A Dios Ngorrenges a Nglunguched?

A DIOS A ORRENGES.

“Ele konger a nglunguuch. A rokui el chad a mer kau el kirel a kngterir.”​—Psalm 65:2.

A rebebil a meluluuch e le ngrulleterir el mo ungil a rengrir alta ngdiak loumerang el kmo ngar ngii a orrenges er tir. Engdi a nglunguuch a diak di doruul er ngii me bo lungil a rengud e bo el sebeched el outekangel a mondai er kid. A Biblia oterekeklii a rengud el kmo a Jehovaha a “kmeed er tirkel rokui el omekedong er ngii, el tirkel mera er a rengrir omekedong er ngii. . . . Ng orrenges ongterir.”​—Psalm 145:18, 19.

Me ngsebechel el mo ulterekokl a rengud el kmo a Jehovah el Dios a orrenges a nglunguchir a remesiungel. Ngoba bltikerreng el melekoi el kmo: “Isei e kom mo omekedong er ngak, e me meluluuch er ngak mak mo onger er kemiu.”​—Jeremia 29:12.

A DIOS A SOAL OMOLULUUCH EL MO ER NGII.

“Di blechoel el meluluuch.”​—Rom 12:12.

Ngar er a Biblia e kede muchelechel el di melemolem el ‘meluluuch’ e mo ‘meluluuch er a rokui el techall.’ Me ngbleketakl el kmo a Jehovah el Dios a soal omoluluuch el mo er ngii.​—Mateus 26:41; Efesus 6:18.

Ngera uchul me a Dios a soal a doluluuch el mo er ngii? Ka molatk: Ngtecha el chad a diak el soal a lsekum a ngelekel a mo er ngii e kmo, “Babpa ngsebechem el ngosukak”? Nguaisei el demal a locha medengelii a uldesuel me a lechub aike el lousbech, engdi sel lerengesii el olengit a ngeso, e ngochotii el kmo a ngelekel a oumerang er ngii e kmeed er ngii. Me ngdi osisiu, sel doluluuch el mora Jehovah el Dios, e kede ochotii el kmo kede oumerang er ngii e soad el kmeed er ngii.​—Osisechakl 15:8; Jakobus 4:8.

A DIOS A MERA EL OMEKERREU ER KAU.

“Moterekokl a ikel rokui el tekoi el suebek a rengmiu er ngii, ele ng kerekikl el omekerreu er kemiu.”​—1 Petrus 5:7.

A Dios a soal a doluluuch el mo er ngii e le ngbetik a rengul e omekerreu er kid. Ngungil medengei aike el mengesang er a uldesued me aike el uchul e ngsuebek a rengud, e soal lolengeseu er kid.

Chelsel a klengar er ngii, e a King David a milluluuch el mora Jehovah el Dios el olengit a ngeso e uluuchais er Ngii aike el ngar er a uldesuel me a rengul. (Psalm 23:1-6) Ngmle uangera uldesuel a Dios el kirel a David? A Dios a mle betik a rengul er ngii e ulerrenges aika el nglunguchel. (Rellir 13:22) Me ngdi osisiu, a Dios a orrenges a nglunguched e le ngomekerreu er kid.

“NG BETIK A RENGUK ER A RUBAK, ELE NG ORRENGES ER NGAK”

Aika tekingel a ta er a milluches er a psalm er a Biblia. Ngmle ulterekokl a rengul el kmo a Dios a orrenges a nglunguchel, e tia kmal klou a lerirellii er ngii. Ngliluut el mo kmeed er a Dios e ngiluu a klisiich el mo outekangel a ringel me a klengiterreng.​—Psalm 116:1-9.

Sel bo lulterekokl a rengud el kmo a Dios a orrenges a nglunguched, e ngmo blak a rengud el meluluuch el mo er ngii. Ka molatk er a experience er a Pedro, el kiei er a diluches er a Spain. A ngelekel el 19 a rekil a mlad er a accident. Me a Pedro a uluuchais er a Dios aike el rokui el mlara rengul e mle blak a rengul meluluuch el olengit a ongelaod me a ngeso. Me ngera dilubech? Ngmelekoi el kmo: “A Jehovah ulenger a nglunguchek loeak a ongelaod me a ngeso el kngilai ngak me a bechik er a rekldemam el Kristiano.”

Me alta nglunguuch a dimlak lolutii a klengar er a ngelekir, engdi kmal klou a lengilsuir er a Pedro me a telungalek er ngii. A bechil er a María Carmen a kmo: “A nglunguuch a ngilsukak el outekangel er a kngtil a renguk. Ak mle medengei el kmo a Jehovah el Dios a medengelii a tekoi el kchelebangel er ngii e le sera kululuuch el mo er ngii, e ak mlo melechesuar a budech e mlo chelellakl a renguk.”

A Biblia me a experience er a rechad a bleketakl lochotii el kmo a Dios a orrenges a nglunguuch. Me nguaisei, engdi ngdirrek el lochotii el kmo ngdiak lorrenges a rokui el nglunguuch. Ngera uchul me nguaisei?