Ngngar Ngii a Klungiolel a Dolemolem el Ngar

Faizal uluusbech er a klou el botk er a heart er a ta el rak er uriul er a lemad a bechil. Ngmelekoi el kmo: “Sel kunguiu er a babier er a Job e ak medengei el kmo a Jehovah ngar ngii a uchul me nguldekiar tia el babier er a Biblia. Sel donguiu el kirel a chad er a Biblia el milechesuar a tekoi el domelechesiu e ngkmal cholodid. Ngkmal ngar ngii a klungiolel a dolemolem el ngar.”

Tarsha a kmal dirk mle kekerei er a lemad a delal. Ngkmo: “Sel bo dodengelii a Ulemeob e ngmeskid a moktek er a klengar er kid, e meskid omelatk, me a deurreng alta ngbetok a mondai el dechelebangel. Ngkmal sebechel mo ulterekokl a rengud el kmo, a Jehovah a sebechel smisichid e ngosukid loutekangel er a bek el sils.”

AIKE EL uleak uchei el suobel ochotii el kmo a meklou el tekoi el duubech er a klengar er kid a sebechel rullid el mo omdasu el kmo ngdikea el sebeched el melemolem. A berraod el mchellungel er ngii a locha rullau el mo melatk el kmo, ngngar ngii a belkul omolemolem el ngar me a lechub e ngngar ngii a chad lomekerreu. Bo lulterekokl a rengum el kmo a Dios a omekerreu. Kau a kmal mekreos er osengel.

Ngike el milluches er a 86 el bliongel er a Psalm a mle ulterekokl a rengul el melekoi er a Dios el kmo: “Ak umekedong er kau er a chelsel a chelebulek, le ke mo remenges a ongtik.” (Psalm 86:7) Engdi ke locha melatk el kmo, ‘Ngmekera Dios e mo onger er ngak er a “chelsel a chelebulek”?’

Alta Dios a diak lemereched el choroid a mondai er kau, a Tekingel Biblia a kmo ngsebechel meskau a budech e ngosukau el outekangel: “Lak el sebek a rengmiu er a ngii di le ngerang, e bai molengit er a Rubak er a bek el nglunguchiu, a ikel mousbech, el di blechoel el mereng a sulel. E a budech er a Dios, el diak el sebechel a chad el mo cherrungel el medengelii, a mo mtebechel a rengmiu ma uldesuiu.” (Filipi 4:6, 7) Molatk a rolel e aika el bades a olterekokl er a rengud el kmo, a Dios a kmal omekerreu a duubech el mei er kid.

A Dios a Omekerreu

“Diak a tal chesisebangiau el lobes er ngii a Dios. . . . Kemiu a kuk meklou a belkmiu er a betok el chesisebangiau.”—Lukas 12:6, 7.

KA MOLATK: A mekekerei el charm el ua chesisebangiau a kora diak a ultutelel er osengir a rechad, engdi Dios omekerreu a duubech el mo er tir. Ngmes a rokui el mekekerei el chesisebangiau, ngmekreos er osengel. A Dios omes er a rechad el lmuut el meklou a ultutelir. A rechad a kot el mengasireng el blebelel a Dios er tia el chutem. Kede rruul el ‘ua teletelel’ a Dios e sebeched lomekeroul e olecholt a blekerdelel.—Genesis 1:26, 27.

“RUBAK, ke mla tirterak me ke medengelkak. . . . e omtab a rokui el uldesuek. . . . Morriter er ngak [e] . . . betik a uldesuek.”—Psalm 139:1, 2, 23.

KA MOLATK: A Dios a ungil medengelkau. Ngmedengei aike el ngar er a rengum me a uldesuem el diak a chad el medengei. Alta rechad a diak el sebechir el mtebengii a ringelel a blekeradel el omngar ngii, me nguaisei engdi a Dios a omekerreu e kmal soal ngosukau. Tia uchul me ngngar ngii a klungiolel omolemolem el ngar.

Ngngar Ngii a Belkul a Klengar er Kau

“Mrenges a nglunguchek e RUBAK, mrengesak a kulengit a ngesou. . . . mrengesak; e morechedau el onger sel kumekedong. . . . Ng mo remenges a nglunguchir a re mlechoit.”—Psalm 102:1, 2, 17.

KA MOLATK: A Jehovah medengei a bek el iuosech el mla ruebet er a mederir a rechad e le te chuarm. (Psalm 56:8) A iuechel a medam a uldimukl er aikang. Ngdiak lobes a rokui el ringel el omchebangel me a iuosech el mla ruebet er a medam, e le kau a kmal mekreos er osengel.

“Ngak a Dios er kau, me lak a ngeral bo medakt er ngii. Ak mo rullau el mo mesisiich, e ngosukau; . . . Ngak a RUBAK el Dios er kau; ak . . . dmu er kau el kmo, ‘Lak medakt, e ak mo ngosukau.’”—Isaia 41:10, 13.

KA MOLATK: A Dios a kltmokl el mo olengeseu er kau. Omesibas e ngmo okisau.

Ngngar Ngii Omelatk el Kirel a Lmuut Lungil Klengar er a Ngar Medad

“Dios a kmal mle betik a rengul er a beluulchad me ng milsa di tal Ngelekel, me tirkel rokui el mo oumera er a Ngelekel a Dios a diak le mad e bai mo ngar el diak a ulebengelel.”—Johanes 3:16.

KA MOLATK: A Dios a kmal betik a rengul er kau me ngkilengei el mecherei a Ngelekel me ngmo mad el tenget el kirem. Tia el tengetengel a meskau omelatk el mo kiei el dmeu a rengum e ungil a klengar er kau el mo cherechar.a

Alta ke chelebangel a ringel me a klengar a kora dikea el sebechem el mtekengelii, mosuub er a Tekingel a Dios e mokurulii a klaumerang er kau er a omelatk el letibir a Dios. Ngmo rullau el mo dmeu a rengum e omelechesiu el kmo, ngngar ngii a klungiolel omolemolem el ngar.

a A lsoam el mo medengei a lmuut el betok el kirel a rolel e ngsebechem el ngmai a klungiolem er a tengetengel a Jesus, e momes er a video el Molatk er a Kodellel a Jesus el ngar er a www.jw.org/pau. Momes er cheungel a CHELDEBECHELAM > CHEDAOL BELSOIL.