Ngmle Ua Techa el Chad a Abraham?

TE DI mekesai el chad a ngar er ngii a klou el bla lerellii er a klechelid el ngar tia el beluulechad. A Rechijudea, Remoslem, me a Rekristiano a oba klou el omengull el kirel a Abraham,a el ngii a bla losaod er ngii a bebil er a babier el kmo “ngklou a ultutelel el chad er a Biblia,” e “cheuatel er a klaumerang.” E a Biblia a omekedong er ngii el “demerir tirikel rokui el . . . oumerang.”​—Rom 4:11.

Ngera uchul me a rechad a oba klou el omengull el kirel a Abraham? A kot, e ngdi ngii el tang a losaod er ngii a Biblia el edei el taem el kmo ngmle sechelil a Dios!​—2 Kronika 20:7; Isaia 41:8; Jakobus 2:23.

Me nguaisei, engdi a Abraham a di mle uai kid el chad. Ngmlo chelebangel a betok el meringel el tekoi el di uai kid, e dirrek el mle sebechel el outekangel. Ngdiak el soam el mo medengei el kmo ngmilekerang e mo sebechel el outekangel a mondai er ngii? Ka me bo dosaod aike el tekoi el Biblia a ouchais el kirel ngika el klou a ultutelel el chad.

A Chisel a Klengar er Ngii

A Abraham a milechell er a rak er a 2018 er a uchei er a taem er a Jesus, e mlukeroul er a beluu er a Ur. (Genesis 11:27-​31) A Ur a mle klou e dirrek el mle merau el beluu. Ngdirrek el kmal mle mesisiich a rolel a omengull el bleob er a chelsel. A demal a Abraham el Tera a locha dirrek el mle teloi er tirke el mengull a bleob. (Josua 24:2) Me nguaisei, engdi a Abraham a millilt el di mo mesiou er a Jehovahb er a bai losiou aike el diak a klengar er ngii el bleob el chelid.

Ngera el tekoi a rirellii a Abraham el mo meruul el uaisei? A Abraham a milechell er a 150 el rak er a uchei er a lemad a Shem el ngelekel a Noah. Me a lsekum e ngmle blechoel el obengkel ngika el kmal klou el chad, e a omomdasu e tia ngngera ngrirellii el kirel? A Abraham a locha mle sebechel el mo medengei el okiu a Shem el kmo ngmilekerang e silobel er a Ieleb er a beluulechad. Ngdirrek el mle sebechel el suubii a klungel a ultutelel a dongull er a Jehovah, el ngii a Dios el ulsebelii a Shem me a rechad er a blil er a klou el Ieleb.

A Abraham a kilengei aike el tekoi el lesiluub el kirel a mera el Dios, el locha ulekiu a Shem me a lechub a lmuut el bebil er a rolel. Me sel taem el Jehovah el ngii a ngike el merriter er “a rengul a chad” a ulemtab er a Abraham, e ngmle sebechel el mesang a melemalt el rengul ngii el chad, me ngliluut el ngosuir el mengal mo ungil a blekerdelel.​—Osisechakl 17:3; 2 Kronika 16:9.

Klengar er Ngii

A klengar er a Abraham a mle klou a belkul. Alta ngmla er ngii a betok el omelsemai el blo lechelebangel, engdi a klengar er ngii a mle mui er a betok el ungil el tekoi. Me bo dosaod a bebil er a tekoi el dilubech el mo er ngii.

▪ Sel taem er a lekiei er a Ur, e a Dios a ulderchii a Abraham me ngtuobed er tia el beluu el lemilechell er ngii el mo er a beluu el Ngii a mo ochotii er ngii. Me alta e a Abraham me a Sara a dimlak lodengei a rokui el tekoi el kirel tia el omerollir el kmo te mo er ker, e ngera uchul me a Dios a melekoi er tir me lorael, engdi te di ullengesenges. E a uriul e te mlo kiei er a tento el ngar er a beluu er a Kanaan el ua lechad er a ngodech el beluu, el mo lmuut er a ulebongel er a klengar er tir.​—Rellir 7:2, 3; Hebru 11:8, 9, 13.

▪ Me sel taem el Abraham me a Sara a dirkak bo loungalek, e a Jehovah a tilbir el mo rullii a klou el renged el okiu a Abraham. A Jehovah a dirrek el dilechelii el kmo a rokui el telungalek er a chutem a mo mukngeltengat el okiu a Abraham. (Genesis 11:30; 12:1-3) E a uriul e a Jehovah a liluut el smisichii tia el telbilel. Ngdilu er a Abraham el kmo a ruldidellel a rsechel a mo imis el betok el mo ua ildisel a btuch er a eanged.​—Genesis 15:5, 6.

▪ Sera bo el 99 a rekil a Abraham me a Sara bo lekeed er a 90 a rekil, e a Jehovah a tilbir el kmo ngmo er ngii a ngelekir el sechal. Me ngoeak a osengir a rechad e tia el omeruul a kmal diak el sebechel el mo tekoi, engdi ngdi mle telkib e a Abraham me a Sara a silubii el kmo ngdiak “a ngeral mo meringel er a [Jehovah].” (Genesis 18:14) Ta el rak er a uriul, er a bocha el 100 a rekil a Abraham, e ngmlo er ngii a ngelekel el sechal el lebilngeklii el Isak. (Genesis 17:21; 21:1-5) A Dios a tilbir el kmo ngokiu a Isak, e ngmo klou a klengeltengat el mo er a klechad.

▪ Betok el rak er a uriul, e a Jehovah a rirellii a ileakl el ongtil el mo er a Abraham: Ngdilu er a Abraham me bo el lolenget er a betik er a rengul el ngelekel el Isak, alta ngdirk kekerei el chad e dirkak lebo lebechiil e diak a rengelekel. Me alta e ngkmal mle meringel er ngii el melatk el kmo ngmocha kirel el mad a ngelekel, engdi ngkiltmeklii el mo melenget er a Isak el ua tenget. A Abraham a kmal uluumerang el kmo a Dios a ngar er ngii a klisichel el mo okisii a Isak er a kodall, a lsekum ngmo kirel, me bo el sebechel el otutii a telbilel. (Hebru 11:19) Me ngngar seikid el taem el lebocha lolenget er a ngelekel, e a Dios a tirrebengii me lak lokodir a Isak. Ngchilat er a Abraham el kirel a blekongesenges er ngii. Me ngngar tiaikid el taem, e a Jehovah a liluut el omelekl aike el dimla telbilel el mo er a Abraham.​—Genesis 22:1-​18.

▪ Me a Abraham a mlad er a uriul er a bo el 175 a rekil. A Biblia a melekoi el kmo ngmlo “chuodel e mad.” (Genesis 25:7, 8) Me a Abraham a mlo chormii a lmuut el ta er a otutel a telbilel a Dios el kmo, ngmo dmeu a rengul er a klengar er ngii er a uchei er a lemad el ngar er a budech.​—Genesis 15:15.

A Dikesel

Alta e a Abraham a kiliei er a bekord el 4,000 el rak er a mla me mong, engdi sel klaumerang er ngii a kmal ungil el kerebai el kired er chelecha el taem. (Hebru 11:8-​10, 17-​19) Me chelechang e me bo dosaod a eua el ungil el blekeradel el lullecholt a Abraham. Me ngsebeched el mo omuchel er sel kot el merael a chisel el blekerdelel el ngii a klaumerang.

[Aike el footnote]

[Baks el ngar er a 4 el llel]

A Klou a Ultutelel el Chad er a Reksi er a Biblia

Ngar er a chelsel aike el kot el teruich el bliongel er a Biblia el ngar er a Genesis, e ngmesaod er a klengar er a rebebil el mle blak a rengrir el chad el uldimukl er a Abel, Enok me a Noah. Engdi ngngar er a chelsel aike el ongingil el 15 el bliongel, e ngmesaod er a klengar er a di ta el chad el Abraham.

Me a lmuut el tang, a Biblia a omuchel el mesaod a bebil er a meklou a ultutelel el tekoi el kirel a Abraham. El uai tiang, ngar er a cheldecheduch el kirel a klengar er a Abraham e kede metik er a . . .

▪ kot el omesaod el kirel a Dios el ua Omekreakl, me a lechub e ng Osebechakl el kirir a remesiungel.​—Genesis 15:1; momes er a Duteronomi 33:29; Psalm 115:9; Osisechakl 30:5.

▪ kot el omesodel a dotuil a klaumerang er kid er a Dios.​—Genesis 15:6.

▪ kot el taem el lemedung a tekoi el profet me a lechub e ng melekingel a Dios.​—Genesis 20:7.

▪ kot el omesodel a bltikerreng er a chad el oungalek.​—Genesis 22:2.