“Bo Mkerekikl Me Lak a Chad el Ebedemiu”!

1. A doltirakl er a Kolose 2:4, 8, e ngmekera Satan a lolasem el mengeblad er kid?

A SATAN a soal a bo domtok er a Jehovah. Ngmeruul er tiang loeak sel lolasem el melodech a uldesued e lerellid el mo omdasu el uai ngii. Ngdirrek el melasem el mengesuseu me a lechub e ngmengeblad er kid el mo oltirakl er ngii el ousbech aike el soad el tekoi.​—Monguiu er a Kolose 2:4, 8.

2-3. (a) Ngera uchul me ngkired el kerekikl el omtab er sel uleklatk el ngar er a Kolose 2:8? (b) Ngera kede mo mesaod er tia el suobel?

² Me kid ngmera el sebeched el mo chelebangel er tia el kdekudel el blekeradel el mo mechetikaik er a Satan? Ochoi! Lak dobes el kmo a Paulus a dimlak loluches er tia el uleklatk el ngar er a Kolose 2:8 el mora rechad el dimlak loumerang. Ngbai milluches er ngii el mora rengellitel el Kristiano el tir a mlengilt loeak a chedaol reng. (Kol. 1:2, 5) Tirke el Kristiano a mle chelebangel er a kdekudel el blekeradel el mle sebechir el mecheblad er seikid el taem, me kid me kede dirrek el uai tir el sebeched el mecheblad er chelecha el taem. (1 Ko. 10:12) E ngera uchul? E le Satan a mla obidokl el mei er a chutem, me ngmelasem er a tkurrebab el sebechel el mengeuid er a reblak a rengrir el mesiungel a Dios. (Och. 12:9, 12, 17) Me a lmuut el tang, kede kiei er a taem el remekngit el chad me a remengeblad a “mekngit e merael mengal mo mekngit.”​—2 Ti. 3:1, 13.

³ Ngar tia el suobel, e kede mo mesaod a rolel e a Satan a ousbech a “chelsengsang” el blulekngel el melasem el mengesuseu a uldesued. Kede dirrek el mo mesaod a edei er aike el “chelebeldil.” (Efe. 6:11) E ngar sel ongingil el suobel, e kede mo mesaod er a rolel e ngsebeched el mengikiid er kid er a mekngit el tekoi el mlo er ngii er a uldesued el chelebeldil a uchul. Engdi a kot, e kede mo mesaod a tekoi el sebeched el suub er a rolel e a Satan a milengeblad er a rechad er a Israel er a uriul er a lesiseb er a Beluu er a Nglat.

MLEKUSUSEU EL MO MENGULL A BLEOB EL CHELID

4-6. A doltirakl er a Duteronomi 11:10-15, e ngmle kirir a rechad er a Israel el mesuub er a ngera el beches el rolel a lomekeroul a kelir er sera bo lsiseb er a Beluu er a Nglat?

⁴ A Satan a kmal mle meduch el mengesuseu er a rechad er a Israel el mo mengull a bleob el chelid. Ngmilekera loruul er tiang? Ngmle medengei el kmo te ousbech a kall, me ngmillasem el ousbech er tiang el rulleterir el mo meruul a soal. A rechad er a Israel er a bo lsiseb er a Beluu er a Nglat, e ngmle kirir el mesuub a beches el rolel a lomekeroul a kelir. Sera lengar er a Ekipten, e te uluusbech a ralm er a Omoachel Nail el omekeroul a dellemelir. Engdi, a rolel a ralm er a Beluu er a Nglat a dimlak lokiu a ralm er a klou el omoachel, e ngbai ulekiu a chull me a dirrek el nguches. (Monguiu er a Duteronomi 11:10-15; Isa. 18:4, 5) Me ngmle kirir el mesuub a beches el rolel a lomekeroul a kelir. E tiang a dimlak lebeot el tekoi e le oumesingd er tirke el mle meduch er a rolel a sers a mlad er a dirk lengar er a ked.

⁵ A Jehovah a milsaod el mora rechedal el kmo ngmla mengodech a blekerdelel a klengar er tir. Ngdirrek el milsterir tia el uleklatk, el domes er ngii e ngua lak a ngera el lerellii el kirel a tekoi er a sers. Ngdilu el kmo: “Kele bo mekesuseu el mo cheroid er a RUBAK el mo mengull el meluluuch e mesiou a ngodech el chelid.” (Dut. 11:16, 17) Ngera uchul me a Jehovah a ulemeklatk er tir el kirel a omengull el mora klsuul el chelid e a osisiu el taem e ngmelekoi el kirel a omesubel a beches el rolel a lomekeroul a kelir?

⁶ A Jehovah a mle medengei el kmo a rechad er a Israel a mo mekesuseu el mo mesuub a rolel a lomekeroul a kelir lokiu tirke el dimlak longull er a Dios. Ngmera el tekoi, tirka el chad a mla er ngii a klemedengei er tir er a rolel a tekoi er a sers, me a rechedal a Dios a mle sebechir el suub a betok er tir, engdi ngsebechir el mo mecheblad. Tirka el chad er a Kanaan a uluumerang e dirrek el milengull er a Baal. Te uluumerang el kmo a Baal a merreder er a melidiul, e ngii ngike el omesterir a chull. Me a Jehovah a dimlak el soal a rechedal a bo loumerang aika el klsuul el klaumerang. Me nguaisei, engdi ngmle betok el taem el rechad er a Israel a millilt el mo mengull er a Baal. (Ule. 25:3, 5; Men. 2:13; 1 Ki. 18:18) Me chelechang e kede mo mesa sel rolel e a Satan a milengeblad er a rechad er a Israel.

EDEI EL TEKOI EL LULUUSBECH A SATAN EL MENGEBLAD ER A RECHAD ER A ISRAEL

7. Ngmilekera measem a klaumerang er a rechad er a Israel er sera lsiseb er a Beluu er a Nglat?

⁷ A kot el tekoi el luluusbech er ngii a Satan, aike el tekoi el sorir a rechad er a bek el sils. Ngdimlak a kmal chull er a Beluu er a Nglat er a ulebengelel a April el mo bedul a September er a bek el rak. Me a bo el sebechir a rechad er a Israel el melemolem a klengar er tir e bo lungil a dbechel a dellemelir, e ngmle kirir el ultuil er a chull el blechoel el ngar ngii sel October. A Satan a milengeblad er a rechad er a Israel el mo omdasu el kmo, a lsekum e ngsorir el mo ungil a klengar er tir, e ngmle kirir el oltirakl a siukang er tirke el chad el iliuekl er tir, el tir a dimlak longull er a Dios. Tirkang a uluumerang el kmo a chedrir a mo otengelii a chull a lsekum te meruul a bebil el rolel a omengull. Me tirke el dimlak el mesisiich a klaumerang er tir er a Jehovah a mlo oumerang el kmo, tiaikid a di ta el rolel e ngmeterob a kemtimt, me te mlo teloi a klsuul el rolel a omengull el mora chelid el Baal.

8. Ngera ongeru el tekoi el luluusbech er ngii a Satan? Mosaod.

⁸ A ongeru el tekoi el luluusbech er ngii a Satan, a ngelbesel a rengrir a rechad er a Israel. Aike el renged el dimlak longull er a Dios a milengull a chedrir lokiu sel loruul a mekikiongel el rolel a deleboes. Tiaikid el kmal kikiongel el rolel a omengull a mle uldimukl er a ruteruul el redil me a resechal el ngar er a templo. Tirka el chad a dimlak di lekengei er a remengolchotaor me a lmuut el bebil er a rolel a deleboes el omeruul, e te dirrek el ulemes aika el tekoi el ua di lungil! (Dut. 23:17, 18; 1 Ki. 14:24) Te ulemdasu el kmo aika el blekeradel a olechau a rengrir aika el chedrir me te mo rullii a chetemel a beluu el mo ungil. A rebetok el chad er a Israel a mlo sorir aika el deleboes el omeruul el lurruul tirka el dimlak longull er a Dios, me te mlechetikaik el mo mengull a klsuul chelid. Me a mera er ngii, te milecheblad er a Satan.

9. A doltirakl er a Hosea 2:16, 17, e ngmilekera Satan e rulleterir a rechad er a Israel me te obes er a Jehovah?

⁹ A ongedei el tekoi el luluusbech er ngii a Satan a rirelleterir a rechad er a Israel el mo rrau a rengrir el kirel a uldesuel a Jehovah. Ngar er aike el sils er a profet el Jeremia, e a Jehovah a millekoi el kmo tirke el klsuul el profet a rirelleterir a Rechedal me te ulebes er a Ngklel, e mlo ousbech er a ngakl el “Baal.” (Jer. 23:27) Me a rechedal a Dios a mlo diak lousbech er a ngklel a Jehovah, e bai miltechir loba ngakl el Baal, el belkul a kmo “Merreder” me a lechub e ng “Mastang.” Tia el omeruul a rirellii el mo meringel er a rechad er a Israel el mesa klekakerous er a Jehovah me a Baal, me ngmlo beot er tir el oldak er a rolel a omengull el mora Baal el mora omengull er tir el mora Jehovah.​—Monguiu er a Hosea 2:16, 17.

AIKE EL TEKOI EL LOUSBECH A SATAN ER CHELECHANG

10. Ngera el bedikl a lousbech a Satan er chelechang?

¹⁰ A Satan a ousbech aika el osisiu el tekoi er chelecha el taem. Ngmengeblad er a rechad lokiu aike el tekoi el sorir a rechad er a bek el sils, me a ngelbesel a rengrir, e rulleterir el mo rrau a rengrir el kirel a uldesuel a Jehovah. A kot e kede mo mesaod er a rolel e a Satan a rulleterir a rechad el mo rrau a rengrir el kirel a uldesuel a Jehovah.

11. Ngoeak a ngera el rolel e a Satan a mla omekerrau a rengrir a rechad el kirel a Jehovah?

¹¹ A Satan a rulleterir a rechad el mo rrau a rengrir el kirel a uldesuel a Jehovah. A uriul er a lemad a rechapostol er a Jesus, e a rebebil el millekoi el kmo te Kristiano a mlo omuchel el olisechakl a blulak el tekoi. (Rel. 20:29, 30; 2 Th. 2:3) Tirka el omtok a mera el osisechakl a rirelleterir a rechad el mo rrau a rengrir el kirel a kmo ngtecha mera el Dios. El ua tiang, ngmlo diak lousbech er a chedaol el ngklel a Dios el ngar er a Biblia er tir, e bai miltechir er a dui el “Rubak.” Me sera lutechir tia el ngklel a Dios er a dui el “Rubak,” e te rirellii el mo meringel er a rechad el menguiu er a Biblia el mo mesa klekakerous er a Jehovah me tirke el kuk bebil er a “rubak” el losaod er tir a Bades. (1 Ko. 8:5) Te uluusbech er tia el osisiu el dui el “Rubak” el kirel a Jehovah me a Jesus, el mlo uchul me ngmlo meringel er a rechad el mesa el kmo a Jehovah me a Ngelekel a kakerous, e dirrek el kakerous a deruchellir. (Jn. 17:3) Tia el rraurreng a mlo uchul a osisechakl er a Trinidad, el ngii a diak debetik er ngii er a Tekingel a Dios. Tiaikid a uchul me a rebetok a oumerang el kmo ngkmal meringel er kid el mo medengelii a Dios. Tiang a mera el blulak el tekoi!​—Rel. 17:27.

12. Ngera ngmelisiich er ngii a klsuul el klechelid, e ngera mla duubech el ua losaod a Rom 1:28-31?

¹² A Satan a ousbech a ngelbesel a rengud. Ngar er a taem er a Israel er a irechar, e a Satan a uluusbech a klsuul el klechelid el melisiich a deleboes el omeruul. Chelecha el taem, e ngmeruul a osisiu el tekoi. A klsuul el klechelid a kongei a deleboes el omeruul e omes el kmo ngdi ungilbesul. Sei a uchul me a rebetok el melekoi el kmo te mesiou er a Dios a mla mo diak loltirakl a bleketakl el llechul el kirel a tekoi er a kldung. A apostol el Paulus a mesaod aike el tekoi el mla duubech e le klsuul el klechelid a melisiich a deleboes el omeruul el ngar er a babilengel el mora rechad er a Rom. (Monguiu er a Rom 1:28-31.) A bebil er “a ikel diak le kirir el meruul” a rokui el bedengel a deleboes el omeruul, el uldimukl er a remengolchotaor. (Rom 1:24-27, 32; Och. 2:20) Sei a uchul me ngkmal klou a ultutelel a dolengesenges a bleketakl el osisecheklel a Biblia!

13. Ngera lmuut el ta er a tekoi el lousbech er ngii a Satan?

¹³ A Satan a ousbech aike el tekoi el sorir a rechad er a bek el sils. Kid a ngar ngii a urunguled el soad el mo er ngii a duch er kid el sebechel ngosukid el omekerreu er kid me a telungalek er kid. (1 Ti. 5:8) Me kede blechoel el mesuub aika el duch sel debo er a skuul e bo leblak a rengud el mesuub. Engdi ngkired el mo kerekikl. Ngar er a betok el beluu, e a rengalek a mosisechakl a kakerous el duch me a dirrek el llomeserreng er tia el beluulechad. El ua tiang, a skuul a melisiich er a rengalek el mo oumededenger el kmo ngar ngii a Dios e mo diak lolecholt a omengull el kirel a Biblia. Te mosisechakl el kmo a rokui el mellomes a rengrir el chad a oumerang el kmo, a klengar a mlo er ngii el okiu a evolution. (Rom 1:21-23) A chouaika el osisechakl a omtok er a “llemesel a rengul a Dios.”​—1 Ko. 1:19-21, NW; 3:18-20.

14. Ngera ngmelisiich er ngii a llomeserreng er a rechad?

¹⁴ A llomeserreng er a rechad a oltngakl e omtok a melemalt el llechul a Jehovah. Ngdiak lolisiich a rodech er a chedaol reng er a Dios, e ngbai di melisiich a “urerel a klechad.” (Gal. 5:19-23) Ngmelisiich er a rechad el mo mekedidai a rengrir el rulleterir el di mo “betik a rengrir ra di tir.” (2 Ti. 3:2-4, BT) Aika el blekeradel a kmal ngodech er aike el blekeradel el Dios a soal a rechedal a bo lolab. (2 Sa. 22:28) A rebebil el Kristiano el mlo er a university a mlo omuchel el olab a uldasu er tia el beluulechad er a bai lolab a uldesuel a Dios. Ka me bo dosaod er a ta el olechotel a tekoi el sebechel el duubech.

15-16. Ngera sebechem el suubii er a tekoi el dilubech el mora ta el odos?

¹⁵ A ta el odos el mla ngar er a mui el taem el omesiou el kuk betok er a 15 el rak a melekoi el kmo: “Ngak el telecholb el Sioning a uchul me ak milenguiu e ulerrenges a telemall el sebechel el mo duubech a debo er a university, engdi ngdimlak kumtab aika el uleklatk. Ak ulemdasu el kmo aika el omellach a dimlak a ultutelel er ngak.” Me ngera el mondai a blo lechelebangel? Ngmle bleketakl el dmu el kmo: “Ak chilitii a klou el temek me a klisichek el mesuub me ngmlo diak a temek el meluluuch el mora Jehovah el ua ngar er a mong, e kmal mlo mesaul a bedengek me ngmlo diak el sebechek el mesaod er a Biblia el mora rechad, e dirrek el mlo diak kungil mengetmokl er ngak el mora miting. Ngkmal dmeu a renguk e le sera bo kulechesuar el kmo ngak el kmal blak a renguk el ngar er a university a mlo uchul a telemellel a deleuill er ngak me a Jehovah, e ngmlo kirek el mo merek el ngar er a skuul. Me ak mirruul er tiang.”

¹⁶ Ngera ngtilemellii er a uldesuel tia el ngarbab el skulel? Ngonger el kmo: “Ak merur el melekoi el kmo a skuul el kngileltii a ulsisecheklak el mo melatk a kngterir a rebebil, el ileakl a rudam me a rudos er ngak, e mo mengerechir er tir el mo meruul a tekoi el engelakl er aike el sebechir, e mo meleakl er ngak er tir. Ak uluusbech er a klou el taem el mo sebechek el mo diak kumdasu el uaisei. Tia el tekoi a mileketeklii er a renguk sel telemellel a doltngakl a uleklatk el lomeskid a Demad el ngar er a eanged el okiu a cheldebechelel. A Jehovah a kmal mle ungil medengelkak, me ulekum e ak ulerrenges er ngii!”

17. (a) Ngkirel mo ulterekokl a rengum el mekerang? (b) Ngera bo dosaod er a ongingil el suobel?

¹⁷ Me bo lulterekokl a rengum me lak mecheblad er aike el “chelsengsang el leko ng llomeserreng” er tia el beluulechad er a Satan. E dirrek, bo blechoel el kerekikl me lak mecheblad er a Satan. (1 Ko. 3:18; 2 Ko. 2:11) E lak becherei me lerellau el mo rrau a rengum el kmo ngtecha Jehovah e uangera el rolel a omengull a soal. Bo moltirakl a ngarbab el llechul a Jehovah el kirel a tekoi er a kldung. E lak becherei a Satan me longeblad er kau me bo moltngakl a ulekrael er a Jehovah. Engdi ke mo mekerang a lsekum e ke melechesukau el mla mechetikaik er a uldasu er tia el beluulechad? A ongingil el suobel a mo ochotii a rolel e a Tekingel a Dios a sebechel el ngosukau el mo mengoit aike el ‘mera el blekerdelem er a chelsel a rengum’ el ike el mengesuseu er a uldesuem me a omerellem.​—2 Ko. 10:4, 5.