Ngera Uchul Me Ngkmal Kired el ‘Di Klekar’?

1. Ka msodii a uchul me ngkmal klou a ultutelel el kired el mo kerekikl el omtab er a taem me a tekoi el dubechang el meliuekl er kid. (Momes er a siasing er a uchelel a suobel.)

A KLOU el ongdibel a mochu omuchel, me ngike el odam el oungerachel er tia el ongdibel a merael el mo er a stage e outkeu er a rokui el chad. Me a ongngak a mocha omuchel me a rechad a medengei el kmo ngmla mo taem el bo ledengchokl. Ngsorir el orrenges aika el ungil el ongngak e semeriar el mo orrenges aike el cheldecheduch el mo er ngii. Engdi te locha ngar er ngii a dimlak lerengesii a tekingel a odam me a lechub e ngdimlak lutebengii el kmo ngmla omuchel a ongngak. Me a ongdibel a mla omuchel e tir a dirk merael el mengedecheduch er a resechelirir. Tia el blekeradel a ochotii el kmo ngera el tekoi a sebechel el mo duubech, a lsekum ngdiak dolechesuar a taem me a lechub e domtab el kmo ngera dubechang el meliuekl er kid. Me tiang a kmal klou a ultutelel el kired el nguu a klubeled er ngii, e le ngkmal di kmedung e ngmo duubech a lmuut el klou el tekoi me ngkired el mo kltmokl el kirel. E tiang ngera el tekoi?

2. Ngera me a Jesus a milengelechel er a redisaiplo er ngii el mo ‘klekar’?

² A Jesus Kristus a milengelechel er a redisaiplo er ngii el kirel a klungel a ultutelel a lolemolem el klekar e bo lekltmokl el kirel a “ulebongel er a beluulchad.” Me ngdilu er tir el kmo: “Bo mekar e mkerekikl, ele ng diak modengelii a le mer ngii isel belsechel.” E a uriul, e ngliluut el omelekl el melekoi el kmo: “Bo mekar.” (Mt. 24:3; monguiu er a Markus 13:32-37.) Me a babier er a Mateus a dirrek el ochotii el kmo, a Jesus a milengelechel er a redisaiplo er ngii el kirel tiang. Ngdilu er tir el kmo: “Seikid a uchul me di mongkar ele ng diak modengelii a le mer ngii a Rubak er kemiu.” E liluut el mengelechel er tir el kmo: “Me bo mkerekikl, ele ng diak modengelii sel sils me sel belsechel.”​—Mt. 24:42-44; 25:13.

3. Ngera uchul me ngkired el kerekikl el omtab er a uleklatk el ledillii a Jesus?

³ Me a Resioning er a Jehovah a kerekikl el omtab er tia el uleklatk el ledillii a Jesus. Kede ungil medengei el kmo kede kiei er a “taem er a ulebongel” me a “kloul ringel” a kmal di kmedu el mo er ngii! (Dan. 12:4; Mt. 24:21, BT) Me ngtoutang a ulochel a Jesus el kmo, a rechedal a Jehovah a omerk er a ungil chais el kirel a Rengedel a Dios el meliuekl er a beluulechad. Engdi osisiu el taem, e kede omes a mekemad me a rakt me a desiu me a klengerenger er a chelsel a betok el beluu. Ngdirrek el kmal klou a rraurreng el kirel a klechelid me a betok el delengerenger me a uldikel el dirkak a ta el ledubech er a ngar er a mong. (Mt. 24:7, 11, 12, 14; Lk. 21:11) Me kede mera el semeriar el mengiil er sel taem el Jesus a mei el mo otaut a moktek er a Demal.​—Mk. 13:26, 27.

SEL SILS A DI OLEKEDANG!

4. (a) Ngera me kede oumerang el kmo a Jesus a mla mo medengelii a temel a Armakedon? (b) Ngulterekokl a rengud el kirel a ngerang, alta e ngdirkak bo dodengelii a temel a kloul ringel?

⁴ Sel debo er a klou el ongdibel, e kede medengei el kmo ngomuchel er oingerang a derta el cheldecheduch. Me nguaisei, engdi ngkmal diak el sebeched el mo medengelii sel taem el lomuchel a kloul ringel. Sera lengar er a chutem a Jesus e ngdilu el kmo: “Ng diak a medengelii sel sils ma lechub e ng sel sikang a le mei, ng ka le anghel er a eanged, ma lechub e ng Ngalek; ngdi tal Chedam a medengelii.” (Mt. 24:36) Kede medengei el kmo a Jesus a ngike el mo mengetakl er a mekemad er a Armakedon, me nglocha mla mo medengelii a taem el lomuchel a mekemad. (Och. 19:11-16) Engdi kid a diak dodengelii sel sils me a lechub e ngsikang el lemei a ulebongel er tia el beluulechad. Sei a uchul me ngkmal klou a ultutelel el kired el di klekar. A Jehovah a mla oterekeklii a taem el lomuchel a kloul ringel me ngbek el sils el di lolekeed tia el taem, me ngkmal “diak bo le meoud.” (Monguiu er a Habakuk 2:1-3.) Me ngera me ngulterekokl a rengud el kirel tia el tekoi?

5. Msodii a rolel e a ulochel a Jehovah a di mo tmaut er sel ulterekokl el temel.

⁵ A ulochel a Jehovah a blechoel el mo tmaut er sel ulterekokl el temel! Ka molatk er sel sils er a loltobed er a rechedal er a klsibai er a Ekipten. Tiang a mle Nisan 14 er a rak er a 1513 er a uchei er a Kristus. Me a uriul e a Moses a milluches el kirel ngii el sils el kmo: “Isel sils el mong me ng mo 430 el rak, e a rokuil kebliil er a re chedal a RUBAK a tilobed er a Ekipten.” (Exo. 12:40-42) Me sera Nisan 14 er a rak er a 1943 er a uchei er a Kristus, el mle 430 el rak er a uchei er a lemengubet er a klsibai a rechad er a Israel, e a telbilel a Jehovah el mo omekngeltengat er a ruldidellel a rsechel a Abraham a mlo tmaut. (Gal. 3:17, 18) E a telkib el taem er a uriul e a Jehovah a dilu er a Abraham el kmo: “A ruldidellel a rsechem a di mo blengedakl el ngar a ngodech el beluu; te mo sibai e mo omengedakl el ngar isei el 400 el rak.” (Gen. 15:13; Rel. 7:6) Me aike el 400 el rak a ulemuchel er a rak er a 1913 er a uchei er a Kristus er sel taem el Ismael a mlo mekngit a omerellel el mo er a Isak. E mlo mekimd er sel sils el Jehovah a ultebedeterir a rechad er a Israel er a beluu er a Ekipten. (Gen. 21:8-10; Gal. 4:22-29) Me ngbetok el dart el rak er a uchei, e a Jehovah a ulterekeklii sel sils el bo lolsobel er a rechedal!

6. Ngera me ngulterekokl a rengud el kmo a Jehovah a mo olsobel er a rechedal?

⁶ A Josua el ta er tirke el mlo mimokl er a klsibai er a Ekipten, a ulemeklatk er a rechad er a Israel er a uriul el kmo: “Kemiu el rokui a medengei er a rengmiu ma chomeltkiu el kmo ng diak a tar a ikel rokui el le tilib a RUBAK el Dios er kemiu el kiriu el dimlak bo le tekoi. Ng rokui el le tilib a di mlo ungilbesul el dimlak a tal mlor ngii a ngelsengesel.” (Jos. 23:2, 14) Me a Jehovah a mla tibir el kmo ngmo olsobel er a rechedal er a taem er a kloul ringel e mo mesterir a diak a ulebengelel el klengar er a chelsel a beches el beluulechad. Me ngulterekokl a rengud el kmo tia el telbilel a mo tmaut. Me a lsekum ngsoad el mo kiei er a chelsel a beches el beluulechad e ngkmal kired el melemolem el di klekar.

MOLEMOLEM EL KLEKAR, E LE NGUCHUL A OSEBELEM

7, 8. (a) Ngera mle ngerechelir a remengkar a beluu er a irechar, e tiang ngomeklatk er kid er a ngerang? (b) Ka msodii a tekoi el sebechel el mo duubech a lsekum a remengkar a imiit a mederir.

⁷ Ngsebeched el nguu a klubeled er a rechad el mengkar a beluu er a irechar. Ngar er a betok el mats el uldimukl er a Jerusalem e ngmla er ngii a meklou el cheotelel a beluu me ngdiak el sebechir a recheraro el mo soiseb er ngii. E tirke el mengkar a ngar er a chetebtel aika el cheuatel me ngsebechir el mesang a beluu el rokir. E a rebebil a kuk mengkar aike el siseball er a beluu. Tirka el chad a mle kirir el mengkar a leklebesei me a lemellomes, e a lsekum te mesterir a recheraro el merael el mei e te mesubed er a rechad er a beluu. (Isa. 62:6) Te medengelii a klungel a ultutelel a lolemolem el klekar e le kerekikl el omes a tekoi el mo duubech, e le lsekum ngdiak e ngsebechel mo uchul a kodellir a rebetok el chad.​—Ese. 33:6.

⁸ A Josephus el milluches a reksi el kirir a rechad er a Judea a silodii sel rolel e ngmlo sebechir a resoldau er a Rom el soiseb er a Jerusalem er a rak er a 70 er a uriul er a Kristus. Tirke el milengkar er a siseball er a mats a iliit a mederir. Me tiang a mlo uchul e ngmle sebechir el soiseb a resoldau er a Rom el sosebii a templo e tomellii a beluu er a Jerusalem el rokir. Tiaikid a mlo ulebongel er a kloul ringel el blo lecheremii a rechad er a Judea.

9. Ngera el tekoi a diak lodengelii a ruumesingd el chad?

⁹ A oumesingd el kabelment er a beluu a ousbech er a resoldau el mengkar aike el oliochel er a belurir, e dirrek el ousbech a beches el klekedall er a security system el meruul er tia el ureor. A rechedal aika el kabelment a kerekikl el omes er a rechad me a lechub e ngii di el ngerang el sebechel el mo uchul a telemellel a belurir. Engdi ngkmal diak lodengei el kmo ngar er ngii a lmuut el mesisiich el kabelment el ngar er a eanged el longedereder er ngii a Kristus Jesus. E tia el kabelment a kmal di kmedu el mo oumekemad el okngemed aika el rokui el kabelment er tia el chutem. (Isa. 9:6, 7; 56:10; Dan. 2:44) Me kede kmal semeriar el mengiil er tia el taem, e dirrek el soad el mo kltmokl el kirel. Tiaikid a uchul me ngkired el kerekikl el omtab a ulaoch er a Biblia, e melemolem el blak a rengud el mesiou er a Jehovah.​—Psa. 130:6.

LAK BO MECHESANG

10, 11. (a) Ngkired el mo kerekikl er a ngerang, e ngera uchul? (b) Ngera el tekoi a oterekeklii a rengum el kmo a Diabelong a mla chodeng a rengrir a rechad?

¹⁰ Ka molatk er a chad el mengkar me ngmekar el ta el kesus. Ngar er aike el sesei el sikang er a mochu tutau, e ngkmal mo meringel er ngii el melemolem el mekar e le ngkmal mo mesaul. Me ngdi osisiu, kid a kiei er a taem er a ulebongel er tia el beluulechad. Me a cherengel a taem el lolekeed a ulebongel e nglmuut el mo meringel er kid el melemolem el klekar. Me ngkmal klengiterreng a lsekum e ngmo mechitechut a rengud me ngmo diak dolemolem el klekar. Mada me bo dosaod a edei el tekoi el sebechel el mo uchul e ngmo diak dekerekikl el klekar.

¹¹ A Diabelong a mengeblad er a rechad. Ngikang a “merreder er tial beluulchad.” Telkib el taem er a uchei er a kodellel a Jesus, e ngulemeklatk er a redisaiplo er ngii el kirel tia el tekoi el edei el taem. (Jn. 12:31; 14:30; 16:11) A Diabelong a ousbech a klsuul klechelid el mengeblad er a rechad, el uchul me a rebetok er chelechang a diak lomtab a bleketakl el ulaoch er a Biblia el ochotii el kmo a ulebongel er a beluulechad a kmal kmedang. (Sef. 1:14) Me ngkmal bleketakl el kmo a Satan a “mla chodeng a rengrir” a rebetok el diak loumerang. (2 Ko. 4:3-6) Tiaikid a uchul me sel dolasem el ouchais er a rechad el kmo a ulebongel a kmedu el mei, e a Kristus a mengedereder er chelechang, e a rebetok er tir a diak el sorir el orrenges er kid, me te blechoel el melekoi el kmo, “Ngdiak semeriar.”

12. Ngera uchul me ngdiak el kired el mecheblad er a Diabelong?

¹² Alta e a rebetok a diak el semeriar a ulaoch er a Biblia, engdi ngdiak el kired el mechei a uldesuir me longitechut er kid. Kede ungil medengelii a klungel a ultutelel a dolemolem el klekar. A Paulus a dilu er a rudam er ngii el kmo: “Kom ungil el medengei el kmo, a Sils er a Rubak sel le mei, e ng ua tal merechorech a le mei er a klebesei.” (Monguiu er a 1 Thesalonika 5:1-6.) Me a Jesus a mengelechel er kid el kmo: “Kemiu a dirrek el kiriu el mo kldmokl, ele Ngelekel a Chad a mei er sel diak momdasu el kmo ng mei er ngii.” (Lk. 12:39, 40) Ngkmal di kmedung e a Satan a mo mengeblad er a rechad me te mo omdasu el kmo: “Ng budech ma rokui el tekoi a di ungilbesul.” Seikid e a sils er a Jehovah a di mereched el mei me a rechad a kmal mo kibetiekl. E kid a kuk mekerang? A lsekum e ngsoad el mo kltmokl el kirel sel sils, e dirrek el diak demecheblad el ua rebetok el chad, e ngkmal kired el melemolem el “mekar e lulterekokl a rengud.” Tiaikid a uchul me ngkired el menguiu er a Tekingel a Dios er a bek el sils e melebedebek a tekoi el louchais er kid a Jehovah.

13. Ngua ngerang a telemellel a reng er tia el beluulechad? E mekerang a doibngid er tia el kdekudel el tekoi?

¹³ A reng er tia el beluulechad a mengesuseu a uldesuir a rechad. A rebetok a omdasu el kmo ngdiak a ultutelel el bo lodengelii a Dios. (Mt. 5:3) Me te bai ousbech a temir me a klisichir el osiik a betok el klalo me a kerruul. (1 Jn. 2:16) Me a lmuut el tang, ngkmal mla mo imis el betok a kakerous el tekoi er ongelaod el olechau a osengir a rechad e dirrek el melisiich er tir el di mo sorir a tametereng e di meruul aike el sorir. (2 Ti. 3:4) Aika el tekoi a mengesang er a rechad me ngdiak loruul a lmuut el meklou a ultutelel el tekoi, e diak lomdasu er a deleuill er tir lobengkel a Dios. Tiaikid a uchul me a Paulus a ulemeklatk er a Rekristiano el kmo, ‘ngkirir el mekiis er a cheliuaiu’ el belkul a kmo ngdiak el kirir el di melemolem a sorir el tekoi.​—Rom 13:11-14.

14. Ngera el uleklatk a denguu er a Lukas 21:34, 35?

¹⁴ Ngsoad a reng er a Dios a lomekrael er kid el diak el reng er tia el beluulechad. Me ngokiu a chedaol reng er a Jehovah, e ngolengeseu er kid el mo ungil medengei a tekoi el kmedu el mo er ngii.^[1] (1 Ko. 2:12) Me ngkmal kired el mo kerekikl, e le ngsebechel a mekekerei el tekoi er a klengar el rullid el mo mechesang me ngmo diak el sebeched el mesiou er a Jehovah. (Monguiu er a Lukas 21:34, 35.) A rebebil a locha mo dmu er kid el kmo kede mekebelung, e le kede oumerang el kmo kede kiei er a taem er a ulebongel. (2 Pe. 3:3-7) Engdi ngkmal diak el kired el mechei a uldesuir me longitechut er kid. E le ngar er ngii a bleketakl el olechotel a kmo a ulebongel a kmedu el mei. Me a lsekum e ngsoad a reng er a Dios a lomekrael er kid e ngkmal kired el mo blechoel el ngar er a miting e teloi er a rudam er kid.

15. Ngera dilubech el mo er a Petrus me a Jakobus me a Johanes? E ngera sebechel el duubech el mei er kid?

¹⁵ A chelitechetud a rullii el mo meringel er kid el melemolem el klekar. A Jesus a ungil medengei el kmo a rechad a diak lemecherrungel, e ngar er ngii a chelitecheterir. Ka molatk er sel kesus er a uchei er a kodellel. Alta e ngmle cherrungel, engdi ngmle medengei el kmo a lolemolem el blak a rengul, e ngkirel el olengit er a Demal me ngolengeseu er ngii. Ngdirrek el ullengit er a apostol el Petrus me a Jakobus me a Johanes me lolemolem el di mekar er sel taem el loluluuch. Engdi tirkang a dimlak lodengelii a klungel a ultutelel a lolemolem el mekar. Me sera bo el mesulaul e te mlo mechiuaiu. A Jesus a dirrek el mlo mesulaul, engdi ngdi millemolem el mekar e meluluuch el mo er a Demal. Me tirka el apostol a dirrek el mle kirir el meluluuch er seikid el taem.​—Mk. 14:32-41.

16. A doltirakl er a Lukas 21:36, e ngmilekerang a Jesus e osisecheklid el mo ‘melemolem el klekar’?

¹⁶ Me ngera sebechel el ngosukid me dolemolem el klekar e mo kltmokl el kirel a sils er a Jehovah? Ngkmal kirel el mo mesisiich a urunguled el soad el meruul a llemalt, engdi ngdiak di el tiaikid e lemerekong. A sesei el klebesei er a uchei er a kodellel a Jesus e ngdilu er a redisaiplo er ngii el kmo, ngkirir el melemolem el meluluuch el olengit a ngeso er a Jehovah. (Monguiu er a Lukas 21:36.) Me kid a dirrek el kired el melemolem el meluluuch el olengit a ngeso er a Jehovah el ileakl er chelecha el taem er a ulebongel.​—1 Pe. 4:7.

MOLEMOLEM EL KLEKAR

17. Kede mekerang e mo kltmokl el kirel a tekoi el kmedu el mo er ngii?

¹⁷ A Jesus a dilu el kmo a ulebongel “a mei er sel kmal diak momdasu el kmo ng mei er ngii.” (Mt. 24:44) Me ngkmal kired el mo kltmokl el kirel er a bek el taem. Chelechang e ngkmal diak el taem el doruul a klengar er kid el mo ua blekerdelel tia el beluulechad er a Satan el omdasu el kmo tiaikid a mo uchul a deuil a rengud. Tiang a kmal di ua berrous el tekoi. Ngbai okiu a Biblia e a Jehovah me a Jesus a mla subedid er a rolel e ngsebeched el melemolem el klekar. Mada bo leblak a rengud el omtab a ulaoch er a Biblia e domes a otutel, e dolemolem el olekeed er kid er a Jehovah, e denguu a Renged el mo kot. Seikid e kede mo kltmokl el kirel a ulebongel. (Och. 22:20) A klengar er kid a kmal ultuil er ngii!