Ngmekerang Aki Mngesuterir a Rudam er Kemam el Ngar er a Chelebuul?

Sel leduubech a tellemall, e a Resioning er a Jehovah a di mereched el kutmokl a ngeso el kirir a rudam er tir el ngar er a chelebuul. A chouaika el ngeso a olecholt er a mera el bltikerreng el ki mobang el kirel a derta er kemam. (Johanes 13:34, 35; 1 Johanes 3:17, 18) Ngoeak a ngera el rolel e aki olengeseu?

Aki melenget a udoud. Sera lebo er ngii a klou el bosech er a Judea, e tirke el Kristiano er a Antiok er a irechar a uleldurokl a udoud el mo er a rudam er tir er a klaumerang. (Rellir 11:27-30) Me ngdi osisiu, sel ki bo modengei el kmo a rudam er kemam el ngar er a bebil er a beluu a chelebangel a chelebuul, e aki oldurokl a udoud el okiu a ongdibel er kemam el mo mengetmokl a ngeso el lousbech.​—2 Korinth 8:13-15.

Aki omesterir a ngeso el lousbech. Tirke el mechuodel el ngar er sel basio el miltemall, a osiik er a rederta el chedal a ongdibel me bo lodengei el kmo te ousbech a ngeso me a lechub e ngdiak. A committee el kirel a ngeso a mo kutmokl a kall, ilumel el ralm, bail, basio el sebechir a rechad el kiei er ngii, me a rolel a ukeruul. A rebetok el Sioning el ngar er ngii a duch er tir er a ureor a kongei el di tir el meleng er tir el mo er aike el basio el mo olengeseu el meruul a mla metemall el blai me a Blil a Ongdibel. A kltarreng el ki moldeu a rengmam er ngii el ua ta el cheldebechel me a klemedengei el ki bla mngai sel ki mdak el oureor, a ngosukemam el mo sebecham el mereched el mo olengeseu sel letemel a chelebuul. Me alta e aki olengeseu er tirke el ‘bebil er kemam’ el ki mngar er a ta el klaumerang, engdi sel bo el sebecham e aki dirrek el olengeseu er a rebebil el ngodech a klechelid er tir.​—Galatia 6:10.

Aki omesterir a ongelaod el mengai er a Bades e melisiich a rengrir. A rechad el ngar er aike el basio el miltemall a kmal ousbech a ongelaod. Ngar er aikaikid el taem, e aki melai a omelisiich el mla er a Jehovah el ngii a Dios er a bek el ongelaod. (2 Korinth 1:3, 4) Ngmera el dmeu a rengmam el ouchais a telbiil el ngar er a Biblia el mo er tirke el ngar er a chelebuul, e melisiich er tir el kmo ngdi kmedung e a Rengedel a Dios a mo okngemed a rokui el tellemall el uchul a ringel me a chelebuul.​—Ocholt 21:4.

• Ngera uchul me a Resioning a sebechir el mereched el mo olengeseu sel lengar er ngii a tellemall?

• Ngera el ongelaod el mengai er a Bades a sebecham el ouchais el mo er tirke el silobel er a klou el tellemall?