A Oureor el Klisichel a Dios a Meskid a Klisiich el Mo Oltngakl a Omengesuseu e Mo Outekangel a chelitechetul a Rengud
“Kom di mo nguu a klisiich sel be le metengel er kemiu a [oureor el klisichel a Dios].”—RELLIR 1:8.
1, 2. Ngera el rolel a ngeso a letilbir a Jesus el mo er a rulebengkel, e ngera uchul me te kmal uluusbech er ngii?
A JESUS a mle ungil medengei el kmo a redisaiplo er ngii a diak el sebechir el di klisichir e bo lodengei a rokui el tekoi el lulellach er tir. Ngmle medengelii a klungel a ureor er a berkel a klumech el ble lechelebangel er ngii, me a dirrek el ultok er a recherraro, me a chelitechetul a klechad, me ngkmal mle bleketakl el kmo te kmal uluusbech er a ileakl el klisiich el lolengeseu er tir. Me ngtelkib el taem er a uchei er a lengasech el mo er a eanged a Jesus, e ngmilengelaod er a redisaiplo er ngii el kmo: “Kom di mo nguu a klisiich sel be le metengel er kemiu a [oureor el klisichel a Dios;] me ko mo ochotek ra Jerusalem, ma Judea el rokir, ma Samaria el mo lmuut ra bek lullebongel ra belulechad.”—Rellir 1:8.
2 Me tia el telbiil a ulemuchel a otutel er a Pentekost er a rak er a 33, er sel taem el oureor el klisichel a Jehovah a ulemecheluch er tirke el ulebengkel a Jesus Kristus me ngmlo sebechir el mo ungil merekii a klumech er a beluu er a Jerusalem el rokir. E dimlak a ngii di el orimel me a lechub e ngodechelakl el mle sebechel el torebengii tia el ureor. (Rellir 4:20) Me tirke el rokui el blak a rengrir el oltirakl er a Jesus el uldimukl er kid, a kmal ousbech er tia el osisiu el oureor el klisichel a Jehovah el melisiich er kid er chelechang “el mo lmuut era ullebongel ra belulechad.”—Matteus 28:20.
3. (a) Ka mosaod er a klekakerous er a chedaol reng me a klisiich. (b) E sel oureor el klisichel a Jehovah ngsebechel el ngosukid el mo mekerang?
3 A Jesus a tilbir el mo er a redisaiplo er ngii el kmo te ‘di mo nguu a klisiich sel be le metengel sel oureor el klisichel a Dios er bebrir.’ Me a tekoi el “klisiich” me a “reng” a kmal kakerous a belkul. A chedaol reng er a Dios el ngii a sel oureor el klisichel a mesaod er a klisiich el sebechel el rullii a chad el mo remuul a tekoi el soal a Dios a lemeketmokl. Engdi a tekoi el klisiich a sebechel el belkul a kmo “ngngar ngii el medechel el klisiich.” Ngsebechel a klisichel a chad me a lechub e ngklalo el diak longitengtik, engdi ngmo oureor a lsekum e kede mo ousbech er ngii. Me a leuaisei, e a chedaol reng a sebeched el omekesiu er ngii er sel oureor el klisichel a dengki el rullii a dengki me ngmo kmard, e sel klisiich el ngar tia el dengki a dodengei el kmo ngdi medechel el diak loureor el dimerekmo sel dorelii. Me a klisichel a Jehovah a lenguu el mesterir a remesiungel el okiu a oureor el klisichel el rulleterir a Rekristiano el mo otutii a telbilir el mo er ngii, e dirrek el meskid a klisiched el mo sebeched el outekangel a ngii di el ultok el bo dechelebangel.—Monguiu er a Mika 3:8; Kolose 1:29.
4. Ngera kede mo mesaod er a chelsel tia el suobel, e ngera uchul?
4 Ngmekerang e sebechel el mo bleketakl er a rengud el kirel sel klisiich el denguu el okiu sel oureor el klisichel a Dios? E mekerang e sebechel tia el oureor el klisichel a Dios el rullid el mo meruul a tekoi el ngar er a kakerous el blekeradel? Sel dolasem el blak a rengud el mesiou er a Dios, e kede blechoel el mo chelebangel a betok el omelsemai, el ngii a sebechel el mei el okiu a Satan me a blekeradel er tia el beluulechad el ngii a longedereder er ngii, me a lechub e ngmei e le ngblekerdelel a klengar er kid el diak demecherrungel. Me ngkmal klou a ultutelel el kired el mo mesisiich er aika el ringel me a omelsemai me bo el sebeched el melemolem el mesiou el Kristiano, e teloi er a ureor er a berkel a klumech, e lomelemii a ungil el deleuill er kid lobengkel a Jehovah. Ka me bo dosaod er sel rolel e ngsebechel tia el oureor el klisichel a Dios el ngosukid el mo mesisiich er a orimel, e dirrek el meskid a klisiched el outekangel a sulel a bedenged me a dirrek el chelitechetul a rengud.
Nguu a Klisiich el Outekangel a Omengesuseu
5. Ngmekerang e sebechel a nglunguuch el melisiich er kid?
5 A Jesus a ullisechakl er a rulebengkel el mo meluluuch el kmo: “E lak momekesiuekl er kemam er chomengarm, e mosobelemam era mekngit.” (Matteus 6:13) Me a Jehovah a kmal ulterekokl el lolengeseu er a rechedal el tir a olengit er ngii el kirel tia el tekoi. Ta er a taem e a Jesus a dilu el kmo “a Chedam ra eanged [a mo] mesterir a chedaol reng tirikel olengit er ngii.” (Lukas 11:13) Me tiang a kmal mengelaod a rengud sel dodengei el kmo a Jehovah a mo meskid tia el oureor el klisichel el ngosukid el mo meruul a llemalt! Engdi tiang a diak el belkul a kmo, me a Jehovah a mo oleiub er kid er a ngii di el omelsemai el bo dechelebangel. (1 Korinth 10:13) Ngbelkul a kmo, sel bo dechelebangel a omelsemai e ngbai mocha taem el kired el mo blak a rengud el meluluuch el lolengit a ngeso er Ngii.—Matteus 26:42.
6. A Jesus nguluusbech er a ngerang el uchetemel a nger er ngii el mo er a omengesuseu er a Satan?
6 Me a Jesus er a longer er a Diabelong e nguluusbech a bades. Ngkmal mle bleketakl a rengul er a lolekoi el kmo: “Ngellechukl el kmo, e liluut el dmu el kmo . . . Mcheridau, kau el Satan! E ngellechukl el kmo, ‘Bo mongull el meluluuch ra [Jehovah] el Dios er kau, e di le ngii cho mosiou er ngii.’ ” Me a bltkil a rengul el mo er a Jehovah me a dirrek el Tekingel, a silsichii a Jesus me ngmlo sebechel el oltngakl a omelsemai er a Satan. (Matteus 4:1-10) Me a Jesus er a uriul er a lotngakl aike el omengesuseu, e a Satan a mirrael el mo cheroid er ngii.
7. Ngmekerang a Biblia e ngosukid el mo mesisiich er a omelsemai?
7 Me a lsekum a Jesus a mle blechoel el ultuil er a Bades me bo el sebechel el oltngakl a omengesuseu er a Diabelong, e ngbelkul a kmo ngkmal kired el oukerebai er ngii! Ngmera el tekoi, a lsekum e ngsoad el mo meduch el oltngakl er a Diabelong me a remekngit el anghel er ngii, e ngkmal kired el omuchel el mo medengei a llechul a Jehovah e mo oltirakl er a chelsel a klengar er kid. A rebetok el chad a mla melodech a klengar er tir el mo oltirakl a ulekrael er a Biblia er a cherengel a taem el losuub a Bades e bo lodengelii a klungel a ultutelel a llomeserreng er a Dios me a dirrek el llemeltel. Me a tekingel a Dios a ngar ngii a klisichel el ‘kutukel chomelebedebeked ma uldesued.’ (Hebru 4:12) Me sel bo le blechoel a chad el menguiu e melebedebek a Bades, e ngulterekokl el mekurulii a “klemerang” er a Jehovah. (Daniel 9:13) E tiang a kmal klemerang el tekoi, me ngkmal kired el mo blechoel el melebedebek aike el bades el sebechel el smisichid er aike el chelitechetud.
8. Me ngokiu a ngera el tekoi e ngmo sebechel sel oureor el klisichel a Dios el melisiich er kid?
8 A Jesus a kmal mle sebechel el oltngakl a omengesuseu e le ngii el mle ungil el medengei a Bades, me ngmle mui er sel ‘oureor el klisichel a Dios.’ (Lukas 4:1) Me ngkired el lolekes er a deleuill er kid lobengkel a Jehovah e mo ungil el oltirakl aike el rolel el lolecholt er kid el okiu sel oureor el klisichel, el ua omesubel a Biblia me a nglunguuch, e dirrek el mo blechoel el teloi er a rudam me a rudos er kid me bo el sebeched el di dul kasisiich. (Jakobus 4:7, 8) Ngoeak tiaikid el rolel, e a rebetok a kmal dmeu a rengrir el kirel a betok el klungiaol el lengai, e le tir el mla oterekeklii a ulterekokl el temir el kirel a rokui el tekoi el kirel a omesiungir el Kristiano, el ngii a uchul e ngsebechir el melemolem el melisiich er a kmes el deleuill er tir lobengkel a Dios.
9, 10. (a) Ngera el rolel a orimel me a omengesuseu a kmal klou er a beluam? (b) E ngmekerang e sebechel a omelebedebekel a Bades me a omeluluuch el melisiich er kau el mo oltngakl aika el tekoi el ileakl er sel taem el mkora mesaul e mechitechetong a rengum?
9 Ngera el omelsemai a kirem el oltngakl? Ngar ngii a taem el mkora olengamech er a chad el diak el bechim? Me a lechub e kau el mesobil el chad, ngmla ta el mkora oureng el mo milil el lobengkel a chad el ngii a diak el oumerang? Me a Rekristiano sel lomes a TV me a lechub e te ngar er a internet e a lebebil er a taem e ngme duum a mekngit el omeruul er a chelsel aika el klalo. A lsekum tia el tekoi a mla ta el bo mchelebangel er ngii, e ke milekerang? Ngkmal uchul a llomeserreng a lsekum e kede blechoel el melatk el kmo a telkib el klebelung el tekoi a sebechel el mo uchul a klou el klengit. (Jakobus 1:14, 15) Ka di molebedebek er a ringel el mo er ngii, oleko ke mo er a klengit me bo luchul a otuub el mo er a Jehovah me a ongdibel me a dirrek el chelsel a telungalek er kau. Me a klikiid el ukltked a kmal sebechel el mo uchul e kede melemolem el blak a rengud el oltirakl a ulekrael er a Jehovah. (Monguiu er a Psalm 119:37; Osisechakl 22:3.) Me a bek el taem el bo me chelebangel a omengesuseu, e moluluuch el mo er a Jehovah me lebeskau a klisichem el mo mesisiich er ngii.
10 Ngar ngii a ta er a tekoi el kired el blechoel el melatk er ngii el kirel aike el omengesuseu er a Diabelong. A Satan a mlo duum er a Jesus er a uriul er a lolsengerenger el ngar er a ked el 40 el klebesei. Ngulterekokl a Diabelong el ulemdasu el kmo ‘tiang a ungil techall’ el bo longarm er a blakerreng er a Jesus. (Lukas 4:13) Me ngdi osisiu, a Satan a dirrek el omes aike el bek el techall e mo melasem er a blakerreng er kid. Me ngkmal klou a ultutelel el kired el blechoel el melisiich er a deleuill er kid lobengkel a Jehovah. A Satan a blechoel el melasem er a blakerreng er a chad er sel taem el lodengei el kmo ngtelkib el mechitechut a klaumerang er ngii. Me sel de kora mesaul a rengud me a lechub e kede mechitechetong, e ngkmal kired el lmuut el mo blak a rengud el meluluuch el mo er a Jehovah el lolengit a ngeso me a dirrek el sel oureor el klisichel el mo melisiich er kid.—2 Korinth 12:8-10.
Mo Mesisiich el Outekangel er a Chelitechetul a Rengud
11, 12. (a) Ngera uchul me a rebetok el chad er chelechang a mechitechut a rengrir? (b) E ngera el tekoi a sebechel el meskid a klisiched el mo mesisiich er a chelitechetul a rengud?
11 Kid el diak demecherrungel a uchul me a lebebil er a taem e ngkora mo mechitechut e mesaul a rengud. E tiang a kmal klemerang er chelechang e le kede kiei er a chelsel a meringel el beluulechad. El ngii el blekeradel a kot el meringel el dirkak a ta el bo lechelebangel er ngii a klechad. (2 Timoteus 3:1-5) Me chelechang el di uangera el kmedang a temel a Armageddon, e ngkmal mo mekngit a rolel a kerruul, me a dirrek el ringelel a uldasu me a lmuut el meringel el blekeradel me ngdi meleketek. Ngdirrek el diak el mechas a rengud a lsekum a rebebil a mo meringel er tir el kutmokl aike el ngerechelir el kirel a delengcheklir. Te dirrek el kmal mo mesaul a bedengir me a rengrir el kirel a ringel me a chelebuul el lechelebangel. Me a lsekum e ke chelebangel er a osisiu el blekeradel, e ke mekerang e mo sebechem el outekangel er tia el omelsemai?
12 Lak mobes, a Jesus a milengelaod er a redisaiplo er ngii el kmo, ngmo mesterir a ngeso el okiu sel oureor el klisichel a Jehovah. (Monguiu er a Johanes 14:16, 17.) Tiang a kot el mesisiich el klisiich er a ngii di el klisiich el ngar ngii er a eanged me a chutem. Ngokiu tiaikid el klisiich e a Jehovah a sebechel el remuul a tekoi el “engelakl” el meskid a klisiched me a dechal a rengud el mo outekangel e oltngakl a ngii di el omelsemai el bo de chelebangel. (Efesus 3:20) Me a apostol Paulus a millekoi el kmo, me sel dolengit a ngeso el ultuil er tia el oureor el klisichel a Dios, e ngsebechel el meskid a “diak le metuk el klisiich,” alta e kede “mosarech ra bek el bedengel a ringel.” (2 Korinth 4:7, 8) Me tiang a diak el belkul a kmo, a Jehovah a tibir el mo okngemed a rokui el ringel er a chelechang, ngbai melisiich a rengud el kmo ngokiu a oureor el klisichel e ngmo sebechel el meskid a klisiched el mo outekangel a ringel el bo dechelebangel.—Filipi 4:13.
13. (a) Ngmilekerang a ta el kekerei el redil el mlo mesisiich el outekangel er a meringel el blekeradel? (b) Me kau, ke dirrek el medengei a bebil el osisiu el blekeradel el dilubech?
13 Ka di molatk er a blekerdelel a Stepanie el 19 a rekil e mesiou el mui el taem. Sera le 12 a rekil e ngmilloched a klou el ngurd er a bedengel, e dirrek el dilubech a kasinoma er a chelsel a bdelul. Sel taem el me lmuut er chelechang e ngmla mo eru el taem el lebo er a botk, e dirrek el ngar er a omelul el kirel a rektel el kasinoma, e liluut el meloched el eru el taem el mlo uchul me ngmechitechut a klitechetul, e dirrek el mekngit a osengel. Me nguaisei, engdi ngii el Stephanie a kmal omekedelad er ngii me bo el sebechel el ngar ngii a klisichel el meruul aike el tekoi el lomdasu el kmo ngmeklou a ultutelel, el ua mo er a miting er a Rekristiano, e dirrek el mo oldingel a obliil. Me ngkmal sebechel el melechesuar a Jehovah el melisiich er ngii, e dirrek el olengeseu er ngii el mo sebechel el outekangel a betok el kakerous el ringel el lechelebangel. Me aike el rokui el babier el mengai a uchetemel er a Biblia el ngar ngii a betok el meringel el tekoi el dilubech el mo er a rekldemel el Kristiano, a dirrek el kmal melisiich er ngii sel longuiu. Me a rudam me a rudos el meluches a babier el melisiich er ngii me a lechub e te dirrek el mengedecheduch er ngii er a uchei me a uriul er a bek el miting. A rebetok el chad a olecholt er a klemeriarreng me a omereng el saul er tir el kirel a Stephanie sel lebo er a blil e lolisechakl er tir el kirel a ulekrael er a Biblia. Me a Stepanie a kmal oba klou el omereng el saul el bedul a Jehovah el kirel aika el rokui el ungil tekoi. Sel kot el soal el bades a ngar er a Psalm 41:3, e ngii a kmal loumerang el kmo tia el bades a kmal mla mutaut er a chelsel a klengar er ngii.
14. Me sel domelechesiu er kid el mechitechetong a rengud, e ngngera el tekoi a kmal kired el mengeroid er kid er ngii, e ngera uchul?
14 Me sel taem el bocha domelechesiu el kmo kede mesulang me a lechub e ngmechitechetong a rengud, e ngkmal diak el kired el melatk el kmo a di ta el rolel e ngsebeched el loutekangel a mo mengemikr er a omesiunged el mo er a Jehovah. Tiang a kot el mekngit el uldasu. Ngera uchul? E le ngokiu a omesubed el di kid el tang me a omesubed el telungalek me a odingel me a dirrek el miting er kid, e ngmo sebeched el nguu sel oureor el klisichel a Jehovah. Me aike el tekoi me a ureor el kirir a Rekristiano a kmal uchul a omelisiich. (Monguiu er a Matteus 11:28, 29.) A lebebil er a taem e a rudam me a rudos a mei er a miting el kora mechitechut e mesaul a rengrir, engdi sel taem el lorolang el mo remei, e ngsebeched el lomes er tir el kmal ungil a rengrir el di ua dedu el kmo a oureor el klisichel a Dios a mla lmuut el melisiich a rengrir!
15. (a) A Jehovah ngtibir el kmo ngmo remuul a rokui el tekoi el mo beot er a klengar er a Rekristiano? Ka mosaod el ousbech a Bades. (b) Ngera el telbiil a letibir el kired a Dios, e tiang ngmo uchul a ngera el ker?
15 Tiang a diak el belkul a kmo tia el ngerachel el Kristiano a di beot el tekoi. A chad el soal el mo blak a rengul el Kristiano a kmal lousbech er a klou el ducherreng. (Matteus 16:24-26; Lukas 13:24) Me nguaisei, engdi ngokiu a oureor el klisichel a Jehovah e ngsebechel el melisiich er tirke el mechitechetong a rengrir. A profet el Isaia a milluches el kmo: “Ngdi tirkel oumeral ulsirs er a [Jehovah] el kirel a ngesou, a mo metik a klisichir el mukbeches. Te mo suebek el mor bab el ua uasi; sel bo le rurt e ng diak bo le mesaul; me sel bo lorael, e ng diak bo le mechitechut.” (Isaia 40:29-31) Me ngungil a di lekid el oker er kid el kmo, Ngerang a mera el uchul me ngak el Kristiano a melechesukak el kora mechitechetong e mesaul a renguk?
16. Kede mekerang e sebeched el mengoit aike el betok el diak a ultutelel el tekoi el ngii a sebechel el mengesang er kid?
16 A Tekingel a Jehovah a mengelechel er kid el mo melilt a “ungil” e meklou a ultutelel el tekoi el doruul. (Filipi 1:10) A Paulus a ulemekesiu er a klengar er a Kristiano el mo er a kemanget el rurt er a ledu el kmo: “Me de bedobed a bek el berraod . . . , e dukduch a rengud el rurtii sel kirel de borngii el klaidesachel.” (Hebru 12:1) A belkul a tekingel a kmo ngkmal kired el kerekikl el mengoit aike el diak a ultutelel e chelsengsang me a berraod el ngii a sebechel el rullid el mo mesaul a rengud. A rebebil a locha melasem el meruul a kmal betok el tekoi el mo uchul e ngmeruul er tia el mechesang el klengar er tir el lmuut el kmal mo mechesang. Me a lsekum e ke melechesukau el kora kmal oberedang er a betok el tekoi, e nglocha ungil a bo mungil el merriter er a osengem el kirel a urerem er a klechad me a omerollem el omais a beluu el milil, me a dirrek el sel klemeriarreng er kau el kirel a klekool me a lmuut el bebil er a rolel a ongelaod me a omilil. Sel bo el tabesul a osenged el kirel aika el tekoi e ngsebechel el mo beot er kid el mengoit aike el diak a ultutelel el tekoi el ngii a sebechel el mengesang er kid.
17. Ngera uchul me a rebebil a mo mechitechut a rengrir, e ngerang a tekingel a Jehovah el kirel tia el tekoi?
17 Ngulterekokl el bebil er kid a locha mo mechitechut a rengrir e le a ulebengelel tia el mekngit el blekeradel a kmal meketeketang el di longiil er ngii e diak el mei. (Osisechakl 13:12) Me a ngii di el chad el omdasu el uaisei a kmal sebechel el ngmai a omelisiich el tekoi el debetik er a Habakuk 2:3 el kmo: “Mlechesii ele ng dirkak bo le temel el mo tmaut. Ngdi sel taem a di mereched el mei me sel kulecholt er ngii er kau a mo tmaut. A lta e ng mo kor a meoud el mei ngdi mongiil er ngii; ng mor ngii er sel taem el bla kuterekeklii, el diak bo le meoud.” Me ngkmal ulterekokl a rengud el kmo a telbilel a Jehovah el kirel a ulebengelel tia el mekngit el blekeradel er a klechad a mo mutaut er sel ulterekokl el taem el bla loterekeklii!
18. (a) Ngera el telbiil a sebechel el melisiich er kid? (b) Ngoeak a ngera el rolel e sel ongingil el suobel a sebechel el mo uchul a klungioled?
18 Me a reblak a rengrir el mesiungel a Jehovah a kmal semeriar el mengiil er sel taem el chelitechetul me a sulel a rengud a mo diak, e a rokui el chad el kiei a mo dmeu a rengrir er a bedengir el di “merael el mo ngeasek.” (Job 33:25) Engdi chelecha el taem e ngdirrek el sebechel el mo mesisiich a rengud el okiu sel oureor el klisichel a Jehovah a lsekum e kede melemolem el omekeek a rengud er a tekingel a Dios, e oltaut er a chelsel a klengar er kid. (2 Korinth 4:16; Efesus 3:16) Me lak bechei a sulel me a chelitechetul a rengum me bo luchul e moridii a diak el mekimd el klengeltengat. Me a rokui el tekoi el sebechel el mo uchul a omengesuseu me a lechub e ngchelitechetul a rengud a ulterekokl el mo diak, a bo lemeoud me a lak, engdi ngulterekokl el mo er ngii er a chelsel a beches el beluulechad er a Dios. Me sel ongingil el suobel e kede mo mesaod er sel rolel e a oureor el klisichel a Dios a mesterir a klisiich a Rekristiano el mo mesisiich el outekangel a odechelakl, e oltngakl a omengesuseu er a resechelirir, e dirrek el mo meduch a rengrir el outekangel a ngii di el omelsemai.
Ke Mekerang a Omonger?
• Ngmekerang e sebechel a omengiuel a Biblia el melisiich er kid?
• Ngmekerang e sebechel a nglunguuch me a omelebedebek el melisiich er kid?
• Kede mekerang e mo sebeched el mengeroid er kid er aike el tekoi el sebechel el mengitechut er a klaumerang er kid?
[Siasing el ngar er a 26 el llel]
Aike el miting er a Rekristiano a sebechel el melisiich er a deleuill er kid lobengkel a Dios