Dios a Di Kmedung e Ngmo Okngemed a Rokui el Ringel

“RUBAK, ng mo ua ngera klteketel el kulengit a ngesou e ke mochu rongesak, e osebelemam er a mekngit el bekeu el omeruul.” (Habakuk 1:2, 3) Aika tekingel a Habakuk el ungil chad el oba kengei er a Dios. Aika el tekingel ngochotii el kmo ngdimlak a klaumerang er ngii? Ngkmal diak el uaisei! A Dios ulelterekokl er a rengul el kmo ngngar ngii a telutk el temel e ngmo okngemed a ringel.​—Habakuk 2:2, 3.

Sel bo dechebangel a ringel me a lechub ngbetik er a rengud a chuarm e ngkmal sebechel mo beot er kid omdasu el kmo a Dios a kmal meoud e mla mo kirel ngosukid er chelechang. Engdi a Biblia olterekokl er a rengud el kmo: “A Rubak a diak le meoud el mo meruul a ikel tekoi el le tilib el mo meruul, el ua ikel lomdasu a re bebil er a re chad. Ng bai oba kllourreng el kiriu, ele ng diak el soal a ngii di le chad a leriid, e bai soal a rokui el chad a lobult el mo imikr a kngterir.”​—2 Petrus 3:9.

OINGERANG E A DIOS A MO OKNGEMED?

Ngkmal di kmedung! A Jesus a dilu el kmo ngngar ngii a telecheroll el mo mes a blekeradel el lolengchelel a uriul el sils er a “ulebongel er a beluulchad.” (Mateus 24:3-42) A ulochel a Jesus el mla tmaut er chelecha el taem ochotii el kmo ngkmedung a osobel er a Dios.a

Engdi ngmekera Dios e mo okngemed a rokui el ringel? A Jesus er a lengar tia el chutem e ngulechotii a klisichel a Dios el olekngemed a ringelir a rechad. Molatk a bebil lolechotel.

Telemellel a Beluu: A Jesus me a rubengkel er a lengar er a Daob er a Galilea e ngmlo er ngii a mesisiich el oiu el mle sebechel orsersii a bos. Engdi Jesus a ulechotii el kmo ngii me a Demal a sebechel torob aike el uchul a temellel a beluu. (Kolose 1:15, 16) A Jesus a dilu el kmo: “Eolt, bo mchelellakl; chedesaoch, bo meiusech!” Me ngngera dilubech? “Ng di mlo diak a eolt e mo meiusech.”​—Markus 4:35-39.

Secher: A Jesus a ble lodengelii a rechad el kmo ngsebechel lomekungil er a remeiko me a rechitechut me tirke el smecher el chebedes me a lmuut el bebil er a rakt. “Jesus . . . ulemekungil er tirkel rokui el silecher.”​—Mateus 4:23, 24; 8:16; 11:2-5.

Bosech er a Kall: A Jesus a uluusbech er a klisiich el lebilsa Demal el remuul a sesei el kall el mo betok. A Biblia kmo ngmle eru el taem el lomekang er a rebetok el telael el chad.​—Mateus 14:14-21; 15:32-38.

Kodall: Aike el edei el okiis el lurruul a Jesus ochotii el kmo a Jehovah a ngar ngii a klisichel lolekiis er a re mla mad. A ta er a chad el ulekisii a Jesus a mle ulekoad el eua el klebesei.​—Markus 5:35-42; Lukas 7:11-16; Johanes 11:3-44.