Kede Mekerang E Mo Klou A Rengud El “Mengiil Er A Dios”?

1. Ngera el tekoi a sebechel el rullid el mo seselk a rengud?

A URIUL el sils er a beluulechad er a Satan a ulemuchel er a rak er a 1914 er sera bo le King a Kristus el ngar er a eanged. Seikid el taem, e ngmlo er ngii a mekemad er a eanged el mlo uchul e a Jesus a uldikii a Diabelong me a remekngit el anghel er ngii el mei er a chutem. (Monguiu er a Ocholt 12:7-9.) A Satan a medengei el kmo “ng di kedeb ku temel.” (Och. 12:12) Engdi tia el ‘kedeb el taem’ a mla melemolem el kuk kemanget er sel lulemdasu er ngii a rebebil. Me kid ngmla mo seselk a rengud el mengiil er sel temel a Jehovah el mo okngemedii a beluulechad er a Satan?

2. Ngera el ker a bo longer tia el suobel?

² Ngkdekudel el tekoi a lsekum e ngmo seselk a rengud. E ngera uchul? E le ngsebechel el mo uchul e kede mo remuul a tekoi el diak domdasu er a uchei er a doruul er ngii. Me ngera sebechel el ngosukid el mo klou a rengud el mengiil er a Dios? Tia el suobel a mo ngosukid el onger aika el ker. (1) Ngera kede suubii er a profet el Mika el kirel a kllourreng? (2) Ngera el tekoi el mo duubech a ochotii el kmo a ulebongel a kmedang? (3) Kede mekerang e ochotii el kmo kede oba omereng el saul el kirel a kllourreng er a Jehovah?

NGERA KEDE SUUBII ER A MIKA EL KIREL A KLLOURRENG?

3. Ngmle ua ngera blekeradel er a Israel er a taem er a Mika?

³ Monguiu er a Mika 7:2-6. A Mika el profet er a Jehovah a ulemes er a rechad er a Israel el merael el mo mechitechut a klaumerang er tir er a Jehovah, e sel taem er a longedereder a King el Ahas e ngkmal dikea lolengesenges er a Dios. A Mika a ulemekesiu er tirke el chad er a Israel el ua beritechetoched el dellomel el sebechel el tomellii a chad. Te mle ua outoched el dellomel e le tir el mle mekngit a omerellir el mo er a rebebil el omekcharm er tir. Ngkmal mlo mekngit a blekeradel e mlo diak a bltikerreng er a chelsel a telungalek. A Mika a mle medengei el kmo ngdiak el sebechel el di ngii el sumecheklii tia el mondai me ngmilluluuch el mo er a Jehovah el mera el ngar er a rengul. E sola e mle klou a rengul el mengiil er a Dios. Ngmle ulterekokl a rengul el kmo a Jehovah a mo sumecheklii tia el tekoi er sel ungil el Temel.

4. Ngera el mondai a dechelebangel er chelechang?

⁴ Kid a di uai a Mika el kiei el teloi er a rechad el di melatk er a di tir. A rebetok er tir a “diak loreng a saul,” e “mekngit omerellir el mor a re chad,” e “cheblad.” (2 Ti. 3:2-4) Ngsebechel el mo meringel a klengar er kid a lsekum a rechad er a urered, skuul me a retonari er kid a meruul a tekoi el di melatk er a di tir. Engdi a rebebil er kid a chelebangel a lmuut el meklou el omelsemai. A Jesus a dilu el kmo a rultirakl er ngii a bo lomtok er tir a rechederir, e a tekingel a di ua aike el medung er a Mika 7:6. A Jesus a dilu el kmo: “Ak mlei ma re ngalek el sechal bo lomtok er a re demerir, ma re ngalek el redil bo lomtok er a re derrir, ma re buchelsechal bo lomtok er a re derrir a re becherir; a re mo kot el mekngit el cherrouel a tal chad a re chad er a blil.” (Mt. 10:35, 36) Ngsebechel el mo meringel a lsekum a rechedal a telungalek er kid el diak losiou er a Jehovah a melenguul e omtok er kid. Me a lsekum e kede chelebangel er a chouaitia el tekoi e ngdiak el kirel el mo mechitechut a rengud. E ngbai kired el melemolem er a blakerreng er kid el mo er a Jehovah e mengiil er ngii el mo omeklemalt er ngii el tekoi. Me sel dolemolem el meluluuch el olengit a ngelsuil, e ngmo meskid a klisiich me a llomeserreng me dolemolem er a blakerreng er kid el mo er ngii.

5, 6. Ngmilekerang a Jehovah e omekngeltengat er a Mika? E ngera el tekoi a dimlak leues a otutel?

⁵ A Jehovah a ulemekngeltengat er a Mika e le ngii el mle klou a rengul. Ngmlo sebechel el mesang a ulebengelel a omengederederel a mekngit el King el Ahas. Ngmilsang a ngelekel a Ahas el Hesekia el mo king e ngilsuterir a rechad er a Israel el lmuut el mo er a bliochel el omengull. Ngdirrek el milsa otutel a ulaoch el kirel a beluu er a Samaria er sel taem er a lesiseb a resoldau er a Asiria el nguu a renged er a Israel er a mo bedul a diluches.​—Mik. 1:6.

⁶ Engdi a Mika a mlad er a uchei er a leues a otutel aike el rokui el ulaoch el Jehovah a ulemekrael er ngii el mo meluches. El uai tiang, ngmilluches el kmo: “A ikel ngar medad el sils e a rois el le dechor er ngii a Templo a mo kot el kedidai er a rois el rokui. Ng betok el beluu a mei el mo ketitech er ngii. Ma re chederir a mo melekoi el kmo, ‘Mei me bo dengasech er a bukl er a RUBAK.’” (Mik. 4:1, 2) Alta e a rechad el mle iliuekl er ngii a mle sebechir el mo diak losiou er a Dios engdi a Mika a tilbir el melemolem el blak a rengul el mo er a Jehovah el mo lmuut er a kodellel. Ngdilu el kmo: “A derta er a ikel beluu a mengull el meluluuch e olengesenges er a di chedul, ngdi kid a mo mengull el meluluuch e olengesenges er a RUBAK el Dios er kid el mo cherechar el diak a ulebengelel.” (Mik. 4:5) Ngmle klou a rengul el outekangel er a chelsel a meringel el taem e le ngmle ulterekokl a rengul el kmo a Jehovah a mo oltaut a rokui el Telbilel. Ngika el blak a rengul el profet a uluumerang er a Jehovah.

7, 8. (a) Ngera uchul me ngsebeched el oumerang er a Jehovah? (b) Ngera el tekoi a rullii a taem el mo mereched el engelakl?

⁷ Kid kede oumerang er a Jehovah el di uai a Mika? Ngar er ngii a ungil el uchul e ngsebeched el oumerang er ngii. Kede mla mesang a otutel a ulochel a Mika. Ngar er aika el uriul el sils, e a rebetok el miliol el chad er a rokui el renged me a kebliil me a omelekoi a mla mo er a “bukl er a RUBAK, el mor a Templo er a Dios.” Me alta e tirka el chad a mle chedal aike el renged el blechoel el kaumekemad, engdi te mla “toiot a saider er tir el mo osib,” e dikea “lluut el mengedmokl el kirel a mekemad.” (Mik. 4:3) Ngmera el ileakl el techall a dobang el mo ta er a chad er a budech el chedal a Jehovah!

⁸ Kid el rokui a soad a Jehovah a bo lolekngemed er tia el mekngit el blekeradel. Engdi a bo dongiil el oba kllourreng e ngkired el mo omdasu el uai a Jehovah. Ngmla ngiltii a Jesus Kristus el mo oukerrekeriil er a rechad, e mla ngiltii a sils el bo loruul er tiang. (Rel. 17:31) Engdi a uchei er a lemei sel taem, e a Dios a omesterir a rokui el chad a techall el mo ungil el ‘medengelii a klemerang,’ e loltaut aike el lesuub e bo lesobel. Lak dobes el kmo a klengar er a rechad a ocherur a kodall. (Monguiu er a 1 Timothy 2:3, 4.) Ngdi kmedung e ngmei a ulebongel. Me a lsekum e kede mechesang el olengeseu er a rechad el mo medengelii a Jehovah, e ngkmal di mereched a taem el engelakl. E sel lemei a ulebongel, e ngmo dmeu a rengud e le kede mle mechesang el omerk er a klumech!

NGERA EL TEKOI A MO OCHOTII EL KMO A ULEBONGEL A KMEDANG?

9-11. A 1 Thesalonika 5:3 ngmla tmaut? Mosaod.

⁹ Monguiu er a 1 Thesalonika 5:1-3. Ngdi kmedung e a rokui el renged a mo melekoi el kmo, “Ng budech ma rokui el tekoi a di ungilbesul”! Me a lsekum e ngdiak el soad el mecheblad er tia el subed, e ngkired el di “mekar e lulterekokl a rengud.” (1 Th. 5:6) Chelechang e kede mo mesaod a bebil er a tekoi el mla duubech el oeak uchei er tia el klou a ultutelel el subed.

¹⁰ Sera bo lemerek aike el eru el mekemedil a beluulechad, e a bek el renged a kmal mlo oureng er a budech. Me a uriul er a kot el mekemedil a beluulechad, e a League of Nations a mileketmokl el mo melisiich er a budech. E a uriul er a ongeru el mekemedil a beluulechad, e a rechad a uluureng el kmo a United Nations a mo toketekii a budech. A remengeteklel a kabelment me a klechelid a oumerang aika el eru el cheldebechel. El uai tiang, a United Nations a ultebedii a subed el kmo a rak er a 1986 a mo International Year of Peace. Seikid el rak, e a rebetok el mengeteklel a balatiks me a klechelid a mlo obengkel ngike el mengeteklel a Ikelesia er a Katolik el meluluuch el kirel a budech.

¹¹ Me nguaisei, engdi tia el subed me a kuk bebil el uai ngii a dimlak lotutii sel ulaoch el ngar er a 1 Thesalonika 5:3. E ngera uchul? E le “kloul tellemall” a dirkak lebo er ngii.

12. Ngera kede medengei el kirel sel subed el kmo “ng budech ma rokui el tekoi a di ungilbesul”?

¹² Te rua techa tirke el mo oltobed er tia klou a ultutelel el subed el kmo “ng budech ma rokui el tekoi a di ungilbesul”? Ngera el tekoi a bo loruul tirke el mengeteklel a Klsuul el Klekristiano me aike el kuk bebil er a klechelid? E kuk ngerang a bo loruul er ngii a kabelment? A Biblia a diak louchais er kid. Me alta e ngkmal mo mesisiich tia el subed engdi kid a di medengei el kmo ngdiak el mera el budech me a ulekerreu. Sel taem e a Satan a dirk mengedereder er tia el beluulechad. Me ngdirk kikiongel a blekeradel er a chelsel e diak bo lemengodech. Me ngkmal mo uchul a klengiterreng a lsekum e kede mo oumerang er tia el chelebeldil a Satan e mo teloi er tia el beluulechad!

13. Ngera uchul me a rechanghel a orreked aike el bek el uchul a eolt?

¹³ Monguiu er a Ocholt 7:1-4. Me chelecha el dongiil er a otutel a 1 Thesalonika 5:3, e a remesisiich el anghel a orreked aike el bek el uchul a eolt er a kloul ringel. Me ngera te mengiil er ngii? A apostol el Johanes a milluches el kmo a rengellitel el “mesiungel” a Dios a mo nguu sel ulebongel el olengchelir.a Me sel bo lemerek tia el klou a ultutelel el tekoi, e a rechanghel a kodoked aika el uchul a eolt. Ngera mo duubech er seikid el taem?

14. Ngerang a ochotii el kmo ngdi kmedung e ngmo nguemed a Kloul Babilon?

¹⁴ A Kloul Babilon, el ngii aike el rokui el klsuul el klechelid a mo nguemed. Ngmera el sebeched el mesang el kmo a ulebongel er ngii a di kmedu el mei. E sel bo leuaisei, e ngdiak a ngii di el chad el sebechel el mo ngosuir. (Och. 16:12; 17:15-18; 18:7, 8, 21) El ua tiang, a news er a TV me a simbung a mesaod a kngtil a klechelid me a remengeteklir el olechotel a kmo a rebetok el chad a dikea el sorir el olengeseu er tir. Me nguaisei, engdi a remengeteklel a klechelid a diak lomdasu el kmo te chelebangel er a kdekudel el blekeradel. Engdi te kmal cheleuid! A uriul er a letobed a subed el kmo, “ng budech ma rokui el tekoi a di ungilbesul,” e a kabelment a di mereched el mo oldechelakl aike el klsuul el klechelid e okngemed. Seikid e a Kloul Babilon a nguemed el mo cherechar! Ngmera el ngar er ngii a belkul a kllourreng er kid el mengiil a otutel aika el tekoi.​—Och. 18:8, 10.

NGMEKERANG A DOCHOTII A OMERENG EL SAUL EL KIREL A KLLOURRENG ER A JEHOVAH?

15. Ngera uchul me a Jehovah a oba kllourreng el mengiil?

¹⁵ Me alta e a rechad a mla mekidekelii a ngklel a Jehovah, engdi ngoba kllourreng e mengiil er sel ungil el taem el bo lekebkellii a ngklel. A Jehovah a diak el soal a ngii di el melemalt a rengul el chad a bo lengemed. (2 Pe. 3:9, 10) Me kau ke dirrek el oba osisiu el uldasu? A uchei er a lemei a ulebongel, e ngar er ngii a kakerous el rolel a dochotii er a Jehovah el kmo kede oba omereng el saul el kirel a kllourreng er ngii.

16, 17. (a) Ngera uchul me ngsoad el mo ngosuterir tirke el mla mo diak losiou er a Jehovah? (b) Ngera me ngklou a ultutelel el kirir tirke el mlo diak losiou er a Jehovah el lmuut el mei er Ngii?

¹⁶ Molengeseu er tirke el mla mo oudeleokl er a omesiungir. A Jesus a dilu el kmo ngmo klou a deurreng er a eanged sel lluut el me remei a ta el ririid el sib. (Mt. 18:14; Lk. 15:3-7) Me a Jehovah a kmal omekerreu er tirke el ulechotii er a uchei el kmo ngbetik a rengrir er ngii alta te diak losiou er ngii er chelecha el taem. A Jehovah me a rechanghel a kmal mo dmeu a rengrir sel dengesuterir a rechad el lmuut el mei er a Jehovah.

¹⁷ Kau ke ta er tirke el diak losiou er a Dios er chelecha el taem? Ke locha mlo diak bo er a miting e le ngmla er ngii a chad er a ongdibel el tilemellii a rengum. Tiang a locha kmal meketeketa el taem. Me di lekau el oker el kmo: ‘Ngak ngdmeu a renguk e ungil a klengar er ngak er chelechang? Ngtecha tilemellii a renguk, ng Jehovah me a lechub e ngchad el diak lecherrungel? A Jehovah el Dios ngar er ngii a ngii di el ngera el bla lerellii el uchul a telemellek?’ A Jehovah a blechoel el ungil a blekerdelel el mei er kid. Me alta ngdikea doltaut er a telbiled el mesiou er ngii, engdi ngdirk omechei er kid me kede oldeu a rengud er aike el ungil el tekoi el lomeskid. (Jak. 1:16, 17) Me nguaisei, engdi ngdi kmedung e ngmei a sils er a Jehovah. Chelechang e ngmla mo taem el deluut el mo er a betik a rengul el Demad el Jehovah, me a ongdibel. Tiaikid a di chimo el basio el sebeched el mo er ngii el kirel a ulekerreu er a chelsel aika el uriul el sils.​—Dut. 33:27; Heb. 10:24, 25.

18. Ngera uchul me ngkired el olengeseu er tirke el olab a ngerachel er a ongdibel?

¹⁸ Bo leblak a rengud el olengeseu er tirke el olab a ngerachel er a ongdibel. A Jehovah a di uai a betik a rengul el Mengkerengel a sib el omekrael e dirrek el omekerreu er kid. Ngmla tutkii a Ngelekel el mo Ngike el Bderrir a remengkerengel a sib. (1 Pe. 5:4) A remechuodel el ngar er a kuk betok er a 100,000 el ongdibel a ousbech a temir el omekerreu a derta me a derta el sib er a Dios. (Rel. 20:28) Sel leblak a rengud el olengeseu er tirke el olab a ngerachel er a ongdibel, e kede ochotii er a Jehovah me a Jesus el kmo kede oba omereng el saul el kirel aike el rokui el bla leruul el kired.

19. Kede mekerang e mo kaiuekeed kid me a rudam er kid?

¹⁹ Molekeed er kau er a rudam er kau. Tia ngera belkul? Tirke el kerekikl el soldau sel lemodechelakl er a recherraro e te mo kaiuekeed me ngmo diak a metetoech er a delongelir. Ngoeak tiaikid el rolel e te mukerreu me ngdiak a ta er tir el metemall. A Satan a mla lmuut el mo mesisiich el oldechelakl er a rechedal a Dios. Me chelechang e ngkmal diak el taem el bo domtok er a rudam er kid. Ngbai taem el kired el olekeed er kid er a rudam er kid, e omes el engelakl aike el chelitecheterir, e dirrek el oumerang er a Jehovah.

20. Ngera el tekoi a kired el meruul er chelechang?

²⁰ Me a leuaisei, e dolemolem el melisiich er a deleuill er kid me a Jehovah e doba kllourreng el mengiil. Kede mengiil er sel taem el lebo er ngii a subed el kmo “ng budech ma rokui el tekoi a di ungilbesul,” me a dirrek el sel ulebongel el olangch el bo lenguu a rengellitel. A uriul er isei, e tirke el teua el anghel a mo kodoked aike el uchul a eolt, e a Kloul Babilon a mo mokngemed. Me chelecha el dongiil aika el tekoi el mo duubech, e dolemolem el oltirakl a ulekrael er tirke el mla metutk el mo omekrael er a cheldebechelel a Jehovah. Bo dedak kid me a rudam er kid el omtok er a Diabelong me a remekngit el anghel er ngii! Chelechang e ngtaem el bo doltirakl er a uleklatk er ngike el milluches er a Psalm el kmo: “Bo mesisiich, mukduch a rengmiu, kemiu el rokui el omeltkiu a ngar a RUBAK.”​—Psa. 31:24.