Moltirakl a Kerebai er a Reprofet—Mika
1. Ngera el ker a locha lullatk er ngii a Mika, engdi ngera uchul me a ureor er a berkel a klumech el lurruul er ngii a dimlak bo lak a ultutelel?
1 ‘Ngoingerang e ngmei a ulebengelel tia el mekngit el blekeradel?’ A profet el Mika a locha millebedebek er a osisiu el ker er sera louchais a kerrekerilel a Jehovah el mo er a renged er a Israel me a Juda. Me nguaisei, engdi a ureor er a berkel a klumech el lurruul er ngii dimlak bo lak a ultutelel. Me sera rak er a 740 er a uchei er a Kristus, er a dirk el chad a Mika, e a tekingel a Jehovah el mo er a Samaria a tilaut. (Mik. 1:6, 7) E a uriul, e a Jerusalem a miltemall er a rak er a 607 er a uchei er a Kristus. (Mik. 3:12) Kede mekerang e mo oltirakl er a kerebai er a Mika sel dongiil el kirel a otutel a kerrekerilel a Jehovah er chelecha el taem er kid?
2. Kede mekerang a dochotii a kllourreng sel dongiil er a sils er a Jehovah, e ngera uchul?
2 Bo Moba Kllourreng: A Mika a milluches el kmo: “Ngdi ngak a di mo omes er a RUBAK. Ak uumerang e mengiil er a Dios el mo olsobel er ngak.” (Mik. 7:7) A Mika a dimlak di ble lechelellakl e longiil er a ulebongel el mei. Ngmillemolem el mechesang el profet er a Jehovah. Me chelecha el dongiil er a sils er a Jehovah, e ngkired el mo “klikiid e omekerreu er a Dios er a klengar er” kid. (2 Pe. 3:11, 12) A kllourreng er a Jehovah a mesterir a derta el chad a techall el mo obult. (2 Pe. 3:9) Me a leuaisei, e bo doltirakl er a uleklatk er a Biblia el mo oukerebai er a kllourreng er ngika el profet. —Jak. 5:10.
3. Ngera uchul me ngkired el olengit er a Jehovah el kirel sel chedaol klisichel?
3 Bo Multuil er a Klisichel a Jehovah: A Mika alta e ngmle meringel a urerel engdi ngulemes el bedul a Jehovah el kirel a klisiich el mo oltaut er a urerel. (Mik. 3:8) A Jehovah a medengei el kmo kede ousbech er sel klisiich el ngar er ngii el mei. Sei a uchul me a Biblia a mengelechel er tirke el mechitechetong e mesulang me lolengit er ngii el kirel a klisiich me bo el sebechir el kutmokl a ngerechelir er a chelsel a ongdibel. (Psa. 84:5, 7; Isa. 40:28-31) Kau ke mla mo medengelii tiang el ngar er a omesiungem el mo er a Dios er a chelsel a klengar er kau? Kau ke blechoel el olengit er a Jehovah me lengesukau el okiu sel klou el chedaol klisichel?—Lk. 11:13.
4. Kede mekerang a dochotii er a bek el sils el kmo a Jehovah a Dios er kid?
4 A omerellel a soal a Dios a mle kot el klou a ultutelel el tekoi er a chelsel a klengar er a Mika. Me ngtilbir el mo melemolem el blak a rengul alta e ngmle iliuekl er a chelebirukel el tekoi. Me ngdi osisiu, a blakerreng er kid a measem er a bek el sils. Me a leuaisei, e me dolisiich a rengud el mo “olengesenges er a RUBAK el Dios er kid el mo cherechar el diak a ulebengelel.”—Mik. 4:5.