A Rengedel a Dios Ngmlo Omuchel el Mengedereder er Oingerang?​—Suobel 2

A BERRUSEL A NEBUKADNESAR​—TELKIB EL OMELEKL

Cameron: Ngkmal ungil a renguk el lmuut el mesekau, e Jon. Ak kmal semeriar er tia el omesodel a Biblia el doruul er ngii er a bek el sandei.a Ke ua ngerang?

Jon: Ak kmal mesisiich, ke mesulang.

Cameron: Ngkmal ungil a renguk e le ke mesisiich. Tia el mlo merek el klasoes er kid, e kede milsaod er a uchul me a Resioning er a Jehovah a melekoi el kmo a Rengedel a Dios a mlo omuchel el mengedereder er sera 1914.b Me ngua dulsaod, kede metik er a kmal klou a ultutelel el olechotel el ngar er a ulaoch er a babier er a Daniel er a Biblia. Ke dirk melatk a tekoi el llechukl er ngii?

Jon: Ngmilsaod er a berrusel a Nebukadnesar el kirel a metongakl el kerrekar.

Cameron: Ochoi, nguaisei. Ngar er a berrusel, e a Nebukadnesar a milsang a metongakl el kerrekar el mlo turkii er a eanged. E rirengesii a anghel er a Dios el dilu el kmo, mukelii ngii el kerrekar e ngdi becherei uchul me a risel me lemedechel er a chutem. E a uriul er a “euid el rak” e a kerrekar a lmuut el mo mukeroul.c Kede dirrek el milsaod er a uchul me tia el ulaoch a ngar er ngii a eru el otutel. Ke dirk medengelii sel kot el otutel?

Jon: Ngmillutk el di mlo er a Nebukadnesar, nguaisei? Ngurridii a uldesuel el euid rak.

Cameron: Ngkmal merang. A Nebukadnesar a urridii a uldesuel el telkib el taem, me a omengederederel a milterob. Engdi ngar sel lmuut el klou el otutel tia el ulaoch, e a omengederederel a Dios a ua dedu el kmo ngmilterob el kirel a euid el rak. Me kede milsang el kmo, a euid el rak a ulemuchel er sel taem el Jerusalem a miltemall er a rak er a 607 er a uchei er a Kristus. Ngar seikid el taem el mei, e ngmlo diak a reking el ngar tia el chutem el ulemtechei er a Jehovah el Dios el mengedereder er a rechedal. Engdi, ulebengelel aika el euid el rak, e a Dios a mo dolemii a beches el Merreder er a rechedal​—el ngii a ngar er a eanged. Me ngsebeched el dmu el kmo, a ulebengelel a euid el rak a mo oterekeklii a uchelel a omengederederel a Rengedel a Dios el ngar er a eanged. Me chelechang, e kede mla smodii el kmo ngulemuchel er oingerang a euid el rak. Me a lsekum e ngsebeched el mo medengelii a klemengetel e ngmlo merek, e ngmo sebeched el mo medengei el kmo a Rengedel a Dios ngulemuchel el mengedereder er oingerang. Ngsebechem el mo medengei aika el bla desaod?

Jon: Ochoi, tia el omelekl el suobel a mla ngosukak e omeklatk er ngak er a tekoi el dulsaod.

Cameron: Ngkmal ungil. Ka me domuchel el mesaod er ngii e domtab er a klemengetel aika el euid el rak. Ak dirk mlo merek el menguiu el kirel tia el suobel me bo lomeklatk er ngak er a meklou a ultutelel el tekoi. Me ak mo melasem el mo er a tkurrebab el sebechek el mesaod er ngii.

Jon: Ochoi, ka bong.

ULEBENGELEL A EUID EL RAK​—UCHELEL A URIUL SILS

Cameron: A kot el otutel a ulaoch el kirel a Nebukadnesar, e aike el euid el rak a millutk el mo er a mera el euid el rak. Engdi aike el euid el rak el mla er sel lmuut el klou el otutel a ulaoch el kirel a Rengedel a Dios, a mle kirel el lmuut el kemanget el taem, el dimlak di lolekoi el kirel a mera el euid el rak.

Jon: Ngera me ke melekoi el uaisei?

Cameron: A ta er a tekoi a kmo, ka momtab, aike el euid el rak a ulemuchel er sera telemellel a Jerusalem er a rak er a 607 er a uchei er a Kristus. Me a domuchel el omechur er seikid el rak el mei, e a mera el euid el rak a ngoikid el mei er a rak er a 600 er a uchei er a Kristus. Engdi ngdimlak a meklou a ultutelel el tekoi el dilubech er seikid el rak el kirel a omengederederel a Dios. Me a leuaisei e aike el dulsaod er a uchei, a betok el dart el rak er a uriul er a lengar tia el chutem a Jesus, e ngulechotii el kmo aike el euid el rak a dirkak el bo el merek.

Jon: Ngmerang. Ak mocha medengelii tilechang er chelechang.

Cameron: A lebebil e a ulaoch er a Biblia a ochotii el kmo, a ta el sils a omtechei er a ta el rak.d Me a leuaisei el diak el lolutk er a mera el rak, e a euid el rak a belkul a kmo, a ta el sils a omtechei er a ta el rak.

Jon: Ngsebechek el mesang el kmo ngera ke mesaod er ngii​—a ta el sils a kirel a ta el rak, nguaisei?

Cameron: Nguaisei. A babier er a Biblia er a Ocholt, el ngii a kmeed el ulech ngii me a ulaoch er a babier er a Daniel, a ngosukid el mo medengelii a mera el klemengetel a euid el rak. Ngochotii el kmo a edei me a tedobech el rak a ua klemengetel a 1,260 el sils.e Misei e a uchul me a euid el rak​—a ua el eru el taem el ildisel a edei me a tedobech el rak​—a mo osisiu a klemengetel ngii me a 2,520 el sils. Ke dirk obengkek?

Jon: Ochoi, a kultirakl a omolekoi. Engdi ngdiak kisang el kmo tia ngera ngochotii er a Rengedel a Dios el mlo omuchel el mengedereder er a 1914.

Cameron: Ochoi, ka me desa el kmo ngmekerang e sebeched el odak aika el tekoi. A lsekum e kede otireklii a Biblia el ta el sils a kirel a ta el rak, e a euid el rak a mo ua ildisel a 2,520 el rak. Me a omomuchel el omechur er a rak er a 607 er a uchei er a Kristus el mei er a 1914, e ngmeskid a 2,520 el rak, a uchul me ngoikid el mei er a rak er a 1914.f Sei a uchul me ngsebeched el dmu el kmo a rak er a 1914, a mle ulebengelel a euid el rak, e mle uchelel a omengederederel a Jesus el King er a Rengedel a Dios. E dirrek el ulemuchel er a 1914, e a meklou el tekoi a dilubech er tia el beluulechad​—el ngii el tekoi a lulemlaoch a Biblia el kirel a uriul el sils.

Jon: Me ngera el tekoi?

Cameron: Ka molatk a lullekoi a Jesus el llechukl er a Mateus 24:7, el kirel a taem el bo lomuchel el mengedereder el ngar er a eanged, e a Jesus a millekoi aikang el kirel tia el chutem: “A meklou el beluu a mo kaumekemad; ma renged a mo kaodechelakl. A bosech ma desiu a mor ngii er a bek el beluu.” Momtab el kmo a Jesus a ulemlaoch el kirel a bosech me a desiu er a chelsel tiaikid el taem. E a beluulechad a ulterekokl el mla mes a betok er aika el mondai er a chelsel tia el mereko el dart el rak, nguaisei ngdiak?

Jon: Ngkmal merang.

Cameron: Ngar tia el bades e a Jesus a dirrek el ulemlaoch a mekemad er a temel a demiel el King er a Rengedel a Dios. E a babier er a Ocholt er a Biblia a ulemlaoch el kirel a diak di el mekemad er a beluu e ngbai mekemad el mo ngar er ngii a letemellii er a beluulechad el rokir er a taem er a ulebongel.g Ke dirk melatk er sera kot el mekemedil a beluulechad er a lomuchel?

Jon: Tiang a mle sera 1914, el osisiu el rak el mdu el kmo a Jesus a ulemuchel el mengedereder! Ngdimlak a ta el kumekbuk aikang er a uchei.

Cameron: Me sel dengai a ika el rokui el tekoi el odekdak​—e a ulaoch el kirel a euid el rak me a lmuut el bebil er a ulaoch er a Biblia el mesaod el kirel a taem er a ulebongel​—e ngkmal mo bleketakl. A Resioning er a Jehovah a kmal ulterekokl a rengrir el kmo a Jesus a mlo omuchel el mengedereder er a Rengedel a Dios er sera 1914, e a uriul el sils a ulemuchel er tia el osisiu el rak.h

Jon: Ak dirk melasem el omtab a belkul aika el ulaoch.

Cameron: Tilechang a kmal klemerang el kudengelii. El ua kdilung er a uchei, ak dirrek el uluusbech er a kemanget el taem el mo medengei aikang. Engdi a kuureng el ulekum me aika el dulsaod a mla ngosukau el mo mesa el kmo alta e a rak el 1914 a diak el bleketakl el ullecholt er a Biblia, engdi a Resioning er a Jehovah a ulterekokl el oumerang er tia el rak el oeak a Bades.

Jon: Ochoi, ak blechoel el chemat er kau el kirel tiang​—a ngii di el tekoi el omolekoi, a mengai a omesodel el oeak a bades. Ngdirkak a ta el di mousbech er a uldesuem. Me ak melebedebek el kmo, ngera me tia kmal meringel. Ngera uchul me a Dios a dimlak di louchais er kid el oeak a Biblia el kmo, a 1914 a tiaikid el rak el Jesus a mo omuchel el mengedereder el ngar er a eanged?

Cameron: Tilechang a kmal ungil ker e Jon. A mera er ngii, ngar er ngii a kmal betok el tekoi el diak desal medengei a omesodel el ngar er a Bades. Me ngera uchul me a Dios a lilechesii a Biblia el kired el lousbech er a klou el taem el mo medengelii? Nglocha sebeched el mo mesaod el kirel er sel kluut el mei.

Jon: Ochoi, ngkmal soak me ak mengiil er kau.