Ngklel a Jehovah​—Kirel Belkul el Mei er Kid

1-2. Kede mekerang e medengei el kmo a ngklel a Jehovah a kmal klou a ultutelel er a Jesus?

NGDIAK a lmuut el klou a ultutelel er a Jesus el ua ngklel a Jehovah. E diak a mla remuul a lmuut el betok er ngii el lolecholt er a ngklel a Demal. Ngua dulsaod er ngii er a uleak uchei el suobel, a Jesus a kilengei el mo mad el kirel a ngklel a Jehovah me aike el rokui el lomtechei er ngii tia el ngakl. (Mk. 14:36; Heb. 10:7-9) E a uriul er a Ta el Telael el Rak er Omerreder e a Jesus a mo lmuut el loluut a rokui el klisiich el mora Demal el mengedaol er a ngklel. (1 Ko. 15:26-28) A bltkil a rengul a Jesus el kirel a ngklel a Dios a dirrek el locholt a betok el kirel a deleuill er ngii me a Demal. Ngochotii el kmo a Jesus a kmal betik a rengul er ngike el Chad loungakl er tia el ngakl.

² A Jesus a mlei er a chutem loba ngklel a Demal. (Jn. 5:43; 12:13) Ngullecholt er a ngklel a Demal el mora rultirakl er ngii. (Jn. 17:6, 26) Ngullisechakl e meruul ongasireng loba ngklel a Jehovah. (Jn. 10:25, BT) E sera loluluuch el mora Jehovah lolengit er ngii me longkar er a redisaiplo er ngii e ngullengit el kmo loruul er ngii el “[ngklel] a uchul.” (Jn. 17:11, NW) Me ngbleketakl el kmo ngdiak a klou a ultutelel er a Jesus el ua ngklel a Jehovah. Me ngmekera chad e sebechel el melekoi el kmo ngoltirakl er a Jesus engdi ngdiak lodengelii me a lechub e ngdiak lousbech er a ngklel a Demal?

3. Ngera kede mo mesaod er tia el suobel?

³ Kid a Rekristiano a melasem el loltirakl er a ultil ochil a Jesus a uchul me kede omes er a ngklel a Demal el kmal mekreos. (1 Pe. 2:21, BT) Ngar tia el suobel e kede mo mesa rolel e a Jehovah omngakl er tirke el omerk er a “ungil chais el kirel a Renged” loba ngklel. (Mt. 24:14, NW) Kede dirrek el mo mesaod er a kirel mo belkul a ngklel a Jehovah el mei er a rederta me a rederta er kid.

“A RECHAD EL KIREL A NGKLEL”

4. (a) A Jesus er a uchei er a lluut el mora eanged e ngerang ngdilu er a redisaiplo er ngii? (b) Me ngngera el ker a duubech?

⁴ A uchei er a lluut el mora eanged a Jesus e ngdilu er a redisaiplo er ngii el kmo: “Sel le mer kemiu a Chedaol Reng, e ng mor ngii a klisichiu, me kom mo ochotek er a Jerusalem, ma Judea el rokir, ma Samaria, el mo lmuut er a bek el beluu er a beluulchad.” (Rel. 1:8) Me a ungil chais a mo oberk er a diak di el chelsel a Israel. Cherengel a taem e a rechad er a rokui el renged a mo er ngii a techellir el mo oltirakl er a Jesus. (Mt. 28:19, 20) Engdi a Jesus a dilu el kmo: “Kom mo ochotek.” Me tirka el beches el disaiplo te ousbech el mo medengelii a ngklel a Jehovah me a lechub te di mo ochotel a Jesus me a lechub ngsioning er ngii? A tekoi el dilubech el losaod er ngii a 15 el bliongel er a Rellir a mo ngosukid el longer er tia el ker.

5. Te milekera rechapostol me a remechuodel er a Jerusalem e ochotii el kmo a rokui el chad a kirir el mo medengelii a ngklel a Jehovah? (Dirrek el momes er a siasing.)

⁵ A 49 C.E., e a rechapostol me a remechuodel er a Jerusalem a mlo kldibel el mo mesaod el kmo a Rechisentael ngkirir el lobotk e mo sebechir el mo Kristiano. A ulebengelel tia el ongdibel e a Jakobus el half el ochellel a Jesus a dilu el kmo: “A [Petrus] a mla smodii el kmo a Dios a ketengel el meltii osengel el mora ike el renged el melai er a delongelir a rechad el kirel a ngklel.” A Jakobus ngmesaod er a ngklel techang? Ngmle quote a tekingel a profet Amos el kmo: “Me tirke el chad el mlo medechel bo leblak a rengrir el osiik er a Jehovah, lobengterir a rechad er a rokui el renged, el rechad el lomekedong er tir loba ngklek, aika tekingel a Jehovah.” (Rel. 15:14-18, NW) Me tirka el beches el disaiplo a diak el bo lodengelii a Jehovah te dirrek el bo ‘lomekedong er tir loba ngklel.’ Tia belkul a kmo te mo ouchais er a ngklel a Dios el mora rechad me a rechad a mo medengelterir lokiu tia el ngakl.

6-7. (a) Ngera uchul me a Jesus a mlei er tia el chutem? (b) Ngera lmuut el klou a ultutelel el luchul me a Jesus a mlei er tia el chutem?

⁶ A belkul a ngklel a Jesus a “A Jehovah Osobel” me a Jehovah uluusbech er ngii el lolsobel er tirke el ochotii a klaumerang. A Jesus a mlei er tia el chutem el odersii a klengar er ngii el kirir a rechad. (Mt. 20:28) Sera lekekedir olubet e ngmilsterir a rechad a techall el mo suobel e nguu a diak a ulebengelel el klengar.​—Jn. 3:16.

⁷ Engdi ngera uchul me a rechad a ousbech er a osobel? Ngtekoi el dilubech er a sers er a Eden a uchul. Ngua losaod er ngii a uleak uchei el suobel, a rekot el demad me a delad er a Adam me a Eva a mlo omtok er a Jehovah e urridii a techall el kiei el mo cherechar. (Gen. 3:6, 24) Me nguaisei, engdi tia dirrek el mle uldimukl er a tekoi el lmuut el klou a ultutelel er a osebelir a rediak el mecherrungel el chad. A ngklel a Jehovah a mlotuub. (Gen. 3:4, 5) Me a osebelir a ruldidellel a rsechel a Adam me a Eva a mle ulekuak er a lmuut el klou a ultutelel el tekoi el ngii a omengedolel a ngklel a Jehovah. A Jesus el uleba ngklel a Jehovah e ullecholt er a ngklel a uchul me ngkmal klou a ultutelel el part er a omengedolel a ngklel a Jehovah.

8. Ngera kirir a rokui el oltirakl er a Jesus el mo medengelii?

⁸ Rokui el oltirakl er a Jesus el Rechijudea me a Rechisentael a kirir el mo medengei el kmo ngike el luchul a osebelir a Demal a Jesus el Jehovah el Dios. (Jn. 17:3) Me a lmuut kung, te di ua Jesus el bo lomekedong er tir el loba ngklel a Jehovah. Te dirrek el kirir el mo medengelii a klungel a ultutelel a dongedaol er tia el ngakl. A osebelir a ultuil er ngii. (Rel. 2:21, 22, BT) Me a rokui el blak a rengrir el loltirakl er a Jesus a mle kirir el mo medengelii a Jehovah me a Jesus. Tiakid a uchul me ngdiak lemechas a rengud er a Jesus el rirekir a nglunguchel el debetik er ngii er a Johanes 17 el kmo: “Kmla ochotii a ngklem er tir, e lmuut lolecholt er ngii, me sel bltkil a rengum er ngak le bora chelsir, me ngak kngara chelsir.”​—Jn. 17:26, BT.

“KEMIU A SIONING ER NGAK”

9. Ngmekera sebeched el lochotii el kmo a ngklel a Jehovah a klou a ultutelel er kid?

⁹ A rokui el bliochel a rengrir el oltirakl er a Jesus a kirir el semeriar er a omengedolel a ngklel a Jehovah. (Mt. 6:9, 10) Ngkirel a ngklel a Jehovah el mo kot el klou a ultutelel el ngakl er tir. Tia kirel el chemolt er a omerelled. Me ngngera sebeched el meruul el mengedaol er a ngklel a Jehovah e omeketakl el kmo aike el ledilung a Satan el kirel a blulak?

10. Ngera el kerrekeriil a losaod er ngii a 42 el mora 44 el bliongel er a babier er a Isaia? (Isaia 43:9; 44:7-9) (Dirrek el momes er a siasing.)

¹⁰ A 42 el mora 44 el bliongel er a babier er a Isaia a ochotii a klungel a ultutelel a dongedaol er a ngklel a Jehovah. Aika el bliongel a mesaod er a ua dedu el kmo ngkerrekeriil el kirel a kldios. Ngar tiang e a Jehovah dmu tirka el melekoi el kmo te chelid me lochotii el kmo te mera el chelid el ngar. Ngdirrek loleker er a resioning er tir el mei me locholt a sioko el meketeklii el kmo te mera el ngar ngii. Engdi ngdiak a chad el sebechel!​—Monguiu er a Isaia 43:9; 44:7-9.

11. Ngera ngdmu Jehovah er a Isaia 43:10-13 el mora rechedal?

¹¹ Monguiu er a Isaia 43:10-13. A Jehovah a melekoi er a rechedal el kmo: “Kemiu a sioning er ngak . . . Ngak a Dios.” A Jehovah oker er tir el kmo: “Ng kol ngar ngii a kuk ngodech el dios?” (Isa. 44:8) Kid a ngar ngii a chetengakl el techelled el longer er tiang. Ngoeak a tekinged me a omerelled e kede ochotii el kmo a Jehovah a di ta el mera el Dios. A ngklel a ngarbab er a ngii di el ngakl. Kede ochotii loeak a klengar er kid el kmo ngmera el betik a rengud er a Jehovah e oba blakerreng el mo er ngii mo lmuut me a lemeringel lomekringel er kid a Satan. Ngoeak tiakid el rolel e ngsebeched el lolengeseu el mengedaol er a ngklel.

12. Ngmilekera tmaut a ulaoch el ngar er a Isaia 40:3, 5 (NW)?

¹² Sel dochotii el kmo kede support er a ngklel a Jehovah me a lechub e ngchisel e kede oukerebai er a Jesus Kristus. A Isaia dirrek el ulemlaoch el kmo ngngar ngii a chad el mo ‘dmedesii [me a lechub e ng “kutmeklii,” ftn.] a rael er a Jehovah.’ (Isa. 40:3, NW) Ngmilekera tmaut tia el ulaoch? A Johanes el Chad er a Techolb a kiltmeklii a rael el kirel a Jesus el ngii a mlei el loba ngklel a Jehovah e milengedecheduch loba ngklel a Jehovah. (Mt. 3:3, NW; Mk. 1:2-4, NW; Lk. 3:3-6, NW) Tia el osisiu el ulaoch a dirrek el dilu el kmo: “A klebkellel a [Jehovah] a mo mocholt.” (Isa. 40:5) Ngmekera uaisei? A Jesus er a lemei er tia el chutem e ngkmal mle ungil lochotii a Jehovah me ngua el rengud ng Jehovah ingii a mlei er tia el chutem.​—Jn. 12:45.

13. Ngmekera sebeched el loukerebai er a Jesus?

¹³ Ngdi ua Jesus, kid a sioning er a Jehovah. Kede olecholt er a ngklel e ouchais er a rokui el de meet er tir el kirel a ungil tekoi el bla leruul. Engdi a bo dungil sioning er a Jehovah e ngkired el dirrek el louchais er a rechad er aike el rokui el leriruul a Jesus el mengedaol er a ngklel a Jehovah. (Rel. 1:8) A Jesus ngike el kot el ngarbab el Sioning er a Jehovah me kede oltirakl er a kerebai er ngii. (Och. 1:5) Engdi ngngera kirel belkul a ngklel a Jehovah el mei er a rederta me a rederta er kid?

A BELKUL A NGKLEL A JEHOVAH EL MEI ER KID

14. Ngua losaod er ngii a 1 Korinth 1:31, ngngua ngera uldesued el kirel a ngklel a Jehovah?

¹⁴ Kede proud er a ngklel a Jehovah. (Monguiu er a 1 Korinth 1:31.) A Jehovah kmal mo dmeu a rengul sel doruul a chisel. (Jer. 9:23, 24; 2 Ko. 10:17) Kede omes er ngii el chetengakl el techall el louchais er a rechad el kmo a Jehovah a chedaol me a rokui el tekoi el loruul a melemalt. Ngkmal diak el kired el mo merur el louchais er a rechad el doureor el lobengterir, re classmate er kid, retonari er kid, me a rebebil el kmo kede Sioning er a Jehovah! A Diabelong a soal a destob el louchais er a rechad el kirel a ngklel a Jehovah. (Jer. 11:21; Och. 12:17) Me a Satan me a reklsuul el profet er ngii a sorir el meruul er a rechad el mo obes er a ngklel a Jehovah. (Jer. 23:26, 27) Engdi bltkil a rengud el mora ngklel a Jehovah a uchul me kede oldeu er a rengud er ngii el “ta el sils.”​—Psa. 5:11; 89:16, NW.

15. Ngngera belkul a bo domekedong er a ngklel a Jehovah?

¹⁵ Kede melemolem el omekedong er a ngklel a Jehovah. (Rom 10:13, 14) A omekedong er a ngklel a Jehovah a diak di lolutk el kirel a mo medengelii e ousbech er a ngklel. Kede mo medengelii a Jehovah el kmo ng Dios el ngar ngii a feelings er ngii me a blekerdelel, e sebechel mo er ngii a deleuill er kid el lobengkel. Kede suubii el mo oumerang el ulsirs er ngii, e omes el bedul ngii el kirel a ngeso me a ulekrael. (Psa. 20:7; 99:6; 116:4; 145:18) Kede dirrek el louchais er a ngklel me a blekerdelel el mora rebebil. E mengelechel er tir el mo obult e melodech a blekerdelir me bo lsebechir el nguu a kengei er ngii.​—Isa. 12:4; Rel. 2:21, 38.

16. Ngmekera sebeched el lochotii el kmo a Satan a bulak?

¹⁶ Kede kongei el mo chuarm el kirel a ngklel a Jehovah. (Jak. 5:10, 11) Sel bo dechuarm a ringel e dolemolem el loba blakerreng el mora Jehovah e kede ochotii el kmo a Satan a bulak. A taem er a Job e a Satan dilu el kirir a remesiungel a Jehovah el kmo: “A chad a mo meiubet a rengul er a bek el tekoi el kirel a klengar er ngii me lak le mad.” (Job 2:4) A Satan a millekoi el kmo a rechad a di mesiou er a Jehovah er a chelsel a ungil el taem e mo choitii a Jehovah sel lebo el chebangel a ringel. A Job ulechotii el kmo tia kmal diak el klemerang. Kid me ngdirrek el sebeched el lochotii el kmo mo lmuut me a bo lemeringel a klengar er kid me a lechub a Satan a melasem el mengitechut er kid me ngkmal diak bo dechitii a Jehovah. Ngkmal sebechel mo ulterekokl a rengud el kmo a Jehovah mo melemolem el mengkar er kid el kirel a ngklel.​—Jn. 17:11, NW.

17. Ngua losaod er ngii a 1 Petrus 2:12, ngera lmuut el ta er a rolel e ngsebeched el mengebkall er a ngklel a Jehovah?

¹⁷ Kede ochotii omengull er kid el kirel a ngklel a Jehovah. (Osi. 30:9; Jer. 7:8-11) Kid el lomtechei er a ngklel a Jehovah e ouchais el kirel a ngklel a uchul me ngsebeched el oldanges er a ngklel me a lechub e kede otubii. (Monguiu er a 1 Petrus 2:12.) Me a leuaisei ngsoad el meruul aike el rokui el sebeched el mo oldanges er a Jehovah loeak a tekinged me a omerelled. Ngoeak tiakid el rolel e kede mengebkall er a ngklel el mo er sel kot el tkurrebab el klisiched alta ngdiak demecherrungel.

18. Ngera lmuut el ta er a rolel e ngsebeched lochotii el kmo ngklou a ultutelel er kid a ngklel a Jehovah? (Dirrek el momes er a footnote.)

¹⁸ Kede feel el kmo a ngklel a Jehovah lmuut el klou a ultutelel er a uldesuir a rechad el kired. (Psa. 138:2) Ngera uchul me tia kmal klou a ultutelel? E le bltkil a rengud el mora ngklel a Jehovah a sebechel tomellii a chised er tirke el meliuekl er kid.a A Jesus a kilengei el mo mad er a omekrur el kodall el dengerenger el chad me le mukebkall a ngklel a Jehovah. “Ng dimlak a belkul er ngii a rrengel” me a lechub e lemeringel a bdelul er a uldesuir a rechad el kirel. (Heb. 12:2-4) Ngmle ulturk osengel er a meruul er a soal a Dios.​—Mt. 26:39.

19. Ngngera uldesuem el kirel a ngklel a Jehovah, e ngerang?

¹⁹ Kede proud er a ngklel a Jehovah e omes er a ngkled el Resioning er a Jehovah el kmal klou el chetengakl. Tiakid a uchul me kede kongei melemolem el oldanges er ngii mo lmuut me a lemetengel osengir a rechad er kid. A ngklel a Jehovah a lmuut el klou a ultutelel er kid er a chised. Mada derellii er a rengud el mo melemolem el oldanges er a Jehovah alta Satan a melasem el mengitechut er kid. Ngoeak tiakid el rolel e kede ochotii el kmo a ngklel a Jehovah a kot el klou a ultutelel er kid, el di ua Jesus Kristus.