Kemiu el Chedam me a Chedil—A Rengelekiu Te Mesuub el Mo Omdasu el Ua Dios?
1. Ngera mo uchul a deuil a rengrir a Rekristiano el chedam me a rechedil?
1 Ngkol ua ngera el klengeltengat a dobang a lengar er ngii a rengeleked el sorir el mesiou er a Jehovah! E tiang a mo uchul a deuil a rengrir a reblak a rengrir el chedam me a rechedil. A apostol el Johanes a ulechotii a chouaisei el deurreng el kirir a rengelekel er a klereng er a loluches el kmo, “Ngdiak a ngaruchei el kloul deourreng er ngak sel krenges el kmo ar ngelekek choltirakl ra klemerang.”—3 Jn. 4.
2. (a) Ngera el ker a bla loker a rebetok el chedam me a rechedil? (b) Ngmlekerang er a longer er tia el ker a ta el chedam?
2 Nguaisei engdi a rebetok el chedam me a rechedil a oker el kmo, “Ke mekerang e rulleterir a rengelekem el mo omdasu el ua Dios?” E mera el kirir el oker el uaisei e le Satan a meringel el mengetikaik er a rengeasek er chelecha el taem. A nger er a rechedam me a rechedil el mla ngosuterir a rengelekir el mo mesisiich er tiang a ungil el kired. A ta el chedam a kmo, “A kot el klou a ultutelel el tekoi a ungil el kerebai er kau el omdasu el ua Jehovah.” Ngika el odam, el ta er a remechuodel e dirrek el teua rengelekel, a mengoit a taem el obengterir a rengelekel. A tekoi er a renged a kot er a klengar er tir. Te mesaod a rolel a losiou er a Jehovah el ongalek. Sel lebo er a omerael, e te mong el telungalek e a demerir a kerekikl me te mo er aike el miting el ngar sel basio el lengar er ngii.
3. Ngmlekerang a ta el chedil e le ngesuterir a rengelekel el mo dmeu a rengrir el loldingel?
3 A ta er a tekoi el kirir el meruul er ngii a rullii a ureor er a odingel a obliil el mo er ngii a deurreng er ngii. A ta el chedil a dilu el kmo ngulebetiterir a rengelekel el mo oldingel a obliil er sera el dirk lemekekerei. Ngkmal mle sorir a odingel, me ngdimlak el di el lebong e le ngmle kirir.
BO MIMOKL EL CHADECHEDUCH
4. Ngerang a sebechel el ngosuterir a rechedam me a rechedil el mo mimokl el mengedecheduch er a rengelekir?
4 Ke mekerang e mo medengei el kmo a rengelekem a mla mesuub el mo omdasu el ua Dios a lsekum e ngdimlak mimokl el mengedecheduch er tir? Nglocha meringel. Sei a uchul me a rebetok el mellomes a rengrir el chedam me a rechedil a metik er ngii el kmo ngungil sel lemimokl el mengedecheduch er a rengelekir, e ledak el meruul a tekoi. Te dirrek el mla metik er ngii el kmo ngungil a lobetiterir a rengelekir sel lengar er a omilil el obengterir a rebebil er a remeklou el chad. Ngoeak tiang, e ngsebechir el dmak el rokui el milil. A remellomes a rengrir el chedam me a rechedil a dirrek el kmal semeriar er aike el loruul a rengelekir sel lengar er a skuul me a lechub e ngngii di el ker. A chouaisei el klemeriarreng el ngar er a rengelekir a rulleterir tir el ngalek el mo sebechir el mengedecheduch er a redemerir me a rederrir sel leduubech a mondai, me alta te mo remuul a mekngit el tekoi engdi ngulterekokl a rengrir el kmo a redemerir me a rederrir a mo ngosuterir.—Osi. 15:14.
5. (a) Ngera uchul me ngklou a ultutelel el kirir a rechedam me a rechedil el mo orrenges er a rengelekir? (b) A rechedam me a rechedil te kirir el mekerang a lolecholt a cheleuid el uldasu a rengelekir?
5 A rebebil el chedam me a rechedil a mla metik er ngii el kmo ngungil a lekerekikl el orrenges er aike el losaod a rengelekir. Te mo medengei el kmo ngera te meruul a rengelekir a lengar er a blai me a lak, e sola e mo melasem el omeklemalt a ngii di el cheleuid el uldesuir a rengelekir er a uchei er a lemedalem er a uldesuir me a rengrir. A remellomes a rengrir el chedam me a rechedil a melasem el melisiich er a rengelekir el mo melemolem el omdasu el ua Jehovah el ngar er tia el beluulechad el melisiich a tekoi er a kerruul. (Efe. 6:10-13) A chouaisei el bltikerreng a oldak er a rechedam me a rechedil me a rengelekir.—Osi. 24:5.
MDAK EL MESUUB A TEKINGEL A DIOS
6. (a) Ngera el klungiaol a lengai a rengalek sel leblechoel el mesuub a Biblia a telungalek? (b) Ngera sebechel rullii a omesubel a Biblia el telungalek el mo er ngii a belkul?
6 A ta er a klou a ultutelel el tekoi el sebechiu el meruul er ngii el mekurulii a uldesuiu el mo omdasu el ua Dios a sel oblechoel el dmak el mesuub a Biblia el telungalek. A lsekum a rengalek a mesang el kmo a redemerir me a rederrir a semeriar er a klemedengei el ngar er a Biblia me te mengoit a taem el kirel er a bek el sandei, e tir me te dirrek el mongeseu el mo meruul el uaisei. Nguldimukl er a taem el lebecherei el kirel a omesodel a ta er a babier me a lechub e ng magazine er a bek el sandei, e a rungil el chedam me a rechedil a mo mesterir a rengelekir a ulekrael me a omelisiich el lousbech. Aike el tekoi el duubech er a skuul me a lechub e ng hang er kid a sebechel el locholt er kid a tekoi el ungil el dosaod el sumechokl a mondai el ngar er ngii. Tiang a ta er a telengtengil a dosuub el mo omdasu el ua Jehovah.
BESTERIR A MERA EL MEKREOS EL KLALO ER A KLERENG
7, 8. (a) Ngera sel kot el ungil el tekoi el sebechir a rechedam me a rechedil el rullii el kirir a rengelekir? (b) Te mekerang a rechedam me a rechedil a lengesuterir a rengelekir el mo kmeed er a Jehovah?
7 A rebebil er a rechedam me a rechedil a uleba cheleuid el uldasu el kmo sel kot el ungil el sebechir el mesterir a rengelekir a kerruul. Engdi a tekoi el mla duubech a ochotii el kmo a rechedam me a rechedil sel lengai a tekoi er a kerruul el mo kot el meklou a ultutelel er a klengar er tir, e tiang a blechoel el mo uchul e te mo diak el sal lomdasu el ua Jehovah e mo diak lomekerreu a deleuill er a rengelekir el obengkel a Jehovah. (Mk. 8:36) Me alta te mo oldeu a rengrir er a rolel a klengar el betok a kerruul er ngii, engdi tia ngsebechel mo uchul a klungiaol a dechitii a deleuill er kid me a Jehovah? A rekuk bebil er a telungalek a mla ngiltii el mo omekbeot er a klengar er tir me lak lobes er a mera el turrekong er tir. (Jn. 6:27) Te mla mesuub el mo ungilbesul er a rengrir aike el ngar er ngii er tir, e mengal mla mo kmeed er a Jehovah el mo uchul e te mukngeltengat tir me a rengelekir.
8 Kau ke melatk er a deleuill er a telungalek er kau me a Jehovah? A leuaisei, e ngera me ngdiak moureor el dmak el meleketek er a mera el mekreos el klalo er a klereng? (Mt. 6:19-21) Mngesuterir a rengelekem el mo olekeed er tir er a Jehovah, e kau me ke dirrek el mo oba omereng el saul e le ‘ar ngelekem choltirakl ra klemerang.’