Abraham me a Sara Ullengesenges er a Dios

Ngmla er ngii a mats el dimlak el cheroid er a Babel el okedongall el Ur. A rechad er ngii a milengull a betok el chelid engdi ngdimlak longull er a Jehovah. Engdi ngmla er ngii a chimo el chad er a Ur el milengull er a Jehovah el di ngii el tang. A ngklel a Abraham.

A Jehovah a dilu er a Abraham el kmo: ‘Mtobed er a beluam me a delongelir a rebebil er kau e bora beluu el bo kuchotii er kau.’ A Dios a tilbir el mo er ngii el kmo: ‘Ke mo klou el renged, me ngak a mo meruul a ungil el tekoi el kirir a rebetok el chad er a beluulechad el kau a uchul.’

A Abraham a dimlak lodengei el kmo a Jehovah ngoldurech er ngii el mo er, engdi nguluumerang er a Jehovah. Me a Abraham me a bechil er a Sara me a demal er a Tera me a Lot el ngelekel a ta er ngii, a mle pack a kloklir e omuchel er tia el kemanget el omerollir.

A Abraham a mle 75 a rekil er a lebo er tia el beluu el Jehovah mle soal lolecholt er ngii el mo er ngii me a telungalek er ngii. Tia el beluu a mle okedongall el Kanaan. A Dios a mlo duum er a Abraham er tiang e tilbir el mo er ngii el kmo: ‘Tia el rokir el chutem el momes er ngii el meliuekl er kau a bo knguu el mesterir a rengelekem.’ Engdi Abraham me a Sara a mechudelang e diak a ngelekir. Me ngmekera Jehovah e mo otutii a telbilel?