A NGER ER AIKE EL KER ER A BIBLIA

Ngera me a rebetok a oumerang el kmo ngar er ngii a Ulemeob?

Ngar er a bekord el 3,000 el rak er a mla me mong, e a ta el chad er a omeluches a milluches el kmo: “Ke rirellak el ileakl ngodech e mengasireng.” (Psalm 139:14) Me kau ngdiak el sal mo mechas a rengum sel molatk er a rolel e ngobeob a ngalek el okiu a di chimo el cell er a chad? A rebetok el chad a omes a charm me a rechad el kmal mengasireng el bleob e mo oumerang el kmo ngar er ngii a Ulemeob.​—Monguiu er a Psalm 139:13-17; Hebru 3:4.

Ngike el milebii a eanged me a chutem me a rokui el tekoi er a chelsel a dirrek el uchul a klengar. (Psalm 36:9) Ngmla ouchais er kid el kirel a blekerdelel me a klemechel el mo er a rechad.​—Monguiu er a Isaia 45:18.

Kid kede mla er a charm el mei?

Ngbetok a klaisisiu er a delongelel a bedengir a rechad me a bedengel a charm, e le rechad me a charm a di dul ulebeob el kirir el kiei er a beluulechad. Engdi ngike el Ulemeob a milebii a kot el chad el dimlak lokiu a charm e ngbai uluusbech a chutem.​—Monguiu er a Genesis 1:24; 2:7.

A rechad a kakerous er a charm el okiu a eru el meklou a ultutelel el tekoi. A kot, a rechad a sebechir el medengelii e betik a rengrir e dirrek el mengull er a Ulemeob. A ongerung, a charm a dimlak lobeob el kirel el kiei el mo cherechar, e a rechad a sebechir. Engdi chelechang e a rokui el chad a oudiukes er a kodall e le ngike el kot el chad a ultngeklii a ulekrael er a Ulemeob.​—Monguiu er a Genesis 1:27; 2:15-17.