Moruul A Tekoi El Oltirakl Er A Nglunguchel A Jesus

1, 2. Ngerang mirruul er ngii a Jesus el obengterir a rechapostol er ngii er a uriul er a Baskua er a rak er a 33?

SEL kesus er a Nisan 14 er a rak er a 33, e a Jesus me tirke el kmal kmeed el sechelil a dirk mlo merek el mengetmokl er a Baskua. Tia el tekoi a ulemeklatk er tir el kirel sel taem el Jehovah a ulsebelterir a rechad er a Israel er a Ekipten. Me nguaisei, engdi a reblak a rengrir el disaiplo er a Jesus a mo mosobel el okiu a lmuut el klou el rolel. Ngar sel ongingil el sils, e a Jesus a bo lokodir a recherrouel. Me a cherrungel el klengar er ngii el letilengetengii a mo uchul e ngsebechir a rokui el chad el mo mimokl er a klengit me a kodall.​—Heb. 9:12-14.

² A Jesus a miluchelii a beches el tekoi el mo mtechir a Baskua el lurruul er ngii er a bek el rak me lak dobes er tia el mekreos el sengk el mla er a Dios. Ngiluu a diak a omkukel el blauang, e ulemached er ngii, e mirrous er ngii el mo er tirke el 11 el blak a rengrir el apostol er ngii. Ngdilu er tir el kmo: “Tia bedengek el mo modars el kiriu. Moruul er ngii el kirel omeltkiu er ngak.” Ngdirrek el uldersii a kob el mla er ngii a bekerekard el bilong e dilu el kmo: “Tial kob a beches el telbilel a Dios el mo mutebechel er a rsechek el mo modars el kiriu.”​—Lk. 22:19, 20.

3. (a) Ngera el klou el omelodech a mlo er ngii er a uriul er a kodellel a Jesus? (b) Ngera el ker a kired el melatk sel dorriter er a nglunguchel a Jesus?

³ Sel taem e a Llach el letilbir a Dios el mo er a rechad er a Israel a kmedu el mo diak a klisichel. Me ngmlo er ngii a beches el telbiil er a delongelel a Jehovah me a rengellitel el chedal a Jesus. Ngii el Jesus a dimlak el soal a rultirakl er ngii a bo el uai a rechad er a Israel, el tir a dimlak el ta rengrir el mengull er a Dios me te mle uchul a otuub el mo er a ngklel. (Jn. 7:45-49; Rel. 23:6-9) Ngkmal mle soal a rultirakl er ngii a bo el ta rengrir el oureor me bo el sebechir el kobkellii a ngklel a Dios. Me ngmilekerang? Ngullengit a ngeso er a Demal el okiu a meringelchad el nglunguuch el ngii a kot el ungil el nglunguuch el sebechel a chad el menguiu er ngii. (Momes er a siasing er a uchelel a suobel.) Tia el nglunguuch a llechukl er a Johanes 17:1-26. Me sel dorriter er tia el nglunguuch, e ngungil a dolatk aika el ker el kmo: “A Dios ngmla onger er a nglunguchel a Jesus? Ngak ak meruul a tekoi el oltirakl er ngii el nglunguuch?”

A TEKOI EL MLE KOT EL KLOU A ULTUTELEL ER A JESUS

4, 5. (a) Ngera kede suubii er a uchelel a nglunguchel a Jesus? (b) Ngera mle nger er a Jehovah el mo er a ongtil a Jesus?

⁴ A Jesus a ullisechakl er a redisaiplo er ngii er a betok el ungil el tekoi el mo osoi. E sola e ulemes el bedul bab e milluluuch el kmo: “Chedam, ng mla mei sel belsechel. Mkebkellii a Ngelekem, ma Ngelekem le kebkellau. Ke milsa klisiich el mengedereder er a rokui el chad, me bo le besterir a diak a ulebengelel klengar tirkel rokui el multerkeklterir er ngii.” Ngdilechelii el kmo: “Ak mla ochotii a klebkellem er a beluulchad e mla rokir sel ureor el mulderchak el me meruul er ngii. Chedam, chelechang e beskak a klebkall er tilechang el cho mngar ngii, el osisiu el klebkall el kulebang e obengkem er uche er a lobeob a beluulchad.”​—Jn. 17:1-5.

⁵ A Jesus a ulemuchel er a nglunguchel el ulemasech a tekoi el mle meklou a ultutelel er ngii. Ngmle kot el klou a ultutelel a lekebkelii a ngklel a Demal, el di ua sera lolisechakl er a redisaiplo er ngii el mo meluluuch. (Lk. 11:2) E a ongerung, e ngdirrek el millatk el kirel aike el lousbech a redisaiplo er ngii. Me ngmilluluuch me “le besterir a diak a ulebengelel klengar.” E a uriul, e ngullengit er a soal el tekoi. Ngullengit el lmuut el mo obengkel a Demal el ngar er a klebkall el lulebang er a uchei er a lobeob a beluulechad. Me a Jehovah a rirengesii a nglunguchel a Ngelekel e milsang a lmuut el betok er aike el lullengit el kirel. Ngmilsang a ngakl el “lmuut el ngarbab er a ngklir” a rokui el anghel.​—Heb. 1:4.

“BO LODENGELKAU EL DI TA EL MERAL DIOS”

6. Ngera mle kirir a rechapostol el meruul er ngii me bo el nguu a diak a ulebengelel el klengar? Kede mekerang e medengei el kmo a rechapostol a mirruul aikang?

⁶ Ngar er a nglunguchel, e a Jesus a dirrek el milsaod el kmo ngera kired el meruul me bo denguu a sengk er a diak a ulebengelel el klengar. (Monguiu er a Johanes 17:3.) Ngdilu el kmo ngkmal kired el mo ungil el medengelii a Dios me a Kristus. Ngmekera doruul er tiang? A kot e ngkired el mo er sel tkurrebab el sebeched el mesuub el mo medengelii a Dios me a Ngelekel. E a ongerung e ngkired el oltaut aike el bla desuub er a klengar er kid. A rechapostol a mla remuul aika el eru el tekoi el ua lulsaod a Jesus er a nglunguchel el kmo: “A tekoi el cho bilskak a bla kbesterir, me te ngiluu.” (Jn. 17:8) Engdi a bo lenguu a diak a ulebengelel el klengar, e ngmle kirir el melemolem el melebedebek a Tekingel a Dios e oltaut er a klengar er tir. Me tirka el blak a rengrir el apostol te di millemolem el meruul er tiang? Ochoi. Kede medengelii tiang e le derta er tir a llechukl a ngklir er aike el 12 el omekedecheraol el bad el ngar er a Beches el Jerusalem.​—Och. 21:14.

7. Ngera belkul a bo dungil el medengelii a Dios? E ngera uchul me ngklou a ultutelel?

⁷ A lsekum e ngsoad el kiei el mo cherechar, e ngkmal kired el mo ungil el medengelii a Dios. E tia ngera belkul? Ngkired el melemolem el mesuub a lmuut el betok el kirel a Dios. El belkul a kmo ngdiak di dosuub el kirel a blekerdelel me a moktek er ngii e lemerekong. Ngdirrek el kirel el mo dmolech a bltkil a rengud el bedul ngii e mo er ngii a kmes el deleuill er kid el obengkel, e olecholt a bltikerreng el mo er a rudam me a rudos er kid. A Biblia a mesaod el kmo: “Ngikel diak loubltikerreng a diak lodengelii a Dios.” (1 Jn. 4:8) A bo dungil el medengelii a Dios e ngdirrek el kired el mo olengesenges er ngii. (Monguiu er a 1 Johanes 2:3-5.) Ngileakl el techall a dobang a lsekum e kede mo ungil el medengelii a Jehovah! Engdi ngkired el mo kerekikl me lak doridii a deleuill er kid el obengkel, el di uai a Judas Iskariot. Me a leuaisei e bo leblak a rengud el melisiich er a deleuill er kid me a Jehovah. A bo doruul el uaisei, e ngmo meskid a kot el ungil el sengk el ngii a diak a ulebengelel el klengar.​—Mt. 24:13.

“MONGKAR ER TIR EL OBA KLISICHEL A NGKLEM”

8, 9. Ngera mle kot el klou a ultutelel el tekoi er a uldesuel a Jesus er a lengar er tia el chutem? E ngera el osisechakl a kmal mle chetil?

⁸ Sel donguiu er a nglunguchel a Jesus el ngar er a 17 el bliongel er a Johanes, e ngouchais el kmo a Jesus a kmal mle betik a rengul er a rechapostol er ngii e dirrek el mle betik a rengul er kid. (Jn. 17:20) Me nguaisei, engdi a osebelel a klengar er kid a dimlak el sel kot el klou a ultutelel el tekoi er a uldesuel a Jesus. Sera lengar er tia el chutem, e ngulemes er a omengebkellel a ngklel a Demal el kot el klou a ultutelel el tekoi. El uai tiang, a Jesus er a lekot el mesaod er a uchul me ngmlei er tia el chutem, e ngmilenguiu er a babier er a Isaia el kmo: “A Reng er a Rubak el Dios a ngar ngak. Ng mla ngiltak e oderchak el oba ungil chais el mor a re mechebuul.” Ngulterekokl a rengud el kmo a Jesus er a longuiu er tiang, e ngdillii a ngklel a Dios.​—Lk. 4:16-21.a

⁹ Kemanget el taem er a uchei er a lemei er a chutem a Jesus, e a remengeteklel a klechelid er a Judea a ullisechakl er a rechad el mo diak lousbech er a ngklel a Dios. Ngulterekokl a rengud el kmo a Jesus a kmal mle chetil tia el tekoi. Ngdilu er tirka el mengeteklel a klechelid el kmo: “Ak mlei loba ngklel a Demak, e kemiu a diak mngikak; e a kmo ngngarngii a ngodech el mei loba di ngklel e kom nguu.” (Jn. 5:43, BT) E a sesei el klebesei er a uchei er a lemad, e ngliluut el mesaod er sel kot el klou a ultutelel el tekoi er a rengul er a loluluuch el kmo: “Chedam, mkebkellii a ngklem!” (Jn. 12:28) Ngdirrek el ngar tia el nglunguuch el dosaod er ngii, e ngbleketakl el kmo a kot el klou a ultutelel el tekoi er a klengar er a Jesus a omengebkellel a ngklel a Demal.

10, 11. (a) Ngmilekerang a Jesus e ochotii a ngklel a Demal? (b) E ngera uchul me a redisaiplo er a Jesus a olecholt er a ngklel a Jehovah?

¹⁰ A Jesus a milluluuch el kmo: “Ak mla ochotau [me a lechub “ochotii a ngklem,” BT] er tirkel mngilititerir er a beluulchad el multerkeklterir er ngak. Te mle chedam me ke mla oterekeklterir er ngak. Tullab a tekingem. Chelechang e ak ekor kau me ng mo diak kngar a beluulchad, ngdi tir a dirk ngar a beluulchad. Chedaol Chedam, mongkar er tir el oba klisichel a ngklem, ngii el ngklem el bilskak, me di bo le tang el ua kau me ngak el di tang.”​—Jn. 17:6, 11.

¹¹ A Jesus er sera lochotii a ngklel a demal el mo er a redisaiplo er ngii, e ngdimlak di lousbech er a ngklel e lemerekong. Ngdirrek el ngilsuterir el mo ungil medengelii a Jehovah, el uldimukl er aike el ungil el blekerdelel me a bltikerreng el lolecholt el mei er kid. (Exo. 34:5-7) Chelechang e a Jesus a King el ngar er a eanged, e melemolem el olengeseu er a redisaiplo er ngii el mo olecholt er a ngklel a Jehovah er a beluulechad el rokir. E ngera uchul me tia el ureor a meketmeklang? Ngmo ngosuterir a rebetok el mo medengelii a Jehovah er a uchei er a lemei a ulebongel er tia el mekngit el blekeradel. E sel lemei sel taem, e ngmo olsobel er a reblak a rengrir el mesiungel, me a rokui el chad a mo medengelii a ngklel a Jehovah!​—Ese. 36:23.

“ME BO LOUMERA BELUULCHAD”

12. Ngera el edei el tekoi a kired el mo meruul me derekir tia el ureor el lulemuchel er ngii a Jesus?

¹² A Jesus a milengelechel er a redisaiplo er ngii el mo merekui er a ureor el ngii a miluchelii. Ngmilluluuch el kmo: “Ak uleldurech er tir el mor a beluulchad, el di ua ser cho moldurech er ngak el mer a beluulchad.” Engdi ngmle medengei el kmo te uluusbech a ngeso el meruul er tia el ureor. Me sera lobengterir, e ngmle blak a rengul el olengeseu er tir el mo mesisiich er aike el chelitecheterir. Me ngar er a nglunguchel, e ngullengit er a Jehovah me lengesuterir el mo meruul a edei el meklou a ultutelel el tekoi. A kot, e ngullengit me a redisaiplo er ngii bo lak el chedal tia el beluulechad er a Satan. E a ongerung, e ngullengit me a redisaiplo er ngii bo lolengesenges er a Tekingel a Dios e bo lechedaol. E a ongedei, e ngullengit me bo el sebechir el mo tang el uai ngii me a Demal el tang. Me ngungil a di lekid el oker el kmo, ‘Ngak ak meruul aika el edei el tekoi el medung er a nglunguchel a Jesus?’ A Jesus a mle ulterekokl a rengul el kmo a lsekum a redisaiplo er ngii a mo meruul aika el tekoi, e a rebetok el chad a mo kongei er tia el klumech.​—Monguiu er a Johanes 17:15-21.

13. Ngmilekerang a Jehovah er a longer er a nglunguchel a Jesus?

¹³ Sel dosuub er a babier er a Rellir a re Apostol, e kede mesa el kmo a Jehovah a ulenger er a nglunguchel a Jesus. A Rekristiano er sel taem a mle uldimukl er a Rechijudea me a Rechisentael, me a remerau me a remechebuul, me a resibai me a rechad el uluusibai. Me ngmle sebechel el mo er ngii a klou el klekakeakl er a delongelir, engdi a kltarreng er tir a uchul me a apostol el Paulus a ulemekesiu er tir el mo er a kakerous el klekedellel a bedengel a chad el Jesus a bdelul. (Efe. 4:15, 16) Ngar er a beluulechad er a Satan el klou a klekakeakl er a chelsel, e ngdi uleak a klisichel a Jehovah e ngmle sebechel el meteketek a kltarreng.​—1 Ko. 3:5-7.

14. Ngmekerang e mla monger a nglunguchel a Jesus er chelechang?

¹⁴ Ngklengiterreng, e le ngmlo diak a kltarreng er a rechad er a uriul er a kodellir a rechapostol, e le nguleberk a klsuul el osisechakl er a chelsel a ongdibel, el mlo uchul a klekakeakl. (Rel. 20:29, 30) Engdi sera rak er a 1919, e a Jesus a ultebedeterir a rengellitel el Kristiano me ngmlo diak el chederedall er a klsuul el klechelid e milengudel er tir “el kmal mo ungil el uldak.” (Kol. 3:14) Me ngera mlo rsel a ureor er a berkel a klumech el lurruul er ngii el oba kltarreng? Chelecha el taem e a kuk betok er a euid el miliol el chad er a “bek el beluu, ma kebliil, ma bek el bedengir a re chad, ma omelekoi,” a oba kltarreng el mengull er a Jehovah el obengterir a rengellitel. (Jn. 10:16; Och. 7:9) Tiang a mera el mengasireng el nger er a Jehovah el mo er a Jesus er a loluluuch el kmo, “ma beluulchad bo lodengei el kmo kulderchak e betik a rengum er tir el di ua bltkil a rengum er ngak”!​—Jn. 17:23.

A ULEBENGELEL A NGLUNGUCHEL A JESUS

15. Ngera el ileakl el ongit a lerirellii a Jesus el kirir a rengellitel el chedal?

¹⁵ Uchei er a loluluuch a Jesus er sel kesus er a Nisan 14, e ngmilengebkall er a rechapostol er ngii el rirellii a telbiil el kmo te mo mengedereder er a Rengedel el obengkel. (Lk. 22:28-30; Jn. 17:22) Me a Jesus a milluluuch el kirir tirke el rokui el mo ngellitel el chedal el kmo: “Chedam, ke ngilititerir el meskak, me ng soak a bo lobengkek el ngar sel kngar ngii, me bo lesa sel klebkellek el bilskak; ele ng mle betik a rengum er ngak er uchei er a lobeob a beluulchad.” (Jn. 17:24) A rekuk bebil el sib a diak lemechechei e te bai dmeu a rengrir el kirel a omeksaul el bo lenguu a rengellitel. Tiang a dirrek el ochotii el kmo a remera el Kristiano er chelechang a ngar er ngii a kltarreng er a delongelir.

16, 17. (a) Ngar er a ulebengelel a nglunguchel, e a Jesus ngdilu el kmo ngmo melemolem el meruul a ngerang? (b) E ngera kired el melemolem el meruul er ngii?

¹⁶ A ruumesingd el chad a diak lekengei el kmo te ngar er ngii a rechad el mera el ngar er a kltarreng e ungil el medengelii a Jehovah. E tia blechoel el mo uaisei e le remengeteklel a klechelid er tir a olisechakl a blulak el tekoi el kirel. Tia el tekoi a dirrek el dilubech er a taem er a Jesus. Me ngar er a ulebengelel a nglunguchel e ngdilu el kmo: “Melemalt el Chedam, a beluulchad a diak lodengelkau, ngdi ngak a medengelkau, me tirkang a medengei el kmo kau a ulderchak el mei. Ak mla ochotau er tir e mo melemolem el olecholt er kau er tir, me bo le betik a rengrir er a re chad el ua ikau el betik a rengum er ngak, me ngak mak dirrek el obengterir.”​—Jn. 17:25, 26.

¹⁷ A Jesus a mera el mla ochotii a ngklel a Demal. E chelechang e ng Bdelul a ongdibel e melemolem el olengeseu er kid el mo olecholt er a ngklel a Demal me a moktek er Ngii el mo er a rechad. Me a leuaisei e bo dolengesenges a ulekrael er a Jesus e leblak a rengud el lomerk er a klumech e doruul er a remo disaiplo. (Mt. 28:19, 20; Rel. 10:42) Ngdirrek el kired el mo blak a rengud el melisiich er a kltarreng er a delongeled kid el chedal a Dios. A bo deuaisei e kede meruul a tekoi el oltirakl er a nglunguchel a Jesus. Tiang a mo uchul e kede kobkellii a ngklel a Jehovah e mo dmeu a rengud el diak a ulebengelel.