Ngtecha Uchul a Ringel?

A lsekum a Dios a diak luchul a ringel, e ngtecha uchul aika el meklou el bosech, chelebuul, mekemad, rakt, me a telemellel a beluu? A Tekingel a Dios el Biblia ocholt a edei el uchul:

1. Rechad a Melatk er a Di Tir, Merechorech a Rengrir, e Ouketui er a Rechad. “A re bebil er a re chad er tial beluulchad a ngar ngii a klisichir, e a re bebil a mo chuarm er tir.” (Olisechakl 8:9) A rechad a blechoel el chuarm er a rekuk bebil le te diak lemecherrungel, melatk er a di tir, e mekngit a omerellir.

2. Taem me a Bkaischemrungel el Blekeradel. A rechad a chuarm “e le taem me a bkaischemrungel a duubech.” (Olisechakl 9:11, NW) Tia belkul a kmo a chad a ngar er a mekngit el basio er a mekngit el taem, ngduubech a accident, me a lechub a rechad a diak el kerekikl me a lechub e te mecheuid omerellir.

3. Ngike el Mekngit el Mengedereder er Tia el Beluulechad. A Biblia ouchais er ngike el ngarbab luchul a ringel. Ngmelekoi el kmo: “A beluulchad el rokir a ngar eungel Ngikel Mekngit.” (1 Johanes 5:19) “Ngikel Mekngit” a Satan el Diabelong el ngii a mle ta er a anghel er a Dios engdi ngmlo “[diak] el dechor ra klemerang.” (Johanes 8:44, BT) A rebebil anghel a mlo teloi er ngii el omtok er a Dios e di meruul aike el sorir me chelechang e te mekngit el anghel. (Genesis 6:1-5) Sera lomuchel a ultok er a Sers er a Eden el mei er chelechang e tirkaikid er a lemesisiich el omekrael er tia el beluulechad el mora klengit, el ileakl er chelecha el taem er kid. A Diabelong a blekall er a klsiberreng e “mengeblad er a beluulchad el rokir” el uchul a ‘chelebuul er a beluulchad.’ (Ocholt 12:9, 12) Nguaisei a Satan a kmal mekngit a blekerdelel el merreder. Nguchul a deuil a rengul sel lomes er a rechad el chuarm. Me ng Diabelong el diak Dios a uchul me a rechad a chuarm.

MUTEBENGII TIANG: Ngdi chad el chedelekelek a rengul a soal lomekcharm er a rechad el diak a telemellir. A Biblia melekoi el kmo: “Dios a bltikerreng.” (1 Johanes 4:8) Me a Dios el bltikerreng a uchul me ngkmal diak el sebechel “mo meruul a cheleuid”.​—Job 34:10.

Me nguaisei engdi ke locha mo melatk el kmo, ‘A Olab a Bek el Klisiich el Dios ngomechei er a Satan me ngmengedereder el mo oingerang?’ Kede mla mesa el kmo a Dios a mederdirk a rengul er a mekngit e a ringeled a uchul a klou el ringel el mo er ngii. Me a lmuut kung a Tekingel a kmo: “Moterekokl a ikel rokui el tekoi el suebek a rengmiu er ngii, ele ng kerekikl el omekerreu er kemiu.” (1 Petrus 5:7) A Dios a kmal betik a rengul er kid e ngar ngii a klisichel el okngemed a rokui el ringel me a chelebirukel el ua bo losaod er ngii a ongingil el suobel.a