A Rengedel a Dios Ngmlo Omuchel el Mengedereder er Oingerang?​—SUOBEL 1

MOLEMOLEM EL ‘OSIIK’ A KLEMEDENGEI

Cameron: Jon, ak kmal semeriar er tia el omesodel a Biblia el doruul er ngii er a bek el sandei.a Tia el mlo merek el dechadecheduch e kuleker er a ker el kirel a Rengedel a Dios. Kuleker el kmo ngera uchul me a Resioning er a Jehovah a oumerang el kmo, a Rengedel a Dios a ulemuchel el mengedereder er sera 1914.

Jon: Ochoi, ak milenguiu er a ta er a babilengiu e ngmillekoi el kmo a Rengedel a Dios a ulemuchel el mengedereder er sera 1914. E tiang a rirellak el kora mo melemlim a renguk e le kom kmo a rokui el tekoi el moumerang a ultuil er a Biblia.

Cameron: Tilecha klemerang, nguaisei.

Jon: E ngak a mla chiuii a Biblia el rokir. Engdi ngdirkak kisang a bades el mesaod er a rak er a 1914. Me ak mlo er a internet e ulemes er a Biblia e ulsiik er a “1914.” Ngmera el uaisei, ngdimlak betik er ngii er a ngii di el keskelel a Biblia.

Cameron: Ak kmal chotengau el kirel a teblong el tekoi, e Jon. A kot, kau el mla chiuii a Biblia el rokir. Kulterekokl el kmal betik a rengum er a Tekingel a Dios.

Jon: Nguaisei. Ngdiak a ungil el uai ngii.

Cameron: Ak kmal kongei. Ongerung, ngsoak el chotengau e le ke mo er a Biblia sel molasem el osiik a nger er a kerim. Kau a mirruul er a tekoi el Biblia a melisiich er kid el mo meruul. Me molemolem el ‘osiik’ a klemedengei.b Ngkmal ungil e le ke melasem el meruul aike el sebechem.

Jon: Ke kmal mesulang. Ngsoak el melemolem el mesuub. A mera er ngii, ak liluut el telkib el osiik e mlo metik a bebil er a omesodel a 1914 er a chelsel tia el babier el dosuub er ngii. Ngmesaod er a berrusel a king el mle klou el kerrekar el mleuukel e liluut el duubech, ngkora kmeed el uaisei a omesodel.

Cameron: Nguaisei. Tiang a ulaoch el llechukl er a babier er a Daniel er a 4 el bliongel, el uldimukl er ngii a berrusel a King el Nebukadnesar er a Babilon.

Jon: Ochoi, ngtiaikid. Ak milenguiu er ngii el ulaoch el betok el taem, engdi a mera er ngii, ngdirrek el dirkak kisang el kmo ngera kangkeister er ngii el kirel a Rengedel a Dios me a lechub a rak el 1914.

Cameron: A mera er ngii e Jon, a profet el Daniel me ngdirrek el dimlak el mui el medengelii a belkul a tekoi el lemlukrael el mo meluches!

Jon: Ngmerang?

Cameron: Ochoi. Ngar er a Daniel 12:8, e ngmelekoi el kmo: “Ak rirenges a lullekoi, ngdi dimlak bo kumtab.”

Jon: Me ngdiak el di el ngak el tang kung. Tia rullak el mo telkib el ungil a renguk.

Cameron: A klemerang a tiakid, a Daniel a dimlak el utebengii e le ngdirkak el bo el temel er a Dios el rechad a mo cherrungel el medengelii a belkul a ulaoch el ngar er a babier er a Daniel. Engdi chelechang el taem er kid e kede mla mo mui el medengelii.

Jon: Ngera me ke melekoi el uaisei?

Cameron: E le ka momtab er a ongingil el bades el bo donguiu er ngii. Daniel 12:9 a melekoi el kmo: “Ikal tekoi a kirel berotel el diak bo lecholt el dimerkmo le me ulebongel.” Me aika el ulaoch a bo dodengei er a uriul el taem, er a taem el “le me ulebongel.” Me ngua aike el bo dosaod er a omesubed er a Biblia, a rokui el olechotel a subedid el kmo kede kiei er a chelsel tiaikid el taem.c

Jon: Me a leuaisei, e ngsebechem el smodii a ulochel a Daniel el mei er ngak?

Cameron: Ak mo melasem el mo er a tkurrebab el sebechek.

A BERRUSEL A NEBUKADNESAR

Cameron: A bo domuchel, e ak mo telkib el smodii a lilsang a King el Nebukadnesar er a berrusel. E seikid e bo dosaod el kmo ngera belkul.

Jon: Ochoi.

Cameron: Ngar er a berrous, e a Nebukadnesar a milsang a metongakl el kerrekar el mlo turkii er a eanged. E tia e ngrirengesii a anghel er a Dios el dilu el kmo mukelii tia el kerrekar. Engdi a Dios a dilu el kmo, di becherei a uchul me lemedechel er a chutem. E a uriul er a “euid el rak” e a kerrekar a lmuut el duubech.d Tia el ulaoch a di millutk er a King Nebukadnesar er a kot el uchul. Me alta e ngkmal mle merael a chisel el king el di ua sel kerrekar el mlo turkii er a eanged, engdi ngmilengai a renged er ngii el “euid el rak.” Ke dirk melatk el kmo ngera dilubech?

Jon: Ngdiak, ngdiak debedebekii.

Cameron: Ngkmal di ungil. A Biblia a ochotii el kmo a Nebukadnesar a urridii a uldesuel el kirel a euid el rak. E a chelsel seikid el taem, e ngmlo diak el sebechel el mengedereder el king. Engdi a uriul er a euid el rak e a uldesuel a liluut er a smechel e ngii a liluut el mo mengedereder.e

Jon: Ak medengei aike el bla msaod el me er chelechang. Engdi aika el rokui ngera belkul el kirel a Rengedel a Dios me a rak el 1914?

Cameron: Ak di mo telkib el smodii, tia el ulaoch a teblong a otutel. A kot el otutel a dilubech er sera omengederederel a Nebukadnesar er a lemeterob. E a ongerung el otutel a mle kirel a omengederederel a Dios er a lemeterob. Me ngtiaikid el ongerung el otutel a ulak el mo er a Rengedel a Dios.

Jon: Ke mekera e medengei el kmo a ulaoch a ngar er ngii a ongerung el otutel el melutk el kirel a Rengedel a Dios?

Cameron: A ta er a tekoi, kede metik a olechotel el ngar er a chelsel a ulaoch. El ua losaod a Daniel 4:17, a ulaoch a mildung me a “rokui el chad er ker me ker bo lodengei el kmo ngii el Kot el Ngarbab el Dios oba klisiich el chodereder a renged er a beluulchad. Ma ngii di le chad el lolatk er ngii . . . me ng sebechel rullii el mo king.” Ke miltebengii a lolekoi er ngii el “renged er a beluulchad”?

Jon: Ochoi, ngmelekoi el kmo, “ngii el Kot el Ngarbab el Dios oba klisiich el chodereder a renged er a beluulchad.”

Cameron: Nguaisei. Ngtechang a omomdasu e ngike el “Kot el Ngarbab”?

Jon: A kumdasu e tia melekoi el kirel a Dios.

Cameron: Nguaisei. Me tiang a subedid el kmo tia el ulaoch a diak di lolutk el mo er a Nebukadnesar. Ngdirrek el melutk el kirel “a renged er a beluulchad”​—e tiang a omengederederel a Dios er a klechad. Me ngkmal bleketakl sel domes er a ulaoch el rokir.

Jon: Ngera ke mesaod?

A BABIER EL MESAOD ER A OSISIU EL DAI

Cameron: A babier er a Daniel er a Biblia a di blechoel el omelekl a osisiu el dai. Ngmelemolem el mesaod el kirel a ngar medad el taem el Rengedel a Dios a mo kutmeklii a omengederederel el ngar cheungel a Ngelekel el Jesus. El ua tiang, ka me domes aike el eru el bliongel er uchei. Ngsebechem el outekangel el mo menguiu er a Daniel 2:44?

Jon: Ochoi. Ngmelekoi el kmo: “Me sel taem el lorreder tirkel king, e a Dios el ngar a eanged a mo toketekii a rengedel el mo diak a ulebengelel. Misel renged a diak a sebechel el mo mesisiich er ngii, e ng bai mo okngemed a ikel bebil er a renged el rokui e sola e ngii a mo medechel el mo cherechar.”

Cameron: Ke kmal mesulang. Ngsebechem el kmo, tia el bades a oderengesed er ngii e ngkora melutk el kirel a Rengedel a Dios?

Jon: Ng . . . Ngdiak sal medengei.

Cameron: Me a leuaisei, e ka momtab, ngmelekoi el kmo tia el renged “a mo medechel el mo cherechar.” E tiang a klemerang el kirel a Rengedel a Dios, engdi ngdiak el sebeched el melekoi er ngii el kirel a ngii di el kabelment er a klechad, adang ngsebeched?

Jon: Ngdiak, nglocha diak.

Cameron: Tiakid a ta er a ulaoch el ngar er a babier er a Daniel el melutk el kirel a Rengedel a Dios. E tia llechukl er a Daniel 7:13, 14 el kirel ngike el mo mengedereder er a ngar medad el taem, e a ulaoch a kmo: “Ngmlar isei e ngiluu a klisiich, ma omengull, ma klisichel omerreder, el kirel me losiou er ngii a re chad er a bek el beluu, ma re bek el bedengir a re chad, ma kakerous el omelekoi. E a klisichel a medechel el mo cherechar, e a rengedel me ng diak a ulebengelel.” Ngar er ngii a ngar tia el ulaoch el mkora medengelii?

Jon: Ochoi, ngsel kirel a renged.

Cameron: Ngkmal merang. E diak el ngii di el renged. Ka momtab ngmelekoi el kmo tia el Renged a mo mengedereder er “a re chad er a bek el beluu, ma re bek el bedengir a re chad, ma kakerous el omelekoi.” A ta er a tekoi a kmo, tia el Renged a mo mengedereder er a beluulechad el rokir.

Jon: Ngdimlak kudengei el kmo tia mle belkul a bades, engdi ke melekoi a mera el tekoi. Ngmera el melekoi el uaisei.

Cameron: Ka momtab a bebil er a lolekoi a ulaoch: “A klisichel a medechel el mo cherechar, e a rengedel me ng diak a ulebengelel.” Tia di ua ulaoch el dirk dechiliuii el ngar er a Daniel 2:44, nguaisei ngdiak?

Jon: Ochoi, nguaisei.

Cameron: Ka me detelkib el omelekl aike el bla desaod. A ulaoch er a Daniel er a 4 el bliongel a lebilskid me a rechad bo lodengei el kmo “ngii el Kot el Ngarbab el Dios oba klisiich el chodereder a renged er a beluulchad.” Aika el tekoi a bleketakl el kmo a ulaoch a ngar er ngii a lmuut el klou el otutel el diak di losaod er a Nebukadnesar. Ngar er a chelsel a babier er a Daniel el rokir, e kede metik a ulaoch el kirel a omengetmeklel a Rengedel a Dios el ngar cheungel a omengederederel a Ngelekel. Me a omomdasu e ngmelemalt el dolekoi el kmo tia el ulaoch el ngar er a Daniel er a 4 el bliongel a dirrek el ngar er ngii a lerellii er a Rengedel a Dios?

Jon: A kumdasu e nguaisei. Engdi ngdirrek el dirkak kisang el kmo, ngera ngrullii el mo er a 1914.

ME A LEMEREKO “EUID EL RAK”

Cameron: Me a leuaisei, e ka me deluut el mo er a King Nebukadnesar. Ka molebedebek, sel kerrekar el mla er sel kot el otutel a ulaoch a ulemtechei er a King Nebukadnesar. A omengederederel a milterob er sera lemuukel sel kerrekar e lemedechel el euid el rak​—e tiaikid sel taem er a loridii a uldesuel el telkib el taem. A Nebukadnesar a liluut el mo ungil a uldesuel e ngiluu a omerreder er a bo lemerek tiaikid el euid el rak. E sel kuk ongerung el otutel a ulaoch, e a omengederederel a Dios a mlo meterob el euid el rak​—e ngdi ngdiak el belkul a kmo a Dios a mlo er ngii a ngelsengesel me a uchul e ngmlo uaisei.

Jon: Ngera me ke melekoi el uaisei?

Cameron: Sel taem er a omelechesel a Biblia, e a reking er a Israel el milengedereder er a Jerusalem a lullekoi er tir el kmo te dilengchokl er a “kingall er omerreder el le kildmeklii a RUBAK.”f Te ulemtechei er a Dios el mengedereder er a rechedal. Me a omengederederir tirke el king a mle olechotel a omengederederel a Dios. Engdi omerollel a taem el mei, e a ruumesingd er tirke el king a mlo diak lolengesenges er a Dios me a ruumesingd er tirke el ulebengterir me ngdirrek el mlo diak el oltirakl er a Dios. Me a rechad er a Israel el mlo diak el olengesenges a uchul me a Dios a milechititerir me a rechad er a Babilon a tilemellii a belurir er sera rak er a 607 er a uchei er a Kristus. Me seikid el taem el mei, e ngmlo diak a reking el omtechei er a Jehovah er a Jerusalem. Misei e a uchul, me ngsebeched el kmo, a omengederederel a Dios a milterob. Ngsebechem el mo medengei aika el bla desaod el merma er chelechang?

Jon: Ochoi, a kumdasu e nguaisei.

Cameron: Me a rak er a 607 er a uchei er a Kristus, a ulechotii a uchelel a euid el rak, me a lechub e ngsel taem el omengederederel a Dios a mlo meterob. E sel mo ulebengelel a euid el rak, e a Dios a mo dolemii ngike el mo beches el merreder el mo omtechei er Ngii​—e tiaikid el taem, e ngmo ta er a chad el ngar er a eanged. Me seikid e a bebil er a ulaoch el donguiu el kirel el ngar er a Daniel a mo motaut. Me a klou el ker a kmo: Ngoingerang a mlo ulebongel er tia el euid el rak? A lsekum ngsebeched el onger er tia el ker, e kede mo medengei el kmo ngoingerang e a Rengedel a Dios a ulemuchel el mengedereder.

Jon: Ngsebechek el mesang. Ka hall e kulangch​—a euid el rak ngmlo merek er sera 1914?

Cameron: Nguaisei! Ke mla mo medengelii.

Jon: Engdi kede mekerang e mo medengelii tiang?

Cameron: Me a leuaisei, a Jesus er sera lengar tia el chutem er a taem er a omesiungel e nguluuchais el kmo aike el euid el rak a dirkak bo lemerek.g Me nglocha kmal kemanget el taem. Me a euid el rak a ulemuchel er a tela el dart el rak er a uchei er a Jesus er a lemei er a chutem, e millemolem el betok el rak er a uriul er a lluut el mo er a eanged. Ka dirrek el momtab, a belkul a ulaoch el ngar er a Daniel a diak el kirel mo obeketakl “el dimerkmo le me ulebongel.”h Me ngkmal ungil a rengud e le chelsel aike el rak er a ulebengelel a 1800, e tirke el mle blak a rengrir el mesuub er a Biblia a mlo merriter er tia el ulaoch me a kuk bebil el uleba sekutaberreng. Te ulemuchel el mo medengei el kmo aike el euid el rak a mlo merek er sera 1914. Me a meklou el tekoi el dilubech el ulemuchel er seikid a ochotii el kmo a rak er a 1914 a tiaikid sel rak el Rengedel a Dios a mlo omuchel el mengedereder el ngar er a eanged. Tia mle rak el tia el beluulechad a mlo soiseb er a uriul el sils, me a lechub e ngtaem er a ulebongel. Me chelechang e ak mocha medengei el kmo aika kmal betok el tekoi el kirem el mo melebedebek . . .

Jon: Ochoi. Ak ulterekokl el lmuut el mo omelekl er tia el suobel me kluut el kmal mo medengelii.

Cameron: Lako bekikl. Ak dirrek el uluusbech er a kemanget el taem el mo medengei aika el ulaoch me a otutel. Engdi a kuureng el kmo aika el bla desaod a mla ngosukau el mo medengei el kmo a tekoi el loumerang a Resioning er a Jehovah el kirel a Renged a ultuil er a Biblia.

Jon: Ngmerang. Ak kmal blechoel el chemat er kemiu el ultuil er a Biblia el kirel a tekoi el moumerang.

Cameron: Ngak me ak dirrek el sebechek el mesang el kmo ngosisiu a klemeriarreng er kau el kirel. Me ngua bla kdung, aika kmal betok el beches el tekoi el diak el sebechem el mo medengei er a di ta el taem. Nglocha dirk ngar er ngii a bebil er a kerim. El ua tiang, kede mla metik er ngii el kmo a euid el rak a ngar er ngii a lerellii el mo er a Rengedel a Dios e ulemuchel er a rak er a 607 er a uchei er a Kristus. Engdi ngoeak a ngera el rolel e kede medengei el kmo aika el euid el rak a mlo merek er sera 1914?i

Jon: Ochoi, ak kora omdasu el kirel tilechang.

Cameron: A Biblia a ngosukid el mo medengelii a ulterekokl el klemengetel a euid el rak. Ngdiak el soam el mo merriter er tia el suobel er sel kluut el mei?

Jon: Ngkora kmal ungil.