9 EL SUOBEL

Kede Mekerang e Mo Ungil el Kutmeklid el Kirel a Miting?

A ta er a Sioning er a Jehovah el mengetmokl er ngii el kirel a miting er a ongdibel — Cambodia

OnA ta er a Sioning er a Jehovah el onger er a miting — Ukraine

A lsekum e ke mesuub a Biblia el obengkel a ta er a Sioning er a Jehovah, e ke locha mengetmokl el kirel a omesubiu er a uchei. Ngdirrek el ungil a omosuub er a uchei er a omei er a miting me bo el sebechem el ngmai a klungiolem er ngii. Ngmo klungiolem sel moterekeklii a temel a omesubem el kirel a miting er a bek el sandei.

Moterekeklii a basio me a temel a omesubem. Ngoingera el taem e ngsebechem el ungil el melebedebek a suobel el mosuub? Ngdirk tutau, el uchei er a omomuchel el meruul a urerem, me a lechub e ngsel taem el bla bo lemechiuaiu a rengalek? Alta e ngdiak el sebechem el mesuub el kemanget el taem, engdi ngungil a omoterekeklii a klungel a taem el mousbech er ngii el mesuub, e lak bechei a ngii di el ngerang me lechesengkau. Msikii a basio el diak a cherrodech er ngii, e mokoad a razio, TV, me a cell phone. Ngdirrek el ungil a omoluluuch er a uchei er a omosuub me lengesukau el mo diak molatk a mondai er kau me bo el sebechem el ungil el melebedebek a Tekingel a Dios.—Filipi 4:6, 7.

Mosuub er a suobel e mketmeklau el mo onger. Ngkmal ungil sel momuchel el suubii a suobel el mo medengelii. Molatk er a dai er a suobel me a bek el bliongel me bo modengei el kmo ngmesaod el kirel a ngerang, e momes a siasing me aike el omelekl el ker el melisiich aike el meklou a ultutelel el tekoi. Monguiu a derta el parakurab e mosiik a nger er a ker. E monguiu aike el bades e momtab el kmo ngmekerang a lolisiich er a suobel. (Rellir 17:11) Me sel obetik er a nger er kau e ngsebechem el lemuches a olengchelem er aike el meklou a belkul el tekoi el ngii a sebechel el ngosukau el mo onger. E sel obo er a miting e ngsebechem el oldars er a chimam e onger el ousbech a di tekingem.

Ngoeak sel mosuub a kakerous el suobel el soadel er aike el miting er a bek el sandei, e ngsebechem el dochelii a klemedengei er kau er a Biblia.—Mateus 13:51, 52.

Ngera sebechem el meruul me bo mkltmokl el kirel a miting?
Ngmekerang e sebechem el kutmeklau el mo onger er a miting?