Babier el Mlara Governing Body

Rudam me a Rudos:

Kid a remesiungel a Jehovah a kmal betik a rengud er a Tekingel el Biblia. Ngulterekokl a rengud el kmo a Biblia meskid a melemalt el omesodel a reksi e sebeched el lultuil a ulekrael er ngii el kirel a klengar er a bek el sils. Kede dirrek el mesa er ngii a klungel a bltkil a rengul a Jehovah el mora rechad. (Psalm 119:105; Lukas 1:3; 1 Johanes 4:19) Ngurungulam a mo ngosuterir a rechad el mo medengei a mekreos el klemerang el ngar er a Tekingel a Dios. Tiakid a uchul me a ki mla otebedii tia el book el “Aike el Sebechem el Suub er a Biblia.” Ka me ki mouchais er kau a telkib el kirel.

Tia el book alta ngmileketmokl el kirir a rengalek me nguaisei, engdi ngdirrek el sebechel ngosuterir a remeklou el chad el tir a sorir el mo medengei a lmuut el betok el kirel a Biblia. A Biblia a babier el mora rokui el chad. Me kid el rokui a ulterekokl el mo ngmai a klungioled sel de review aike el sebeched el suub er ngii, el ngii a mo ngosukid el mera el mo dmeu a rengud.

Tia el book ousbech a cheldecheduch er a Biblia louchais er a uchelel a telungalek er a rechad, el lomuchel er a omebelel a rokui el tekoi el mei. Ngklou el ureor a mileketmokl el mo ouchais a cheldecheduch er a Biblia el ngar er a blechebechel a tekoi el dilubech, loeak a bleketakl e beot el rolel.

Me nguaisei, tia el book a diak di louchais a cheldecheduch er a Biblia. A omelechesel me a siasing lousbech a remuul aika el cheldecheduch el me ngar er a uldesued e ocholt aike el lulemelechesiu a rechad el losaod er tir.

Tia el babier a ngosukid el mo mesa el kmo a Biblia babier el mesaod er a rechad el ullengesenges er a Jehovah me a rechad el dimlak lolengesenges er ngii, e ngosukid el ngmai a klubeled er tir. (Rom 15:4; 1 Korinth 10:6) Tia el book a blii el mo 14 el bliongel. A uchelel a derta el bliongel a meskid a summary er a bebil er aike el tekoi el sebeched el suub.

A lsekum koungalek e nglocha sebechem el menguiu er a chimo el suobel el obengkel a ngelekem e mesaod a siasing el obengkel a suobel. A uriul e kemiu el terung a sebechiu el menguiu a bades er a Biblia el lemengai er ngii a suobel. Mngesuir a ngelekem el connect aike el longuiu er a Biblia me aike el lesuub er a book. Osisiu el teletael a sebechem el lousbech er ngii el ngosuir a klou el chad el luchesii er a uldesuel a siasing er a klumech er a Biblia.

Ngomeltkam el kmo tia el babier a mo ngosuterir a remelemalt a rengrir el meklou me a mekekerei el ngmai a klubelir er a Tekingel a Dios e oltaut aike el lesuub er ngii er a klengar er tir. Seikid e tir me te dirrek el mo mengull er a Jehovah e mo chedal a telungalek er ngii.