A Dios a Olekeed er Ngii er Kau

A UCHUL ME A REBEBIL A MERINGEL ER TIR EL OUMERANG: A rebetok el chad el oumerang er a Dios a omdasu el kmo te cheroid er ngii. A Christina el redil er a Ireland el ulemais el mo er a ikelesia er ngii er a bek el sandei a dmu el kmo: “Ak mle medengei el kmo a Dios a ulemeob a rokui el tekoi, engdi ngdimlak kungil medengelii e dimlak a ta el taem el bok keed er ngii.”

A OSISECHAKL EL NGAR ER A TEKINGEL A DIOS: Sel lekea dodengei el kmo kede mo mekerang er a klengar er kid, e a Jehovah a kmal diak lechitid. A Jesus a milsaod er a rolel e a Dios a omekerreu er kid er a ledu el kmo, ngmo mekerang “a tal chad el oucharm a 100 el sib e a chimo er ngii a remiid? Ng mo meche ikel 99 el sib me ng menga er a tkul a ked e ngii a mo osiik er ngikel ririid el sib.” Ngera kede suubii er tia el tekoi? Kede suubii el kmo, a Demad el ngar er a eanged a “diak el soal a tar tirkal mekekerel ngalek a bo leriid.”​—Mateus 18:12-14.

Tirka el rokui “mekekerel ngalek” a kmal mekreos er a osengel a Dios. Me ngmekerang a Dios e “osiik er ngikel ririid el sib”? A doltirakl er a bades el medung er a uchelel tia el suobel, e a Jehovah a mekrolii el mo er ngii.

Ka molatk er sel rolel er a Jehovah er a lomekrael er a rebebil el mo er ngii. Sel taem er a rekot el Kristiano, e a Dios a ulderchii a Filip el mo olsiuekl er a ngarbab el chad er a Ethiopia el ngar er a mlil e mesaod a belkul a ulaoch er a Biblia el lulenguiu. (Rellir 8:26-39) E a uriul e a Dios a ulemekrael er a Petrus el mo oldingel er a mengeteklir a resoldau er a Rom el Kornelius, el di mle blechoel el meluluuch e oureng el mo mengull er a Dios. (Rellir 10:1-48) A Dios a dirrek el ulemekrael er a apostol el Paulus me a rulebengkel el mo er a bita er a omoachel er a ikrel a mats er a Filipi. Ngar er isei e te miltik er a redil el Lydia a ngklel el “milengull el meluluuch er a Dios, ma Rubak a diledesii a rengul me ng mle blak a rengul el orrenges.”​—Rellir 16:9-15.

Me ngar er a derta er aika el tekoi el dilubech, e a Jehovah a milsterir a techellir tirke el losiik er ngii me te mlo kmeed er ngii. Te rua techang a oldingel er a rechad er a rekeblirir me a buai el ouchais er tir er a klumech er a Biblia el kirel a Dios? A rebetok a melekoi el kmo, “te Resioning er a Jehovah.” Me di lekau el oker el kmo, ‘A Dios ngousbech er tirka el chad el olekeed er ngii er ngak?’ Aki melisiich er kau el mo meluluuch el olengit er a Dios me lengesukau el mo olekeed er kau er ngii.a