Molemolem el Melatk a Tekingel a Dios

1, 2. Ngokiu a ngera el rolel e ngkmal ileakl a no er a bdelul a chad?

A TEKOI a uchul me a rechad a mo sebechir el menguiu e meluches e mengedecheduch e mo medengei a tekoi el medung e meluluuch e dirrek el mengitakl el oldanges er a Jehovah. Me a derta er aikang a ochotii el kmo ngkmal mengasireng a blebelel a no er a bdelud me sel rolel a loureor. E tiang a dirkak bo el sebechir a re scientist el mo cherrungel el medengelii a rolel e ngmeketmokl el tekoi. Me tiaikid el ileakl el rolel e ngoureor a no er a bdelud a rullid me ngsebeched mesuub a tekoi. A ta el professor er a linguistics a kmo: “Sel rechedel a uldesuir a rengalek el mesuub a tekoi a ta er a ileakl el blekerdelir a rechad.”

² Me tia el duch er a rechad el mengedecheduch a kmal mengasireng el sengk er a Dios. (Psa. 139:14; Och. 4:11) Me a no er a bdelud el lebilskid a Dios a ileakl el ngodech el okiu a kuk ta er a rolel. Ngkuk ngodech er a no er a bdelul a charm e le kede ulebeob el “okesiul a Dios.” Me ngar er ngii a ilmekled el melilt a tekoi e dirrek el sebeched el ousbech er a duch er kid el mengedecheduch el mo mengebkall er a Dios.​—Gen. 1:27.

3. Ngera el ungil el sengk a bla lebeskid a Jehovah el rullid el mo mellomes a rengud?

³ A Dios el ngike Uchul a omelekoi a mla mesterir tirke el rokui el sorir el mengebkall er ngii a kmal ungil el sengk el Biblia. E tiang a mla motobed el cherrungel me a di mekedeb el ngar er a betok er a 2,800 el bedengel a omelekoi. Me sel molebedebek aika el chedaol llechukl e ke omekeek er a uldesuem er a tekingel a Dios. (Psa. 40:5; 92:5; 139:17) Me seikid e ngmo dmeu a rengum el melatk a tekoi el ngii a “sebechel el mekllemesii a rengum e orolau el mo oumerang . . . me ke mo suobel.”​—Monguiu er a 2 Timothy 3:14-17.

4. Ngera belkul a omelebedebekel a tekoi, e ngera el ker a bo dosaod?

⁴ Me a dolebedebek a tekoi e ngbelkul a kmo ngkired el omdasu e melatk er a tekoi alta ngungil me a lechub e ngmekngit. (Psa. 77:12; Osi. 24:1, 2) Me a eru el kot el ungil el tekoi el kired el melatk a Jehovah el Dios me a Ngelekel el Jesus Kristus. (Jn. 17:3) Kede locha mo melatk el kmo me ngera uchul me a omenguiu me a omelebedebek el tekoi a kirel el dmak? Ngmo uchul a ngera el tekoi el kired a dolebedebek a tekoi e mekerang e mo soad el meruul er ngii?

A OMESUBEM BO LUCHUL A UNGIL EL TEKOI

5, 6. Ngera sebechel el ngosukau el lmuut el mo ungil el medengei a tekoi el monguiu e dirrek el mo diak mobes er ngii?

⁵ Ngbetok a ungil el tekoi el sebechel a no er a bdelud el remuul, engdi a lebebil er a taem e ngsebeched el meruul a tekoi el diak dousbech er ngii. El ua tiang, ngsebeched el outeliil e merael, e ngar er a rrat, me a lechub e kede outype. Ngdi osisiu el ua omenguiu, me ngklou a ultutelel el kired el mo kerekikl el melatk a belkul a tekoi el donguiu. Me sel bocha er a ulebengelel a parakurab me a lechub e ke mocha omuchel er a beches el dai er a babier e ke locha mo chelellakl e kora melebedebek a tekoi el bla mchuiu me bo el sebechem el ungil el medengelii a belkul. Me a tekoi el mengesang er kid, me kid el mo diak dungil el omtab a uchul, e ngmo mechesang a uldesued el melatk a bebil er a tekoi, e seikid e a omesubed a mo diak lungil. Me ngmekerang e sebeched el oibngid er tia el tekoi?

⁶ A remesuub a tekoi a mla tirterii el kmo sel donguiu el klou a ngered e ngmo beot er kid el melatk a tekoi el dosuub. Me ngike el Ulemeob er a no er a bdelud a ungil medengelii tiang, sei a uchul me ngdilu er a Josua me ngmo menguiu e melebedebek er a babier er a Llach. (Monguiu er a Psalm 1:2.) Ke ulterekokl el mo melechesuar el kmo sel molebedebek a tekoi el monguiu e ngsebechem el mo ungil medengelii a suobel. Tiang a dirrek el ngosukau el mo ungil el melatk a tekoi.

7. Ngoingerang a kot el ungil el taem el dolatk a Tekingel a Dios? (Momes er a siasing er a uchelel a suobel.)

⁷ Me alta e a omenguiu a sebechel el beot er kid el meruul er ngii, engdi a chad a kirel el chelellakl me ngmo sebechel el ungil el melebedebek a tekoi. Seikid a uchul me tia el diak el cherrungel el no er a bdelud, a beot er ngii el melatk a mekekerei el tekoi. Me sel kot el ungil el taem el bo dolebedebek a tekoi, a ngar sel taem el bla dolengull e lak a ngera el mengesang a uldesued. A ta er a milluches er a Psalm a miltebengii el kmo a ungil el taem el lolebedebek a tekoi, a sel temel el mechiuaiu er a dukllel er a klebesei. (Psa. 63:6) Me a Jesus el mle cherrungel a uldesuel a dirrek el mle medengelii a klungiolel sel lengar er a chelellakl el basio, e lolebedebek a tekoi, e loluluuch.​—Lk. 6:12.

A TEKOI EL UNGIL A BO DOLATK

8. (a) Ngera el tekoi a sebeched el melatk el ngii a uldimukl er a Tekingel a Dios? (b) Ngua ngera uldesuel a Jehovah el kirir tirke el chad el mengoit a temir el mesaod er ngii?

⁸ Me sel dolatk a tekoi el donguiu er a Biblia e tiang a ta er a klou a ultutelel el rolel e kede melebedebek a tekoi, engdi ngar er ngii a lmuut el bebil er a rolel. El ua tiang, sel momes a klebokel el blebelel a Dios e bo mungil el omtab, e ngulterekokl el rullau el mo soam el oldanges er a Jehovah el kirel a ungil el omerellel. E dirrek el locha mo soam el mesaod el obengkel a chad el ngar bita er kau. (Psa. 104:24; Rel. 14:17) Me a Jehovah, ngdmeu a rengul el mo medengei a ungil el uldesued me a tekinged el kirel? Me bo desa nger er ngii el ngar er a Tekingel. Ngar er ngii a telbilel el kirel a semecheklel tia el mekngit el blekeradel er a beluulechad el kmo: “Misei e a re chad el meluu er a RUBAK a mle chachedecheduch, e a RUBAK a ulerrenges e mlo medengei a lolekoi. Me ng milluches er a babier er medal a RUBAK omerellir tirkel meluu e mengull er ngii.”​—Mal. 3:16.

9. (a) Ngera ngdilu Paulus el mle kirel a Timothy el mo melatk? (b) Kede mekerang e oltirakl er a ulekrael er a Paulus sel dongetmokl er kid el mo oldingel?

⁹ A apostol el Paulus a dilu er a Timothy me ‘bo le blak a rengul’ e lekerekikl a tekingel me a omerellel me a osisecheklel. (Monguiu er a 1 Timothy 4:12-16.) Me kid a di ua Timothy el sebeched el melatk a betok el tekingel a Dios. El ua tiang, ngkired el mengoit a taem el mesuub e mengetmokl er kid me bo el sebeched el olisechakl er a rechad el ousbech er a Biblia. Me sel dolatk er a rederta el chad el dosuub el obengterir e ngsebeched el melatk a ker me a lechub e ngokesiu el sebechel el ngosuterir el mo olengeriakl er a omesubir. Me a temed el dongoit el meruul er tiang a sebechel el omekbeches a uldesued. E sel dolatk aika el tekoi e ngsmisichii a klaumerang er kid e ngosukid el mo meduch e semeriar el olisechakl er tir el ousbech er a Biblia. Me tiang a di osisiu er sel dongetmokl er kid el mo oldingel a obliil. (Monguiu er a Esra 7:10.) Me sel donguiu a derta el bliongel er a babier er a Biblia er a Rellir e ngrullid el lmuut el ‘mo blak a rengud’ el meruul er a omesiunged. (2 Ti. 1:6) Me sel dolatk aike el bades el soad el mo ousbech er sel sils, me aike el babier el soad el mo merous, e ngosukid el lmuut el mo ungil el kutmeklii tia el techelled el mesiou er a Dios. Dolatk er a rechad el ngar er a basio el domerk er a klumech er ngii me aike el tekoi el bo lesemeriar er ngii. Me a rokui el tekoi el deketmokl el kirel a mo uchul e kede ungil el merkii a klumech el ‘melisiich a tekinged el ultuil er a klisichel a reng er a Dios’ el mengai er a Biblia.​—1 Ko. 2:4.

10. Ngera lmuut el bebil el techall el sebeched el meruul me bo dolatk a tekingel a Dios?

¹⁰ Me kau, ke meluches aike el tekoi el soam er sel temel a cheldecheduch el mo er a buai me aike el meklou el ongdibel er kid? Ngkmal ungil el techall el molatk aika el suobel sel omluut el mo omes aike el tekoi el bla msuub el okiu a Tekingel a Dios me a cheldebechelel. Ngdirrek el bek el buil el ngar er ngii a Ongkerongel me a Awake! el tuobed el sebeched el menguiu e melebedebek. Me sel monguiu er a Yearbook, e ngdirrek el ungil el bom telkib el mo chelellakl e molatk aike el ungil el tekoi el dilubech. Ngokiu tiang e ngmeskau a techellem el melatk a tekoi el dilubech me ngmelisiich er a rengum. Nglocha dirrek el mo soam el locha olengchelem er aike el meklou a ultutelel el tekoi me lengesukau sel mluut el mo oldingel er a resemeriar, me a lechub e ke mo melisiich er a rudam er kau, me a lechub e ke mo oltobed er a cheldecheduch el mo er a buai. Engdi sel kot el klou a ultutelel a sel mtelkib el mo chelellakl e molatk a tekoi el mosuub, me sel monguiu aike el babier el mengai a uchetemel er a Biblia, e ngmo ngosukau el melatk ngii el tekoi e dirrek el mo sebechem el meluluuch el mereng a sulel a Jehovah el kirel a betok el ungil el tekoi el mosuub.

MOLATK A TEKINGEL A DIOS ER A BEK EL SILS

11. Ngera ngaruchei el uchul me ngkired el melatk a tekoi, e ngera uchul?

¹¹ Sel ngaruchei el uchul me ngkired el melebedebek a tekoi a okiu a Tekingel a Dios el Biblia. Me oleko ngmo er ngii a taem el diak a Biblia er kau, e ngdirk ngar er ngii a techellem el melatk aike el tekoi el bla msuub me ngmedechel er a uldesuem, el ua sel kot el soam el bades me a tekoi el ngar er a chelitakl er a Renged. (Rel. 16:25) Me a chedaol reng er a Dios a sebechel el ngosukau me ngsebechem el mo melatk aike el ungil el tekoi el bla msuub.​—Jn. 14:26.

12. Ngera el rolel a omengiuel a Biblia a mo uchul a klungioled?

¹² A lebebil e ngsebechem el oterekokl a temem er a chelsel a bek el sandei el mo menguiu e melatk er sel omengiuel a Biblia er kid el kirel a Skuul el Kirel a Urerel a Dios. E a bebil er a sils e ngsebechem el di menguiu er a Biblia el kirel a omerellel me a tekingel a Jesus. Ke ulterekokl el kongei el kmo a Ebangkelio el kirel a klengar er a Jesus me a omesiungel er tia el chutem el ngar er a Biblia, a kmal betok a rechad el medengelii. (Rom 10:17; Heb. 12:2; 1 Pe. 2:21) A rechedal a Dios a dirrek el ngar er ngii a babilengir el mesaod er a blechebechel a tekoi el dilubech er a klengar er a Jesus, me sel taem er a lengar er a chutem. Tiang a kmal ungil el babier, el ileakl a lsekum kede kerekikl el menguiu e melatk aike el osisiu el cheldecheduch el ngar er a derta el bliongel er a chelsel.​—Jn. 14:6.

NGERA ME NGKLOU A ULTUTELEL EL DOLATK A TEKOI?

13, 14. Ngera me ngklou a ultutelel el kired el melatk a tekoi, e tiang rullid el mo soad el mekerang?

¹³ A dolatk a tekingel a Dios e ngmo uchul e ngmukeroul a klaumerang er kid. (Heb. 5:14; 6:1) A chad el diak a temel el melatk er a Jehovah me a Jesus a diak el sebechel el mukeroul a klaumerang er ngii. Me a uaisei el chad a klou a techellel el mo cheroid er a klemerang. (Heb. 2:1; 3:12) A Jesus a milengelechel el kmo a lsekum e ngdiak dorrenges me a lechub e dekengei el oltirakl a Tekingel a Dios e ngkmal diak el sebechel el medalem er a rengud. Ngbai mo beot er kid el mekesuseu er a “chelsengul a klechad, ma ilteet, ma tametereng er tial klengar . . . me ng di mo diak a ultutelel” a klengar er kid.​—Lk. 8:14, 15.

¹⁴ Me a leuaisei, e deluut el mo blak a rengud el melebedebek a Tekingel a Dios. Ngrullid me ngmo sebeched el olecholt aike el blekerdelel a Jehovah el medung er a Biblia. (2 Ko. 3:18) Me ngera kede dirk mengerechir er ngii? Sel dokurulii a klemedengei er kid er a Dios, e lebo er ngii a techelled el mesuub a blekerdelel, e kede mo oba ileakl el techall el diak a ulebengelel, e dirrek el melemolem el mesuub el mo meduch el oukerebai er ngika el Demad el ngar er a eanged.​—Oli. 3:11.

15, 16. (a) Kede mekerang e ngmai a klungioled sel dolatk a tekingel a Dios? (b) Ngera me a lebebil er a taem e ngmeringel er kid el melatk a tekoi, engdi ngera me ngkired el melemolem el meruul er ngii?

¹⁵ Me sel deblechoel el melatk a tekingel a Dios e nglmuut el mukeroul a klemeriarreng er kid er a klemerang. E tiang a mo uchul e ngsebeched el mengelaod er a rudam er kid me tirke el semeriar el chad el debetik er tir sel doldingel a obliil. Me sel dolatk er a kot el ngarbab el sengk er a Dios, el ngii a olubet el tengetengel a Jesus, e ngdirrek el ngosukid el mo mengreos er a techall el dobang, el mo er ngii a kmes el deleuill er kid me ngika el Chedaol el Chedam el Jehovah. (Rom 3:24; Jak. 4:8) A Mark er a beluu er a South Africa el mle 3 el rak el lekelebus e le ngii el Kristiano me ngdimlak lekengei el teloi a ngii di tekoi er a balatiks, a kmo: “A omelebedebekel a tekoi a sebeched el omekesiu er ngii el mo er a ungil el omerael. A cherengel a taem el dolatk a tekingel a Dios e kede mo medengei a lmuut el bebil er a beches el tekoi el kirel a Dios er kid el Jehovah. Me ngar er aike el taem el bo lemechitechut a renguk me a lechub e ngsuebek a renguk el kirel a ngar medak el taem, e ak nguu a Biblia er ngak e menguiu er ngii e melatk a belkul a Bades el kunguiu. E seikid e ngmera el mo chelellakl a renguk.”

16 Ngmera el tekoi, a klengar er chelechang a kmal cheliseksikt er a betok el tekoi, el rullii me ngmo meringel er kid el melatk a tekingel a Dios. A ta er a blak a rengul el odam er kid er a Africa el Patrick a kmo: “A uldesuek a di ua mailbox el mui er a betok el mail el bebil a soak me a bebil a chetik. Me ngkirek el bek el sils el kulilt e mengoit aike el chetik el mail. Me sel kurriter er a uldesuek e ak blechoel el metik a mekngit el uldasu me ngmo kirek el meluluuch el mo er a Jehovah me lededesii a uldesuek me bo kungil el melatk a tekoi, e tia el omeruul a ousbech er a telkib el taem. Seikid e ngmo sebechek ungil el melatk a tekoi, me ngrullak el mo kmeed er a Jehovah e mekengii a uldesuek me nglmuut el mukeroul a klemedengei er ngak er a klemerang.” (Psa. 94:19) Me ngkmal betok a klungiaol el mo er tirke el rokui el blak a rengrir ‘el orrenges a osisechakl, e bek el sils el losuub er a Chedaol Llechukl.’​—Rel. 17:11.

NGMEKERANG E MO ER NGII A TEMEM?

17. Ngmekerang e mo er ngii a temem el melatk a tekoi el mosuub?

¹⁷ A rebebil a mekiis er a dirk tutau e menguiu e melatk a tekoi el longuiu, e dirrek el meluluuch. E a rebebil a kuk meruul er tiang er a temel a sueleb. E kau a locha kuk soam el meruul er ngii a lekebesengei me a lechub e ngsel bochu mechiuaiu. E a rebebil a “mesuub er ngii er a llomes ma klebesei” me a lechub e ngbek el sils. (Jos. 1:8) Me nguaisei, engdi a klou a ultutelel a kmo dolasem el mengoit a diak a ultutelel el tekoi me lebo er ngii a temed el melebedebek a Tekingel a Dios.​—Efe. 5:15, 16.

18. Ngerang dmung a Biblia el kirir tirke el melatk a Tekingel a Dios er a bek el sils e melasem el oltaut aike el lesuub?

¹⁸ A Tekingel a Dios a omelekl el mesaod er a telbiil el mo omekngeltengat er tirke el melatk er ngii e melasem el oltaut aike el lesuub. (Monguiu er a Psalm 1:1-3.) A Jesus a dilu el kmo: “Te bai ngeltengat tirkel rongesii a tekingel a Dios e mo oltirakl er ngii!” (Lk. 11:28) E a klou a ultutelel el tekoi a sel dolebedebek a tekingel a Dios er a bek el sils e nguchul e ngmo sebeched el odengesii ngika el Ngarbab el Ulemeob er tia el mengasireng el no er a bdelud. E ngii a omekngeltengat er kid me ngmo dmeu a rengud er chelechang me sel klengar el mo cherechar er a chelsel a beches el beluulechad er ngii.​—Jak. 1:25; Och. 1:3.