Ngar er Ngii a Orrenges a Nglunguched?

A rebebil a omdasu el kmo ngdiak a ultutelel el doluluuch e le ngdiak a orrenges a nglunguched. E a rebebil a kuk mla melasem el meluluuch engdi te omdasu el kmo ngdiak lemonger a nglunguchir. A ta el chad el diak loumera er a Dios a millasem el di ngii el omeob er a Dios er a uldesuel e milluluuch el kmo: “Di el ta el mongululau er ngak.” E a uriul e ngdilu el kmo: “Engdi a Dios a di liluk.”

Me nguaisei, engdi a Biblia a meketeklii el kmo ngar er ngii a Dios e Ngii a orrenges a nglunguched. Ngar er ngii a llechukl el omesodel el ngar er a Biblia el mlo er a rechad er a irechar el kmo: “A RUBAK a chubechubechad me sel le renges a lengeliu, e ngmo onger er kemiu.” (Isaia 30:19) Me a lmuut el ta er a Bades a kmo: “A RUBAK a dmeu a rengul er a re ungil chad a loluluuch.”​—Osisechakl 15:8.

A Biblia a dirrek el ouchais a omerellir tirke el milluluuch e mlonger a nglunguchir. A ta er a bades a mesaod er a Jesus “er a loluluuch e lolengit a ngera er a Dios, el ngikel mle sebechel el osebelii” me a “Dios a rirengesii” a nglunguchel. (Hebru 5:7) Ngar er ngii a lmuut el bebil er a nglunguuch el sebeched el metik er a Daniel 9:21 me a 2 Kronika 7:1.

Me ngera uchul me a rebebil a omdasu el kmo ngdiak lemonger a nglunguchir? Ngkmal sebechel el morenges a nglunguched a lsekum kede meluluuch el mo er ngike el Dios el oubabier er a Biblia el Jehovah,a el diak el ngii di el chelid me a lechub te chedad el mla mad. Me a lsekum kede meluluuch el oltirakl a soal a Dios e ngdirrek el “rongesid.” (1 Johanes 5:14) Me a lsekum ngsoad a lemorenges a nglunguched, e ngkired el omuchel el mo medengelii ngika el Dios er a Biblia e mesuub el mo medengei a tekoi el soal a doruul.

Me a rebetok a oumerang el kmo a nglunguuch a diak di el siukang er a klechelid, e ngmera el ngar er ngii a Dios el lorrenges e onger a nglunguuch. A Isaac er a beluu er a Kenya a kmo: “Ak milluluuch el olengit a ngeso me bo el sebechek el mo ungil el medengelii a Biblia. E di mle telkib el taem er a uriul e a ta el chad a mle duum e kilengei el ngosukak er tia el tekoi. Ngar er a beluu er a Huriping e a Hilda a mle soal el mo diak lolamech a dekool. Me a uriul er a lolasem el betok el taem e lekea el sebechel, e a bechil a dilu el kmo, “Ngera me ngdiak moluluuch el olengit a ngeso er a Dios?” Me ngkilengei e millasem er tia el tekoi e dilu el kmo: “Ngkmal mlo mechas a renguk er a ngelsuil a Dios. Ngdi rirellak el mo chetik tia el tekoi el uchul me ngmlo sebechek el choitii a omelamech el dekool.”

A Dios, ngsemeriar el ngosukau sel moluluuch el olengit a ngeso er ngii el oltirakl a soal?