Blekeradel el Mengebkall er a Dios
1. Ngera uchul me a rechad a dongcheterir a Resioning er a Jehovah sel lebo er a ileakl el eru el sils el ongdibel?
1 Sel debo er a ileakl el eru el sils el ongdibel (district conventions), e ngbeot er a rechad el mo medengelkid el kmo kede mlong el kirel tia el ongdibel. Ngar er a betok el basio, e a rechad er a news a blechoel el ouchais er a buai el kirel aika el ongdibel er kid. Aike el hotel me a blil a blengur a blechoel el meseked a rudam me a rudos er ngii, me a rechad a sebechir el mesekid el ousbech a badge card er kid. Aika el ngariou a di bebil er a uleklatk el mo ngosukid el mengebkall er a Dios el oeak a ungil blekerdelel sel dengar er aike el basio el ngar er ngii a ileakl el eru el sils el ongdibel.—1 Pe. 2:12.
2. Ngmekerang e sebeched el mengebkall er a Dios el oeak a ungilbesul el biled sel dengar er a basio er a ileakl el eru el sils el ongdibel?
2 Ungilbesul el Bail: Sel doubail a ungilbesul el bail sel de bo er aika el ileakl el eru el sils el ongdibel a blechoel el rulleterir a rechad el omes er kid el mo mechas a rengrir. Engdi, a teletelel a doubail sel debo er a hotel, me a blil a blengur, me a kuk bebil er a basio a sebechel el klou a lerellii er a rolel a lomes er kid a rechad. Me alta ngdiak doubail a bail er a miting, engdi ngkirel ungilbesul a biled el diak di doubail a biled er a blai. A rechad el omes er kid a kirir el sebechir el mesang a klekakerous er kid me tirke el diak loumerang. (Rom 12:2) Me a lmuut el tang, ngkired el ousbech a badge card me bo el sebeched el ochotii el mo er a rechad tia el ongdibel er kid, e mo ousioning el mo er a rebebil, e dirrek el mo sebechir a rudam me a rudos el dongchid.
3. Ngmekerang a dolecholt a kllourreng me a ungil el omeruul?
3 Kllourreng me a Ungil el Omeruul: Ngar tia el taem el betok el chad a di melatk er a di tir e diak loreng a saul, e ngmera el dmeu a rengrir a rechad, el uai tirke el ngar er a hotel me a blil a blengur el omes er kid el olecholt a kllourreng me a ungil el omeruul. (2 Ti. 3:1-5) Me sel dongetmokl aike el mo kingelled me a lechub e sel dolai a dirk tilobed el babier me a lechub e ng video, e ngdiak el kired el melatk er a di kid e kede bai melatk er a rebebil. (1 Ko. 10:23, 24) A ta el chad el mle ketengel el mo er aika el meklou el ongdibel a millekoi er sera bo lemerek el kmo: “Ngdiak debedebek aike el cheldecheduch er sel sils, engdi a blekerdelir a Resioning a mera el mle klou a lerellii el kirek.”
4. Ngera me ngungil a dolatk el mo melenget a temed el olengeseu er a temel a ileakl el eru el sils el ongdibel?
4 Tirke el Kongei el Melenget a Temir el Oureor: A rechad a medengelterir a remera el Kristiano e le tir el kongei el melenget a temir el oureor. (Psa. 110:3) Kau ngsebechem el mo olengeseu er a temel a ileakl el eru el sils el ongdibel? Ngar er a ta el klou el ongdibel, e te bekord el 600 el rudam me a rudos a millenget a temir el mo mengetmokl er a basio el kirel tia el ongdibel. A rechad el uluureor er sel basio a millekoi el kmo: “Tiang a mera el mengasireng el tekoi! Ngmeringel er kemam el oumerang el kmo tirka el chad a di melenget a temir el oureor.” Kede mera semeriar el kirel aika el merael el mei el ileakl el eru me a edei el sils el ongdibel er kid er a rak er a 2013 me a techall el dobang el mo orrenges er a Dios e mo mosisechakl er ngii e dirrek el mo mengebkall er ngii.
[Baks el ngar er a 3 el llel]
Uleklatk er a Ileakl el Eru el Sils el Ongdibel er a 2013
◼ Temel a Prokuram: A Blil a Ongdibel a mengai a chesmerel er a 8:00 a.m. me a ongngak a mo omuchel er a 9:20 a.m er aika el eru el sils. Ngar tia el taem, e ngkired el mo er a kingelled me bo el sebechel el omuchel a prokuram el ngar er a ungil el rolel. A ulebongel el chelitakl me a nglunguuch a mo er ngii er a 4:50 p.m. er a Sebadong me a 3:35 p.m. er a Sandei.
◼ Kutmokl a Kingellir a Rebebil: Ngdi sebeched el mengetmokl a kingellir tirke el kiei el obengked me tirke el doltak er tir me a lechub e ngtirke el dosuub a Biblia el obengterir. A kingellir a remechuodel me a remechitechut a di mekesai, me nglocha mo diak el sebechir el dmak el dengchokl el obengterir a rechedal a telungalek er tir el rokui. Me a leuaisei, e ngungil a di debechei aika el kingall el kirir a remechuodel me a remechitechut me tirke el olengeseu er tir.—1 Ko. 13:5.
◼ Blengur er a Sueleb: Moutekangel el ngmai a sueleb er kau el me er sel basio er a kldibel me lak bo mtobed el mo omengur er a cheroid. Ngsebechem el ousbech er a kekerei el cooler el sebechel el mo er cheungel a kingall. A meklou el cooler me a ngii di el obebeu el klalo a diak el kired el ousbech er sel basio er a kldibel.
◼ Tenget: Ngsebeched el ochotii a omereng el saul er kid el kirel a oketmeklel tia el klou el ongdibel el oeak a dolenget el mo er a ureor er a beluulechad el rokir. A lsekum e ke melenget el ousbech er a check e ngkirem el luchesii el mo er a “Watch Tower.”
◼ Kar: A lsekum e ngngar er ngii a kar el kirem el melai, e mngai a ungil el ildisel e le ngdiak a kar er tia el basio er a kldibel. Ngdiak el kired el mengoit aike el orus el lousbech tirke el smecher el sukal er a blil a komi er a ongdibel.
◼ Blil a Blengur: Mongebkall er a ngklel a Jehovah el oeak a ungil el omerellem sel omngar er a blil a blengur. Moubail a ungilbesul bail el ochotii el kmo ke Kristiano. E becherei a tip a lsekum e ngsiukang er a beluu.
◼ Tirke el Sorir el Olengeseu: A ngii di el chad el soal el olengeseu a kirel el mo er sel Volunteer Service Department. A rengalek el ngariou a rekrir er a 16 a dirrek el sebechir el olengeseu el oeak a loureor el obengterir a rechad er a blirir me a lechub a ta er a klou el chad el lomekrael er tir.