Mongetmokl el kirel e Moldeu a Rengmiu er a Miting er a Ongdibel
1. Ngera sebechel el ngosukid el mo dmeu a rengud e dirrek el melai a klungioled er a miting er kid?
1 Ngkirel ngar er ngii a ulterekokl el taem el domechei er ngii el dousbech er ngii el mengetmokl el kirel a miting. Ngar er ngii a rebebil el sebechir el mengoit er a kuk klou el taem el mengetmokl er tir er a rebebil. Engdi, a desal kmal mechesang, me ngii a di rolel a llomeserreng a dolecheuekl a taem el kirel a omengetmekled el kirel a miting.—1 Ti. 4:15, 16.
2-5. Kede mekerang a dongetmokl er kid el kirel a: (a) Omesubel a Biblia er a Ongdibel? (b) Skuul el kirel a Berkel a Klumech? (c) Omesuub el kirel a Omesiunged el Mo er a Dios? (d) Omesubel a Ongkerongel?
2 Kirel a Omesubel a Biblia er a Ongdibel: A kot e mtirterii a suobel; molebedebek er a dai er sel bliongel me aike el mekekerei el dai el ngar er a chelsel. E sel omonguiu, e mutebengii sel klou a ultutelel el uldasu el losaod er ngii. Momelekl el omes aike el Bades el lousbech el olengeseu er a suobel. Molasem el onger aike el ker el lousbech a di tekingem. E sel obla mketmeklii a suobel, e momelekl a tekoi el mulsuub er a chelsel a uldesuem. Molasem el melatk aike el meklou a ultutelel el tekoi el melsaod me a rolel a omesaod el luluusbech er ngii.—2 Ti. 2:15.
3 Kirel a Skuul el kirel a Berkel a Klumech: Molasem el oltirakl er a omengiuel a Biblia er a bek el sandei. (Jos. 1:8) Momelekl aike el suobel el bo losaod, e mngai aike el babilengem el kirel ngii el suobel me bo el sebechem el oltirakl er ngike el mengedecheduch sel loltobed er a suobel. Molatk el kmo ke mekera omousbech aika el tekoi er a chelsel a omesiungem.
4 Kirel a Omesuub el kirel a Omesiunged el Mo er a Dios: Momes er a prokuram el ngar er a chelsel a Omesiunged el kirel a Renged. Monguiu aike el suobel el mo soadel. A lsekum a suobel a mlengai er a Ongkerongel me a lechub e ngta er a babier er a ongdibel e mdirrek el smiik e mchuiu ngii el babier. A lsekum ngngar er ngii a teletelel a odingel el mo motobed, e diba medal e momelekl ngii el rolel a cheldecheduch me bo el sebechem el kltmokl el mo ousbech er a chelsel a omesiungem.
5 Kirel a Omesubel a Ongkerongel: Monguiu er a suobel er a uchei e mutab a nger er aike el ker el ngar er ngii. A omomes a bades el ngar er a chelsel a suobel e ngsebechel el ngosukau el telkib el mo bleketakl er a rengum a suobel. A omolebedebek el kmo ngmekera ngii el suobel a omoldak er ngii me a klemedengei er kau er a imamade a sebechel el kilungii a klemedengei er kau. Mtibir a rengum el mo onger er a temel a omesubel a Ongkerongel me mketmokl a mekekedeb el nger er kau el kirel a tang me a lechub e ngteblong el parakurab. Chouaisei el tekoi a klou a ultutelel el kirel a “urrunguled el domeketakl er ngii.”—Heb. 10:23.
6. Ngera lmuut el bebil er a tekoi el sebechel el remuul a miting el mo er ngii a belkul el kired me kid a dmeu a rengud el ngar er ngii?
6 Oldeu a Rengud el Ngar er a Miting: A lsoad el mo oldeu a rengud el ngar er a miting el mo er sel tkurrebab el sebeched, e ngklou a ultutelel el demei el olab a taem me bo el sebeched el mo teloi er a nglunguuch el melai a chesmerel a miting, el olengit er a chedaol el reng er a Jehovah. Ngdirrek el sebechem el mo ngmai a klungiolem er aike el ungil el chelitakl el ngar er ngii. Molasem el omiis er a Biblia er kau el mo er a bek el bades el mechuiu. Tia el tekoi a sebechel el ngosukau el mo melebedebek aike el tekoi el omrirenges. A omouchais er a telungalek er kau me a resechelim el kirel a tekoi el omsiluub e tia ngosukau el losiich ngii el tekoi er a chelsel a uldesuem. Sel molasem el meruul aika el tekoi e tiang a sebechel el remuul a miting el mo er ngii a belkul me kau a mo dmeu a rengum el omais el mo er ngii, e dirrek el mera el “omekses a bltikerreng ma ungil lomeruul.”—Heb. 10:24, 25.