Aike el Meklou el Ongdibel—A Taem el Doldeu a Rengud er a Omengull er Kid
1. Ngmekerang e aike el chedaol el sils er a Israel el uai aika el meklou el ongdibel er kid er chelechang?
1 A Josef me a Maria me a rengelekir me a rekuk bebil a mle blechoel el mo er a Jerusalem el mo er aike el chedaol el sils er a bek el rak. Ngar er aika el taem, e tir me a rebebil a mechei aike el mondai er tir er a bek el sils e otaut a osengir er aike el lmuut el meklou a ultutelel el tekoi er a klereng er a klengar er tir. Aike el chedaol el sils a mesterir a taem el mo melatk e mesaod el kirel a ungilreng er a Jehovah e omtab a llechul. Aika el merael el mei el meklou el ongdibel a mo meskid a osisiu el techall el kirel a dongull er a Jehovah el ngar er a deurreng.
2. Ngera kired el meruul el mengetmokl er kid el kirel a merael el mei el klou el ongdibel?
2 Ngusbechall a Omengetmokl: A omerollel a telungalek er a Jesus el mong e lmuut el mei er a Nazareth a mle bekord el 120 el mael a klemengetel. Alta ngdiak dodengei a ildisir a rebebil er a Jesus, engdi ngsebeched el mtebengii a klungel a taem me a ureor el mle kirel a Josef me a Maria el meruul er ngii. Kau ke mla kutmeklau me bo el sebechem el mo er sel merael el mei el klou el ongdibel? Nglocha kirem el melai a ulengellem er a ureor me a lechub e ke mengedecheduch er a merredelem me a lechub e mongedecheduch er a sensei er a ngelekem me bo lolengull er a skuul er seikid el taem. Kau ngsebechem el ngosuir a chad el ngar er a ongdibel el ousbech a ileakl el ngeso me bo el sebechel el mo er tia el ongdibel?—1 Jn. 3:17, 18.
3. Kede mekerang a dolecholt el kmo kede oba omereng el saul el kirel a klodam er kid el Kristiano el ngar er a kltarreng?
3 A ta er a uchul e a blak a rengul e mellomes a rengul el mesiou a mengideb er kid el mo dmak e orrenges a cheldecheduch el ngar er aike el meklou el ongdibel er a bai loltobed aika el osisiu el tekoi er a babier e le ngmo sebeched el kasisiich er a delongeled. (Heb. 10:24, 25) A leuaisei, e mketmeklau me bo el sebechem el mereched el mo er tia el klou el ongdibel er a bek el sils el mo oldeu a rengum er a ungil el klausechelei el obengterir a rebebil er a uchei er a chairman a bo lolai er a chesmerel a prokuram el okiu a ongngak el louchais el kmo ngmla mo temed el mo dengchokl. Kede muchelechel el ngmai a di sesei el sueleb er kid me di dousueleb er a basio er tia el klou el ongdibel me bo el sebeched el chadecheduch kid me a rebebil. A klodam er kid el Kristiano el ngar er a kltarreng a sengk el mla er a Jehovah el kmal kired el oba omereng el saul el kirel.—Mik. 2:12.
4. Ngera mo ngosukid el ngmai a klungioled er a prokuram?
4 Taem el kirel a Omesuub: A Jesus a ulemuchel er a ledirk lekekerei el ousbech aike el temel a chedaol el sils el mesuub el kirel a Demal el ngar er a eanged. (Lk. 2:41-49) Ngera mo ngosukid me a telungalek er kid el mo ngmai a klungioled er aike el cheldecheduch el mo er ngii? Sel temel a cheldecheduch, e lak bekiis er a kingellem, me a diak msal mengedecheduch. Lak becherei a cell phone, pager, me a ngii di el klalo el uai ngii me bo longesang er kau me a rebebil. Momes er ngike el mengedecheduch, e moluches a tekoi el losaod el soam. Mdak el dengchokl el telungalek me moterekeklii el kmo a rengelekem a orrenges a cheldecheduch. Sel lekebesengei e mchoit a telkib el taem el dmak el mesaod a bebil er a tekoi el mle somiu.
5. Ngera kired el melatk er ngii el kirel a teletelel a biled me a omengetmeklel a bedenged?
5 Teletelel a Doubail me a Omengetmeklel a Bedenged: A rechad er a ngodech el beluu el omsaso el mla er a omerael a mle beot el dongchii a telungalek er a Jesus me a rebebil er a rechad er a Judea el mla er a omerael el mong e mei er aika el chedaol el sils, e le nguluusebesob a rsel a bilir e mle rresimel a mellemau el kerreel el meliuekl er a rsel a bail er bebul ngii el sebesob. (Ule. 15:37-41) Me alta Rekristiano a diak el loubail a ileakl el bail, engdi a rechad a medengelkid el kmo kede ungil el loubail. Ngdirrek el kired el kerekikl a ketmeklel a bedenged sel domais el mong e mei el ngar er aike el meklou el ongdibel, e blechoel el ngar er ngii a badge er a klou el ongdibel el bereked er a biled. Ngoeak tia el rolel, e kede mo chemolt el ngodech er a rediak el Sioning e mo ungil er a osengir a rechad el omes.
6. Ngera me ngkired el melatk el mo oureor el olengeseu er a temel a klou el ongdibel?
6 Te Usbechall a Rechad el Olengeseu: Te usbechall a rebetok el chad el olengeseu me bo el sebechel a meklou el ongdibel el mo ungil el merael. Ngsebechem el mo olengeseu? (Psa. 110:3) Aike el ureor el meketmokl el ngar er aika el meklou el ongdibel a tedebechel a chedaol el omesiunged e dirrek el ungil el sioning. A merredel er a ta er aike el basio el mla er ngii a klou el ongdibel a kmal mle mechas a rengul er tirke el uluureor el mengetmokl ngii el basio me ngmilluches el kmo: “Ngsoak el mereng a suliu el kirel tia el mera el ungil el kldibel el bla kisang. Ak blechoel el ulerrenges el kmo a Resioning er a Jehovah a mle ileakl el chad el kmal mla mo kemanget el taem el ungil a chisir er a ureram el kmo te blechoel el lorael e a basio el lulleng a kuk beches e ungil el kltmokl er sel taem er a lekot el ngmai. Kemiu me a cheldebechelliu a mla kutmeklii tia el basio el mo ungil el kirel a beluu e rirellii el obengterir a rekot el ungil a blekerdelir el chad el mle dmeu a rengmam el mo medengelterir.”
7. Ngera el techall a ngar er ngii el sebeched el ousioning el ngar er a basio el ngar er ngii a klou el ongdibel?
7 Techall el Mo Sioning: A rebetok a sebechir el mesekid a dungil el oubail e dousbech a badges er kid, me ngsebechel el mo sorir el mo medengei el kmo ngngera ngar er ngii, me te meskid a techall el mo ouchais el kirel ngii el klou el ongdibel. A ta el eua rekil el buik a ngiluu a ta er aike el beches el tilobed el babier el babilengel el mo er a blil a blengur er a uriul er a prokuram e ulechotii er a ta er a redil el uluureor er isei. Tiang a mlo uchul e a demal me a delal ngika el buik a mlo sebechir el mengemedaol er ngika el redil el mo er sel klou el ongdibel el mla er ngii.
8. Ngmekerang a doukerebai er a omereng el saul el lulebang a telungalek er a Jesus el kirel aike el techall el mo mesuub el kirel a Jehovah?
8 Aike el chedaol el sils er a ngar er a mong a mle taem er a deurreng el tirke el chad er a Judea el mle sorir el mo medengei a betok el kirel a Jehovah a mle madeltmuil el mengiil. (Dut. 16:15) A telungalek er a Jesus a mle dmeu a rengrir el melenget aike el ngar er ngii er tir me bo el sebechir el mo er aike el chedaol el sils e lengai a klungiolir er ngii. Kid me kede oba osisiu el omereng el saul el kirel aika el meklou el ongdibel er kid, e omes el kmo ngsengk el mla er a betik a rengul el Demad el ngar er a eanged. (Jak. 1:17) Chelechang e ngtaem el dongetmokl er kid el kirel tia el techall er a bek el rak el sebeched el mo oldeu a rengud el mengull er a Jehovah!
[Baks el ngar er a 6 el llel]
Uleklatk el kirel a Meklou el Ongdibel
◼ Blengur er a Sueleb: Ngungil el mngai a bento er kemiu el mei, er a bai mtobed er sel basio er a klou el ongdibel el mo osiik a keliu er a sueleb. A kekerei el cooler el sebechel el mo er a cheungel a kingellem a sebechem el ousbech er ngii. A meklou el cooler el blil a kall me a ilumel me a lechub a ngii di el obebeu el klekedall a diak el kired el olab el mei er sel basio er a klou el ongdibel.
◼ Omelenget: Ngsebeched el ochotii a omereng el saul er kid el kirel a oketmeklel a meklou el ongdibel el oeak a omelenget el mo er a ureor er a beluulechad el rokir el ngar er a blil ongdibel er kid me a lechub e ngngar er sel basio er a klou el ongdibel. Me a lsekum e ke melenget el ousbech a check e ngkirem el luchesii el mo er a “Jehovah’s Witnesses.”