Sel Lebo er Ngii a Meringel el Rektem

“Sera bo kudengei el kmo ngkasinoma olemedek me a colon er ngak, e a kulemdasu el kmo ngak a kmal di mo mad. Engdi uriul er a kumes er a toktang e bok rei e ak mlo melatk, ‘OK, ngdimlak expect er ngii engdi ngkirek losiik a rolel e outekangel er ngii.’”—Linda, 71 a rekil.

“Ak smecher er a kmal meringel el rakt el affect er a ngurd er a left side er a medak. Ngkmal mo meringel me ngngar ngii aike el taem e a kmal mo depressed. Ngbetok el taem el bo kumdasu el kmo ngkmal di ngak el tang e mo soak el melai er a klengar er ngak.”—Elise, 49 a rekil.

Chad el smecher el iliuekl er a rebetik er a rengul

A LSEKUM kau me a lechub e ngbetik er a rengum a smecher er a omekodall el rakt, e ke kmal medengelii a ringelel tia el blekeradel. Ngdiak di el tia el rakt a meringel, blekeradel el omngar ngii a uchul me nglocha dirrek el di ngera ngmasech a rengum, mo seselk a rengum, me a lechub e ngmo suebek a rengum. Nglocha mo uaisei er a temel aike el appointment, me a lechub e ngringelel a cheral a ukeruul, me a lechub e ng side effect er a kar el molai. Ke locha feel er a kmal klou el berraod.

Kede metik a ngeso er ker? A rebetok a metik er a klou el ongelaod sel loluluuch e longuiu a bades el melisiich er tir. Te dirrek el ngmai a ngeso loeak a support er a resechelirir me a telungalek er tir.

ROLEL E A REBEBIL A MLA OUTEKANGEL

A Robert el 58 a rekil a kmo: “A klaumerang er kau er a Dios a mo ngosukau loutekangel. Moluluuch el mora Jehovah. Mouchais er ngii aike el ngar er a rengum. Molengit er a chedaol reng er ngii. Molengit er ngii me lengesukau el mo mesisiich el kirel a telungalek er kau e melemolem loba chelellakl el reng loutekangel.

“Ngkmal mo dmeu a rengud sel lengar ngii a telungalek er kid lomekerreu er kid. Ngbek el sils el ngar ngii omekedong loker el kmo, ‘Ke uangerang?’ Me a resechelik el kiei a kakerous el beluu a dirrek el kmal omeskak omelisiich. Tia rullak el kmal mo ungil a renguk e ngosukak el melemolem.”

A lsekum ke mo oldingel er a sechelim el smecher e molatk a tekingel a Linda. Ngkmo: “A chad el smecher a soal a lolemolem el normal a klengar er ngii me nglocha diak el soal el mesaod er a secherel. Me mongedecheduch er ngii el mesaod aike el tekoi el omblechoel el mesaod el diak el secherel.”

Ngoeak a klisiich el lomeskid a Dios me a ongelaod el debetik er a Bades, me a dirrek el support er a resechelid me a telungalek er kid, e ngsebechel mo ulterekokl a rengud el kmo alta kede outekangel er a meringel el rakt me nguaisei engdi ngngar ngii a klungiolel a dolemolem el ngar.

Bades er a Biblia el Sebechel Ngosukau

Multuil er a Dios.

“Ak milluluuch el mor a RUBAK e ngii a ulenger er ngak; ng ngilbetak er a rokui el dektek. A ruusbech a ngesou a omekedong er ngii, e ngii onger.”—Psalm 34:4, 6.

A Linda el dulsaod er ngii er a uchei a kmo: “Ngdiak kululuuch el kmo, ‘Mrellak el mo ungil.’ Ak bai blechoel el meluluuch el kmo, ‘Msisichii a renguk e mngesukak loutekangel er a secherek.’”

Molai a klisiich er a Tekingel a Dios.

“Ng mo diak a tal chad el kiei er a beluad el lmuut el mo mengeremrum el kmo ng smecher.”—Isaia 33:24.

Molebedebek a telbilel a Dios el kirel a ngar medad. Tia mo meskau omelatk, el ngii a mo ngosukau loutekangel.

Molengit a support er a resechelim me a telungalek er kau.

“A sechelid a di blechoel el oubltikerreng, e a ta er kid el sechal a ngosukid er a chelebuul.”—Osisechakl 17:17.

A Elise el dulsaod er ngii er a uchei a kmo: “Lak moleakl er kau er a rechad. Bechititerir a resechelim me lolengeseu er kau. Nglocha mo er ngii aike el taem el bo momelechesiu el kmo ngkmal di kau el tang me a Dios a diak lorrenges a nglunguchem, engdi lak bo moleakl er kau er a rechad.”