Aike el District Convention​—Mesisiich el Olechotel a Klemerang

1. Aike el chedaol el sils ngmilsterir a rechad er a Israel a techall el mo melebedebek e mesaod a ngera el meklou a ultutelel el klemerang er a Biblia?

¹ A rechad er a Israel er a irechar a mle blechoel el mo dmak el edei el taem er a ta el rak el kirel aike el chedaol el sils. Alta ngdi mle kirir a resechal el mong, engdi a rokui el chedal a telungalek a dilak el mo er a Jerusalem el mo oldeu a rengrir er aika el kldibel. (Dut. 16:​15, 16) A chouaika el kldibel a milsterir a techall el mo melebedebek e mesaod aike el meklou a ultutelel el klemerang er a Biblia. Ngerang a bebil er aika el klemerang? A tang a kmo a Jehovah a bekururau e betik a rengul el Ngike el Omeskid aike el dousbech. (Dut. 15:​4, 5) A lmuut el tang a kmo ngsebeched el ultuil er ngii el kirel a ulekrael me a ulekerreu. (Dut. 32:​9, 10) A rechad er a Israel a dirrek el mle sebechir el melebedebek el kmo te oba ngklel a Jehovah a uchul me ngmle kirir el meruul a tekoi el oltirakl a melemalt el rolel. (Dut. 7:​6, 11) Chelecha el sils e aike el eru el sils el ileakl el ongdibel er kid a dirrek el mo uchul a klungioled.

2. Ngmekerang aike el eru el sils el ileakl el ongdibel e ochotii a klemerang?

² A Prokuram a Mo Ochotii a Klemerang: Ngar er aika el eru el sils el ileakl el ongdibel er kid, e kede oldeu a rengud er aike el cheldecheduch, drama, demonstration me a interview el ngosukid el mo ungil el medengei e oltaut a klemerang el ngar er a Biblia. (Jn. 17:​17) Ngkmal klou el ureor a mla meketmokl el kirel tia el merael el mei el ongdibel er kid. A cheldebechelel a Jehovah a mengetmokl er a prokuram el mo mesaod aike el tekoi el lousbech a rechad el meliuekl er a beluulechad el rokir. (Mt. 24:​45-​47) Kau ke semeriar el mo omes e orrenges aike el tekoi el mo er ngii?

3. Ngera kired el meruul er ngii me dengai a klungioled er a prokuram?

³ Nguaisei, kede mo ngmai a klou el klungiaol a lsekum e kede mong e mo kerekikl el orrenges er aike el eru el sils. Ngungil a omongedecheduch er a merredelem me bo mnguu a ulengellem, a lsekum ngdirkak moruul el uaisei. Ngdirrek el kirem el mo ungil el mechiuaiu me bo el sebechem el ungil el orrenges sel lengar er ngii a prokuram. Te betok a metik er ngii el kmo sel lomes er ngike el mengedecheduch e loluches a meklou a ultutelel el tekoi e ngngosuterir el mo kerekikl el orrenges. Lak becherei a cell phone me a lechub a pager er kau me bo longesang er kau me a rebebil. Ngungil a lak mongedecheduch e moluches a text. Ngdirrek el ungil a lak mongang er a temel a prokuram.

4. Ngmekerang a ruungalek a lengesuterir a rengelekir el mo ngmai a klungiolir er a eru el sils el ileakl el ongdibel?

⁴ Me ngta el taem er a bek el euid el rak, e a rechad er a Israel a mo kldibel el ongalek el orrenges er a Llach el mechuiu er a taem er a Chedaol el Sils er a Delidui. Me te dilak tir me a “re ngalek” el mo ‘orrenges e mesuub.’ (Dut. 31:​12) Ngmera el melisiich er kid sel desterir a rebetok el ongalek el dmak el dengchokl er a chouaika el kldibel me a rengalek el blak a rengrir el orrenges a cheldecheduch! Sel obo mrei e ngungil a omdak el ongalek el mesaod aike el tekoi er a prokuram el kmal mle somiu. Me sel lesueleb me a lechub e sel lengar er a hotel, e a ruungalek a ungil a lekerekikl er a rengelekir, el uldimukl er tirke el mla mo ngeasek me lak di el ‘cheloit a klemat’ er tir, e le “a klebelung a medechel er a chelsel a rengul a ngalek.”​​—Osi. 22:15; 29:⁠15.

5. Ngmekerang a dekebkellii a klemerang el oeak a teletelel a doubail el ngar er aike el ongdibel er kid?

⁵ Sel dousbech er a convention badge er kid, e ngdiak di lolechotel a kmo ngngar er ngii a ongdibel er kid e bo luchul el sebechir a rebebil er a Resioning el dongchid, e ngdirrek el mo uchul a ungil el ocholt el mo er a rechad el omes er kid. A rechad a omes er tirke el lousbech aika el badge el kmo ngungilbesul a bilir, el diak el terrekakl me a lechub e lolechaumad el ua teletael er tia el beluulechad. (1 Ti. 2:​9, 10) Sei e a uchul me ngkired el mo kerekikl a rolel a doubail me a omengetmekled er a temel aika el ongdibel. A lsekum e kede mo oleiuid er kid er a uriul er a prokuram e mo er a blil a blengur, e lak dobes el kmo kede Sioning er a Jehovah er a bek el taem me ngkired el di kerekikl a biled.

6. Ngera ta er a rolel a doldeu a rengud er a kltarreng er a delongeled a Rekristiano er a temel aika el ongdibel?

⁶ Ngar er aike el chedaol el sils, e a rechad er a Israel a uleldeu a rengrir er a ungil el klausechelei el obengterir a rekldemir er a klaumerang el mla er a bebil er a beluu el mei, e tiang a millisiich er a kltarreng. (Rel. 2:​1, 5) A ileakl el klodam er kid a Rekristiano a obeketakl sel lengar er ngii aika el eru el sils el ileakl el ongdibel er kid. A rechad el omes er a budech el mocholt er a delongeled a kmal mechas a rengrir. (Psa. 133:⁠1) Ngungil omngai a kelem me lak bo mtobed el mo omechar a kall, e bai mousbech er tia el techall el mo mengedecheduch er a rudam me a rudos!

7. Ngera bebil er a uchul me ngungil a dolenget a temed el mo olengeseu a lsekum e ngsebeched?

⁷ A rechad el omes er kid a blechoel el mechas a rengrir er a ungil el oketmeklel aika el ongdibel er kid, el ileakl sel bo lodengei el kmo a ureor a meketmokl el okiu a rechad el melenget a temir el oureor. Kau ke “kongei” el mo olengeseu er a ureor sel lengar er ngii aika ongdibel? (Psa. 110:⁠3) A betok el ongalek a blechoel el kongei el mo oureor me bo el sebechir el olisechakl er a rengelekir el mo olengeseu er a rebebil. Me a lsekum e ke sekemerur, e a omolengeseu el ngar aika el ongdibel e ngmeskau a techall el mo medengelterir a rebebil. A ta el odos a kmo: “Ak di mle medengelterir a rechad er a blik me a resechelik e merekong, engdi sera bo kulengeseu el mengetmokl e ak mlo medengelterir a rebetok el rudam me a rudos el kmal mlo uchul a klou el deuil a renguk!” Ngmo er ngii a lmuut el bebil er a resechelid sel dolengeseu er a ureor er aika el ongdibel, e tiang a meskid a klou el deurreng. (2 Ko. 6:​12, 13) A lsekum e ngdirkak a ta el molengeseu, e molengit er a remechuodel me louchais el kmo ngmekerang e sebechem el mo olengeseu.

8. Ngmekerang a bo dongemedaol er a rebebil el mei er a eru el sils el ileakl el ongdibel?

⁸ Mongemedaol er a Rebebil el Me Orrenges er a Klemerang: Ngdi ua ike el mereko el rak, e kede mo merous a siotaikeng el mengemedaol er a rechad el me obengked er a edei el sandei er a uchei er a lomuchel a eru el sils el ileakl el ongdibel er kid. A bek el ongdibel a ungil a bo loruul aike el sebechir el merous er tia el siotaikeng el mo er a bek el basio el loldingel. (Momes er a baks el “Ngmekerang a Bo Dorous er Tia el Siotaikeng?”) Ngkired el ngmai aike el mlo medechel el siotaikeng el mo er tia el ongdibel. Aikang a bo dousbech el mo ousioning er a temel a eru el sils el ileakl el ongdibel.

9. Mouchais a tekoi el dilubech el olecholt el kmo a omerusel a siotaikeng er a bek el rak a ngar er ngii a leketmeklii.

⁹ A rechad te kongei el melai er tia el siotaikeng? Ngar er a ta er aika el ongdibel, e a odam a ngilsuterir a rubekel el smiik a kingellir. Te uluuchais er ngii el kmo te ngiluu tia el siotaikeng e “ulemdasu el kmo ngkmal lungil.” Te ulemekall el kuk betok er a 200 el mael el mo er tia el ongdibel! E kuk ngar er ngii a odos el uleldingel a obliil e milsa tia el siotaikeng el mo er a chad el mle soal el mo medengei el kirel tia el ongdibel. Me a leuaisei, e ngmilsaod er tia el siotaikeng el mo er ngii. A uriul er a sesei el klebesei er a lengar er a eru sils el ongdibel, e ngii el odos a milsa ngika chad me a ta er a sechelil el oba ta er aike el dirk tilobed el babier.

10. Ngera uchul me ngklou a ultutelel el debo er aika el eru sils el ileakl el ongdibel?

¹⁰ Aike el chedaol el sils a lulengetmokl a Jehovah el oeak a bltikerreng el mo olengeseu er a rechad er a Israel el mo “mesiou er ngii el oba blakerreng” me a klemerang. (Jos. 24:​14) Me ngdi osisiu, sel debo er aike el eru sils el ileakl el ongdibel er kid er a bek el rak e ngngosukid el mo “oltirakl er a klemerang” (3 Jn. 3) Me a Jehovah bo lomekngeltengat er tirke el rokui el betik a rengrir er a klemerang el melasem el mo er aika el ongdibel e lengai a klungiolir er ngii!

[Blurb el ngar er a 4 el llel]

A ungil el omerelled er a temel a eru el sils el ileakl el ongdibel a kobkellii a klemerang

[Blurb el ngar er a 5 el llel]

A edei el sandei er a uchei er a lomuchel a eru el sils el ileakl el ongdibel er kid, e kede mo merous a siotaikeng el mengemedaol er a rechad el me obengked

[Aike el baks el ngar er a 3-6 el llel]

Uleklatk Er A District Convention Er A 2012

◼ Temel a Prokuram: A prokuram a mo omuchel er a 9:20 a.m. er aike el eru el sils. Me ngike el odam sel ledu el kmo ngmla omuchel a ongngak, e kid el rokui a kired el mo dengchokl me bo el sebechel a prokuram el omuchel el ngar er a ungil el rolel. A prokuram a mo merek er a 4:55 p.m. er a Sebadong me a 3:40 p.m. er a Sandei.

◼ Kutmokl a Kingellir a Rebebil: Ngdi sebeched el mengetmokl a kingellir tirke el kiei el obengked me a lechub e ngtirke el obengked el ngar er a mlid me a lechub e ngtirke el chad el dosuub a Biblia el obengterir.​—1 Ko. 13:⁠5.

◼ Blengur er a Sueleb: Moutekangel el ngmai a sueleb er kau el me er sel basio er a kldibel me lak bo mtobed el mo omengur er a cheroid. Ngsebechem el ousbech er a kekerei el cooler el sebechel el mo er a cheungel a kingall. A meklou el cooler me a obebeu el blil a ilumel a diak el kired el ousbech er sel basio er a kldibel.

◼ Tenget: Ngsebeched el ochotii a omereng el saul er kid el kirel a oketmeklel aika el eru el sils el ongdibel el oeak a dolenget el mo er a ureor er a beluulechad el rokir. Me a lsekum e ke melenget el ousbech a check e ngkirem el luchesii el mo er a “Watch Tower.”

◼ Accident me a Emergency: A lsekum e ngmo duubech a emergency el ngar er tia el basio er a kldibel, e moutekangel el mo ouchais er a odam el olengeseu el kmeed er kau, e ngii a mereched el mo ouchais er a chad er a First Aid me bo el sebechel el mesa sel blekeradel e lolengeseu. A lsekum e ngusbechall, e ngike el chad er a first aid a mo omekedong er a 911. Tiang a mo uchul me ngdiak el bo el betok a okedong el mo er sel obis.

◼ Kar: A lsekum e ngngar er ngii a kar el kirem el melai, e mngai a ungil el ildisel e le ngdiak a kar er tia el basio er a kldibel. Ngdiak el kired el mengoit aike el orus el kirir tirke el smecher el sukal er a blil a komi er a ongdibel.

◼ Blil a Blengur: Mongebkall er a ngklel a Jehovah el oeak a ungil el omerellem sel omngar er a blil a blengur. E becherei a tip a lsekum e ngsiukang er a beluu.

◼ Tirke el Sorir el Olengeseu: A ngii di el chad el soal el olengeseu a kirel el mo er sel Volunteer Service Department. A rengalek el ngariou a rekrir er a 16 a dirrek el sebechir el olengeseu el oeak a loureor el obengterir a rechad er a blirir me a lechub a ta er a klou el chad el lomekrael er tir.

[Baks el ngar er a 6 el llel]

Ngmekerang a Bo Dorous er Tia el Siotaikeng?

Ngsoad el di mengedeb a cheldechedechad me bo el sebeched el rokir a basio el doureor er ngii. Ngsebeched el dmu el kmo: “Alii. Aki meruul er tia el ureor el ngar er ngii er a beluulechad el rokir el merous er tia el siotaikeng. Me tiakid a siotaikeng er kau. E ngar er ngii a lmuut el betok el omesodel el ngar er a siotaikeng.” Mochotii a klemeriarreng er kau el kirel. Me sel morous er tia el siotaikeng er a Sebadong me a Sandei, e ngungil a modak a makesin el obengkel.