A Jehovah Dimlak a Ta el Lobes er a Josef

A Josef er a lekelebus e a Farao el king er a Ekipten a mlo er ngii a berrusel el dimlak a chad el sebechel el smaod. Me a ta er a remesiungel a dilu er ngii el kmo a Josef a sebechel el louchais a belkul a berrusel. Me a Farao a di mle mereched el dmu el kmo lenguu a Josef el mei.

Me a Farao uleker er a Josef el kmo: ‘Ngsebechem el smaod a belkul a berrusek?’ Me a Josef a dilu er ngii el kmo: ‘A Ekipten a mo betok a kall er ngii el euid el rak e a uriul er isei e ngmo euid el rak el lengar ngii a bosech. Me mtetkii a mellomes a rengul el chad el mo oungerachel el mengudel a kall me a rechad lak lemad er a klengerenger.’ Me a Farao a kmo: ‘Ak tutkau! Ke mo ongeru el merreder er a beluu er a Ekipten!’ Ngmilekera Josef e mo medengei a belkul a berrusel a Farao? Ng Jehovah a ngilsuir.

Me a Josef a milengudel a kall el euid el rak. E ua ledilu a Josef, a uriul e ngmlo er ngii a bosech er a beluulechad el rokir. Me a rechad a mlei er ker me ker el me omechar a kall er a Josef. A demal er a Jakob a rirenges el kmo ngngar ngii a kall er a Ekipten me ngulderecheterir a reteruich er a rengelekel el sechal el mong el mo omechar a kall.

Me a rengelekel a Jakob er a lebong e a Josef a kmal di mle mereched el dongcheterir, engdi a rubekul a dimlak ledengchii. Te ulsus er ngii el di uai sel berrusel er a lengalek. A Josef a mle soal mo medengei el kmo a rubekul ngdirk mla er ngii a kltui er a rengrir me ngdilu er tir el kmo: ‘Kemiu a ourabek. Ngsomiu el me osiik a chelitechetul a belumam.’ Engdi te dilu el kmo: ‘Ngdiak! Kemam a re 12 el odam el kiei er a Kanaan. A chimo er a ochellam a mla mad e ngike el kot el kekerei a obengkel a demmam.’ Me a Josef a kmo: ‘Bo mnguu a kot el kekerei el ochelliu el mei e ak mo oumerang er kemiu.’ Me te liluut el mo remei er a demerir.

Sera lluut el mo diak a kall e a Jakob ulderecheterir a rengelekel el mora Ekipten. Tiakid el taem e te ngiluu a kot el kekerei el ochellir er a Benjamin. Me a Josef a mlo melasem er a rubekul me ngngiluu a silber el kebengel el mertii er a bekengel a Benjamin e mocha oltelechakl er tir el kmo te mla nguu a kebengel. A remesiungel er a lebetik er ngii el kob er a bekengel a Benjamin e ngkmal mlo mechas a rengrir tirka el odam. Te ullengit er a Josef me lomlals er tir el diak el Benjamin.

Chelecha Josef a mocha medengei el kmo a rubekul a mla change. Ngdikea el sebechel lorekedii a rengul me nglmangel e dmu er tir el kmo: ‘Ngak a ta er kemiu er a Josef. A demak ng dirk chad?’ Tirka el odam er ngii a kmal mlo mechas a rengrir. Me ngdilu er tir el kmo: ‘Lak el mekngit a rengmiu er a omeruul el mrirelii el mei er ngak. A Dios a ulderechak el mei el me olsobel a klengar er kemiu. Me mereched el mo nguu a demak el mei.’

Te mlo remei e ouchais er a demerir er tia el kmal el ungil chais e melai er ngii el mora Ekipten. Me a uriul er a betok el rak e a Josef me a demal a kol mocha kasoues.