“ Bo Leblak a Rengmiu el Mengeluolu er a Kltarreng er a Reng”

A APOSTOL Paulus a millisiich er a Rekristiano er a Efesus me lolemolem el “mengeluolu er a kltarreng er a reng el rrengodel er a ochull er a budech.”—Efe. 4:2, 3, NW.

A “kltarreng” el dobang a mlara “reng.” Tia belkul a kmo ngrodech er a oureor el klisichel a Dios. Me nguaisei engdi a Paulus a mileketeklii el kmo a kltarreng er kid a kired el meringel el loureor er ngii me lak doridii. Ngtecha kirel el meringel loureor el kirel a kltarreng? Ngngerechelel a derta el Kristiano el mo meruul er a part er ngii el “mengeluolu er a kltarreng er a reng.”

Ngsebeched lomekesiu er ngii er tiang. Okmo chad a milskau a beches el mlai. Ngtecha ngerechelel el take care er tia el mlai? Ngkau. Okmo ngmetemall e ngdiak el sebechem el loltelechakl er a chad el milskau ngii el mlai e le ngkau a dimlak em take care er ngii.

Ngdi osisiu, alta kltarreng er kid a Rekristiano a sengk el mlara Dios engdi ngngerechelel a derta er kid el mengeluolu er ngii. A lsekum ngdiak el budech a deleuill er kid me a odam me a lechub ngodos e ngkired el di kid el oker, ‘Ngak, ak meruul er a part er ngak el maintain er a kltarreng er a reng er a chelsel a ongdibel?’

‘BO LEBLAK A RENGUM’ EL MENGELUOLU ER A KLTARRENG

Ngar er a tekingel a Paulus e kede mesa el kmo, a lebebil e ngmo meringel er kid a maintain er a kltarreng er a reng, tokubets a lsekum a ta er a odam me a odos a kingtir a rengud. A bo de maintain er a budech e ngbelkul a kmo ngkirel bek el taem e kede mo mengedecheduch er a chad? Ngdiak el uaisei. Di lekau el oker, ‘A lsekum ak rullii tiang el mo issue, e ngmo melisiich er a budech me a lechub ngrullii a mondai el lmuut el mo klou?’ A lebebil e ngmellomes el rael a dekaberkakl a mlo mekngit me a lechub ke dousubes.—Osi. 19:11, NW; Mk. 11:25.

Uldekdak el siasing: Odam el melilt el mengoit er a mlo mekngit er a delongelel ngii me a ta er a odam. 1. A ta er a odam a oldiu er ngii. 2. Ngmelatk er a tekoi el lerirellii a odam. 3. Ngmenguiu er a Biblia e melebedebek aike el longuiu. — Di lekau el oker, ‘A lsekum ak rullii tiang el mo *issue,* e ngmo melisiich er a budech me a lechub ngrullii a mondai el lmuut el mo klou?’

Ngua lolekoi a apostol Paulus, ‘dongemekl a rengud el loba bltikerreng.’ (Efe. 4:2, NW) A ta el reference a melekoi el kmo tia sebechel moiuid el ‘di leuaisei a chad e mnguu.’ Tia belkul a kmo kede accept el kmo a rekldemed er a klemerang a uaikid el diak demecherrungel. Nguaisei kede melasem el “moubail er ngikel beches el chad.” (Efe. 4:23, 24, BT) Engdi ngdiak a ta er kid el sebechel perfect el meruul er tiang. (Rom 3:23) A lsekum kede accept er tiang e ngmo beot er kid a kaberkakl a mo mekngit er a delongeled e ousubes e “mengeluolu er a kltarreng er a reng.”

Kede mo “rrengodel er a ochull er a budech” sel dousubes e dobes aike el leriruul a rebebil el kilengtir a rengud. A tekoi er a Grik el moiuid el “rrengodel er a ochull” el debetik er ngii er a Efesus 4:3 (NW) a moiuid el “ligaments” er a Kolose 2:19 (NW). A ligaments a mesisiich el tissue er a bedenged el loldak er a chimo el chiuis er a tang. Ngdi osisiu, a budech me a dirrek el bltikerreng er kid el mora rudam er kid a mo ngosukid el melemolem el kmeed er tir alta lebebil e ngmo diak el soad a tekoi el loruul.

Me a lsekum a kldemem er a klemerang a kingtir a rengum, ongesechii a rengum, me a lechub e ngmo seselk a rengum er ngii e molasem el lomes er ngii loba klechubechub er a bai moukerrekeriil er ngii. (Kol. 3:12) Kede rokui el diak demecherrungel me kau a ulterekokl el ngar ngii a taem e ke kilengtir a rengul a ta er a chad. A lsekum ngdiak mobes er tia el tekoi e ngmo ngosukau el meruul er a part er kau el “mengeluolu er a kltarreng er a reng.”