Moukerebai er a Blekerdelel a Jesus el Di Klekar
“Mongkar e moluluuch.”—MATTEUS 26:41.
NGMEKERANG A OMONGER?
Ngmekerang a nglunguched a lolecholt el kmo kede di mekar?
Ngoeak a ngera el rolel e kede ochotid el di klekar el kirel a omesiunged?
Ngera me ngklou a ultutelel a di deklekar er a chelsel a meringel el taem, e mekerang a doruul el uaisei?
1, 2. (a) Ngera el ker a sebechel el mo er ngii el kirel a kerebil a Jesus el di mle klekar? (b) Ngsebechir a rediak el mecherrungel el chad el mo oltirakl er a cherrungel el kerebil a Jesus? Ka mochotii a okesiu.
NGMLA ta el molatk el kmo: Ngsebeched el di klekar el ua Jesus? Ke locha mo omdasu el kmo ngdiak el sebeched, e le Jesus a mle cherrungel el chad. Me a lebebil er a taem e a Jesus a dirrek el mle medengei aike el tekoi el mo duubech er a betok el telael el rak er a ngar er a medad. Me a leuaisei, a Jesus ngmla er ngii a ultutelel el lolemolem el di mekar? (Matteus 24:37-39; Hebru 4:15) Ka me bo donger aika el ker me bo desa el kmo, ngklou a ultutelel e dirrek el kmal orechudel a dolemolem el di klekar.
2 Kid ngsebeched el mesuub e mo oltirakl a kerebil a cherrungel el chad? Ngsebeched, el di ua chad el sebechel el mesuub er a kerebil a ungil el sensei. El ua tiang, ka molatk er a chad el mesuub el mo meduch el omalech. A kot, e ngkmal diak el sebechel el tmaut er sel klou el chaibibeob el target, engdi ngmelemolem el mesuub e le ngsoal el mo meduch. Me ngkerekikl el omes er a sensei, el ngii a kmal meduch el melechii a belngel tia el target. Ngomes er a delecherul me a rolel a loltamet er sel kerrelel el ousbech a chimal el mengurs er ngii. Me a cherengel a taem e ngmesuub er a klisiich el kirel el ousbech el oltamet er a kerrelel, me a rolel a eolt a lorrurt er a kelel a balech. A lsekum ngblak a rengul el mesuub er a sensei er ngii, e ngmo sebechel el mdelmii a kelel a belechel el lmuut el mo kmeed er a belngel tia el target. Me ngdi osisiu, kede melasem el mo er sel sebeched el mo ungil el Kristiano el oeak a dolemolem el mesuub e doltirakl a tekingel me a kerebil a Jesus.
3. (a) Ngmilekerang a Jesus e ochotii el kmo ngmle kirel el di klekar? (b) Ngera el tekoi a bo dosaod el ngar er tia el suobel?
3 Ngmla er ngii a ultutelel el lolemolem el di klekar a Jesus? Chochoi. El ua tiang, sel kesus er a uchei er a lemad e a Jesus a milengelechel er a rechapostol er ngii el kmo: “Kom di ngar tiang el obengkek e di mekar.” E dilechelii el kmo: “Mekar e moluluuch, me lako mekesuseu.” (Matteus 26:38, 41) A Jesus a ullecholt er tia el blekeradel el di klekar er a lengar er a chutem, el ileakl er sel ulebongel el kesus er a klengar er ngii. Ngmle soal el di klekar e melemolem el kmes a deleuill er ngii me a Demal el ngar er a eanged. Ngmle medengei el kmo a rultirakl er ngii a mle kirir el di klekar er seikid el taem, el mo lmuut er a ngar er a mederir el klebesei. Me bo dosaod er a uchul me a Jesus a soal a dolemolem el di mekar. E a uriul e kede mo mesuub a edei el rolel e ngsebeched el oukerebai er tia el blekerdelel a Jesus er a bek el sils.
A UCHUL ME A JESUS A SOAL A DI DEMEKAR
4. Ngera me ngkired el di klekar?
4 A Jesus a soal a di demekar e le aike el tekoi el diak dodengei me aike el tekoi el dodengei a uchul. Sera lengar er tia el chutem a Jesus, e ngii ngmle medengei a rokui el tekoi el mo er ngii er a ngar medad el taem? Ngdiak, ngbai mle ngariou a rengul er a ledu el kmo: “Ngdiak a medengelii sel sils malechub e ngsikang, el ka le anghel ra eanged, ma ka le ngiil Ngalek, ngdi Chedam a medengelii.” (Matteus 24:36) Ngar er sel taem e a Jesus, el “Ngalek,” a dimlak lodengelii sel sils el lemei a ulebongel er tia el mekngit el blekeradel er a beluulechad. E kuk mekerang el kired er chelechang? Kid kede medengei a rokui el tekoi er a ngar medad el taem? Ngkmal diak! Ngdiak dodengelii a taem el Jehovah a mo oderchii a Ngelekel el mo okngemedii tia el mekngit el blekeradel er a beluulechad. Omko kede medengelii sel taem, e a omomdasu e ngngar er ngii a ultutelel el di deklekar? A Jesus a milsaod el kmo a ulebongel a di mereched el mei, er sel diak dolechesuar el taem a uchul me ngkired el di klekar.—Monguiu er a Matteus 24:43.
5, 6. (a) Ngmekerang e a klemedengei er kid el kirel a Rengedel a Dios a ngosukid el di klekar? (b) Ngera me a klemedengei er kid el kirel a Satan a kirel el rullid el di klekar?
5 A Jesus a mle medengei a betok el ungil el klemerang el tekoi el kirel a ngar er medad el taem, el rechad el meliuekl er ngii a dimlak lodengei. Me kid a diak a klemedengei er kid el ua Jesus, engdi ngullisechakl er kid a betok el kirel a Rengedel a Dios me aike el tekoi el bo loruul er a di mereched el taem. A ruumesingd el chad el iliuekl er kid el ngar er a ureor, me a skuul me sel doldingel a obliil a diak lodengei aika el ungil el tekoi. Me tiang a kirel el rullid el di klekar. Ngkired el mo ua Jesus el blechoel el di klekar el kirel a techall el mo ouchais er a rechad aike el tekoi el dodengei el kirel a Rengedel a Dios. A klengar er a rechad a ultuil er a bo dekerekikl el ousioning er a bek el taem!—1 Timoteus 4:16.
6 Ngdirrek el mla er ngii a ta er a uchul e a Jesus a di mle klekar. Ngmle medengei el kmo a Satan a mo melasem el mengesuseu e oldechelakl er ngii, e melemall er a blakerreng er ngii el mo er a Dios. Ngika el cheraro a mle blechoel el omes el kirel “a kuk tar a techall” el mo mengarm er a Jesus. (Lukas 4:13) Engdi a Jesus a mle blechoel el di klekar. Ngmle soal el di kltmokl el kirel a ngii di el ongarm me a ultok me a odechelakl. Me kid a ulterekokl el mo uai a Jesus el mo chelebangel aika el tekoi. Kede medengei el kmo a Satan er chelechang a “ua ongumk el laion el osiik er a bo lomerkakl er ngii.” Sei a uchul me a Tekingel a Dios a mengelechel er a Rekristiano el kmo: “Bo lultebechel a rengmiu e di mklekar.” (1 Petrus 5:8) Me kede mekerang a doruul el uaisei?
A ROLEL E A NGLUNGUUCH A NGOSUKID EL DI KLEKAR
7, 8. A Jesus ngmilskid a ngera el ulekrael el kirel a nglunguuch? Ngera kede suubii er a blekerdelel a loluluuch?
7 A Biblia a ochotii el kmo a nglunguuch a klou a ultutelel e le ngngosukid el mo kerekikl el di mekar el kirel a deleuill er kid me a Jehovah. (Kolose 4:2; 1 Petrus 4:7) A Jesus er a uriul er a longelechel er a rulebengkel me di leklekar el obengkel, e ngdilu el kmo: “Mekar e moluluuch, me lako mekesuseu.” (Matteus 26:41) Me tiang mle belkul a kmo ngdi kirir el meluluuch er seikid el meringel el taem e merekong? Ngdiak, e ngbai mle omellach el kired el oltaut er ngii er a bek el sils.
8 A kerebil a Jesus el kirel a nglunguuch a kmal mle ungil. Ke locha mo melatk er sel taem er a loluluuch el mo er a Demal el ta el kesus. (Monguiu er a Lukas 6:12, 13.) A Jesus a locha mle kmeed er a mats er a Kapernaum el ble lekiei er ngii. E a bocha lekebesengei e a Jesus a mlo er a ta er a rois el sebechel el omes er a Daob er a Galilea. Me sera lomes er a beluu e ngulemes a kerdel a lambei el ngar er a beluu er a Kapernaum me aike el bebil er a beluu el kmeed er ngii. A Jesus a mle blak a rengul el meluluuch el mo er a Jehovah el betok el sikang. Me ngdimlak lomtab a olbidel el ouderta el mo diak a kerdel me a lechub a buil el ngar er a rolel er a eanged me a charm el osiik a kelel er a delul a chudel. Nglocha meluluuch el kirel a klou el tekoi el bo loruul er ngii el melilt er a 12 el chad el mo apostol er ngii. Me a Jesus a ulterekokl el mle blak a rengul el meluluuch el mo er a Demal el olecholt a uldesuel me a ngar er a rengul el kirir a redersta el disaiplo, e dirrek el olengit a ulekrael me a llomeserreng el kirel a omelilt er ngii.
9. Ngera kede suubii er a kerebil a Jesus el milluluuch el ta el kesus?
9 Ngera kede suubii er a kerebil a Jesus? Ngkired el mengoit a betok el sikang el meluluuch? Ngdiak, e le Jesus a dilu aika el tekoi el kirir a rulebengkel el kmo: “A reng a soal, e a klechad a mechitechut.” (Matteus 26:41) Me nguaisei, engdi ngsebeched el oukerebai er a Jesus. El ua tiang, kid kede meluluuch el mo er a Demad el ngar er a eanged er a uchei er a bo dolilt a tekoi el ngar er ngii a lerellii er kid me a ongalek er kid me a rekldemed er a klaumerang? Me a nglunguched, ngolecholt a uldesued el kerekikl er a rudam me a rudos er kid? Kid kede meluluuch el ngar er a rengud er a bai domelekl a di osisiu el tekoi? Ka momtab er a Jesus el kmal mle soal el olecholt aike el ngar er a rengul el mo er a Demal. Ngbeot er kid el mo mechesang er a tekoi er tia el beluulechad me kede obes a meklou a ultutelel el tekoi. Engdi a doterekeklii a klou el temed el kirel a nglunguuch e kede mo blechoel el di klekar el kirel aike el soal a Dios. (Matteus 6:6, 7) E tia ngosukid el olekes er a deleuill er kid me a Jehovah, e dirrek el mo kerekikl me lak doruul a tekoi el mo tomellii tia el deleuill.—Psalm 25:14.
A ROLEL A DI DEKLEKAR EL KIREL A BERKEL A KLUMECH
10. Kede mekerang e medengei el kmo a Jesus a di mle klekar el kirel a techall el mo ousioning?
10 A Jesus a mle blechoel el kerekikl el kirel a ureor el lebilsang a Jehovah. Ngar er ngii a bebil er a ureor el sel doruul er ngii e domdasu el kirel a ta er a tekoi, e ngdiak bo el uchul a tellemall. Engdi a betok el ureor a kired el blechoel el kerekikl sel doruul er ngii, e tiang a uaisei el kirel a berkel a klumech. A Jesus a mle uaisei el blechoel el klekar el kirel a techall el mo omerk er a ungil el chais. El ua sel taem el ngii me a redisaiplo er ngii a mirrael el mo er a mats er a Sihar, e a redisaiplo a mlo omechar a kall. A Jesus a mlo olengull er a bita er a chido er sel mats, engdi ngmillemolem el klekar e milsa techall el mo ousioning. A redil er a Samaria a mlei el me melai a ralm. A Jesus a mle sebechel el mo mechiuaiu el telkib me a lechub e ngmillatk er a uchul me ngdiak longedecheduch er ngii. Engdi ngbai ulemuchel a cheldecheduch el obengkel ngika el redil el mlo uchul a klou el ocholt el mo er a rebetok el chad er sel mats. (Johanes 4:4-26, 39-42) Kid ngsebeched el oukerebai er a Jesus e di demekar el kirel a techall el mo omerk er a ungil el chais el mo er a rechad er a bek el sils?
11, 12. (a) Ngerang dilu Jesus el mo er tirke el millasem el omekrael er ngii me lak loruul er a urerel? (b) A Jesus ngmilekerang e ulechotii a tabesul el uldasu el kirel a omesiungel?
11 A lebebil er a taem e a rechad a millasem el omekrael er a Jesus me lak loruul er a urerel. A seked el ngar er a Kapernaum a mle sorir a Jesus a di lekiei e le ngulemekungil er a resmecher. E tia el uldesuir a dimlak el mekngit. Engdi a urerel a Jesus a mo olisechakl er a rokui el “ririid el sib ra blai ra Israel,” el diak lekirel a di ta el mats. (Matteus 15:24) Me ngdilu er tirke el chad el kmo: “Ngkirek el mo omerk ra ungil klumech ra rengedel a Dios era ikel kuk bebil ra mats; itiai a uchul ma kmlodurch.” (Lukas 4:40-44) Sel kot el klou a ultutelel el tekoi er a klengar er a Jesus a mle sel omesiungel, me ngdimlak lebecherei a ngii di el omeruul el mo mengesang er ngii.
12 A Jesus ngkmal di mlo chemau a omesiungel e dimlak loba tabesul el uldasu me a ka lulengoit a taem el oldeu er a rengul? Me a lechub el sal mle mechesang er tia el ureor me ngdimlak leues aike el lousbech a rechad? Ngdimlak, ngbai mle tabesul a uldesuel el kirel a rokui el tekoi. Nguleldeu er a rengul er a klengar el obengterir a resechelil. Ngmle sebechel el omtab a mondai er a delengchokl me aike el lousbech a ongalek, e mle blechoel el olecholt a bltikerreng el mo er a rengalek.—Monguiu er a Markus 10:13-16.
13. Ngmekerang a doltirakl er a kerebil a Jesus el di mle klekar e tabesul a uldesuel el kirel a omesiungel?
13 Sel doltirakl er a kerebil a Jesus el mle klekar, e ngmekerang a bo el tabesul a uldesued el uai ngii? Ngdiak debecherei tia el beluulechad me longesang er kid er a omesiunged. Me a dirrek a resechelid me a rechedad el sorir a bo el ungil a klengar er kid, a locha mo melisiich er kid el mo oltirakl er a uldesuir er a bai di demechesang er a omesiunged. Engdi a doukerebai er a Jesus e kede mo omes er a omesiunged el di ua kall. (Johanes 4:34) Tia el ureor a melisiich a klaumerang er kid e meskid a deurreng. Me nguaisei, engdi ngdiak el soad el di chemau tia el ureor el olecholt el leko kede kmal melemalt el chad me a lechub e dobes el mo oldeu er a rengud. Ngsoad el mo uai Jesus el dmeu a rengud e tabesul a uldesued el mesiou er a “dmeu a rengul el Dios.”—1 Timoteus 1:11, New World Translation.
A ROLEL A DI DEKLEKAR ER A CHELSEL A MERINGEL EL TAEM
14. Sel dechelebangel a ringel, e ngera el blekeradel a kired el oltngakl er ngii? E ngera uchul?
14 Kede mla mesa el kmo a Jesus er a lechelebangel a ringel e ngblechoel el millisiich er a redisaiplo er ngii el di mekar. (Monguiu er a Markus 14:37.) Me sel dengar er a chelsel a meringel el taem e ngkmal kired el melatk er a kerebil. Ngar er a chouaika el taem e a rebetok a obes er sel klemerang el tekoi el medung er a babier er a Osisechakl. Tiang a kmal klou a ultutelel a uchul me ngmedung el eru el taem: “Ngar ngii a rael el rengul a chad ng melemalt, e a lechub e ng rael el mor a kodall.” (Osisechakl 14:12; 16:25) A lsekum e kede ultuil er a di uldesued, el ileakl sel ledubech a meringel el mondai, e ngsebechel el mo uchul a tellemall el kired kid me a rebetik er a rengud.
15. Ngera el ongetikaik a mo er a bdelul a ongalek el meringel er ngii el mengetmokl aike lousbech a rechedal?
15 El ua tiang, ka molatk er a bdelul a ongalek el meringel er ngii el mengetmokl aike lousbech “a re chedal.” (1 Timoteus 5:8) Nglocha mo kongei er a ureor el ngii a sebechel el rullii me ngmo diak lebo er a bek el miting er a Rekristiano, e bo loungerachel er a omengull er tir el ongalek, me a lechub e ngmo diak loldingel a obliil. E a lsekum ngoltirakl er a di uldesuel e nglocha mo omdasu el kmo ngkirel el kongei er tia el ureor. Engdi tiang a sebechel el tomellii sel deleuill er ngii me a Jehovah me a lechub e ngrullii el mo cheroid er ngii. Ngbai ungil a bo loltirakl er a omellach er a Salomon el medung er a Osisechakl 3:5, 6 el kmo: “Moumeral ulsirs er a [Jehovah] el oba rengum el rokir. Lak mulsirs er a di llemesel a rengum. Mletkii a [Jehovah] er a ikel bek el moruul, e ngii a mo ochotii er kau a melemalt el rael.”
16. (a) Ngera kede suubii er a kerebil a Jesus el mle ultuil er a llomeserreng er a Jehovah? (b) Te mekerang a rebdelul a ongalek a loukerebai er a Jesus er a chelsel a meringel el taem?
16 Sera lechelebangel a ringel a Jesus e ngkmal dimlak lultuil er a di uldesuel. Ka molatk er tiang! Ngike el mle kot el mellomes a rengul el chad el kiliei er a chutem a millilt el mo diak loltirakl er a llemesel a rengul. El ua sel taem er a longetikaik er ngii a Satan, a Jesus a mle blechoel el onger el kmo: “Ngellechukl el kmo.” (Matteus 4:4, 7, 10) Ngmle ultuil er a llomeserreng er a Demal el mo oltngakl a ongetikaik, e ullecholt a klengariourreng el blekeradel el louketui er ngii a Satan. Me kid kede dirrek el meruul el uaisei? A bdelul a ongalek el ngii a di mekar el ua Jesus a blechoel el ousbech a Tekingel a Dios el omekrael er ngii, el ileakl er a chelsel a meringel el taem. A rebetok el telael el bdelul a ongalek el meliuekl er a beluulechad a meruul el uaisei. Ngblak a rengrir el meruul er a Rengedel a Dios me a mera el omengull el mo kot er a klengar er tir, el kuk ngaruchei er a kerruul. Seikid a kot el ungil el rolel a lomekerreu er a ongalek er tir. A Jehovah a omekngeltengat a urerir el osiik a lousbech a rechederir, el ua letilbir.—Matteus 6:33.
17. Ngera rullau el mo soam el di klekar el uai Jesus?
17 Ngbleketakl el kmo a Jesus a kiltmeklii a kot el ungil kerebai el di mle klekar. A kerebil a olengeseu er kid e dirrek el sebechel el olsobel a klengar. A Satan a soal el mengitechut er a klaumerang er kau, e rullau el mo diak el blak a rengum er a omengull er kau, e soal a omrellii a tekoi el mo tomellii a deleuill er kau el obengkel a Dios. (1 Thesalonika 5:6) Lak becherei me bo lemesisiich er kau! Bai molemolem el di klekar el uai Jesus, el kirel a nglunguuch me a ngar er a omesiungem me sel bo mchelebangel a meringel el taem. A omoruul el uaisei, e ngmo dmeu a rengum er a ungilbesul el klengar er chelechang, el lolekedang a ulebongel er tia el mekngit el blekeradel. A lsekum ke melemolem el di mekar, e sel lemei a Mastang er kau el mo okngemedii tia el mekngit el beluulechad, e ngmo mesekau el blak a rengum el meruul a soal a Demal. Me a Jehovah a mo dmeu a rengul el meskau a omeksullem el kirel a blakerreng er kau!—Chocholt 16:15.
[Siasing el ngar er a 16 el llel]
A Jesus a milengedecheduch er a redil er a bita er a chido. Ngera el techall a omousbech el omerk er a klumech er a bek el sils?
[Siasing el ngar er a 17 el llel]
Sel molisiich er a klaumerang er a ongalek er kau e ke ochotau el di klekar