Ngtechang a Kirel el Olisechakl er a Rengalek el Kirel a Dios?

“A mesuub a diak le ngarbab ra sensei er ngii, ngdi le mecherrungel chomesubel e ngmo ua sensei er ngii.”​—LUKAS 6:40.

A REBEBIL el oungalek el chad a omdasu el kmo te metitur el olisechakl er a rengelekir el kirel a Dios. Te mo omdasu el kmo ngdiak a ungil el klemedengei er tir er a tekoi er a skuul me a lechub e ngolengesonges a klemedengei er tir el kirel a tekoi er a klechelid me ngdiak el sebechir el mo ungil el osisecheklterir. Me tiang a mo uchul e ngmo diak loruul er tia el kmal klou a ultutelel el ngerachel, e bai mo omdasu el kmo ngsebechir a rechederir me a lechub e te mengeteklel a klechelid el olisechakl er a rengelekir.

Engdi ngtecha ngike el kot el ungil el chad el kirel el lolisechakl er a rengalek el kirel a tekingel a Dios me a omellach el kirel a kldung? Ka me bo domes aike el tekoi el ledung a Biblia, e bo domekesiu er ngii er aike el tekingir a rehakase el tir a mla merriter el kirel tia el tekoi.

Ngerang a Ngerechelel a Chedam er a Blai?

Aike el Lolisechakl a Biblia: “Me kemiul chedam, lak molengasech a rengrir ar ngelekiu, e momekeroul er tir er chomengedung ma chomellach ra Rubak.”​—Efesus 6:4.

A mla meteriter el tekoi: Ngera el klungiaol a bo lengai a rechedam a lsekum e te toketek a mesisiich el klaumerang er tir er a Dios? A babier el Father’s Religious Involvement and Early Childhood Behavior, el tilobed er a rak er a 2009, a melekoi el kmo: “A resechal el tir a blechoel el mesuub a tekingel a Dios a ulterekokl el mo ungil el chedam er a blai. A omesubel a tekingel a Dios a sebechel el ngosuterir a rederta el chad el mo er ngii a ungil e melemalt el rolel a osisechakl me a ulekrael el lengai el mo uchul a ulterekokl el rolel a klengar er tir.”

A Biblia a kmal melisiich er a klungel a ultutelel a ngerachel el loba chedam el kirel a lomekeroul e lolisechakl er a rengelekel. (Osisechakl 4:1; Kolose 3:21; Hebru 12:9) Engdi tia el ulekrael, ngklou a ultutelel er chelecha el taem? Ngar er a rak er a 2009, e a University of Florida a ultebedii a babier el mesaod el kmo ngera sebechel duubech er a klengar er a rengalek el chedam a uchul. Tirke el hakase a mla metik er ngii el kmo a rengalek el redemerir a ulemekeroul er tir a blechoel el chubechubechad, e ungil a blekerdelir. A rengalek el sechal a blechoel el bekongesenges, e a rengalek el redil a blechoel el ulterekokl a rengrir. Me tia el tekoi a kmal oterekeklii el kmo a ulekrael er a Biblia a kmal dirk klou a ultutelel er chelecha el taem.

Ngua Ngerang a Klungel a Ultutelel a Ngerechelel a Chedil?

Aike el Lolisechakl a Biblia: “Bo le blak a rengum er a ikel le dung a delam.”​—Osisechakl 1:8.

A mla meteriter el tekoi: A babier el tilobed er a rak er a 2006 el Handbook of Child Psychology a melekoi el kmo: “Ngmla meteriter el kmo a rechedil a kesengil e te mengoit er a bekord el 65% el mo er a 80% el taem el kuk betok er a temir a rechedam el mengedecheduch er a derta el mekekerei el ngelekir, e tia el telkael el mla meteriter a osisiu er a chelsel a betok el kakerous el beluu.” Me ngoeak tiaikid el omesuub e ngmeketeklii el kmo sel klemengetel a taem el longoit er ngii a chedil el obengkel a ngelekel, e a tekingel me a omerellel me a blekerdelel a kmal klou a lerellii er a okurulel a ngelekel.

A lsekum a chedil me a chedam a dmak el olisechakl er a rengelekir er a klemerang el tekoi el kirel a Dios, e ngmo sebechir el mesterir a eru el kmal mekreos el sengk. A kot, e a rengalek a mo er ngii a techellir el mekurulii a ungil el deleuill er tir el obengkel a Demad el ngar er a eanged, e tiang a klausechelei el sebechel el mo uchul a klungiolir er a chelsel a klengar er tir. E a ongerung, e ngmo sebechir el suubii a kerebai er a demerir me a derrir sel ledak el oureor el kutmokl a meklou a ultutelel el turrekong er tir. (Kolose 3:18-​20) Ngdiak el mekngit a lsekum a rebebil a olengeseu el olisechakl er a rengalek, engdi a rechedam me a rechedil a kmal ngerechelir el olisechakl er a rengelekir el kirel a Dios me a dirrek el sel rolel a klengelakel el soal a Dios a lemeketmokl er a chelsel a ongalek.

Me a ruungalek, ngkirel mo ua ngerang a rolel a lolisechakl er a rengelekir? E ngerang a kot el ungil el rolel?