A Meklou el Tellemall​—Ngolecholt el Kmo a Dios Ngmekngit a Blekerdelel?

AIKE EL LOLEKOI A RECHAD: “A Dios a mengedereder er tia el beluulechad me nguchul a meklou el tellemall; me a leuaisei e ngmekngit a blekerdelel.”

AIKE EL LOLEKOI A BIBLIA: “A beluulchad el rokir a ngar eungel Ngikel Mekngit e ngdi kid a medengei el kmo kede chedal a Dios.” (1 Johanes 5:19) Ngtecha “Ngikel Mekngit”? A Biblia a melekoi el kmo ng Satan. (Mateus 13:19; Markus 4:15) Tiang meringel er kid a oumerang er ngii el tekoi? Ka molatk er tiang: A lsekum a Satan a ngar er ngii a klisichel er tia el beluulechad, e ngmelisiich er a rechad el mo uai ngii el di melatk er a di tir, e merechorech a rengrir e di omdasu aike el sorir. Tiang a mocholt er a omerellir a rechad el meterekakl er tia el chutem. A rechad el medengei el kirel a eltel a beluulechad a omeklatk el kmo a terrekakl el blekeradel a sebechel el mo uchul me ngar er ngii a meklou el tellemall. Ngsebechel el omuchel a meklou el tellemall, rullii el mengal el mo mekngit me a lechub e ngmo uchul a telemellir a rechad.

Me ngera uchul me a Dios a mecherei a Satan me ngklou a klisichel er tia el beluulechad? Ngsebeched el metik a nger er tiang er a tekoi el dilubech er a uchelel a klechad er sel taem el kot el demad me a delad a mlo omtok er a Dios el Merredeled. Seikid el taem el mei, e a rebetok el chad a mla meruul er a osisiu el tekoi. Tiaikid el omelilt el mo omtok er a Dios el Merredeled a uchul me a klechad a ngar cheungel a omengederederel a Satan, el ngii a cherrouel a Dios. Sei a uchul me a Jesus a ulemekedong er a Satan el “merreder er tial beluulchad.” (Johanes 14:30) A Satan ngmo mengedereder el mo cherechar? Ngdiak!

A Jehovaha a diak lolechib a osengel er aike el ringel el mo duubech el Satan a uchul. A Dios a kmal mekngit a rengul er a rechad sel lechelebangel a ringel. El ua tiang, a Biblia a mesaod a uldesuel a Dios el kirel aike el meringel el taem el lechilebangel a rechad er a Israel el kmo: “Ngkmal mle meringel er ngii er a lomes er tir el chuarm er a rokui el ringelir.” (Isaia 63:9, NW.) Engdi ngdmeu a rengud e le Dios a di kmedung e ngmo olekngemed er a omengederederel a Satan. Ngmla tutkii a Ngelekel el Jesus Kristus el mo melemalt el King el mo cherechar.

ROLEL E KE ULDIMUKL ER TIA EL TEKOI: A omengederederel a Satan a diak el sebechel el omekerreu er a rechad er a meklou el tellemall, engdi a omengederederel a Jesus a mo omekerreu er tir. A Jesus a mle ta el loruul a tekoi el mo omekerreu er a redisaiplo er ngii er a klou el eolt. A cheldecheduch er a Biblia a kmo: “Ma Jesus a mlo dechor e dilu el kmo, ‘Eolt, bo mchelellakl; chedesaoch, bo meiusech!’ Me ng di mlo diak a eolt e mo meiusech.” A redisaiplo a dilu el kmo: “Ngikal chad ng kol techang el eolt ma chedesaoch orrenges er ngii?” (Markus 4:37-41) Tia el tekoi a oterekeklii a rengud el kmo a Jesus a mo omekerreu er a rokui el bekongesenges el chad sel bo longedereder el King.​—Daniel 7:13, 14.