Bo Dekaukerreu E Dekasisiich

1, 2. Ngera ngilsuterir tirke el 230 el Sioning er a Jehovah me te silobel er a death march el mla er ngii er a ulebengelel a Ongeru el Mekemedil a Beluulechad?

NGMOCHA er a ulebongel er a Ongeru el Mekemedil a Beluulechad. Me a resoldau er a Hitler a mechitechetong er a mekemad. A kabelment er a Nazi a millatk el mo omekoad er tirke el betok el telael el chad el dirk mle kelebus er aike el blil a kelebus er tir. Me tirke el kuk mle kelebus er a Sachsenhausen a mle kirir el merael el mo er a kerodel el mo ngmasech er a diall el mo ruchorech. Me tiaikid el kdekudel el omerael me a lmuut el bebil a mlungakl er a uriul el death marches.

² Tirke el okedei me a edei el telael el bebil er a rekelebus er a Sachsenhausen a mle kirir el merael el 155 el mael el mo er a kerodel er a Lübeck el ngar er a beluu er a Dois. Te mla er ngii a 230 el Sioning er a Jehovah er a elolem el kakerous el beluu el mle teloi er tir. Me a resoldau a dilu er a Resioning me te mo dmak el merael. Tirka el rokui el kelebus a mle mechitechut a bedengir el secher me a klengerenger a uchul. Engdi tirke el rokui el rudam er kid a silobel er tia el omerael. Ngmilekerang e mo uaisei? A ta er tir a dilu el kmo, “Aki millemolem el kasisiich er a delongelam e dmak el merael.” A bltikerreng er a delongelir el uldimukl er a “klou el klisiich” el lengiluu er a Dios a ngilsuterir me te silobel.​—2 Ko. 4:7.

3. Ngera uchul me ngkired el kasisiich er a delongeled?

³ Me alta ngdiak dengar er a death march er chelecha el sils, engdi kede dirk mo chelebangel a betok el mondai. Uriul er a lomuchel el mengedereder a Rengedel a Dios er a rak er a 1914, e a Satan a ulebidokl er a eanged el mei er a chutem. Me ngkmal kesib a rengul e le ngmedengei el kmo “ng di kedeb ku temel.” (Och. 12:7-9, 12) Me chelecha el olekedang a Armakedon, e a Satan a ousbech a ringel el mengitechut er a deleuill er kid me a Jehovah. Kede dirrek el chelebangel a ringelel a klengar er a bek el sils. (Job 14:1; Oli. 2:23) Me a lebebil er a taem e aika el ringel el dechelebangel a sebechel el rullid el kmal mo mechitechut a rengud alta e kede melasem el diak bo demechitechut. El ua tiang, a ta el odam a mlo betok el rak el lolisiich er a rebetok el chad me lolemolem el blak a rengrir el mo er a Jehovah. Engdi sera bo lechuodel, e ngii me a bechil a mlo smecher me ngmlo mechitechut a rengul. Me kid a di ua ngika el odam el ousbech er a “klou el klisiich” el ngar er a Jehovah el mei. Kede dirrek el ousbech a omelisiich er a rekldemed er a klaumerang.

4. Ngera el tekingel a apostol el Paulus a kired el oltirakl er ngii a lsekum e ngsoad el melisiich er a rechad?

⁴ Me a lsoad el melisiich er a rechad, e ngkired el oltirakl er a tekingel a apostol el Paulus el mo er a Rekristiano el chad er a Hebru. Ngdilu el kmo: “Bo de kaukerreu e de kaingeseu el olecholt er a bltikerreng e doruul a ungil. E lak dongoit a ongdibel er kid el ua blekerdelir a re bebil er a re chad, e bai le mengal mo blak a rengud el kasisiich er chelechal domes er sel Sils er a Rubak el olekedang.” (Hebru 10:24, 25) Kede mekerang e otireklii tia el klou a ultutelel el omellach?

“BO DE KAUKERREU”

5. Kede mekerang e mo “kaukerreu” er a delongeled?

⁵ Ngkired el mo melatk aike el lousbech a rebebil me bo el sebeched el “kaukerreu” er a delongeled. Ngdiak el sebeched el mo medengei aike el lousbech a rudam er kid a lsekum kede di ouetkeu er tir er a Blil a Ongdibel me a lechub e kede di mesaod a diak a ultutelel el tekoi. Me nguaisei, engdi ngdiak el soad el mo mesaod er a klengar er a rechad. (1 Th. 4:11; 1 Ti. 5:13) Engdi ngsoad el mo medengei el kmo te ua ngerang a rudam er kid. Ngsoad el mo medengelii a blekerdelel a klengar er tir, blekerdelir, chelitecheterir, me a uldesuir el kirel a klemerang. Ngkirir el mo melechesuar el kmo kede sechelirir e dirrek el betik a rengud er tir. Ngsoad el mengoit a taem el obengterir el diak di el sel lebo el mechitechut a rengrir el mondai er tir a uchul.​—Rom 12:13.

6. Ngera sebechel el ngosuterir a remechuodel el mo omekerreu er tirke el ngar er a ongdibel?

⁶ A Biblia a melekoi el kmo a remechuodel a kmal kirir el kongei e semeriar el omekerreu er tirke el ngar er a ongdibel. (1 Pe. 5:1-3) Ngkirir el mo ungil medengelterir a rudam me a rudos er tir me bo el sebechir el ungil kutmeklii tia el ureor. (Monguiu er a Osisechakl 27:23.) Me sel lolecholt el kmo te kltmokl el olengeseu e dmeu a rengrir el obengterir a rudam me a rudos, e a rengar er a ongdibel a mo beot er tir el mo olengit a ngeso er tir. Ngdirrek el mo beot er tir el mengedecheduch er a remechuodel el kirel a uldesuir me a sebekreng er tir. E seikid e ngmo sebechir a remechuodel el mesterir aike el ngeso el tir a ousbech.

7. Ngera uchul me ngdiak el kired el mo ‘mechas a rengud’ er a tekingir tirke el chuarm a uldesuir?

⁷ A Paulus a dilu er a ongdibel el ngar er a Thesalonika el kmo: “Mngesuterir a re mechitechut a rengrir.” (Monguiu er a 1 Thesalonika 5:14.) E tiang a uldimukl er tirke el chormang a uldesuir me a remechitechetong a rengrir. A Osisechakl 24:10 a kmo: “A lsekum ke mo mechitechut sel bo le chetituokel a tekoi, e kau a mechitechut.” Me a lsekum e ngsoad el melisiich er tirke el chormang a uldesuir, e ngdiak el kired el mo ‘mechas a rengud’ er a tekoi el ledung. (Job 6:2, 3) Te locha mo dmung a tekoi el diak el mera el ngar er a rengrir. A Rachelle a mlo melechesuar tia el tekoi er a bo el secher a delal el chuarm a uldesuel. Me ngdilu el kmo: “Betok el taem el bo lemekngit el mengedecheduch a delak, e ak blechoel el melatk er sel mera el blekerdelel a delak el betik a rengul, ungil a omerellel, e bekururau. Ak mlo medengei el kmo a rechad el chuarm a uldesuir a dmu tekoi el diak el mera el ngar er a rengrir. Me ngkmal mekngit el tekoi a lsekum kede melekoi me a lechub e kede meruul a mekngit el mo er tir.” A Osisechakl 19:11 a kmo: “A ungil uldasu a rullii a chad me ng meoud el ngmasech a rengul, e chetengakl el mor ngii a di lechoit a mekngit el merruul el mor ngii.”

8. Te rua techang a kmal kired el ochotii a bltkil a rengud el mo er tir, e ngera uchul?

⁸ Kede mekerang e omekerreu er a chad el mechitechut a rengul el klengit el lerirellii er a uchei a uchul? Alta e ngmla mengodech a blekerdelel, engdi nglocha dirk merur er a klengit el lerirellii. A Paulus a milluches el mo er a rudam el ngar er a Korinth el kirel a chad el ngar er a ongdibel er tir el ulebult er a kngtil el kmo: “Ng kiriu er chelechal bai ousubes er ngii e omekebek er a medal, me lak bo le meeleb er a klou el klengiterreng. Mak ulengit er kemiu me mochotii er ngii el kmo ng meral betik a rengmiu er ngii.” (2 Ko. 2:7, 8) A odam a diak el sebechel el mo medengei el kmo ngbetik a rengud e omekerreu er ngii a lsekum e ngdiak dochotii el okiu a tekinged me a omerelled.

“DE KAINGESEU EL OLECHOLT ER A BLTIKERRENG E DORUUL A UNGIL”

9. Ngera belkul a “de kaingeseu el olecholt er a bltikerreng e doruul a ungil”?

⁹ A Paulus a milluches el kmo: “Bo de kaukerreu e de kaingeseu el olecholt er a bltikerreng e doruul a ungil.” Ngsebeched el meruul er tiang el oeak sel dolisiich er a rudam er kid el mo olecholt a bltikerreng e loruul a ungil. E tiang a sebeched el omekesiu er ngii el ua ngau. A lsekum a ngau a medkung e ngkirem el osiur e meruoru er ngii. Me ngdi osisiu, ngar er ngii a tekoi el sebeched el remuul el ngosuterir a rudam er kid el mo melemolem el blak a rengrir el mesiou er a Jehovah. A ta er a kot el ungil el rolel a doruul er tiang a sel dechat er a rudam me a rudos er kid el kirel a ungil el omerellir.

10, 11. (a) Te rua techang a ousbech er kid el chemat er tir? (b) Mosaod er a kerebai el ochotii el kmo ngsebeched el ngosuir a chad el mo sumecheklii a omerellel el okiu sel dechat er ngii.

¹⁰ Kede rokui el mo ungil a rengud sel lechat er kid a rechad, alta ngmechitechut a rengud me a lechub e ngdiak. A ta el odam a milluches el kmo, “A demak a dimlak a ta el lechat er ngak el kirel a tekoi el kurruul.” Me sera lorael el mo klou e ngulemdasu el kmo ngkmal diak a ungil el tekoi el sebechel el remuul. Me alta e ngmla mo 50 a rekil, engdi ngkmal mo ungil a rengul sel lechat er ngii a rechad el kirel a ungil el omesiungel el ta er a remechuodel. Ngokiu a tekoi el dilubech er a klengar er ngii, e ngmelechesuar a klungel a ultutelel a lechat er a rebebil me ngblechoel el osiik a bek el techall el mo chemat er a rechad. Nguchul a omelisiich a lsekum a chad a chemat er kid el kirel a tekoi el deriruul. Tia el tekoi a dirrek el mo er a re pioneer, a remechudelang, me tirke el mechitechut a rengrir.​—Rom 12:10.

¹¹ Sel lolasem a remechuodel el olengeseu er a chad el mlo er a klengit, e ngsebechir el chemat er ngii el kirel a ungil el tekoi el leriruul er a uchei me lengesuir el mo ngodechii a uldesuel e bo el semecheklii a omerellel. (Gal. 6:1) Tiaikid el omeruul a ngilsuir a odos el ngklel a Miriam. Ngmeluches el kmo: “Ngkmal mlo meringel a klengar er ngak er sera letobed er a klemerang a rebebil el sechelik e a osisiu el taem e a demak a mlo smecher er a rakt el brain hemorrhage. Me ngkmal mlo mechitechut a renguk.” Ngulemak er a deleuill er ngii me a chad el dimlak longull er a Jehovah e le ngulemdasu el kmo ngmo mechelaod a rengul. Engdi tiang a bai rirellii el mo omdasu el kmo ngdiak el rredemelel a bltkil a rengul a Jehovah me ngmillatk el mo cheroid er a klemerang. Engdi a ta er a remechuodel a ulemeklatk er ngii el kirel aike el rokui el bla leruul er a omesiungel el mo er a Jehovah e milengelaod er ngii el kmo a Jehovah a kmal dirk betik a rengul er ngii. Me tiang a mlo uchul e ngliluut el mo mesisiich a bltkil a rengul el mo er a Jehovah. Me ngdilertii a deleuill er ngii el obengkel ngika el chad e millemolem el mesiou er a Jehovah.

12. Ngera sebechel el mo duubech a lsekum kede omekesiu er a rudam er kid er a rebebil, e dolekoi a mekngit el kirir, me a lechub e kede rulleterir el mo mekngit a ukltkir?

¹² Ngkired el mo kerekikl er a rolel a dolisiich er a rudam er kid me lolemolem el blak a rengrir el mesiou er a Dios. Ngkmal diak el kired el omekesiu er tir er a rebebil, e dolekoi a mekngit el kirir e le tir el diak leredemii a uldesued me a osenged el kirel a tekoi, me a lechub e derelleterir el mo mekngit a ukltkir el mo omdasu el kmo ngkirir el lmuut el kilungii a omesiungir. A chouaika el tekoi a sebechel el melisiich er tir el di telkib el taem engdi ngdiak lolemolem. A kot el ungil el rolel e kede melisiich er a rudam er kid a sel dechat er tir e dengesuterir el mo melechesuar el kmo a bltkil a rengrir el mo er a Dios a uchul me ngsorir el mo er a tkurrebab el sebechir el mesiou er Ngii.​—Monguiu er a Filipi 2:1-4.

BO ‘DEKASISIICH’

13. Kede mekerang e melisiich er a rechad? (Momes er a siasing er a uchelel a suobel.)

¹³ E a mo orokiolel, e a Paulus a dilu el kmo ngkired el mo “kasisiich.” Me sel dolisiich er a rebebil e ngsebeched el omekesiu er ngii el mo er a rolel a dolechel a idungel er a ngau me lolemolem el di kmard. Me a lechub e kede dochel a idungel me nglmuut el mo klou el kmard a ngau. El belkul a kmo kede melisiich e mengelaod er a rudam er kid me bo el sebechir el melemolem el mesiou er a Dios. Me sel dolasem el olengeseu er tirke el mechitechetong a uldesuir e ngkmal kired el oba bltikerreng e ungil el mengedecheduch er tir. (Osi. 12:18) Ngdirrek el kired el mo “mereched el orrenges” e “meoud el mengedecheduch.” (Jak. 1:19) Me a lsekum kede mo ungil el orrenges er a odam er kid e ngsebeched el mo medengelii a uchul me ngmechitechut a rengul me bo el sebeched el dmu tekoi el mo melisiich er ngii.

14. Ngmilekerang a ta er a remechuodel e ngilsuir a odam el mle mechitechut a rengul?

¹⁴ Ka molatk er a ta er a remechuodel el ungil a blekerdelel el mle sebechel el ngosuir a odam el mlo oudeleokl a omesiungel el sesei el rak. Sera lorrenges er ngii, e ngmlo medengei el kmo ngika el odam a dirk betik a rengul er a Jehovah. Ngika el odam a mle blak a rengul el mesuub a Ongkerongel e millasem el mo er a bek el miting. Engdi a rebebil el ngar er a ongdibel a riruul a tekoi el tomellii a rengul. Me ngika el chuodel a mle kerekikl el orrenges e mlo medengei a uldesuel me ngdimlak loukerrekeriil er ngii e bai ulechotii el kmo a rekldemel er a klaumerang a betik a rengrir er ngii. Me a cherengel a taem, e ngika el odam a mlo melechesuar el kmo ngdirk omechei a mekngit el tekoi el dilubech er a uchei me ngmerrob er ngii me lak losiou er ngika el betik er a rengul el Dios. Ngika el chuodel a ullengit er ngii me bo ledak el mo oldingel. Me ngokiu a ngelsuil ngika el chuodel, e ngika el odam a mlo blak a rengul er a omesiungel e a uriul e ngliluut el mo mesiou el ta er a remechuodel.

15. Ngera sebeched el suubii er a Jehovah el kirel a rolel a dolisiich er a remechitechetong a rengrir?

¹⁵ A chad el mechitechetong a rengul a locha diak el mereched el mo ungil a rengul me a lechub e lekengei er a ngelsuid. Nglocha mo kired el di melemolem el melisiich er ngii e le Paulus a dilu el kmo: “Mngesuterir a re mechitechut a rengrir e bo le klou a rengmiu el kirir el rokui.” (1 Th. 5:14) Misei e lak di demereched el meterob el diak dolengeseu er tirke el mechitechetong e bai dolemolem el olengeseu er tir. Sera ngar er a mong, e a Jehovah a uleba kllourreng el kirir tirke el mesiungel el mlo mechitechut a rengrir. El ua tiang, a Dios a kmal mle klou a rengul el bedul a Elias e dirrek el milengull er a uldesuel. Ngmilsang aike el lousbech a Elias me bo el sebechel el melemolem el mesiou er Ngii. (1 Ki. 19:1-18) A Jehovah a dirrek el uluusubes er a David e le nguluuchel er a rengul er a klengit el leriruul. (Psa. 51:7, 17) A Dios a dirrek el ngilsuir ngike el milluches er a Psalm 73, el ngii a di mle kmeed e ngmo diak losiou er Ngii. (Psa. 73:13, 16, 17) A Jehovah a ungil a omerellel e klou a rengul el bedul kid, el ileakl sel taem el lemechitechut a rengud. (Exo. 34:⁠6) A Biblia a melekoi el kmo a klechubechub er a Jehovah a “beches er a bek el tutau” e dirrek el “diak a ulebengelel.” (Kle. 3:22, 23) A Jehovah a mengerechir er kid el mo oltirakl er a kerebil sel dolisiich er a remechitechetong a rengrir.

DEKASISIICH ME DEDAK EL MERAEL ER A RAEL EL MO ER A KLENGAR

16, 17. Ngera kired el meruul er ngii er chelecha el olekedang a ulebongel er tia el beluulechad, e ngera uchul?

¹⁶ Me a rebetok el telael er a chelsir tirke el 33,000 el tilobed er a kelebus er a Sachsenhausen a mlad er sel omerael. Engdi tirke el rokui el 230 el Sioning er a Jehovah el tilobed er tia el kelebus a silobel. Te silobel e le tir el mle kasisiich e kaingeseu er a delongelir.

¹⁷ Chelecha el taem, e kede merael er a “siseball el mor a klengar.” (Mt. 7:14) Ngdi kmedung e tirke el rokui el meluu er a Jehovah a mo suobel e mo kiei er a beches el beluulechad el ngar er ngii a llemalt. (2 Pe. 3:13) Me chelecha el lolekedang a ulebongel er tia el beluulechad er a Satan, e dolemolem el kasisiich e dedak el merael er a rael el mo er a klengar.