Toruud Aike el Omesaod el Omtok er a Klemedengei er a Dios!

1. Ngera el omengelechel a lulluches er ngii a apostol el Paulus el mora rengellitel el Kristiano?

A APOSTOL el Paulus a ulemeklatk el kmo: “Lak di moltirakl a blekerdelel a tekoi er tial beluulchad.” (Rom 12:2) Ngmilluches aika el tekoi el mora Rekristiano er a irechar. Ngera uchul me ngmillekoi er tia el kmal mesisiich el omengelechel el mora resechal me a redil el tir a mla tuib a rengrir el mora Dios e mla mengilt lokiu a chedaol reng?​—Rom 1:7.

2-3. Ngmekera Satan a lolasem el mengeroid er kid er a Jehovah, engdi ngmekera dongoit aike el ‘mera el blekerdeled er a chelsel a rengud’?

² A Paulus a mle suebek a rengul e le a mekngit el uldasu er a beluulechad el longedereder er ngii a Satan a milengesuseu er a rebebil el Kristiano. (Efe. 4:17-19) E tia el tekoi a sebechel el duubech el mora derta er kid. Me a Satan el merreder er tia el blekeradel er a beluulechad a sebechel el ousbech a kakerous el tekoi el mengesuseu er kid el mo cheroid er a Jehovah. El ua tiang, a lsekum e ngsoad el mo ngarbab el chad me a lechub e ngmo merael a chised, e ngsebechel el ousbech er tia el uldasu el mo choridid er a Jehovah. Ngdirrek el sebechel el ousbech aike el tekoi el dilubech el mei er kid er a ngar er a mong, me a siukang er kid me a lechub a skuled el rullid el mo omdasu el uai ngii.

³ Ngmera el sebeched el mult aike el ‘mera el blekerdeled er a chelsel a rengud’? (2 Ko. 10:4) Ka momtab er a rolel a longer er tiang a Paulus el kmo: “Ma ki toruud a ikel klaititekangel er chomesaod ma bek el kldidai lomtok ra klemedengei ra Dios, e mdechem a bek luldasu el mo chederdall ra Kristus.” (2 Ko. 10:5, BT) Me ngokiu a ngelsuil a Jehovah e ngsebeched el chemoit a mekngit el uldasu. Ngdi ua kar el sebechel el mekerur a chad el mla nguim a poison, a Tekingel a Dios a sebechel el choridid er a telemellel a beluulechad er a Satan.

‘MOMEKBECHES A RENGMIU’

4. Ngera el omelodech a mle kirir a rebetok er kid el meruul er a dekot el mo medengelii a klemerang?

⁴ Ka molatk aike el omelodech el mle kirem el meruul er sera omsubii a klemerang er a Tekingel a Dios e molib er a rengum el mo mesiou er a Jehovah. A rebetok er kid a mle kirir el mengoit a bebil el mekngit el omeruul. (1 Ko. 6:9-11) Kede mera el mereng a sulel a Jehovah el ngilsukid me ngmlo diak doruul aika el mekngit el tekoi!

5. Ngera el eru el tekoi a kired el meruul el losaod a Rom 12:2?

⁵ Nguaisei, engdi ngdiak el kired el mo omdasu el kmo ngmla mo diak doruul a ngii di el omelodech. E le alta ngmla mo diak doruul a oberaod el klengit el durruul er a uchei er a demetecholb, engdi ngdirk kirel el mo blak a rengud el mengeroid er kid er a ngii di el ngerang el sebechel el choitikikid el lmuut el mo meruul aika el oberaod el klengit. Me ngmekera doruul er tiang? A Paulus a onger el kmo: “Lak di moltirakl a blekerdelel a tekoi er tial beluulchad, e bai bsa techellel a Dios me lukbeches a rengmiu e le ngodech a blekerdeliu.” (Rom 12:2) Me ngkired el meruul a eru el tekoi. A kot, e ngkirel el mo ‘diak di doltirakl’ me a lechub e demekesuseu er tia el beluulechad. E a ongerung, e ngkired el mo ‘omekbeches a rengud’ el okiu sel dolodech er a rolel a domdasu a tekoi.

6. Ngera sebeched el suubii er a tekingel a Jesus el ngar er a Mateus 12:43-45?

⁶ Me a Paulus a dimlak di losaod el kirel a omelodech er a bedenged me a osengir a rechad el kired. Ngbai milsaod el kirel a dolodech er a blekerdeled me a rengud. (Momes er a baks el “Omekbeches me a lechub e Te Meruul a Teletelir el Leko?”) Ngkired el melodech er a uldesued el rokir, el ngii a blekerdeled, me aike el domelechesiu, me a dirrek el urunguled. Me a derta er kid a kirel di ngii el oker el kmo, ‘Aika el omelodech el kuruul e le ngak el Kristiano ngdi ngar ngii a lerellii er a uldesuir a rechad el bedul ngak, me a lechub e ak mera el melodech er a uldesuek me a renguk?’ Ngkmal klou a ultutelel a bo dodengelii a klekakerous er aika el eru el tekoi. A Jesus a milsaod er tiang el ngar er a Mateus 12:43-45 el ngii a tekoi el kired el meruul er ngii. (Monguiu.) E aika el tekoi a osisecheklid er a klou a ultutelel el suobel el kmo: Ngdiak di dongoit a mekngit el uldasu e lemerekong, ngdirrek el kired el omtechei el olab a ungil el uldasu el lekengei a Dios.

“A ULDESUIU MA RENGMIU A KMAL KIREL EL MUKBECHES”

7. Ngmekera dolodech a mera el blekerdeled?

⁷ Ngsebeched el melodech a mera el blekerdeled er a chelsel a rengud? A Tekingel a Dios a onger el kmo ngsebechel. Ngmelekoi el kmo: “A uldesuiu ma rengmiu a kmal kirel el mukbeches el rokui, e kemiu a loia beches el klechad el bleob el ua teletelel a Dios. Tial klechad a di ngii el ochotii el oeak a meral klengar el melemalt e klikiid.” (Efe. 4:23, 24) Me ngsebeched el melodech a mera el blekerdeled, engdi tiang a diak lebeot el tekoi. Ngdiak el kired el di mengemekl a mekngit el urunguled me a omerelled e lemerekong, e ngdirrek el kired el melodech a ‘uldesued ma rengud.’ E tia uldimukl er a dolodech a urunguled, me a blekerdeled, me aike el uchul me kede meruul a tekoi. E tiang a kired el blechoel el oureor el kirel.

8-9. Ngmekera tekoi el dilubech el mora ta el odam e ochotii a uchul me ngkired el melodech a mera el blekerdeled?

⁸ El ua tiang, a ta el odam a kmal mle mekngit a blekerdelel er a uchei. Me a uriul er a bo lak lolim a rrom e dirrek el okoad er a rechad, e ngmlo sebechel el mo metecholb. Tia mlo uchul a ungil sioning er sel basio el lekiei er ngii. Engdi a ta el kesus er a uriul er a lemetecholb, e ngmleasem er a rolel el dimlak lomdasu er ngii. A ta el cheltelaol el chad a mlei er a blil e mle soal lokoad er ngii. Me a kot, e ngika el odam a mle sebechel el kilmeklii a rengul e diak lokoad er ngii, engdi ngika el chad er a bo loltuub er a ngklel a Jehovah, e ngmlo uchul e ngika el odam a mlo diak el sebechel el mtebechelii a ngesechel a rengul. Me ngtilobed el cholebedii ngii el chad. Me ngera me ngmirruul er tiang? Alta e a omesubel er a Biblia a ngilsuir el mo kilmeklii a rengul er sel mekngit el blekerdelel, engdi tiang a dimlak lengedechii a uldesuel me a rengul. Me ngbelkul a kmo, ngika el odam a dirkak lengedechii sel mera el blekerdelel.

⁹ Me nguaisei engdi ngika el odam er kid a di millemolem el melodech a blekerdelel. (Osi. 24:16) Ngokiu a ngelsurir a remechuodel, e ngmillemolem el olengeriakl. E a cherengel a taem, e ngmlo sebechel el mesiou el ta er a remechuodel. E a ta el kesus, el ngar er a ikrel a Blil a Ongdibel, e ngmlo chelebangel er a osisiu el omelsemai el dilubech el mo er ngii er a uchei. A ta el cheltelaol el chad a mlo soal oldechelakl er a ta er a remechuodel. Me ngmilekera ngika el odam? Ngmle chelellakl a rengul e uleba klengariourreng el mesaod a tekoi el mo er ngika el cheltelaol, e ngilsuir el mo remei. Ngera uchul me ngika el odam er kid a kuk mle ngodech a blekerdelel er sel taem? Ngika el odam er kid a mla ngodechii a uldesuel me a rengul. Ngmera el mla mo chad er a budech e ngariou a rengul, el rokui el di mo uchul a odanges el mora Jehovah!

10. Ngera kired el meruul el mo melodech a mera el blekerdeled er a chelsel a rengud?

¹⁰ Aika el omelodech a diak di el kiul mo er ngii me a lechub e ngdi diak a ngera el doruul e leduubech. Nglocha kirel el mo ‘meduch a rengud’ el oureor el mengoit el betok el rak. (2 Pe. 1:5) Ngdirrek el diak leduubech e le kid el mla mesiou er a Jehovah el kemanget el taem. Ngkired el melasem er a tkurrebab el sebeched el melodech aike el mera el blekerdeled er a chelsel a rengud. Ngar ngii a bebil el tekoi el sebechel el ngosukid el meruul er tia el omelodech. Ka me bo dosaod a bebil er aikang.

A ROLEL A DOLODECH A ULDESUED ME A RENGUD

11. Ngmekera nglunguuch a lengesukid el melodech a uldesued me a rengud?

¹¹ A kot el klou a ultutelel el tekoi el kired el meruul er ngii a meluluuch. Ngkired el meluluuch el ua ngike el milluches er a psalm el dilu el kmo: “Momeob er a beches el chaidireng er a chelsek e Dios, e mlia beches e blak a rengul reng er a chelsek.” (Psa. 51:10) Ngkired el kongei el melodech a uldesued me a rengud e olengit a ngeso er a Jehovah. Ngmekera mo ulterekokl a rengud el kmo a Jehovah a mo ngosukid el meruul a omelodech? Ngsebeched el ngmai a omelisiich er a telbilel a Jehovah el kirir tirke el medecherecher a rengrir el chad er a Israel er a taem er a Esekiel el kmo: “Ak mo mesterir a beches el reng, ma beches el uldasu . . . e mesterir a bekongesenges el reng.” (Ese. 11:19) A Jehovah a kilengei el ngosuterir tirke el chad er a Israel el mo melodech a blekerdelir, e dirrek el kongei el mo olengeseu er kid.

12-13. (a) A doltirakl er a Psalm 119:59, e ngera kired el melebedebek el kirel? (b) Ngera el ker a sebeched el di kid el oker?

¹² A ongeru el klou a ultutelel el tekoi el kired el meruul er ngii a melebedebek a tekoi. Sel bo dekerekikl el menguiu er a Tekingel a Dios er a bek el sils, e bo dongoit a taem el melebedebek, e kede mo medengei el kmo ngera el uldesued me a tekoi el domelechesiu a kired el melodech. (Monguiu er a Psalm 119:59; Heb. 4:12; Jak. 1:25) Ngdirrek el kired el mo medengei el kmo ngera el uldasu me a tekoi el domelechesiu a mla mekesuseu er a uldasu er tia el beluulechad. E kired el mo medengei a chelitechetud e mo blak a rengud el oureor el mo mengoit ngii el chelitechetud.

¹³ El ua tiang, di lekau el oker el kmo: ‘Ngak, ngar ngii a telkib el chelechei er a chelsel a renguk?’ (1 Pe. 2:1) ‘Ngak, ak kumdasu el kmo ak kuk ungil er a rebebil e le ngbeluak, me a skulek, me a lechub e ngklungel a ududek a uchul?’ (Osi. 16:5) ‘Ngak, ngmetengel a osengek er a rechad el diak lolab a osisiu el klalo el uai ngak me a lechub e te chad er a ngodech el beluu?’ (Jak. 2:2-4) ‘Ngak, ngsoak aike el tekoi el ngar er a beluulechad er a Satan?’ (1 Jn. 2:15-17) ‘Ngak, ak semeriar a mekikiongel el tekoi me a kdekudel el rolel a ongelaod?’ (Psa. 97:10; 101:3; Amo. 5:15) A nger er aika el ker a sebechel ocholt aike el tekoi el kirem el oureor er ngii. Me sel bo el sebeched el mult aika el ‘mera el blekerdeled er a chelsel a rengud,’ e kede mo odeuir a rengul a Demad el ngar er a eanged.​—Psa. 19:14.

14. Ngera uchul me ngklou a ultutelel a dolilt er a rungil sechelid?

¹⁴ E a ongedei el klou a ultutelel el tekoi el kired el meruul er ngii a melilt a ungil klausechelei. Tirke el dobengterir a kmal klou a techellir el mengesuseu er kid, alta kede mtebengii tia el tekoi me a lechub e ngdiak. (Osi. 13:20) Me sel dengar er a ureor me a lechub a skuul, e kede iliuekl er a rechad el diak lolengeseu er kid el mo oba uldasu el lekengei er ngii a Dios. Nguaisei, engdi ngsebeched el metik er a rekot el ungil el sechelid er a miting er kid a Rekristiano. Ngar er aika el miting, e kede kasisiich el omekses a “bltikerreng ma ungil lomeruul.”​—Heb. 10:24, 25, BT.

BO “MESISIICH EL OUMERANG”

15-16. Ngmekera Satan a lolasem el melodech a uldesued?

¹⁵ Engdi ngdiak dobes el kmo a Satan a kltmokl el melodech a uldesued. Me ngousbech a bek el uldasu el melemall aike el ungil el tekoi el ngar er a uldesued el dengai el lokiu a Tekingel a Dios.

¹⁶ A Satan a melemolem el oker a osisiu el ker el luleker er a Eva er a lengar er a sers er a Eden el kmo: “Ng meral dilu Dios el kmo?” (Gen. 3:1) Ngar tia el beluulechad el ngar cheungel a klisichel a Satan, e kede blechoel el orrenges a ker el sebechel rullid el mo oumededenger a klaumerang er kid el uaika el kmo: ‘A Dios ngmera el diak lekengei a chebechiielir a remengolchotaor? A Dios ngmera el diak el soal a omongedaol er a Kurismas me a tanziobi? A Dios er kau ngmera el chetil a omousbech a rasech? A betik a rengul el Dios ngmera el chetil omobengterir a rebetik er a rengum el mla mesuld a ngklir?’

17. Ngera kired el meruul er ngii a lsekum kede mo chelebangel a ker el rullid el mo oumededenger er a klaumerang er kid? Ngera sebechel el duubech el ua losaod a Kolose 2:6, 7?

¹⁷ Ngkirel el mo ulterekokl a rengud er a klaumerang er kid. A lsekum e ngdiak debetik a nger er aike el meklou a ultutelel el ker el kirel a klaumerang er kid, e ngsebeched el omuchel el oumededenger el kmo aike el doumerang el tekoi a klemerang. E aike el doumededenger el tekoi a sebechel el mengeuid a uldesued e tomellii a klaumerang er kid. Me ngera kired el meruul er ngii? A Tekingel a Dios a kmo ngkired el omekbeches a rengud, me bo el sebeched el medengelii “a rengul a Dios er a kmo, ng ngera ungil, ma ngera odeuir a rengul, ma ngera kmal cherrungel el ungil.” (Rom 12:2) Me sel bo deblechoel el mesuub, e ngsebechel el mo ulterekokl a rengud el kmo aike el bla desuub er a Biblia a klemerang. E seikid e ngmo ulterekokl a rengud el kmo a llechul a Jehovah a melemalt. Me kede mo ua kerrekar el mesisiich a risel, el belkul a kmo kede mo “mesisiich el oumerang.”​—Monguiu er a Kolose 2:6, 7.

18. Ngera mo ngosukid el mo cheroid er a mekngit el telemellel a beluulechad er a Satan?

¹⁸ Ngdiak a chad el sebechel el olterekokl er a klaumerang er kid, me molemolem el omekbeches er a rengum me a uldesuem. Bo blechoel el meluluuch, e molengit a ngelsuil a chedaol reng er a Jehovah. Bo mkerekikl el melebedebek, e molemolem el merriter a uldesuem me aike el uchul me ke meruul a tekoi. Mosiik er a rungil sechelim el tirke el mo ngosukau el melodech a uldesuem. Sel moruul aikang, e ke choridau er a mekngit el telemellel a beluulechad er a Satan e mo sebechem el toruud a “ikel klaititekangel er chomesaod ma bek el kldidai lomtok ra klemedengei ra Dios.”​—2 Ko. 10:5, BT.