Bo Mukrael er Sel Oureor el Klisichel a Dios el Diak el Blekeradel er a Beluulechad
“Me sel de ngiluu a diak le reng ra belulechad, e [ngbai sel oureor el klisichel a Dios,] el kirel me bo lsebeched lomtab a sengk ra Dios el mer kid loeak a grazia.” —1 KORINTH 2:12.
1, 2. (a) Ngoeak a ngera el rolel e a remera el Kristiano a oumekemad? (b) Ngera el ker a bo dosaod er ngii?
A REMERA el Kristiano a ngar er a mekemad! E ngike el cherroued a kmal mesisiich, e cheblad, e dirrek el meduch el oumekemad. E oba mesisiich el klekedellel er a mekemad el mengesuseu er a ruumesingd el chad er a beluulechad. Engdi ngdiak el kired el mo mechitechut a rengud el omdasu el kmo ngdiak el sebeched el omtok er ngii. (Isaia 41:10) E le kede medengei el kmo ngngar ngii a ngeso el sebechel el ngosukid el mo mesisiich er a ngii di el ultok.
2 Me tia el klaumekemad a diak el mekemad el omtok er a rechad, e kede bai oumekemad er ngike el cherroued el Satan el Diabelong. E ngii el Diabelong a ousbech er a klekedellel er a mekemad el ‘mekngit el blekeradel er a beluulechad.’ (1 Korinth 2:12) Me sel kot el mesisiich el ngeso el sebechel el ngosukid a oureor el klisichel a Dios. Me a bo demesisiich er tia el mekemad e dolemolem el kmeed er a Dios, e ngkmal kired el meluluuch el olengit er a klisichel a Dios, e dirrek el omekeroul a blekerdelel a Dios er a chelsel a klengar er kid. (Galatia 5:22, 23) Engdi ngerang a mekngit el blekeradel er a beluulechad, e ngmilekerang e mo mesisiich el mengesuseu er a klechad? Kede mekerang e mo medengei el kmo a eltel tia el beluulechad a mla omuchel el mengesuseu er kid? E ngera el tekoi a sebeched el suub er a Jesus el kirel a bo de mukrael er a klisichel a Dios el mo omtok er a mekngit el blekeradel er a beluulechad?
Ngera Uchul me a Mekngit el Blekeradel er a Beluulechad A Kmal Mla Obeketakl?
3. Ngera tia el mekngit el blekerdelel a beluulechad?
3 A eltel tia el mekngit el beluulechad a mla er a Satan el ngike el “merreder er tial belulechad,” el ngii a omtok er sel oureor el klisichel a Dios. (Johanes 12:31; 14:30; 1 Johanes 5:19) Tia el mekngit el blekeradel a mesisiich el mengesuseu a uldesuir a rechad el rulleterir el mo meruul a mekngit. Me ngoeak tiaikid el mesisiich el orimel e a klechad a mukrael el mo omtok er a soal a Dios me a moktek er ngii.
4, 5. Ngmekerang e tia el mekngit el blekerdelel a Satan a mla obeketakl er a beluulechad el rokir?
4 Ngmilekerang e tia el mekngit el eltel a beluulechad er a Satan e mla oberk er a beluulechad el rokir? A kot, e a Satan a chilebeldir a Eba er a chelsel a sers er a Eden. Ngulumulak er a Eba el kmo, ngmo ungil a klengar er ngii a lsekum e ngmo ileakl er a Dios. (Genesis 3:13) Ngii a bulak e mera el bulak! (Johanes 8:44) Ngchilebeldir a Eba me bo el sebechel el oeak ngii el choitikikii a Adam el mo omtok er a Jehovah. Me a Adam el ulerrengesmengoit a uchul me a klechad a mlo sibil a klengit, misei a uchul e a rechad a oltirakl er tia el mekngit el blekerdelel a Diabelong.—Monguiu er a Efesus 2:1-3.
5 A Satan a dirrek el milengesuseu er a rebetok el anghel el mo oltirakl er ngii, e tirkang a okedongall el mekngit el anghel. (Chocholt 12:3, 4) Me sel ultekengir el mo er a Dios a dilubech er a uchei er a Ieleb er a taem er a Noah. A Satan a milengesuseu er a rechanghel el mo oumerang el kmo ngbai ungil a lechoit a deruchellir er a eanged e bo loltaut a ngibeserreng er a klechad. (Judas 6) Me ngoeak a ngeso er a remekngit el anghel, el tir a dikea lolab a bedengir er a klechad, e a Satan a “mengeuid ra belulechad el rokir.” (Chocholt 12:9) Ngmera el klengiterreng, e le ruumesingd el chad a diak lolechesuar el kmo te cheltikaik er a klisichir a remekngit el anghel.—2 Korinth 4:4.
Kau, Ke Mla Mekesuseu er a Blekerdelel Tia el Beluulechad?
6. Ngoeak a ngera el rolel e a blekerdelel tia el beluulechad a sebechel el mengesuseu er kid?
6 A rebetok el chad a diak lodengei el kmo ngmekerang a Satan a longesuseu er a rechad, engdi a remera el Kristiano a mla mosisechakl er a Biblia er a rolel a Diabelong a longetikaik er a rechad. (2 Korinth 2:11) Me nguaisei, a blekerdelel tia el beluulechad a diak el sebechel el choitikikid el mo er sel soal a lak debecherei me longesuseu er kid. Ka me bo dorriter a eua el ker el sebechel el meketeklii el kmo, kid kede mukrael er a klisichel a Dios me a lechub e ngblekerdelel tia el beluulechad.
7. Ngoeak a ngera el rolel e a Satan a melasem el mengeroid er kid er a Jehovah?
7 Aike el tekoi er a ongelaod el kulilt ngochotii a ngerang el kirek? (Monguiu er a Jakobus 3:14-18.) A Satan a melasem el mengeroid er kid er a Dios el oeak a longesuseu er kid el mo soad a kdekudel el omeruul. A Diabelong a medengei el kmo a Jehovah a ouketui er ngike el soal meruul a delengerenger. (Psalm 11:5) Me nguaisei, a Satan a ousbech a babier me a mubi me a chelitakl me a dirrek aike el klekool er a video, el bebil er ngii a rulleterir a ruusekool el ua loruul a deleboes me a dirrek el delengerenger el oltirakl a ngibeserreng er a klechad. A Satan a dmeu a rengul a lsekum kede meruul a mekngit el oltirakl er ngii e a osisiu el taem e ngdirrek el betik a rengud el meruul a melemalt el tekoi.—Psalm 97:10.
8, 9. Ngera el ker er a tekoi er a ongelaod a kired el di kid el oker er kid?
8 Ngar a kuk bitang, e a klisichel a Dios a omekrael er tirke kongei er ngii el mo klikiid e chad er a budech e dirrek el mui er a klechubechub. Misei e di lekid el oker el kmo, ‘A tekoi er a ongelaod el kulilt ngmelisiich a ungil el blekerdelek?’ A llomeserreng el ngarbab el mei “a diak longesuul.” Me tirke el mukrael er a klisichel a Dios a diak lolisechakl a llemalt me a budech el mo er a retonari er tir e a osisiu el taem e lekengei el omes aike el mubi el melisiich a uldikel me a deleboes el omeruul er a chelsel a blirir.
9 A Jehovah a mengerechir er a cherrungel el omengull er kid el mo er ngii. Engdi a Satan a kuk soal a di el ta el mkengei el mengull er ngii, el ua sel lulengerechir er ngii er a Jesus. (Lukas 4:7, 8) Ngsebeched el di kid el oker el kmo: ‘Aike el tekoi er a ongelaod el kulilt ngrullii a omesiungek el mo cherrungel el bedul a Dios? A omelilt el kuruul ngrullii el mo meringel me a lechub e ngmo beot er ngak el loltngakl a blekeradel er tia el beluulechad? Ngak, ngmla mo kirek el melodech er a uldesuek el kirel a tekoi er a ongelaod el kuusbech?’
10, 11. (a) Ngera el uldasu a lolisiich er ngii a blekeradel er tia el beluulechad el kirel a tekoi er a kerruul? (b) A mlukrael el Tekingel a Dios ngmelisiich er kid el mo oba ngera el uldasu?
10 Ngerang a uldesuek me a osengek el kirel a kerruul er ngak? (Monguiu er a Lukas 18:24-30.) A blekeradel er a beluulechad a melisiich er a “ngibes ra mad” el okiu a rechorecherreng me a skel a tekoi er a kerruul. (1 Johanes 2:16) Ngmla smisiich a uldesuir a rebetok el mo sorir el mo merau. (1 Timoteus 6:9, 10) Tia el eltel a beluulechad a sebechel el rullid el mo oumerang el kmo a ildisel a kerruul er kid a mo uchul a ulekerreu. (Osisechakl 18:11) Me nguaisei, engdi a lsekum kede mo betik a rengud er a udoud el kuk ngar er a uchei er a bltkil a rengud el mo er a Dios e ngbelkul a kmo a Satan a mla mo mesisiich. Ngkired el di kid el oker er kid el kmo, ‘A klengar er ngak er chelechang mla mo mechesang el melatk a kerruul me a tekoi er a ongelaod?’
11 A mlukrael el Tekingel a Dios a bai melisiich er kid el mo oba tabesul el osenged el kirel a udoud e dirrek el mo blak a rengud el oureor me bo el sebeched el ngmai aike dousbech el kired kid me a telungalek er kid. (1 Timoteus 5:8) A klisichel a Jehovah a ngosuterir tirke el mukrael er ngii el mo oukerebai er sel blekerdelel el bekokeuii. Choua itirka el chad a sorir el merous, el diak di lolai e lemerekong. Te omes er a rechad el kuk meklou a ultutelir er a klalo e dirrek el dmeu a rengrir el merous aike el ngar ngii er tir. (Osisechakl 3:27, 28) Ngdiak lebecherei a skel a udoud me le bo er a uchei er a omesiungir el mo er a Dios.
12, 13. Ngmekerang e sebechel a klisichel a Dios el smisichid el mo meruul a ungil me kede mo ngodech er a blekerdelel tia el beluulechad?
12 A omerellek me a uldesuek ngolecholt er a ngera el blekeradel? (Monguiu er a Kolose 3:8-10, 13.) A blekeradel er a beluulechad a melisiich a urerel a tech. (Galatia 5:19-21) A omelsemai a mo er ngii el meketeklii el kmo kede mukrael er a ngera el blekeradel er sel taem el lebo er ngii a chetituokel el tekoi. El ua tiang, kede mo mekerang a lsekum a Kristiano el odam me a lechub e ngodos a olechib er ngii er kid, me a lechub e ngmelibas er kid me a lechub e ngmeruul er a klengit el omtok er kid. Me a lmuut el tang, a omerelled me a uldesued a obeketakl el kmo kede melisiich er a ngera el blekeradel er a chelsel a delengchekled. Me ngkmal kired el mo ungil el merriter er kid. Me di lekau el merriter er kau el kmo, ‘Aika el merekong el elolem el buil e a blekerdelek ngmeleketek el ua blekerdelel a Kristus me a lechub e ngua blekerdelel tia el beluulechad?’
13 A klisichel a Dios a sebechel el ngosukid el “medebedii el choitii ngikel mechut el chad ma chomerellel,” e mla omail er kid er “ngikel beches el chad.” Me tiang a mla rullid el lmuut el mo oubltikerreng e dirrek el meruul a ungil tekoi. Kede kltmokl el mo ousubes el mo lmuut er a taem el bo dechelebangel er a ngar ngii a ungil el uchul el mondai. Ngmo sebechel el klou a rengud el outekangel a chelebirukel e mengoit a “rokuil cheluached, ma ngasechereng, ma klsiberreng, ma teloketok, ma chomelaes.” Me ngoeak itiang, e kede mo er a tkurrebab el sebeched el mo ‘bekokuii e chubechub.’—Efesus 4:31, 32.
14. Ngua ngerang a uldesuir a ruumesingd el chad el kirel a Tekingel a Dios?
14 Ngak ngbetik a renguk e dirrek el mengull a llechul a Biblia el kirel a tekoi er a kldung? (Monguiu er a Osisechakl 3:5, 6.) A blekeradel er a beluulechad a olechotel a ultok el kirel a Tekingel a Dios. Tirke el mekesuseu er tia el blekeradel er a beluulechad a mengemikr a klungiolel a ulekrael er a Biblia e bai oltirakl a siukang me a llomeserreng er a rechad. (2 Timoteus 4:3, 4) A rebebil a kmal diak loumerang er a Tekingel a Dios. Me choua itirka el chad a oumededenger er a belkul me a ultutelel a Biblia e omdasu el kmo te kmal mellomes a rengrir. Te mengitechut er a melemalt el llechul a Biblia el kirel a laokreng me a mengolchotaor me a dirrek el dertel a chebechiil. Te olisechakl “a mekngit el kmo ng ungil e melekoi a ungil el kmo ng mekngit.” (Isaia 5:20) Kid, kede mla mo oltirakl er tia el blekeradel? Kid, kede mo ultuil a di uldesued me a llomeserreng er a rechad sel bo dechelebangel a mondai er kid? Me a lechub e ngmo blak a rengud el oltirakl a ulekrael er a Biblia?
15. Ngera kired el meruul er ngii el diak di dultuil er a llemesel a rengud?
15 A klisichel a Dios a smisichid el mo oba klou el omengull el kirel a Biblia. Kede omes er a tekingel a Dios el ua olbidel el omekrael er kid e dirrek el llemesel a roled, el ua uldesuel a ta er a milluches er a Psalm. (Psalm 119:105) Me lak dultuil er a di llemesel a rengud e bai bo lulterekokl a rengud el lultuil er a mla meluches el Tekingel a Dios el olengeseu er kid el mo medengei a ungil me a mekngit. Kede mesuub el mo mengull er a Biblia e dirrek el mo betik a rengud er a llechul a Dios.—Psalm 119:97.
Suub a Betok er a Kerebil a Jesus
16. Ngera uldimukl er a domekeroul er a “chomelebedebekel a Kristus” er a chelsel a rengud?
16 A lsoad el nguu a ngeso el okiu a klisichel a Dios, e ngkired el mekurulii a “chomelebedebekel a Kristus” er a chelsel a rengud. (1 Korinth 2:16) Me a bo doba “tal uldasu” el ua Kristus e ngbelkul a kmo ngkired el mo medengelii sel rolel a lomdasu e loruul a tekoi e dirrek el mo oukerebai er ngii. (Rom 15:5; 1 Petrus 2:21) Bo dosaod a bebil rolel e ngsebeched el loltirakl er a Kristus.
17, 18. (a) Ngera kede suubii er a Jesus el kirel a nglunguuch? (b) Ngera uchul me ngkired el melemolem el ‘olengit’?
17 Moluluuch el olengit er a klisichel a Dios. A Jesus a mle blechoel el meluluuch el olengit er a klisichel a Dios el mo olengeseu er ngii er a uchei er a bo lechelebangel a ringel. (Lukas 22:40, 41) Me kid me kede dirrek el kired el olengit er a oureor el klisichel a Dios me lolengeseu er kid. A Jehovah a kmal diak el mekreos er tia el klisichel e dirrek el dmeu a rengul el morous er ngii el mo er tirke el olengit er ngii el oba klaumerang. (Lukas 11:13) A Jesus a dilu el kmo: “Molengit, me le beskemiu; e mosiik mo betik; e molngod ra chesimer, me lobkais el kiriu. Le ngikel olengit a nguu, me ngikel osiik a metik, me ngikel melngod ra chesimer chobkais el kirel.”—Matteus 7:7, 8.
18 Sel dolengit er a ngelseuil me a klisichel a Jehovah e lak di lemereched el mo mechitechut a rengud. Ngkmal kired el blechoel el ungil melebedebek a nglunguched er a uchei er a doluluuch. A lebebil er a taem e a Jehovah a meskid a techelled me kede ochotii el kmo kede oumerang er ngii, me ngsebechel el mesang a olechotel a klaumerang er kid er a uchei er a longer a nglunguched.a
19. Ngera ngmle blechoel el meruul a Jesus e ngera uchul me ngkired el oukerebai er ngii?
19 Bo molengesenges er a Jehovah er a rengum el rokir. A Jesus a mle blechoel el meruul a tekoi el oldeu er a rengul a Demal. Ngmla er ngii a ta el taem el mle ngodech a uldesuel a Jesus er a uldesuel a Demal. Engdi ngmle ulterekokl a rengul el melekoi er a Demal el kmo: “Ngdi lak le uldesuek, e bai le ngar sel uldesuem.” (Lukas 22:42) Di lekau el oker er kau el kmo, ‘Ngak a kulengesenges er a Dios el mo lmuut er a bo kchelebangel a meringel el tekoi?’ Ngklou a ultutelel er a klengar a blekongesenges el mo er a Dios. Kede belsel ngike el Ulemeob er kid, e dirrek el Uchul a klengar er kid el kirel a blekongesenges. (Psalm 95:6, 7) Ngdiak a ngii di el tekoi el sebechel el mtechir a blekongesenges, e dirrek el diak el sebeched el nguu a kengei er a Dios a lsekum ngdiak dolengesenges er ngii.
20. A Jesus ngmle mechesang a klengar er ngii el kirel a ngerang, e mekerang a doukerebai er ngii?
20 Bo mungil el medengelii a Biblia. A Jesus er sera loltngakl er a omelsemai er a Satan el kirel a blakerreng er ngii, engdi milsaod a Bades. (Lukas 4:1-13) Sera losaod er ngii er mederir tirke el chad er a klechelid, e a Jesus a uluusbech er a Tekingel a Dios el melisiich a cheldechedechal. (Matteus 15:3-6) A klengar er a Jesus el rokir a mle ultuil er a klemedengei er ngii me a otutel a llechul a Dios. (Matteus 5:17) Me kid a dirrek el soad el melemolem el omekeroul er a klaumerang er kid el okiu a Tekingel a Dios. (Filipi 4:8, 9) Ngblechoel el mo meringel er kid el oterekeklii a taem el kirel a omesubed el di kid el tang me a omesubed el telungalek. Me ngbai ungil a doterekeklii a taem el mo mesuub er a di dosiik a techall el mo mesuub.—Efesus 5:15-17.
21. Ngera el tekoi a sebeched el ousbech el mekurulii a klemedengei er kid er a Tekingel a Dios el ngosukid el mo sebeched el oltaut er ngii er a chelsel a klengar er kid?
21 “Ngikel blak a rengul e mellomes a rengul mesiou” a mla ngosukid el mo oterekokl a taem el kirel a omesubed el di kid el tang me a dirrek el Omesuub el Telungalek, el tang er a ta el sandei. (Matteus 24:45) Kau kungil el ousbech er tia el techall? Ngsebechem el mukeroul el mo omdasu a tekoi el ua Kristus a lsekum ke mesuub aike el tekoi el lullisechakl a Jesus el kirel a suobel el kau a semeriar er ngii. Ngsebechem el ousbech er sel babier el Watch Tower Publications Index el osiik aike el suobel el mosuub el kirel. El ua tiang, ngulemuchel er sera rak er a 2008 el mo er a 2010 e aike el A Ongkerongel a ngar ngii a 12 el suobel er a chelsel el dai er ngii a kmo “Ngera Kede Suubii er a Jesus.” E kuk ngar a rak er a 2006 e ngmlo er ngii a suobel er a Awake! el oker el kmo “How Would You Answer?” Choua tia el suobel a sebechel el ngosukau el mekurulii a klemedengei er kau el kirel a Tekingel a Dios. Ngkmal ungil a omodekiar tia el suobel er a temel a Omesuub el Telungalek.
Ngsebeched el Mo Mesisiich er Tia el Blekerdelel a Beluulechad
22, 23. Ngera kired el meruul me bo el sebeched el mo mesisiich er tia el beluulechad?
22 Ngkmal kired el oltngakl a ngii di el blekeradel er tia el beluulechad a lsekum e ngsoad el mo mukrael er sel oureor el klisichel a Dios. Choua itia el blekeradel a diak el beot el tekoi. Ngsebechel el mo meringel el ua meringel el ultok. (Judas 3) Ngdi ngsebeched el mo mesisiich er ngii! A Jesus a dilu er a redisaiplo er ngii el kmo: “Cho mngara belulechad e kom chuarm; ngdi, bo mekereker, e ak mla mo kats er a belulechad.”—Johanes 16:33.
23 Kid me ngdirrek el sebeched el mo mesisiich er a beluulechad a lsekum kede oltngakl a ngii di el blekeradel er tia el beluulechad e meruul aike el tekoi el mo uchul e ngsebeched el nguu a ngelsuil sel oureor el klisichel a Dios. Nguaisei, “a lsekum a Dios cholab el mer kid, e ngtecha mo sebechel mo oucherarou er kid?” (Rom 8:31) Me sel denguu a ngeso er sel oureor el klisichel a Dios e bo doltirakl a ulekrael er ngii el medung er a Biblia, e kede ulterekokl el mo metik a ulekerreu me a budech me a deurreng me a ulterekokl el omelatk el kirel a diak a ulebengelel el klengar, er a chelsel a beches el beluulechad el kmal di kmedung el mo tmaut.
[Footnote]
a A lsoam a lmuut el omesodel e momes er A Ongkerongel er a December 1, 2006 er a parakurab 8 er a 20 el llel.
Ke Dirk Melatk?
• Ngera uchul me a mekngit el blekeradel er a beluulechad a kmal mla obeketakl?
• Ngera el eua el ker a kired el di kid el oker er kid el kirel?
• Ngera edei el tekoi el sebeched el suub er a Jesus el kirel a denguu sel oureor el klisichel a Dios?
[Siasing el ngar er a 10 el llel]
Te milekerang a rebebil el anghel e mo anghel el omtok er a Dios?
[Siasing el ngar er a 12 el llel]
A Satan a ousbech a blekeradel er tia el beluulechad el mengedereder er a rechad, engdi ngsebeched el diak demechetikaik er ngii a lsekum ngdiak dekengei el oltirakl er ngii