A Jeremia a Di Milengedecheduch el Kirel a Jehovah

A lebebil er a taem e a rechad a omekako er kid me a lechub e te ngmasech a rengrir sel dongedecheduch er tir el kirel a Jehovah. E tiang a sebechel el rullid me ngmo soad el mo diak dongedecheduch el kirel a Dios. Ngmla ta el momelechesiu el uaisei?— A Biblia a ouchais er kid el kirel a ta el kekerei el buik el mle betik a rengul er a Jehovah, engdi kilo ngmo diak el longedecheduch el kirel. A ngklel a mle Jeremia. Ka me bo dosuub a lmuut el betok el kirel.

A Jeremia er sera lekekerei el buik e a Jehovah a dilu er ngii el kmo, ngmle kirel mo mengelechel er a rechad me bo lak loruul a mekngit el tekoi. E tiang a kmal mle meringel er a Jeremia, ngdirrek el mle medakt. Ngmillekoi er a Jehovah el kmo: ‘Ngdiak kudengei a bo kulekoi. Ngak a dirk buik.’ Engdi a Jehovah a dilu el kmo: ‘Lak bo medakt. E a kmo ngosukau.’

Me a Jeremia a mocha omuchel el mengelechel er a rechad el kmo, a lsekum ngdiak el lolodech a blekerdelir e te mo obals. Omomdasu e a rechad te mirruul a lullekoi a Jeremia?— Ngdimlak. Te millenguul er ngii e kmal ngilasech a rengrir er ngii. A rebebil er a rechad a mle sorir lomekoad er ngii! Omomdasu e a Jeremia ngera ngulemelechesiu er ngii?— Ngmle medakt me ngdilu el kmo: ‘Ngdiak bo kungedecheduch el kirel a RUBAK er chelecha el mong.’ Engdi ngmera el mlo diak el luut el mengedecheduch?— Ngdiak, ngdi millemolem. Ngkmal mle betik a rengul er a Jehovah me ngdimlak el meterob el mengedecheduch el kirel a uchul me a Jehovah a ulemekerreu er ngii.

El ua tiang, a ta el taem e a rebebil el mekngit el chad a chilitii er a chelsel a chido el mui er a dengitech. Ngdimlak a kelel me a imelel el ralm. E tirka el chad a mle sorir el mecherei a Jeremia er a chelsel a chido me lemad. Engdi nguleak a ngelseuil a Jehovah e ngmlo sebechel el chemiis!

Ngera sebechem el suubii er a kerebai er a Jeremia?— Nguaisei el bebil er a taem e ngmle medakt, engdi ngmillemolem el mengedecheduch el kirel a Jehovah. Me sel mongedecheduch el kirel a Jehovah, e a rechad a melenguul er kau me a lechub e te ngmasech a rengrir er kau. Ke locha mo merur me a lechub e ke mo medakt. Engdi ngkirem el melemolem el mengedecheduch el kirel a Jehovah. Ngmo blechoel el olengeseu er kau el di ua sera lolengeseu er a Jeremia.