“Molilt . . . el Kmo Kom Mo Mesiou er Techang”

1. A bo denguu a mera el deurreng e ngngera kired el meruul er ngii, e ngerang? (Isaia 48:​17, 18)

A DEMAD el ngar er a eanged a kmal betik a rengul er kid, e soal a bo ledeu a rengud er a klengar er chelechang me a ngar medad. (Oli. 3:​12, 13) Ngmilebid el ngar ngii a bebil el ileakl el duch er kid engdi ngdimlak lebeskid a duch er kid el di kid el mengedereder er kid e melilt el kmo ngngera ungil me a mekngit. (Oli. 8:9; Jer. 10:23) Ngmedengei el kmo a bo denguu a mera el deurreng e ngkired el mesiou e olengesenges er ngii.—Monguiu er a Isaia 48:​17, 18.

2. A Satan ngsoal a bo dobang a ngera el uldasu, e ngera ngmla rullii a Jehovah el kirel tia el blulak el ultelecheklel?

² A Satan a soal a bo domdasu el kmo ngdiak dousbech er a Jehovah el mo nguu a deurreng, e sebeched el di kid el mengedereder er kid. (Gen. 3:​4, 5) A Jehovah mla mechititerir a rechad me te di tir el mengedereder er tir lomeketakl er ngii el kmo a Satan a bulak. Ngkmal sebeched el di beot el mesa el kmo a omengederederir a rechad a telemall. Me nguaisei a Biblia ouchais el kirir a rebetok el sechal me a redil el kmal mle ungil a klengar er tir e le te milsiou er a Jehovah. A Jesus Kristus ngike el kot el mle dmeu a rengul er tir el rokui. A kot e me dosaod er a uchul me ngileltii el mo mesiou er a Jehovah. Ongingil e kede mo merriter a uchul me a Demad el ngar er a eanged a rredemelel a omengull er kid. A ulebongel e kede mo review a bebil er aike el luchul me kede melilt el mesiou er a Jehovah.

UCHUL ME A JESUS A NGILELTII EL MO MESIOU ER A JEHOVAH

3. Ngera el offer a lengiluu a Jesus, e ngera ngngileltii?

³ A Jesus er a lengar tia el chutem e ngmle kirel el melilt el kmo ngmo mesiou er techang. Kedeb el taem er uriul er a lemetecholb a Jesus e a Satan a mle offer er ngii aike el rokui el renged er a beluulechad a lsekum ngdi ta el taem el lochotii omengull er ngii. Me a Jesus a dilu el kmo: “Mcheridau e Satan! A Chedaol Llechukl a kmo, ‘Mongull el meluluuch er a Rubak el Dios er kau, e di le ngii el tang cho mosiou er ngii!’” (Mt. 4:​8-10) Ngera uchul me a Jesus a millilt el uaisei? Molatk a bebil luchul.

4-5. Ngera bebil er a uchul me a Jesus a ngileltii el mo mesiou er a Jehovah?

⁴ A bltikerreng sel ngarbab el luchul me a Jesus a ngileltii el mo mesiou er a Jehovah. A Jesus a kmal dmolech a bltkil a rengul el mora Demal. (Jn. 14:31) Me a lmuut kung, a Jesus a mesiou er a Jehovah e le ngmelemalt el tekoi a loruul el uaisei. (Jn. 8:​28, 29, BT; Och. 4:11) A Jesus a medengei el kmo a Jehovah a Uchul a klengar me ngii a kmal bekururau e sebeched el loumerang er ngii. (Psa. 33:4; 36:9; Jak. 1:17) A Jehovah a blechoel el melekoi a klemerang el mora Jesus e milsang a rokui el tekoi el lolab. (Jn. 1:14) Engdi Satan a kmal ngodech er a Jehovah. Ngika uchul a kodall. Ngbulak e merechorech a rengul e di melatk er a di ngii. (Jn. 8:44) A Jesus a kmal mle ungil medengei aika el tekoi me ngdimlak a ta el bo lolatk el mo uai a Satan e mo omtok er a Jehovah.—Fil. 2:​5-8.

⁵ A lmuut el ta er a uchul me a Jesus a ngileltii el mo mesiou er a Jehovah a ngii lulemes el beduluchei el mora ike el bo leketmokl a blakerreng er ngii. (Heb. 12:2) Ngmle medengei el kmo a lolemolem el loba blakerreng e ngmo kobkellii a ngklel a Demal e kutmeklii a rolel e ngsebechel meterob a rokui el ringel el Diabelong a mla mekdubech.

UCHUL ME A JEHOVAH RREDEMELEL A OMENGULL ER KID

6-7. Ngera uchul me chelecha el taem e te betok a diak losiou er a Jehovah, e ngera uchul me ngrredemelel a dongull er ngii?

⁶ Te betok er chelecha el taem a diak losiou er a Jehovah e le te dirkak bo lodengei a klebokel el blekerdelel e diak lodengei aike el rokui el bla leruul el kirir. Te kmal di ua rechad el Paulus ulemerk el mo er tir er a Athens.—Rel. 17:​19, 20, 30, 34.

⁷ A Paulus a silodii el mora rurrenges er ngii el kmo a di ta el mera el Dios a “omesterir a re bek el chad a klengar, ma telrir, ma bek el tekoi.” Ngdilechelir el kmo: “Ngii a uchul e kede outeliil, e mengitengtik e ngar ngii a klengar er kid.” A Dios a Ulemeob, “ng uleak a tal chad e mileob a bek el bedengir a re chad” me ngrredemelel a dongull er ngii el di ngii el tang.—Rel. 17:​25, 26, 28.

8. Ngera kmal diak a ta el bo loruul er ngii a Jehovah? Mosaod.

⁸ A Jehovah a Ulemeob me ngllemeltel el merreder er a melidiul me a chutem me ngsebechel force er a rechad el mo mesiou er ngii. Me nguaisei engdi ngkmal diak a ta el bo loruul er tia el tekoi. Ngbai meskid a betok el sioko lochotii el kmo ngmera el ngar ngii e kmal betik a rengul er a derta me a derta er kid. Ngkmal soal a rokui el chad a bo lesechelil el mo cherechar. (1 Ti. 2:​3, 4) Tiakid a uchul me ngmla train er kid el mo olisechakl er a rebebil er a moktek er ngii e ouchais er tir el kirel aike el lungil tekoi el bo loruul el kirir a rechad. (Mt. 10:​11-13; 28:​19, 20) Ngmla meskid ongdibel el sebeched el mo er ngii e mengull er ngii e meskid a remengkerengel a sib el mo omekerreu er kid.—Rel. 20:28.

9. Ngmekera bltikerreng er a Jehovah e bleketakl el mues?

⁹ A Jehovah ochotii a bltikerreng er ngii loeak a lomesterir a ungil el tekoi el mo er tirke el diak el sorir el loumerang el kmo ngmera el ngar ngii. Molatk aikang: Sel domes er a reksi e te betok el biliol el chad a melilt el diak lolengesenges er a Jehovah e di meruul aike el lomdasu el kmo ngungil me a mekngit. Me nguaisei a Jehovah a melemolem lomesterir aike el lousbech el melemolem el ngar e oldeu a rengrir er a klengar. (Mt. 5:​44, 45; Rel. 14:​16, 17) A Jehovah uchul me ngngar ngii a resechelirir me a telungalek er tir el betik a rengrir er tir, e sebechir el mo oungalek, e meridm a klungiaol er a meringel el urerir. (Psa. 127:3; Oli. 2:24) Me a sioko bleketakl lochotii el kmo a Demad el ngar er a eanged a betik a rengul er a rokui el chad. (Exo. 34:​6, NW) Chelechang e me de review a bebil er a uchul me kede melilt el mesiou er a Jehovah me a rolel ngomekngeltengat er tirke el melilt el mesiou er ngii.

UCHUL ME KEDE MELILT EL MESIOU ER A JEHOVAH

10. (a) Ngera sel ngarbab luchul me kede mesiou er a Jehovah? (Mateus 22:37) (b) Ngera el klungiaol obla mngai er a kllourreng er a Jehovah? (Psalm 103:​13, 14)

¹⁰ Ngdi ua Jesus, kede mesiou er a Jehovah e le ngkmal betik a rengud er Ngii. (Monguiu er a Mateus 22:37.) Ngmo soad el mo kmeed er a Jehovah sel bo dodengei a blekerdelel. El ua tiang, molatk er a kllourreng er a Jehovah el bedul kid. A rechad er a Israel er a bo lak lolengesenges er ngii e ngullengit er tir el kmo: “Mereko e lak [mngar] a klengit.” (Jer. 18:11) A Jehovah medengei el kmo ngdiak demecherrungel, kede di chebechab. (Monguiu er a Psalm 103:​13, 14.) Sel molebedebek er a kllourreng er a Jehovah me aike el lmuut el bebil er a ungil blekerdelel, e tia ngdiak lodbechau el mo soam el mesiou er ngii el mo cherechar?

11. Ngera lmuut el bebil er a uchul me kede melilt el mesiou er a Demad el ngar er a eanged?

¹¹ Kede dirrek el mesiou er a Jehovah e le ngmelemalt a doruul el uaisei. (Mt. 4:10) Me a lmuut kung, kede medengei aike el mo meketmokl sel doba blakerreng el mo er ngii. A blakerreng er kid a mengebkall er a ngklel a Jehovah, meketeklii el kmo a Satan a bulak, e rullii a Demad el kmal mo dmeu a rengul. A lsekum kede ngiltii el mo mesiou er a Jehovah er chelechang, e ngngar ngii omeltked el mo mesiou er ngii el mo cherechar!—Jn. 17:3.

12-13. Ngera kede suub er a experience er a Jane me a Pam?

¹² Sel dirk demekekerei e ngsebeched el mekurulii a dmolech el bltikerreng er kid el mora Jehovah, el ngii a lmuut el menga el mo mesisiich sel dorael el mo klou el chad. Molatk er a Jane me a Pama el teru el odos. Ngmle 11 me a 10 a rekrir er a lomuchel el mesuub er a Biblia. Alta rechad er a blirir a dimlak el sorir el mesuub, te milechititerir me ngsebechir lobengterir a Resioning a lsekum te dirrek el lobengterir el mora ikelesia. A Jane a kmo: “Aike el lullisechakl a Resioning er a Biblia a ngilsukak el mo oltngakl orrimel er a rengalek er a skuul el mo melai a drugs e ngar er a deleboes.”

¹³ Sera bocha lekeed er a lluich a rekrir e te di dul mlo publisher. Uriul e te mlo pioneer e omekerreu er a remechudelang el chad er a blirir. A Jane a melatk er a klengar er tir e kmo: “Ak silubii el kmo a Jehovah ochotii a blakerreng el mora resechelil e omekerreu er tir, e ua lolekoi a 2 Timothy 2:19 (NW), ‘A Jehovah medengelterir a rechedal.’” Ngkmal diak doumededenger el kmo a Jehovah omekerreu er tirke el ngiltii el mo betik a rengrir er ngii e mesiou er ngii!

14. Ngmekera tekinged me a omerelled e olengeseu el omeketakl a blulak el mora ngklel a Jehovah? (Dirrek el momes a siasing.)

¹⁴ Ngkmal soad lolengeseu lomeketakl a blulak el mla mora ngklel a Jehovah. Molatk er tia el blekeradel: Ngngar ngii a kmeed el sechelim el kmal ungil a blekerdelel, bekururau, e blechoel el ousubes. A ta er a klebesei e ke rongesii a chad el melekoi el kirel a sechelim el kmo ngkmal mekngit a blekerdelel e bulak. Ke mo mekerang? Ke mo mesebechakl er ngii. Ngdi osisiu, a Satan me tirke el cheltikaik er ngii sel lolasem el melemall er a chisel a Jehovah loeak a lomerk a blulak el kirel, e kede mesebechakl er a Jehovah loeak sel douchais a klemerang el kirel. (Psa. 34:1; Isa. 43:10) Kede ochotii el kmo ngbetik a rengud er a Jehovah e soad el mesiou er ngii loeak a tekinged me a omerelled.

15. Ngera el klungiaol a lengilai a Paulus lengii el millodech a turrekong er ngii er a klengar? (Filipi 3:​7, 8)

¹⁵ Kede kongei el melodech a turrekong er a klengar er kid me lsebeched el mesiou er a Jehovah loba kengei er ngii me a lechub e kede meruul a lmuut el betok el ngar er a omesiunged el mo er ngii. El ua tiang, a apostol Paulus a mle klou a ultutelel el chad er a klechelid er a Rechijudea, engdi ngchilitii e mo oltirakl er a Kristus e mesiou er a Jehovah. (Gal. 1:14) Tiakid a uchul me ngmle betok a ungil experience er ngii el mesiou er a Jehovah e ngiluu a techall el mo mengedereder lobengkel a Kristus er a eanged. Ngdimlak a ta el bo louuchel a rengul er a omelilt er ngii el mesiou er a Jehovah, me kid me ngkmal diak bo louuchel a rengud el kirel.—Monguiu er a Filipi 3:​7, 8.

16. Ngera kede suub er a experience er a Julia? (Dirrek el momes a siasing.)

¹⁶ A lsekum kede rullii omesiou el mora Jehovah el mo kot el klou a ultutelel el tekoi er a klengar er kid e ngmo er ngii a ungil klengar er kid er chelechang me a ngar medad. Molatk er a experience er a odos el Julia. Uchei er a lesubii a klemerang e ngmilengitakl er a choir er a ikelesia er a lekekerei el me klou. A chad el mle professional el mengitakl a opera milsa el kmo ngkmal lungil chiklel me ngngiluu e train er ngii. Ngdimlak el meketeket e a Julia mlo merael a chisel e mlo mengitakl er aike el merael a chisel el basio er a omengitakl. Sera lebora merael a chisel el skuul el kirel a ongngak e a classmate er ngii a ulemuchel el mesaod er a Dios el mo er ngii e silodii el kmo a Dios a ngar ngii a ngklel, ng Jehovah. Ngdi mle telkib e a Julia mlo mesuub a Biblia el eru el taem er a chelsel a ta el sandei. Cherengel a taem e ngmlo melilt el mengoit a temel me a klisichel el mesiou er a Jehovah e mo diak lolasem el mo chad er omengitakl el opera. Tia el omelilt a dimlak el beot. Ngkmo: “Te betok el chad a dilu er ngak el kmo ak di waste er a gift er ngak me nguaisei engdi ngmle soak lousbech er a klengar er ngak el rokir el mesiou er a Jehovah.” Ngua ngera uldesuel el kirel tia el omelilt el lerirellii er a betok er a 30 el rak er a mla me mong? Ngkmo: “Ngbudech a uldesuek e oumerang el kmo a Jehovah mo otaut a rokui el urungulek er a ngar medad.”—Psa. 145:​16, NW.

MOLEMOLEM EL MESIOU ER A JEHOVAH

17. A kldebengel a taem el dekiei er chelechang ngera ngrullii el mo er tirke el mla ngiltii el mesiou er a Dios me tirke el dirkak?

¹⁷ Kede kiei er a orechudel el taem. A apostol Paulus a milluches el kmo: “Ele ngdi telkibkung, e ngmei ngikel kirel mei el diak bo le meoud.” (Heb. 10:​37, BT) Tiang ngera ngrullii el mei er kid? Ngkedebenga taem el kirir a rechad el mo melilt el mo mesiou er a Jehovah. (1 Ko. 7:29) E a lsekum kede mla ngiltii el mo mesiou er a Dios e kede medengei el kmo alta ngmo kired el loutekangel a ringel, engdi ngdi “telkibkung.”

18. Ngera ngmelisiich er kid el mo meruul er ngii a Jesus me a Jehovah?

¹⁸ A Jesus a millisiich er a redisaiplo er ngii me lak di bo loltirakl er ngii, ngdirrek el kirir el melemolem el oltirakl er ngii. (Mt. 16:​24, NW) Me a lsekum kede mla mesiou er a Jehovah el betok el rak e derellii er a rengud el diak bo de give up. Ngkired el meringel el loureor el loltaut er a omelilt er kid el mesiou er a Jehovah. Alta ngdiak lebeot, engdi mo lmuut er chelechang me ngkmal sebechel mo dmeu a rengud e oldeu a rengud er a betok el klengeltengat!—Psa. 35:27.

19. Ngera kede suub er a experience er a Gene?

¹⁹ A rebebil a feel el kmo, a bo dosiou er a Jehovah e ngkmal betok a kired el mengoit. A lsekum ke dirk ngeasek, e kau ke feel el kmo ke mo miss out a lsekum ke mesiou er a Jehovah? A Gene el kekerei el odam a kmo: “Ak mle feel el kmo ngdiak el sebechek el have fun lengak el Sioning er a Jehovah. A rebetok el ngalek el kmlukeroul lobengterir a mle sebechir el mora party, oumechas me a rubak, me a lechub e te ousekool a violent el game, e ngak a mlara miting me a odingel.” Tia ngera ngrirellii el mora Gene? Ngkmo: “Ngmlo eru a bedengel a klengar er ngak. Tia mle fun el telkib el taem. Engdi ngdimlak lerellak el mera el mo dmeu a renguk. Ak mlo melatk a klemerang er a Biblia el dimlak kultirakl e mlo ngiltii el mo mesiou er a Jehovah el loba renguk el rokir. Tiakid el taem el mei e a Jehovah mla mo onger a bek el nglunguchek.”

20. Ngera kired el rullii er a rengud el mo meruul er ngii?

²⁰ A ta er a milluches er a Psalm a milengitakl el kmo: “Ngdmeu a rengul ngike el mngiltii e mokedii er kau el me kiei er a mekesekesel a blim.” (Psa. 65:​4, NW) Mada derellii er a rengud el mo oba uldesuel a Josua el dilu el kmo: “Ngdi ngak ma re chad er a blik a mo mesiou er a RUBAK.”—Jos. 24:15.