Sibai el Ullengesenges er a Dios

A Josef a mle ta er tirke el kot el mekekerei el ngelekel a Jakob el sechal. A rubekul a milsang el kmo a demerir a kot el soal ngalek a Josef. Omomdasu e ngmlo uangerang a uldesuir el kirel tiang? Te mlo mechechei er a Josef e ouketui er ngii. A Josef er a leberrusii a kora ngodech el berrous e nguluuchais er a rubekul el kirel. Te mlo omdasu el kmo a belkul a berrusel a kmo, a ta er a klebesei e te mo osus er ngii. Chelechang te kmal mocha chetirir ngii!

A ta er a klebesei e a rubekul a Josef a milengkar a sib er a bita er a mats er a Sikem. Me a Jakob a ulderchii el mo check er tir. Ngdi mla er cheroid e a rubekul a mesa el merael el mei me te katekingang el kmo: ‘Ngmerma ngika el chad er a berrous. Dokodir!’ Me te mildechemii e ngiluu lotungii er a ta er a chido. Engdi obekrir er a Juda a dilu er tir el kmo: ‘Lak momekoad er ngii! Bai doterur el mo sibai.’ Me te ulterur el mora rulterau a klalo el chad er a Midian el mlara omerolir el mora Ekipten. Te ulterur el 20 el silber el udoud.

Me a rubekul a Josef a dillechii a ikrel a bilel er a rsechel a kaming e ngiluu el mo msa demerir e kmo, ‘Tiang, ngdiak el bilel a ngelekem?’ Me a Jakob a mlo omdasu el kmo a tebelik el charm a mla mekodir a Josef. Ngkmal milecham a rengul e dimlak a sebechel chemolodii.

A Josef er a lebora Ekipten e te ulterur el mora Potifar el ofiser er a Farao. Me nguaisei engdi a Jehovah a ulebengkel a Josef. A Potifar a milsang el kmo a Josef a kmal meduch er a urerel e sebeched el oumerang er ngii. Me ngdi mle telkib e a Potifar a rullii el mo oungerachel a rokui el kloklel.

A bechil a Potifar a milsa el kmo a Josef a mesisiich e kmal ungil el sechal. Ngmle bek el sils el lolekoi er a Josef me bo lebad el lobengkel. Me ngmo mekerang a Josef? Ngmle kotouar e kmo: ‘Ngdiak! Tilecha diak el melemalt. A mastang er ngak a kmal oumerang er ngak me kau a bechil. A bok bad lobengkem e ak mo rullii a klengit lomtok er a Dios!’

A ta er a klebesei e a bechil a Potifar a mlo melasem lorrimel er ngii el mo bad el lobengkel. Ngurrekedii a bilel engdi Josef a mle sebechel chemiis. Me a lebe el rei a Potifar e a bechil a dilu er ngii el kmo a Josef a millasem el lolterebek er ngii. Ngulumulak. A Potifar a kmal ngilasech a rengul me ngultungii a Josef er a blil a kelebus. Me nguaisei engdi a Jehovah dimlak lobes er a Josef.