A Jehovah a Mengudel er a Telungalek er Ngii
‘Bor sel kot er bab el sebechiu el omtebechel er a kltarreng.’—EFESUS 4:1, 3.
NGMEKERANG A OMONGER?
Ngera sel uldesuel a Dios el losaod er ngii a Efesus 1:10?
Kede mekerang e oltaut a ulekrael el ngar er a Efesus 4:3?
Ngerang a ngosukid el mo ‘bekokuii er a delongeled’?
1, 2. Ngera moktek er a Jehovah el kirel a chutem me a klechad?
NGERA ke melatk er ngii sel mrengesii a tekoi el telungalek? Ke melatk er a bltikerreng, deurreng, me a rechad el dmak el oureor el ta rengrir? Ke dirrek el melatk er a basio er a ulekerreu el sebechem el mukeroul er a chelsel e mesuub e mimokl el mengedecheduch? Ke ulterekokl el melatk aika el tekoi a lsekum e ke mlukeroul er a chelsel a ungil el telungalek. A Jehovah a ngike el uchelel a telungalek. (Efesus 3:14, 15) Me a moktek er Ngii a soal a rokui el kiei er a eanged me a chutem a bo leua ta el telungalek e bo lolechesuar a ulekerreu, e le kaumerang er a delongelir e bo loba kltarreng.
2 A uriul er a lerebet er a klengit a Adam me a Eva e a rechad a mlo diak el chedal a telungalek er a Dios. Engdi tiang a dimlak lengedechii a moktek er a Dios el mle soal el omekeek er a Paradis el chutem er a rengelekel a Adam me a Eva. (Genesis 1:28; Isaia 45:18) Ngmla kutmokl a rolel e ngmo otaut a moktek er ngii. A babier er a Efesus a blechoel el mesaod er a kltarreng, e dirrek el olecholt aike el bla leketmokl a Jehovah. Kede mo mesaod a bebil er a bades el meketeklii sel rolel e ngsebeched el olengeseu el melisiich er a moktek er a Jehovah el mengudel er tirke el ngar er a eanged me a chutem el mo ta el telungalek.
A ROLEL E A JEHOVAH A OTAUT A MOKTEK ER NGII
3. Sel doltirakl er a Efesus 1:10 e ngulemuchel el mekerang a Dios? E ngulemuchel el meruul er a kot el tekoi er oingerang?
3 A Moses a dilu er a rechad er a Israel el kmo: “A RUBAK el di ngii el tang el RUBAK a Dios er kid.” (Duteronomi 6:4) Me a rokui el tekoi el loruul a Jehovah a melisiich er a moktek er ngii. Me sera bo el temel er a rengul e ngulemuchel el oldak er a rengar er a eanged me a chutem el mo chimo el telungalek. (Monguiu er a Efesus 1:8-10.) Ngar er ngii a eru el tekoi el kirel meketmokl. A kot, e a Dios a kutmeklterir a rengellitel el mo kiei er a eanged e mo oureor el chederedall er a Kristus. Tiang a ulemuchel er a Pentekost er a rak er a 33, er sel taem el Jehovah a millilt er tirke el mo mengedereder el ngar er a eanged. (Rellir 2:1-4) Me ngokiu a olubet el tengetengel a Kristus e a Dios a omes er tirka el ngellitel el melemalt e rredemelel a nguu a klengar. Me a rengellitel a medengei el kmo te mla merodel el mo “ngelekel a Dios.”—Rom 3:23, 24; 5:1; 8:15-17.
4, 5. Ngerang a ongeru el tekoi el kirel meketmokl?
4 Ongerung, e a Dios a mengetmokl er tirke el mo kiei er a Paradis el chutem el tir a kongei el chederedall er a Rengedel a Messias. A “kloul seked” er a rechad el mo suobel er a Armageddon a tirke el kot el mo kiei er a chelsel a Paradis. (Chocholt 7:9, 13-17; 21:1-5) E ngar er a chelsel a ta el telael el rak el omengederederel a Kristus, e a rebetok el biliol el chad a mo mekiis er a kodall el mo kiei er a chutem el teloi er a “kloul seked.” (Chocholt 20:12, 13) Me a taem er a okiis a meskid a techelled el mo melisiich er a kltarreng er a delongeled! Me a “kloul seked” me tirke el mo mekiis er a kodall a mo ‘ikel tekoi el ngar a beluulechad.’ Me a ulebengelel a ta el telael el rak, e te mo measem a klaumerang er tir. E tirke el melemolem el blak a rengrir a mo merodel el mo “ngelekel a Dios” el kiei er tia el chutem.—Rom 8:21; Chocholt 20:7, 8.
5 Chelecha el taem e a Jehovah a mengetmokl er a rengellitel el mo kiei er a eanged me tirke el ngodech el sib el mo kiei er a Paradis el chutem. Me kede mekerang e olengeseu el melisiich er tia el moktek er a Dios?
MOBA KLTARRENG EL OKIU A OUREOR EL KLISIICH
6. Ngera el bades a ochotii el kmo a Rekristiano a muchelechel el mo dmak el kldibel?
6 A Biblia a mengelechel er a Rekristiano el mo dmak el kldibel. (1 Korinth 14:23; Hebru 10:24, 25) Engdi ngdiak el belkul a kmo kede di mo kldibel el ua blekerdelir tirke el mo er a makit me a blil a klekool. Ngmo mesisiich a kltarreng er kid sel doltaut a llechul a Jehovah e debecherei a oureor el klisichel me losmechokl er kid el mo ungil el chad.
7. Kede mekerang e oba kltarreng el okiu a oureor el klisichel a Dios?
7 A Jehovah a omes er kid el melemalt el chad e le kede oumerang er a olubet el tengetengel a Jesus. Me ngomes er a rengellitel el ua rengelekel me rengodech el sib el ua resechelil. Engdi ngar er a chelsel tia el beluulechad er a Satan e ngblechoel el mo er ngii a chetituokel er a delongeled kid me a rebebil. (Rom 5:9; Jakobus 2:23) Seikid a uchul me a Biblia a melisiich er kid el mo klou a rengud. Engdi ngkired el mekerang me bo el sebeched el oba kltarreng kid me a rudam me a rudos er kid? Ngkired el mesuub el mo “blechoel el oba ngariourreng, ma delemedemekerreng.” Me a Paulus a dilu el kmo: “Bor sel kot er bab el sebechiu el omtebechel er a kltarreng el loleiukes er ngii a [oureor el klisichel a Dios] el okiu a budech el merenged el oldak er kemiu.” (Monguiu er a Efesus 4:1-3.) Kede otutii tia el bades sel debecherei a oureor el klisichel a Dios me lolodech a omerelled e lengesukid el mo olecholt aike el ungil el blekerdelel a Dios. Ngdirrek el diak el kired el meruul a urerel a klechad el ngii a tekoi el Dios a ouketui. Aike el ungil el blekerdelel a Dios a ngosukid el mo meduch el mesmechokl a mondai er kid me a rebebil, el mo uchul a kltarreng. Engdi a urerel a klechad a mo uchul a klekakeakl.
8. Ngmekerang a urerel a klechad a loleakl er a rechad?
8 Ngmekerang a “urerel a klechad” a loleakl er a rechad? (Monguiu er a Galatia 5:19-21.) A deleboes a rullii a chad el mo cheroid er a Jehovah me a ongdibel. E a laokreng a mo uchul a klengiterreng me a dertel a chebechiil, e rulleterir a ruungalek me a rengelekir el mo chacheroid. A ngellengalek a mekikiongel el omeruul. El di ua teblo el klalo el diak el sebechel el obuid el mo dmak a lsekum a chimo er ngii a dechudech, me a chad el diak el klikiid a omerellel a diak el sebechel el mo sechelil a Dios me a rechedal. A klekad a ochotii el kmo a chad a diak lomekerreu a llechul a Dios me a ka lolengesenges ngii el llach. Me a bek el bedengel a urerel a klechad a rullii a chad el mo cheroid er a Dios me a rechedal. A Jehovah a ouketui aika el omeruul.
9. Ngera el ker a ngosukid el mo medengei el kmo kede melisiich er a budech me a kltarreng er a delongeled?
9 A derta er kid a kired el di kid el oker el kmo: ‘Ak mera el melasem el oureor el melisiich er a budech me a kltarreng er a chelsel a ongdibel? Ak mo mekerang a lsekum e ngmo er ngii a mondai er ngak me a ta er a chad? Ak mo ouchais er a resechelik e melasem el mengesuseu er tir el mo olab el mei er ngak? Ak mengiil er a remechuodel el mo mesmechokl er tia el mondai me ngdiak bo kungedecheduch er ngii el melasem el meruul er a budech? A lsekum ak medengei el kmo ngar er ngii a chad el kesib a rengul er ngak, e ak melasem el mengeroid er ngak er ngii me lak bo kusaod er ngak er ngii?’ A lsekum e nguaisei a omerelled, e kid kede mera el olengeseu el melisiich er a moktek er a Jehovah el mengudel er a rechad el mo ua ta el telungalek el chederedall er a Kristus?
10, 11. (a) Ngua ngera klungel a ultutelel a le budech a delongeled kid me a rudam er kid? (b) Kede mekerang e meleketek a budech er a delongeled e mo ngmai a klengeltengat er a Jehovah?
10 A Jesus a dilu el kmo: “Me sel bochu er olengetongel el mo oldars er a tengetengem el mor a Dios, e a lsekum ke lotkii odam er kau el ngar ngii a mekngit er a rengul el kirem e ke mechere tengetengem er medal a olengetongel, e mereched el mo rullii a delongelem kau ma odam er kau, e sola e lmuut kung el mo oldars er a tengetengem el mor a Dios. . . . E mereched el mo meledaes er a delongeliu.” (Matteus 5:23-25) Me a Jakobus a milluches el kmo: “Ma re chad er a budech sel lolalem a tane er a budech e te mo meridm er a llemalt.” (Jakobus. 3:17, 18) E tiang a belkul a kmo ngdiak el sebeched el melemolem el meruul a llemalt a lsekum e ngdiak a budech er a delongeled kid me a rechad.
11 Ngar er a bebil el beluu el mla er ngii a mekemad, e a klou er a edeitiud er a beluu a diak el sebechir a rechad el ousers er ngii e le ngdelakl a betok el dub er ngii. Me sel lobuu a ta er aika el dub er a chelsel a sers e ngmo diak el ousbech er ngii el sers, me ngmo meringel er a rechad el metik a urerir e mo olengesonges a kelir. Me ngdi osisiu, ngmo meringel er kid el omekeroul a ungil el blekeradel a lsekum e ngmeringel er kid el meruul a budech el lobengterir a rechad. Me tiang a rullid el mo ua delakl el dub. A leuaisei e ngkired el melodech a blekerdeled. A lsekum kede mereched el ousubes er a rechad e meruul a ungil el mo er tir, e ngsebeched el meleketek a budech er a delongeled e mo mukngeltengat er a Jehovah.
12. A remechuodel te mekerang e ngosukid el mo ta rengud?
12 A remechuodel el Kristiano a dirrek el olengeseu el meleketek er a budech. Te mla mukngerachel el kirir el lolengeseu er kid el ‘di mo tang a de ngar ngii el oumerang.’ (Efesus 4:8, 13) Sel loureor lobengked el mesiou er a Jehovah e te olengeseu er kid el melisiich a ungil blekerdeled, e omekrael er kid el ousbech er a Biblia. (Efesus 4:22-24) Lak mobes el kmo a Jehovah a ousbech er a remechuodel el omekrael e mellach er kid el mengetmokl er kid el mo kiei er a chelsel a beches el beluulechad. Me kemiu el mechuodel, bo mkerekikl el omekrael er a rechad me bo el sebechir el melechesuar a bltkil a rengmiu.—Galatia 6:1.
“BO BEKOKUII ER A DELONGELIU”
13. Ngera mo rsel a lsekum e ngdiak dolengesenges er a omellach er a Efesus 4:25-32?
13 Ngar er ngii a bebil el tekoi el diak el kired el meruul el medung er a Efesus 4:25-29. Ngdiak el kired el omulak, e mo kesib a rengud, e mesaik, e melekoi a mekngit el tekoi. Ngbai kired el melekoi a ungil el tekoi el ngii a sebechel el melisiich er a rechad. A ngii di el chad el diak lolengesenges er aika el omellach a rulleterir a rechad el mo kakeakl, me ngmocha omtok er a ulekrael el mei el okiu a oureor el klisichel a Dios, el ngii a klisiich el oldak er a rechad. (Efesus 4:30) A lsoad el meleketek a budech me a kltarreng e ngkired el oltirakl er a tekingel a Paulus el kmo: “Bedobed a rokui el uchul a kngtil a rengmiu, ma cheldechuderreng, ma ngasechereng. Mereko klaiuediu, ma otuub, ma bek el teletelel a klauketui. Bai bo bekokuii er a delongeliu e mkaukerreu e mkausubes, el ua Dios el mla ousubes a telemelliu el oeak a Kristus.”—Efesus 4:31, 32.
14. (a) Ngera belkul a tekoi el “bo bekokuii”? (b) Ngerang a ngosukid el mo bekokuii el mo er a rechad?
14 A tekingel a Paulus el “bo bekokuii” a ochotii el kmo ngkired el mesuub el mo bekokuii e le ngdiak de blechoel el bekokuii. Ngkired el mesuub el mo omdasu el kmo a uldesuir a rechad a klou a ultutelel er a uldesued. (Filipi 2:4) A lebebil er a taem e ngsoad el melekoi a tekoi el mo uchul e a rechad a ocherchur me a lechub e te mo omdasu el kmo ngmellomes a rengud. Engdi a lsekum e ngdiak el rolel a blekokuii e lak mdelii el mo er a chad. Ngungil a bo dekerekikl el melatk aike el tekoi el bo dolekoi me bo el sebeched el olecholt er a blekokuii.
MOMEKEROUL A BLTIKERRENG ME A OMENGULL ER A CHELSEL A TELUNGALEK
15. Ngmekerang a bades er a Efesus 5:28 e melisiich er a rebechiil el sechal el mo oukerebai er a Kristus?
15 A Biblia a omekesiu er a deleuill er a Kristus me a ongdibel el mo er a deleuill er a chad me a bechil. A kerebil a Kristus a ngosuir a bechiil el sechal el mo meduch el omekrael e oubltikerreng e omekerreu er a bechil. Me a kerebil a Kristus a dirrek el ngosuir a bechiil el redil el mo medengei el kmo ngkirel el chederedall er a bechil. (Efesus 5:22-33) Me sera loluches a Paulus el kmo: “A re sechal a kirir el mo betik a rengrir er a re becherir el di ua le betik a rengrir er a di bedengir,” e ngmle kirir a rebechiil el sechal el mo oltirakl er a kerebil techang? (Efesus 5:28) Me a tekoi el ledilung el kirel a Kristus me a ongdibel a ngosukid el mo onger er tia el ker. Ngdilu el kmo a Kristus a betik a rengul er a ongdibel e tilengetengii a klengar er ngii el kirel, e dirrek el milengikiid er ngii el “oeak a tekingel.” Me a bechiil el sechal a ngerechelel el lolengeseu er a rechedal a telungalek el mo omak a ungil el deleuill er tir lobengkel a Jehovah. Me sel loruul el uaisei, e ngoureor el melisiich er a moktek er a Jehovah el soal el oldak er a rokui el chad el mo chimo el telungalek el chederedall er a Kristus.
16. Ngera mo rsel a lsekum a ruungalek a mo ungil el rullii a ngerachel el bla loterekeklii a Jehovah er tir?
16 A ruungalek a diak el kirir el obes el kmo a Jehovah a mesterir a ngerechelir el kirir el omekerreu er a rengelekir. Engdi ngklengiterreng e le rebetok el chad er chelechang a “meterkakl el diak lomekerreu.” (2 Timoteus 3:1, 4) A rebetok el chedam a mengemikr a ngerechelir el mo uchul a telemellel a rengrir a rengelekir. Engdi a Paulus a dilu er a Rekristiano el chedam el kmo: “Lak molengasech a rengrir a re ngelekiu. E bai momekeroul er tir el oba omellach ma osisechakl er a Rubak.” (Efesus 6:4) A rengalek a omuchel el mesuub el kirel a bltikerreng me a rolel a omengull er a chelsel a blai. Me a ruungalek el olisechakl er a rengelekir er aika el tekoi a oureor el melisiich er a moktek er a Jehovah el soal el oldak er a rechad el rokui. A rengalek a kirir el mo melechesuar a bltikerreng, me a ruungalek a kirir el diak lolengasech a rengrir me a lechub e te di oldiu el melekoi a mekngit el mo er tir. Me ngoeak tiaikid el rolel e te olisechakl er a rengelekir el mo meduch el olecholt a bltikerreng me a omengull el kirel a dereder, e dirrek el mengetmokl er tir el mo kiei er a beches el beluulechad er a Dios.
17. Kede mekerang e mo mesisiich er a Diabelong?
17 Lak dobes el kmo a Satan a di blechoel el melasem el merrob er kid me a rebebil me lak dosiou er a Dios. A rebetok el chad a melisiich a soal a Satan sel lorort a chebechiielir, e ledak el kiei el dirkak lokur a chebechiielir, e dirrek el kongei a chebechiielir a remengolchotaor. Engdi kid a oltirakl er a kerebil a Kristus el diak doltirakl a omerellir a rechad er a beluulechad. (Efesus 4:17-21) Me ngkired el mo oubail er a ‘klekedellel a mekemad el le bilskid a Dios’ a lsekum e ngsoad el mo mesisiich er a Diabelong me a remekngit el anghel er ngii.—Monguiu er a Efesus 6:10-13.
DEKIEI EL OBA BLTIKERRENG
18. Ngerang a toketekii a kltarreng er a delongeled?
18 Ngkired el mo oba bltikerreng a lsekum e ngsoad el mo ta rengud. Ngbetik a rengud er a ‘di ta el Rubak’ el Jesus Kristus me a ‘di ta el Dios’ el Jehovah me a rudam me a rudos er kid. Seikid a uchul me ngsoad el meleketek er a budech me a kltarreng er a delongeled. (Efesus 4:3-6) A Jesus a milluluuch el mesaod er tiaikid el rolel a bltikerreng el kmo: “Ng diak di kululuuch el kirir e le merekong, ak dirrek el meluluuch el kirir tirkel mo oumera er ngak el tekingir a uchul. Ak ulengit el kmo bo le ta rengrir el rokui. Chedam, bo lobengked el di ua ikau el obengkek me ngak a obengkem. . . . Ak mla ochotau er tir e mo melemolem el olecholt er kau er tir, me bo le betik a rengrir er a re chad el ua ikau el betik a rengum er ngak, me ngak mak dirrek el obengterir.”—Johanes 17:20, 21, 26.
19. Ngera ke mla tibir el mo meruul er ngii?
19 A lsekum e ngar er ngii a blekerdeled el meringel er kid el melodech er ngii, e ngkirel a bltkil a rengud el rullid el mo meluluuch el olengit er a Dios el kmo: “Mrellii a renguk el mo meluu er a ngklem.” (Psalm 86:11) Ngkmal kired el mo blak a rengud el omtok er a Diabelong sel lolasem el mengeroid er kid er a betik a rengul el Demad me a rudam me a rudos er kid. Me kid el ‘cheleoch el ngelekel a Dios a kired el melasem el mo ua ingii. Ma klengar er kid a kirel el mo cheldereder er a bltikerreng’ el dolecholt er ngii er a chelsel a telungalek me a ongdibel me sel doldingel a obliil.—Efesus 5:1, 2.
[Siasing el ngar er a 29 el llel]
Mecherei a tengetengel er a olengetongel, e mo rullii a budech er a delongelel ngii me a odam er ngii
[Siasing el ngar er a 31 el llel]
Ruungalek, molisechakl er a rengelekiu el mo olecholt a omengull