Molekeed er Kau er a Dios

“A ikel Dilubech el Tekoi er a Ngar a Mong a Kmal Di Mo Diak a Melatk”

SEL dolatk a tekoi el dilubech er a ngar er a mong, el ua aike el temed el obengterir a rebetik er a rengud e ngmera el mo ungil a rengud. Engdi ngdiak el blechoel el uaisei. Kau ke di blechoel el melatk a mekngit el tekoi el dilubech er a ngar er a mong? A lsekum ke uaisei, e ke locha mo omdasu el kmo, ‘ngak ngsebechek el mo diak kulatk aika el tekoi?’ A tekingel a profet el Isaia a onger er tia el ker e sebechel el mengelaod er kid.​—Monguiu er a Isaia 65:17.

A moktek er a Jehovah a mo smuld a rokui el ringel me a klengiterreng. El mekerang? Ngoeak sel bo lokngemedii tia el mekngit el blekeradel me aike el rokui el ringel el ngar er a chelsel e lutechir er a ungil el blekeradel. Ngokiu a Isaia e a Jehovah a tibir el kmo: “Ak meruul er a beches el beluulchad ma beches el melidiul.” Me sel bo dodengelii a belkul tia el telbiil e ngmo er ngii a omeltked.

Ngerang a beches el melidiul? A Biblia a meskid a eru el tekoi el mo ngosukid. A kot, e a tekoi el beches el melidiul me a lechub e ng eanged a losaod er ngii a reteru er a remilluches a Biblia, el di dul mesaod el kirel a klou el omeldechel a tekoi er tia el beluulechad. (2 Petrus 3:13; Chocholt 21:1-4) A ongerung, a lebebil er a taem e a Biblia a ousbech er a tekoi el “eanged” el omtechei a omengedereder me a lechub e ngkabelment. (Isaia 14:4, 12; Daniel 4:25, 26) Me a beches el eanged a beches el kabelment el ngii a mo toketekii a melemalt el blekeradel er tia el chutem. Me a di ta el omengedereder el sebechel el kutmokl aika el rokui a Rengedel a Dios, el kabelment el ngar er a eanged, el Jesus a ullisechakl er kid el mo meluluuch el kirel. E ngii el Renged a mo remuul a soal a Dios e otutii a llemalt er tia el chutem.​—Matteus 6:9, 10.

Me ngerang a beches el beluulechad? Ka molatk a eru el bades el sebechel el ngosukid el mo medengelii a belkul. A kot, e a Biblia a ousbech er a tekoi el beluulechad, a lebebil er a taem el mesaod er a rechad, el diak losaod er tia el chutem. (Psalm 96:1) A ongerung, e a Biblia a ulemlaoch el kmo ngar er cheungel a omengederederel a Dios, e a reblak a rengrir el chad a mo mesuub el kirel a llemalt, el ngii a mo oberk er a beluulechad el rokir. (Isaia 26:9) Me a beches el beluulechad a melutk el kirel a klechad, el ngii a mo kongei el chederedall er a omengederederel a Dios e kiei el oltirakl a melemalt el llechul.

Ngsebechem el mtebengii sel rolel er a Jehovah a bo lolekngemed a rokui el mekngit el de blechoel el melatk? Ngdi kmedung, e a Jehovah a mo otutii a telbilel el kirel a beches el eanged me a beches el beluulechad, e toketekii a melemalt e beches el beluulechad.a Me ngngar er a chelsel sel beches el beluulechad e a secherel a bedenged me a uldesued me a rengud a mo tekoi er a ngar er a mong. Me a reblak a rengrir el chad a mo kiei el dmeu a rengrir, e di mo melatk aike el ungil el tekoi el duubech er a bek el sils.

E kuk mekerang el kirel a ringel el omekcharm er kid er chelechang? A Jehovah a tibir el okiu a Isaia el kmo: “A ikel dilubech el tekoi er a ngar a mong a kmal di mo diak a melatk.” Me a ngii di el ringel el dechelebangel er chelechang a mekekokil el mo nguemed. Ngua ngera uldesuem el kirel tiang? Ngdiak el soam el mo medengelii a rolel e ngsebechem el olekeed er kau er a Dios, el ngii a mla tibir a ungil el klengar er a ngar er a medad?

[Footnote]

[Blurb el ngar er a 12 el llel]

A moktek er a Jehovah a mo smuld a rokui el ringel me a klengiterreng