Molemolem er a Blakerreng er Kau!

1. Te milekera tirka el tedei el Sioning e lilemelemii a blakerreng er tir el mora Jehovah?

KA MOLATK aika el edei el blekeradel el sebechel el duubech el mora Resioning er a Jehovah. (1) A kekerei el redil a ngar a skuul, e a sensei a melekoi er a rengalek er a skuul el mo teloi er a chedaol sils. Ngika el ngalek a medengei el kmo tia el chedaol sils a diak lekengei er ngii a Dios, me nguleba omengull e smodii a uchul me ngdiak el kirel teloi er ngii. (2) A ta el kekerei el chad el sekemerur a oldingel obliil. Ngmedengei el kmo a ta er a ngalek er a skulel a kiei er sel next el blai el lebo er ngii, e ngikang a mle ta el lolenguul er a Resioning er a Jehovah er a uchei. Engdi ngika el kekerei el chad a mlo er ngii el blai me ngmelngod er a chesimer. (3) A ta el chad el meringel loureor el mengereker el kirel a telungalek er ngii, e a ta el taem e a merrederel a mlo soal loldurech er ngii el meruul a chelebirukel el tekoi me a lechub e ngtekoi el melemall a llach. Me alta ngsebechel metemall er a urerel, engdi ngii el chad a smodii el kmo ngkirel el mo honest er a bek el taem e oltirakl a llach er a beluu e le Dios a mengerechir er a remesiungel el mo meruul uaisei.​—Rom 13:1-4; Heb. 13:18.

2. Ngera el ker a bo dosaod, e ngera uchul?

² Ngera el blekeradel a sebechem el mesang er tirke el tedei el chad? Nglocha sebechem el mtab a eru el tekoi, el blekeu me a honesty. Engdi a ta el ileakl el blekeradel el kmal mekreos el sebeched el mesang a blakerreng. A derta er tir a ulechotii a blakerreng er tir el mora Jehovah e dimlak lekengei el mo melemall a llechul a Dios. A blakerreng er tir a rirelleterir el mo meruul el uaisei. Me a Jehovah a kmal ulterekokl el mlo dmeu a rengul el kirel a omerellel a derta er tir el lilemelemii a blakerreng er tir. Me kid me kede dirrek el uai tir el soad el rullii a Demad el ngar a eanged el mo dmeu a rengul. Mada me bo dosaod aika el ker el kmo: Ngerang a blakerreng? Ngera uchul me kede ousbech er a blakerreng? E mekera dolisiich er a blakerreng er kid er a chelsel aika el meringel el taem?

NGERANG A BLAKERRENG?

3. (a) Ngerang a blakerreng? (b) Ngera el tekoi a sebechel ngosukid el mo medengelii a belkul a blakerreng?

³ Kid el mesiungel a Dios a omes er a blakerreng el cherrungel el bltkil a rengud me a diak lemetemall el blakerreng er kid el mora Jehovah, me kede meruul a tekoi el oldeu er a rengul er a bek el taem. Ka molatk er sel usbechel a tekoi el blakerreng er a Biblia. A ta er a belkul tia el tekoi el “blakerreng” el ngar a Biblia, a cherrungel me a lechub e ngdiak a telemellel. El ua tiang, a rechad er a Israel a millenget a charm el mora Jehovah, e a Llach a mesaod el kmo ngii el charm a kirel el cherrungel.b (Lev. 22:21, 22) A rechedal a Dios a dimlak el kirir el melenget a charm el chelemus a ochil me a lechub a dingal me a lechub e ngbelechit a medal; me a lechub e ngsmecher. Ngar a osengel a Jehovah, e ngmle klou a ultutelel el kirel a charm el cherrungel me a lechub e ngdiak a telemellel. (Mal. 1:6-9) Me ngsebeched el mo medengelii a uchul me a Jehovah a soal a cherrungel el tekoi. Kid sel domechar a klalo, el ua babier me a lechub e ngdongu me a lechub e ngrodech, e ngdiak el soad el mecherar a klalo el ngar ngii a telemellel me a lechub e ngar ngii a ngesonges er ngii. Ngsoad a cherrungel me a lechub e ngdiak a telemellel. Me a Jehovah a uaisei a uldesuel el kirel a bltkil a rengud el mo er ngii, me a blakerreng er kid el bedulngii me ngkmal kirel mo cherrungel me a lechub e ngdiak a telemellel.

4. (a) Ngera uchul me ngsebechel a diak el cherrungel el chad el mo oba blakerreng? (b) A doltirakl er a Psalm 103:12-14, e ngera ngmengerechir er kid a Jehovah?

⁴ Me kid, ngkired el melatk el kmo ngkmal kired el mo cherrungel me bo doba blakerreng? Kede locha mo melatk el kmo kede rokui el mo remuul a betok el cheleuid. Ka molatk a eru el uchul me ngdiak el kired el bekikl. A kot, a Jehovah a diak di lomdidm a cheleuid el omerelled. E a Tekingel a subedid el kmo: “Chomko ke meluches a kngtmam, e ng techa sebechel moiub el diak le medebeakl?” (Psa. 130:3) Ngmedengei el kmo ngdiak demecherrungel, e chad el ngar a klengit, e ngii a kmal kongei el lousubes er kid. (Psa. 86:5) A ongerung, a Jehovah a medengei a telkeled, e diak longerechir er kid er a tekoi el lodengei el kmo ngdiak lsebeched el remuul. (Monguiu er a Psalm 103:12-14.) Me ngokiu a ngera el rolel e ngsebeched el mo cherrungel me a lechub e ngdiak a telemelled er a osengel?

5. Ngera me a remesiungel a Jehovah a ousbech er a bltikerreng me bo el sebechir el oba blakerreng?

⁵ A uchetemel a blakerreng er a remesiungel a Jehovah a bltikerreng. A bltkil a rengud el mora Dios, me a blakerreng er kid el bedul ngika el Demad el ngar a eanged el Jehovah, a kmal kirel melemolem el cherrungel me a lechub e ngdiak a telemellel. Me a lsekum a bltkil a rengud a melemolem el uaisei el mo lmuut er a taem el bo dechelebangel a omelsemai, e kede mo oba blakerreng. (1 Kr. 28:9; Mt. 22:37) Ka mluut el melatk a blekerdelir tirke el tedei el Sioning el dulsaod er tir er a uchei. Ngera me te mirruul a tekoi el uaisei? Ngike el kekerei el redil, ngmle chetil el milil teloi er a resechelil er a skuul, me a lechub e ngike el kekerei el chad ngkilengei el mo merur er a medal a tuangel, me a lechub e ngike el chedam, ngkilengei el mo diak a urerel? Ngdiak leuaisei. Ngbai sel klemedengei er tir el kirel a melemalt el llechul a Jehovah, me a ulterekokl el uldesuir el sorir el oldeu er a rengul a Demerir el ngar a eanged a uchul. A bltkil a rengrir el bedulngii a rulleterir me te mo melatk er a Jehovah er a uchei er a bo loruul a ngii di el rolel a omelilt. Tiaikid el rolel a ochotii el kmo te oba blakerreng.

A UCHUL ME KEDE OUSBECH ER A BLAKERRENG

6. (a) Ngera me kede ousbech er a blakerreng? (b) Ngmilekera Adam me a Eva e mlo diak loba blakerreng?

⁶ Ngera uchul me kede rokui el ousbech er a blakerreng? Kau a ousbech er a blakerreng, e le Satan a melasem er a Jehovah, e dirrek el melasem er kau. Ngika el mlo omtok el anghel a di mle ngii el rullii el mo Satan, me a lechub e “Ngike el omtok” er sel taem er a sers er a Eden. Ngtilemellii a chisel a ngklel a Jehovah er sera lotelecheklii el kmo a Dios a mekngit, e di melatk er a di ngii, e Merreder el di omulak. Me ngklengiterreng e le Adam me a Eva a mlo obengkel a Satan e omtok er a Jehovah. (Gen. 3:1-6) A klengar er tir er a chelsel a Eden a milsterir a klou el techall el mo melisiich er a bltkil a rengrir el mora Jehovah. Engdi sel taem er a ultekengel a Satan, e a bltkil a rengrir el mora Dios a mlo diak el cherrungel me a lechub e lak a telemellel. Tiang a mlo uchul e ngdilubech a ta er a ker el kirel mo monger el kmo: A rechad, ngsebechir el melemolem er a blakerreng er tir el mora Jehovah el Dios el bltkil a rengrir el mo er ngii a uchul? El ua tiang, a rechad ngsebechir el olecholt er a blakerreng? Tia el ker a mlo er ngii er a tekoi el dilubech el mora Job.

7. A doltirakl er a Job 1:8-11, e ngmle uangera uldesuel a Jehovah me a Satan el kirel a blakerreng er a Job?

⁷ A Job a kiliei er a taem el rechad er a Israel a mlara Ekipten. Ngar sel taem, e ngdimlak a chad el blak a rengul el uai ngii. Ngika di uaikid el diak el cherrungel e riruul a cheleuid el tekoi, engdi Jehovah kmal mle betik a rengul er ngii el kirel a blakerreng er ngii. Ngsebeched el omdasu el kmo ngar tia el taem e a Satan a mla melsemai er a Jehovah el kirel a blakerreng er a rechad. Me a Jehovah a milsaod er a blakerreng er a Job. Ngar a klengar er ngika el chad, e ngmileketeklii el kmo a Satan a bulak! Me a Satan a mlo soal melasem er a blakerreng er a Job. E a Jehovah a uluumerang er a sechelil el Job, me Ngmilecherei a Satan me bo lolsemai er ngii.​—Monguiu er a Job 1:8-11.

8. Ngmilekera Satan er a loldechelakl er a Job?

⁸ A Satan a mekngit a blekerdelel e omekoad er a rechad. Ngkmal mlo meringel melsemai er a Job, me ngilai a rokui el kloklel e milekodeterir a remesiungel e tilemellii a chisel er a beluu. Nguldechelakl er a telungalek er ngii, e milekodeterir tirke el teruich el betik er a rengul el ngelekel. Ngdirrek el ulsecherii er a kmal meringel el rakt me ngdi mlo btuu er a bdelul el mora rsel ochil. A bechil a mlo imis el chuarm a uldesuel e mekngit a rengul me ngdilu er a Job me lolius er a Dios e lemad. A Job a dirrek el mlo oureng el mad, engdi ngdi millemolem er a blakerreng er ngii. Seikid e a Satan a kuk mlo melasem er ngii er a ta er a bedengel a odechelakl. Nguluusbech er a retedei el sechelil a Job. Tirka mlo oldingel er a Job el betok el klebesei, engdi ngdimlak a ta el longelaod er ngii. Ngbai mle mekngit a tekingir me a omellach er tir el mo er ngii. Te millekoi el kmo a Dios a uchul aika el ringel e dirrek a Dios a diak lomekerreu er a blakerreng er a Job. Te dirrek el dilu el kmo ngii a mekngit el chad me ngrredemelel aika el mekngit el tekoi el dubecha er a klengar er ngii!​—Job 1:13-22; 2:7-11; 15:4, 5; 22:3-6; 25:4-6.

9. A Job, ngdimlak lekengei el mo mekerang er a chelsel a meringel el blekeradel er a klengar er ngii?

⁹ Ngmilekera Job er a chelsel aika el rokui el ringel? Ngikang a diak lecherrungel. Ngkmal mlo meringel el oungeroel er tirka el leko te sechelil, e dilu tekoi er tir el blo louuchel er a rengul er ngii er a uriul. Ngmilsebechakl er a llemeltel el kuk mlo ngaruchei er a llemeltel a Dios. (Job 6:3; 13:4, 5; 32:2; 34:5) Engdi ngar a chelsel aika el taem, e ngdimlak a ta el bo lomtok er a Jehovah el Dios. Ngdimlak a ta el lekengei el mo oumerang a blulak el tekoi el ledilu tirka leko te sechelil. Ngdilu el kmo: “Ngdiak a ta el bo kdu el kmo kemiu a melemalt! Ngmo lmuut er a kodellek me ngak a di melemolem er a blakerreng er ngak.” (Job 27:5, NW) Tia el tekingel a meketeklii el kmo a Job a mle telbiil er a rengul el mo lomelemii a blakerreng er ngii er a chelsel a ngii di el meringel el blekeradel. Me kid me ngdirrek el sebeched el mo ua blekerdelel a Job.

10. Ngera klaisisiu er a blekeradel el mcharm er ngii er aike el lechilarm er ngii a Job?

¹⁰ A Satan a dirrek el meruul a osisiu el tekoi el bedul a derta er kid. Me ngera klaisisiu er a blekeradel el mcharm er ngii er aike el lechilarm er ngii a Job? Ngoeak a tekingel a Satan e ngua ledu el kmo kau a diak lemera el betik a rengum er a Jehovah el Dios, e ke dirrek el mo meterob el mesiou er Ngii sel bo lekirem lolsobel er a klengar er kau, e dirrek el diak lolemolem a blakerreng er kau el mora Dios! (Job 2:4, 5; Och. 12:10) Ngmo uangera uldesuem el kirel tia el tekoi? Ngulterekokl el kmal mo mekngit a rengum, engdi ka molatk er tia el tekoi el kmo: A Jehovah a oumerang er kau me ngmeskau a kmal mengasireng el techall. A Jehovah a msa techellel a Satan me ngmelasem er a blakerreng er kau. E ngii el Jehovah a oumerang el kmo ngsebechem el lomelemii a blakerreng er kau el bedulngii e ngosuir el meketeklii el kmo a Satan a bulak. Ngii a dirrek el tibir el mo olengeseu er kau el rullii tia el tekoi. (Heb. 13:6) Tiang a kmal ileakl el techall el mo sebeched el nguu a klaumerang er ngika el Mengedereder er a uldekial a eanged me a chutem! Me kau, ke mla mo medengelii a klungel a ultutelel a blakerreng? Tiang a rullid me ngsebeched el otngakl a blulekngel a Satan, e olengeseu el mengikiid er a ungil ngklel a Demad e dirrek el olengeseu el melisiich er a omengederederel. Me ngera sebeched el meruul el mo lomelemii a blakerreng er kid?

ROLEL E NGSEBECHED LOMELEMII A BLAKERRENG ER KID ER CHELECHANG

11. Ngera sebeched el suubii er a blekerdelel a Job?

¹¹ A Satan a mengal mla lmuut el mo mesisiich el oldechelakl er a remesiungel a Dios er chelecha el taem er a “uriul sils.” (2 Ti. 3:1, BT) Me ngar a chelsel tia el milkolk el beluulechad, e ngmekera sebeched el melisiich er a blakerreng er kid? Ngsebeched el suub a betok er a blekerdelel a Job. A uchei er a bo lechelebangel a odechelakl, e ngmilekurulii a blakerreng er ngii el mora Dios. Me bo dosaod a edei el tekoi el sebeched el suub er a blekerdelel el kirel a rolel a dolisiich er a blakerreng er kid.

12. (a) A doltirakl er a Job 26:7, 8, 14, e ngmilekera Job e mekurulii a dmolech el omengull er ngii el bedul a Jehovah? (b) Ngmekera dokurulii a dmolech el omengull er kid el mora Dios?

¹² A Job a millisiich er a bltkil a rengul el mora Dios lokiu a mengasireng el urerel a Jehovah. Ngmilengoit er a klou el temel el melebedebek a mengasireng el blebelel a Jehovah. (Monguiu er a Job 26:7, 8, 14.) Ngkmal mle mechas a rengul sel lolatk el kirel tia el chutem me a eanged me a eabed me a derumk, me nguaisei, engdi ngdirrek el mle medengei el kmo ngkmal di kesai a klemedengei er ngii el kirel a rokui el tekoi el Jehovah a mileob. Ngdirrek el ulemes a tekingel a Jehovah el kmal mle mekreos me ngmilsaod el kirel el kmo: “Ak bai mla ngmai el sichedekl er a renguk.” (Job 23:12, NW) Ngkmal mle imis el mechas a rengul er a Jehovah e ulechotii a klou el omengull er ngii el bedulngii. Ngkmal mle betik a rengul er a Demal e mle soal loldeu er a rengul. Me a telbilel a rengul el soal lomelemii a blakerreng er ngii a liluut el mo mesisiich. Kid me ngdirrek el kired el meruul a tekoi el ua Job. Kede ungil medengei a lmuut el betok el kirel a mengasireng el blebelel a Dios el kuk betok er aike el ble lodengei a rechad er a taem er a Job. Ngdirrek el ngar ngii a cherrungel el Biblia el sebechel ngosukid el mo ungil medengelii a Jehovah. Me a rokui el tekoi el desuub a sebechel ngosukid el mo dmeu a rengud er aika el tekoi el bla leruul a Dios. A dmolech el omengull er kid, me kid el soad el meruul a soal a Jehovah, a rullid el mo betik a rengud er ngii e olengesenges er ngii e mekurulii a urunguled el lomelemii a blakerreng er kid.​—Job 28:28.

13-14. (a) A doltirakl er a Job 31:1, e ngmilekera Job e meketeklii el kmo ngmle bekongesenges? (b) Kede mekera mo oukerebai er ngii?

¹³ A blekongesenges er a Job a silsichii a blakerreng er ngii. A Job a mle medengei el kmo a blakerreng a mo er ngii lokiu a blekongesenges. E a mera er ngii, a ta el olechotel a blekongesenges a lmuut el smisichid me ngmengal mo soad el lomelemii a blakerreng er kid. A Job a uleba blakerreng lolengesenges er a Dios er a bek el sils er a klengar er ngii. El ua tiang, ngmle kerekikl a omerellel el bedul a redil. (Monguiu er a Job 31:1.) Ngii el mle bechiil, me ngmle medengei el kmo ngmekngit a bo lomekeroul er a urungulel el mora redil el diak lebechil. Chelecha el taem, e a beluulechad a kmal di melisiich a tekoi er a deleboes. Me kid, kede ua Job el diak dekengei el mo oureng er a chad el ngii a diak el bechid? Kede mo uai ngii el diak dekengei el omes a ngii di el mekikiongel me a lechub e ngsiasing er a remeau? (Mt. 5:28) A lsekum kede mo kerekikl me ngdiak doruul aika el tekoi, e ngmo sebeched el lmuut el smisichii a blakerreng er kid.

¹⁴ A Job a dirrek el ullengesenges er a Jehovah el kirel a rolel a bo letabesul a osengel el kirel a klalo. Ngmle medengei el kmo a lsekum ngmo ultuil a klaumerang er ngii er a kloklel, e ngmo uchul e ngruebet er a klengit me ngmo obals el kirel. (Job 31:24, 25, 28) Chelecha el taem, e kede kiei er a beluulechad el kmal mesisiich a tekoi er a kerruul er ngii. Me a lsekum e ngmo tabesul a osenged el kirel a udoud me a klalo, el ua longelechel er kid a Biblia, e kede lmuut el smisichii a urunguled el soad el melemolem er a blakerreng er kid.​—Osi. 30:8, 9; Mt. 6:19-21.

15. (a) Ngomelatk el kirel a ngera el omeksulel a rirellii a Job el lomelemii a blakerreng er ngii? (b) Ngera me ngosukid a doba omelatk el kirel a tekoi el Dios a mo kutmokl el kired?

¹⁵ A Job a lilemelemii a blakerreng er ngii lulekiu a omeltkel el kmo a Dios a mo msa omeksulel. Nguluumerang el kmo a Dios a ulemes er a blakerreng er ngii el kmal mekreos. (Job 31:6) Me ngar a chelsel a taem er a ringelel a Job e ngmle ulterekokl a rengul el kmo a Jehovah a mo msa omeksulel. Tia el ulterekokl el tekoi er a rengul a ngilsuir me ngmillemolem loba blakerreng. A Jehovah a kmal mlo dmeu a rengul er a blakerreng er ngii me Ngmilsa omeksulel er sel taem er a dirk el chad el dirkak bo lecherrungel! (Job 42:12-17; Jak. 5:11) Ngdirrek el lmuut el mo ngmai a betok el omeksulel er a ngar medad el taem. Me kau, ngdirrek el mesisiich a omeltkem el kmo a Jehovah a mo meskau a omeksulem el kirel a blakerreng er kau? Ngika el Dios er kid a kmal dirkak lemengodech. (Mal. 3:6) A lsekum ngdiak dobes el kmo ngomes er a blakerreng er kid el mekreos, e ngmo sebeched el oba omelatk el kirel a ungil klengar er a ngar medad el taem.​—1 Th. 5:8, 9.

16. Ngkired el tibir er a rengud el mo mekerang?

¹⁶ Lak demeterob el melemolem er a blakerreng er kid! A lebebil er a taem, e ke locha mo omdasu el kmo ngdiak a ngar bita er kau el melemolem er a blakerreng er ngii, engdi ngkmal diak di lekau el tang. Kau a teloi er a rebetok el miliol el blak a rengrir el chad el meliuekl er a beluulechad. Ke dirrek el mo teloi er a rebetok el kakerous el sechal me a redil el tir a uleba blakerreng er a irechar, el mo lmuut er a taem el blo locherur a kodall. (Heb. 11:36-38; 12:1) Me bo leblak a rengud el rokui e detibir el mo kiei el oltirakl a tekingel a Job el kmo: “Ngak a di melemolem er a blakerreng er ngak!” Me a blakerreng er kid bo luchul a klebkall el mora Jehovah el diak a ulebengelel!