◼ Temel a Prokuram: A Blil a Ongdibel a mengai a chesmerel er a 8:00 a.m. me a ongngak a mo omuchel er a 9:20 a.m. Ngar tia el taem, e ngkired el mo er a kingelled me bo el sebechel el omuchel a prokuram el ngar er a ungil el rolel. A ulebongel el chelitakl me a nglunguuch a mo er ngii er a bekord el 5:00 p.m.
◼ Aike el International Convention: A bebil el beluu a mo oungerachel aike el international convention. Lak mobes el kmo a branch office a mla mengemedaol a bebil el ongdibel me a rechad er a ngodech el beluu el mo er aike el meklou el ongdibel er a uriul er a bo lodengei a ildisel a kingall, parking, me a room er a hotel el sebeched el ousbech. Ngsebechel el mo meseked a lsekum a re publisher a mo er a international convention el diak el kirir el mo er ngii. Me a lsekum e ngmo diak el sebechem el mo er sel district convention el mle kirem el mo er ngii, e lak obo er a international convention.
◼ Parking: Ngar er aike el rokui el basio el ngar er ngii a convention er kid el doungerachel a parking, e tirke el me a mereched el mei a sebechir el ngmai a diak locheraol el parking. Ngdi mekesai a parking, me ngungil a dedak el ngar er a osisiu el mlai. Ngdi tirke el ngar er ngii a license plate me a lechub a sticker er a mlirir el olecholt el kmo te chitechut a sebechir el park er aike el basio el melutk el di kirir.
◼ Kutmokl a Kingellir a Rebebil: Sel lemengai a chesmerel a basio er a bek el tutau, e lak morreched el mo melai aike el soam el kingall el ua omongaidesachel er a rechad. Sel domdasu er a rebebil e ngosukid el mo osiik aike el mo uchul a klungiolir e tiang a olecholt el kmo kede mera el Kristiano e rulleterir tirke el omes er kid el mo mengebkall er a Dios. (Jn. 13:34, 35; 1 Ko. 13:4, 5; 1 Pe. 2:12) Ngdi sebeched el mengetmokl a kingellir tirke el kiei el obengked me a lechub e ngtirke el obengked el ngar er a mlid me a lechub e ngtirke el chad el dosuub a Biblia el obengterir. Ngar er ngii a ileakl el kingellir a remechuodel me a rechitechut. Ngkmal mekesai aika el kingall, me ngdi sebechel a tang me a lechub e te teru el chad el dengchokl el obengterir tirka el chad el olengeseu er tir.
◼ Blengur er a Sueleb: Moutekangel el ngmai a sueleb er kau el me er sel basio er a convention me lak bo mtobed el mo omengur er a cheroid. Ngsebechem el ousbech er a kekerei el cooler el sebechel el mo er cheungel a kingall. A meklou el cooler me a ngii di el obebeu el klalo a diak el kired el ousbech er sel basio er a convention.
◼ Tenget: Ngsebeched el ochotii a omereng el saul er kid el kirel a oketmeklel tia el convention el oeak a tengetenged el mo er a ureor er a beluulechad el rokir. A lsekum e ke melenget el ousbech er a check e ngkirem el luchesii el mo er a “Christian Congregation of Jehovah’s Witnesses.” Ngdirrek el sebeched el melenget el okiu a debit me a lechub a credit card.
◼ Kar: A lsekum e ngngar er ngii a kar el kirem el melai, e mngai a ungil el ildisel e le ngdiak a kar er tia el basio er a convention. Ngdiak el kired el mengoit aike el orus el lousbech tirke el smecher el sukal er a blil a komi er a basio er a convention me a lechub e ng hotel.
◼ Tekoi el Kired el Mo Kerekikl er Ngii: Bo mkerekikl me lak metemall sel mtorech. A bek el rak e a rechad a blechoel el metemall el oecherir a uchul, el ileakl sel loureacher a mekemanget a btil el oeacher. Sei a uchul me ngungil a doureacher a ungilbesul el oeacher el sebechel el ngosukid me ngdiak demekesakl a dorael er a mekedidai el basio, me a terebel, me a tkul a dobu me aike el uai ngii.
◼ Mekngit Oderngesir: A lsekum a prokuram a mo motobed er a FM radio frequency, e ngkirem el nguu a kekerei el battery-operated FM receiver el obengkel a earphones me bo el sebechem el orrenges.
◼ Baby Stroller me a Lawn Chair: Ngdiak dolab a baby stroller me a lawn chair el mo er a basio er a convention. Engdi a kingellir a rengalek a sebeched el olab el mong a lsekum e ngar er ngii a kingall el sebechir el ousbech el kmeed er a demerir me a derrir.
◼ Kosui: Oumesingd el convention a ngar er a basio el di chelsimer el ousbech a air condition. Me ngolechotel a bltikerreng a lsekum e kede olengeasek a usbechel a mesisiich a bul el kosui e le ngsebechel el ngar er ngii a letemellii er a rechad el ngul me a lechub e ngsecher el uai ngii.—1 Ko. 10:24.
◼ Please Follow Up (S-43) el Babier: A Please Follow Up el babier a dousbech el meluches a tekoi el kirir a rechad el ullecholt a klemeriarreng er a dousioning el mo er tir er a temel a ulengull er a convention. Sel bla mrekir tia el babier e mnguu el mo er a Book Room me a lechub e ke nguu el msa melechesel a ongdibel er kau.
◼ Blil a Blengur: Mongebkall er a ngklel a Jehovah el oeak a ungil el omerellem sel omngar er a blil a blengur. Moubail a ungilbesul bail el ochotii el kmo ke Kristiano. E becherei a tip a lsekum e ngsiukang er a beluu.
◼ Hotel:
Ngdiak el kired el reserve a betok el room el medeel er aike el dousbech, e diak el kirel el mo engelakl a ildisir a rechad el kirir el ngar er a chelsel aike el room.
Ngdi sebeched el cancel a reservation a lsekum e ngduubech a bkaischemrungel el tekoi, engdi ngkired el mereched el subedeterir a rechad er a hotel me bo el sebechel ngar er ngii a room el mo er a rechad el ousbech. (Mt. 5:37) A lsekum e ngkirem el cancel er a reservation er kau, e ngkirem el nguu a cancellation number er kau. E a lsekum e ke cancel er a room er kau er a uriul er a 48 el sikang, e ngdiak el sebechem el nguu a refund er kau.
Mutebengii el kmo a lsekum e kede ousbech a debit me a lechub a credit card sel de check in er a hotel, e ngblechoel a hotel el oreked a ududed me bo el sebechel el harau a room er kid, me a ngii di el telemall me a tekoi el sebechel el duubech. Me ngdiak el sebeched el ousbech a ududed el mo ikrel a sesei el klebesei.
Mnguu a luggage cart a lsekum e kom ousbech er ngii, e mereched el olutii me bo el sebechir a rebebil el ousbech er ngii.
A lsekum e ngsiukang er a beluu, e ngsebechiu el tip er tirke el chad el oureor er a hotel sel longider a torangk er kemiu, e dirrek el sebechiu el tip er tirke el mengetmokl a room.
Ngdi sebechiu el meruul a kall er a room a lsekum e te kongei.
Lak meterekakl aike el kall el lomeskemiu a hotel a letutau, me a kohi, me a ice me di mongang e molim aike el sebechiu e lak molai el mo er a basio er a convention.
Ngkired el bek el taem el dolecholt a ungil el blekerdelir a remera el Kristiano el mo er tirke el oureor a hotel. Tirkang a meringel el oureor el oungerachel er a rebetok el okiak me te oba omereng el saul a dolecholt a blekokeuii, kllourreng, me a tabesul el blekeradel.
A ruungalek a kirir el mo kerekikl el omtebechel er a rengelekir er a bek el taem el lengar er a hotel, elevator, swimming pool, lobby area, exercise room me a kuk bebil el basio.
A cheral a room er a ta el sils el mocholt er sel Recommended Lodging List a diak luldimukl er a tax. A lsekum e te overcharge er kau, e lak mongkad er ngii e mereched el mo ouchais er a Rooming Department.
A lsekum e ngmo er ngii a mondai el kirel a room er kau, e mouchais er a Rooming Department er sel basio er a convention me bo el sebechir el ngosukau.
◼ Tirke el Sorir el Olengeseu: A ngii di el chad el soal el olengeseu a kirel el mo er sel Volunteer Service Department el ngar er a basio er a convention. A rengalek el ngariou a rekrir er a 16 a dirrek el sebechir el olengeseu el oeak a loureor el obengterir a redemerir me a lechub a rederrir, guardian er tir, me a lechub e ngchad el lekengei er ngii a rechad er a blil el loungerachel er ngii.