Ngklel a Jehovah​—Belkul el Mora Jesus

1-2. (a) Ngerang ngmirruul er ngii a Jesus er sel kesus er a uchei er a lokodir? (b) Ngera el ker a bo dosaod er tia el suobel?

NG THURSDAY er a kebesengei er a Nisan 14, 33 C.E. A Jesus a di kmedung e te mo oterur, oukerrekeriil er ngii, otelecheklii, omekcharm er ngii, e mekodir. Ngkmal dirk mlo merek el meruul er a ileakl el blengur er a delemerab er bab lobengterir a reblak a rengrir el apostol er ngii. Ngmocha omesterir rechapostol er ngii a ulebongel el tekingel el melisiich er tir. E a uchei er a letobed er tia el delemerab er bab e a Jesus a mocha stob e dulii a kmal klou a ultutelel el nglunguuch. A apostol Johanes a lilechesii tia el nglunguuch el sebeched el metik er ngii er a 17 el bliongel er a Johanes.

² Ngera ngochotii er kid tia el nglunguuch el kirel a mlara uldesuel a Jesus er tiakid el taem? Ngmekera tia el nglunguuch e ochotii sel mle kot el klou a ultutelel er a Jesus er a lengar tia el chutem? Ka me dosaod a nger er aika el ker.

“KMLA OCHOTII A NGKLEM ER TIR”

3. Ngera ngdilu Jesus el kirel a ngklel a Jehovah, e ngera mle belkul a tekingel? (Johanes 17:6, 26, BT)

³ A Jesus a dilu el ngar er a nglunguchel el kmo: “Kmla ochotii a ngklem er tir.” Kede medengei el kmo tia kmal mle klou a ultutelel er ngii e le ngmle eru el taem el ledu el uaisei. (Monguiu er a Johanes 17:6, 26, BT.a) Ngngera mle belkul a tekingel? A Jesus nguluuchais er tir er a ngakl el dimlak lodengelii? A redisaiplo er a Jesus a mle Chijudea me te mle medengei el kmo a ngklel a Dios a Jehovah. Tia el ngakl a sebeched el metik er ngii el betok el telael el taem er aike el Bades el tekoi er a Hebru. Me a Jesus a dimlak losaod er a ngakl el loungakl er ngii a Dios, ngbai milsaod er a lomtechei er ngii tia el ngakl. A Jesus ulechotii ngike el chad loungakl er a ngakl el Jehovah, el luldimukl er a moktek er ngii, omerellel, me a blekerdelel el ngar er a rolel el diak el sebechel a ngii di el chad el rullii.

4-5. (a) Ka momekesiu er a belkul a bo dodengelii a ngklel a chad. (b) Ngoeak a ngera el rolel e a redisaiplo er a Jesus a mlo medengelii a ngklel a Jehovah?

⁴ Ngsebeched el lomekesiu er ngii er tiang. Kam imagine el kmo ngngar ngii a ta er a remechuodel er a ongdibel er kau el ngklel a David el toktang er a botk. Ngmla mo betok el rak el modengelii. Me nguaisei engdi a ta er a klebesei e ngdilubech el mo er kau a emergency er a tekoi er a ukeruul. Te di mle mereched el ngoikau el mo er tia el osbitar loureor er ngii a odam me ngii el toktang el lodam a osebelii a klengar er kau. Me a ngklel ngika el odam ngmla lmuut el mo dmolech a belkul er kau? Chochoi! A David a mla mo diak di leta er a remechuodel el modengelii ngdirrek el mla mo toktang el ulsebelau.

⁵ Ngdi osisiu, a redisaiplo er a Jesus a mle medengelii a ngklel a Jehovah. Me nguaisei engdi tia el ngakl a liluut el mo dmolech a belkul er tir er a temel omesiungel a Jesus. Ngera uchul me ngsebeched el melekoi el uaisei? E le Jesus uluukerebai er a Demal er a rokui el omerellel me a tekingel. Me a rechapostol a mlo ungil ‘medengelii’ a Jehovah er a lorrenges er a rolel a losisechakl a Jesus e lomes omerellel el mora rechad.​—Jn. 14:9; 17:3.

“NGII EL NGKLEM EL BILSKAK”

6. Ngoeak a ngera el rolel e a Jehovah a milsang a ngklel er a Jesus? (Johanes 17:11, 12)

⁶ Ngar er a nglunguchel a Jesus e ngmilluluuch el kirir a redisaiplo er ngii el kmo: “Mongkar er tir el oba klisichel a ngklem, ngii el ngklem el bilskak.” (Monguiu er a Johanes 17:11, 12.) Tia ngbelkul a kmo a Jesus a bocha domekedong er ngii el Jehovah? Ngdiak. Mutebengii el kmo a Jesus a mesaod el kirel a ngakl el Jehovah el kmo “a ngklem.” Me a ngklel a Jehovah dimlak lebo el ngklel a Jesus. Me ngngera mle belkul a tekingel a Jesus er a ledu el kmo a ngklel a Dios a lebilsang? A kot e a Jesus a ulemtechei er a Jehovah e mle melekingel. Ngmlei loba ngklel a Demal e mirruul a ongasireng lokiu a ngklel. (Jn. 5:43, BT; 10:25, BT) Me a lmuut kung, a belkul a ngakl el Jesus a “A Jehovah Osobel.” Chochoi a belkul a ngklel a Jesus ulekuak er a ngakl el Jehovah.

7. Momekesiu er a uchul me a Jesus a sebechel mengedecheduch el ngar er a ngklel a Jehovah.

⁷ Ngsebeched lomekesiu er ngii er a ambassador el omtechei er a merreder me nglocha mo mengedecheduch el ngar er a ngklel a merreder. Me sel longedecheduch a ambassador e ngoba klisichel a merreder. Ngdi osisiu a Jesus a ulemtechei er a Jehovah me milengedecheduch er a rechad el ngar er a ngklel.​—Mt. 21:9; Lk. 13:35.

8. Ngmilekera Jesus e “oba” ngklel a Jehovah er a uchei er a lemei er a chutem? (Exodus 23:20, 21)

⁸ Ngoeak a ngerechelel el Tekoi e a Jesus a uluureor el melekingel a Jehovah loeak a louchais a tekoi me a ulekrael el mo er tirke el lmuut el bebil er a anghel el ngelekel a Dios me a dirrek el rechad. (Jn. 1:1-3) A Jesus a ulterekokl el ngike el anghel el Jehovah ulderchii el mo omekerreu er a rechad er a Israel er a lengar er a ked. A Jehovah er a ledu er a rechad er a Israel me lorrenges er ngika el anghel e ngdilu er tir el kmo: “Ele ng oba ngklek.”b (Monguiu er a Exodus 23:20, 21.) Me a Jesus uleba ngklel a Jehovah e le ngmilengedecheduch el kirel e ngike el kot el ngarbab el lochotii el kmo a rokui el tekoi el loruul a Jehovah melemalt me ngii a chedaol.

“CHEDAM, MKEBKELLII A NGKLEM”

9. Ngmle uangerang a klungel a ultutelel a ngklel a Jehovah el mora Jesus? Mosaod.

⁹ Ngua bla dosaod, mo lmuut er a uchei er a lemei er tia el chutem a Jesus me a ngklel a Jehovah kmal mle klou a ultutelel er ngii. Me ngdiak lemechas a rengud er ngii er a lengar tia el chutem el rokui el tekoi el lurruul a mle ulekuak er a ngklel a Jehovah! Ngar er a mocha ulebongel er a omesiungel a Jesus er tia el chutem e ngullengit er a Jehovah el kmo: “Chedam, mkebkellii a ngklem!” Me a Demal a di mle mereched longer er ngii loeak a klou el ngor er a eanged el kmo: “Ak mla kobkellii e lmuut el mo kobkellii.”​—Jn. 12:28.

10-11. (a) Ngera uchul me a Jesus a milengebkall er a ngklel a Jehovah? (Dirrek el momes er a siasing.) (b) Ngera uchul me a ngklel a Jehovah kirel mechedaol e mesebechakl?

¹⁰ A Jesus a dirrek el milengebkall er a ngklel a Demal. Ngoeak a ngera el rolel? A ta er ngii a nguluuchais a kmal ungil blekerdelel a Demal me a mengasireng el lomerellel el mora rebebil. Me nguaisei nglmuut el betok a mle uldimukl er a dongebkall er tia el ngakl. A ngklel a Jehovah mle kirel mechedaol me a chisel le mesebechakl.c A Jesus a ulechotii a klungel a ultutelel tiang er a lolisechakl er a rultirakl er ngii er a delal a nglunguuch. Ngdilu el kmo: “Demmam el ngar a eanged: Bo le modanges a chedaol ngklem.”​—Mt. 6:9.

¹¹ Ngera uchul me a ngklel a Jehovah kirel mechedaol e mesebechakl? E le Satan ultubii a Jehovah er a sers er a Eden. A Satan a dilu el kmo a Jehovah a bulak e orreked a ungil er a Adam me a Eva. (Gen. 3:1-5) A Satan a dirrek el ua lullekoi el kmo a rolel a loruul a tekoi a Jehovah a diak el melemalt. Me aika el blulekngel a Satan a millemall er a chisel me a lechub e ngklel a Jehovah. Uriul er a taem er a Job e a Satan a dilu el kmo tirke el mesiou er a Jehovah a di mesiou er ngii le ngngar ngii a lengai er ngii. Ngika el bulak a dirrek el dilu el kmo ngdiak a chad el mera el betik a rengul er a Jehovah, te mo stob el mesiou er ngii sel bo lechebangel a ringel. (Job 1:9-11; 2:4) Nguluusbech a taem el mo ochotii el kmo ngtecha bulak, ng Jehovah me a lechub e ng Satan.

“KMENGKENGKII A KLENGAR ER NGAK”

12. Ngera ngmle kongei el meruul er ngii a Jesus le ngii el kmal betik a rengul er a ngklel a Jehovah?

¹² Bltkil a rengul a Jesus el mora Jehovah a uchul me ngmle soal meruul aike el rokui el sebechel el mo mengedaol e mesebechakl er a ngklel a Jehovah. Ngdilu el kmo: “Kmengkengkii a klengar er ngak.” (Jn. 10:17, 18, BT) Chochoi, ngkilengei el mad el kirel a ngklel a Jehovah.d Tirke el teru el kot el mecherrungel el chad el Adam me a Eva ultngeklii a Jehovah e mlo obengkel a Satan. Engdi a Jesus a kilengei el mei er a chutem el mo ochotii a bltkil a rengul el mora Jehovah. A Jesus a ulechotii tiang er a lolengesenges er a Jehovah er a rokui el omerellel me a tekingel. (Heb. 4:15; 5:7-10) Klengar er ngii el rokir e ngmillemolem el loba blakerreng el mora lemad er a teluo el kerrekar. (Heb. 12:2, NW) Ngoeak tia el rolel e ngmileketeklii a bltkil a rengul el mora Jehovah me a ngklel.

13. Ngera uchul me a Jesus ngike el best el chad lomeketakl el kmo a Satan a bulak? (Dirrek el momes er a siasing.)

¹³ Ngoeak a klengar er a Jesus e ngulechotii el kmo a Satan a bulak ngdiak el Jehovah! (Jn. 8:44) A Jesus a mle ungil medengelii a Jehovah el ngaruchei er a ngii di el chad. Me a lsekum e ngmla er ngii a chimo el klemerang er a ultelecheklel a Satan el mora Jehovah e a Jesus medengei el kirel. Engdi Jesus a millemolem el blak a rengul el mesebechakl er a ngklel me a lechub e ngchisel a Jehovah. Mo lmuut me a lekora teletelel a kmo a Jehovah a mla choitii, me nguaisei engdi a Jesus a kilengei el mad er a bai lotngeklii a betik er a rengul el Demal.​—Mt. 27:46.e

“AK . . . MLA ROKIR SEL UREOR EL MULDERCHAK EL ME MERUUL ER NGII”

14. Ngmilekera Jehovah e omekngeltengat er a blakerreng er a Jesus?

¹⁴ Ngar er a nglunguchel a Jesus er sel kesus er a uchei er a lemad e ngmle sebechel melekoi el kmo: “Ak . . . mla rokir sel ureor el mulderchak el me meruul er ngii.” Nguluumerang el kmo a Jehovah a mo omekngeltengat er a blakerreng er ngii. (Jn. 17:4, 5) Me a klaumerang er ngii er a Demal a dimlak el cheleuid. A Jehovah dimlak lebecherei me lolemolem el ngar er a debull. (Rel. 2:23, 24) Ngulekisii a Jesus er a kodall e milsang sel kot el ngarbab el deruchall er a eanged. (Fil. 2:8, 9) Cherengel a taem e a Jesus a mlo King er a Rengedel a Dios. Ngera ngmo kutmokl tia el Renged? A ongeru el telengtengil a delal a nglunguuch a kmo: “Bo le motaut a soam [e Jehovah] er a beluulchad el ua ingii er a eanged.”​—Mt. 6:10.

15. Ngera ngdirrek el mo kutmokl a Jesus?

¹⁵ Ngdi kmedung e a Jesus a mo oumekemad er a recherrouel a Dios e okngemedeterir tirke el rokui el mekngit er a Armakedon. (Och. 16:14, 16; 19:11-16) Kedeb el taem er uriul er tiang e ngmo mideklii a Satan er a “diak a btil deliobech” me ngmo kelebus el diak el sebechel mekerang. (Och. 20:1-3) A Jesus a lmuut el mo toketekii a budech me a chelerrungel er a Ta el Telael el Rak el Omerrederel. Ngmo olekiis er a rulekoad. Ngmo rullii a beluulechad el rokir el mo baradis. Ngmo otutii a moktek er a Jehovah!​—Och. 21:1-4.

16. Ngera mo meketmokl er a ulebengelel a Ta el Telael el Rak er Omerreder?

¹⁶ Ngera sebeched el expect er ngii er a ulebengelel a Ta el Telael el Rak er Omerreder? Ngmo diak a klengit me a chelitecheterir a rechad. A rechad a mo diak lousbech lolengit a klausubes er a kngterir loeak a olubet me a lechub e lousbech er a melekingir me a kleprist. Me a “cherarou el kmal mo uriul el bo lokngemedii, a kodall.” Ngmo bechachau a debull. A rulekoad a mo mekiis. Me a rokui el chad er a beluulechad a mo mecherrungel.​—1 Ko. 15:25, 26.

17-18. (a) Ngera mo duubech er a ulebengelel a Ta el Telael el Rak er Omerreder? (b) Ngera ngmo meruul er ngii a Jesus sel lebo lemerek a temel omengederederel? (1 Korinth 15:24, 28) (Dirrek el momes er a siasing.)

¹⁷ Ngera dirrek el mo meketmokl er a ulebengelel a Ta el Telael el Rak er Omerreder? Ngngar ngii a kmal ileakl el tekoi el mo duubech. Ngmo merek a mondai el kirel a cheledolel a ngklel a Jehovah. Ngmekera e uaisei? A Satan a dilu er a sers er a Eden el kmo a Jehovah bulak e diak longedereder er a rechad loeak a bltikerreng. Seikid el taem el mei e a ngklel a mla mechedaol el betok el taem loeak tirke el oldanges e mengull er ngii. Me a ulebengelel a Ta el Telael el Rak er Omerreder e a chisel a Jehovah mecherrungel a osebecheklel. A Jehovah mo meketeklii el kmo ngbetik a rengul el Chedam el ngar er a eanged el diak a klaumededenger el kirel.

¹⁸ Me a blulekngel a Satan a mo obeketakl el diak a ulebengelel. Ngera ngmo meruul er ngii a Jesus sel lebo lemerek a temel omengederederel? Ngmo oltirakl er a Satan e mo omtok er a Jehovah? Ngdiak! (Monguiu er a 1 Korinth 15:24, 28.) A Jesus a mo lmuut el lolutii a Renged el mora Demal. Ngmo ngar cheungel omengederederel a Jehovah. Chochoi, a Jesus a diak el ua Satan e le ngkongei el give up aika el rokui e le ngbetik a rengul er a Jehovah. E sel bo lokngemedii a Satan e a ngklel a Jehovah mo mechedaol e mosebechakl el diak a ulebengelel.

19. A ngklel a Jehovah ngngera belkul el mora Jesus?

¹⁹ Me ngdiak lemechas a rengud er a Jehovah el kilengei el nguu a ngklel el msa Jesus! A Jesus a mla ochotii el kmo ngmla cherrungel lochotii a Demal. Me a ngklel a Jehovah ngngera belkul el mora Jesus? Nglmuut el klou a ultutelel er a Jesus el ngaruchei er a ngii di el tekoi. Ngkilengei el mad el kirel tia el ngakl, e kongei el loluut a rokui el tekoi el mora Jehovah er a ulebengelel a Ta el Telael el Rak er Omerreder. Ngmekera sebeched el loukerebai er a Jesus? Kede mo mesaod er tia el ker er a ongingil el suobel.