Betok el Klengeltengat el Mla er a Jehovah
1. Kede mekerang e ngmai a klungioled er tia el kldibel er kid er chelecha el rak?
1 Ngar er tia el beluulechad er a Satan el dikea loltirakl er a tekingel a Dios, e a Jehovah a melemolem el melisiich er a rechedal. (Isa. 58:11) A ta el tekoi el lousbech er ngii a Jehovah el melisiich er kid a oeak sel klou el kldibel er kid er a bek el rak. Me chelechang el lolekedang tia el kldibel er kid, e ngmekerang a dongetmokl er kid el mo melai a klemedengei el kirel a Dios e dirrek el mo melisiich er a rebebil?—Osi. 21:5.
2. Ngera el tekoi a dirk kired el mengetmokl?
2 Me a lsekum e ngdirkak mketmeklau, e chelechang e ngungil el taem el kirem el omes er a blekerdelel a klengar er kau me a temem er a ureor e kutmokl a ruoll el tekoi me bo el sebechem el mo er tia eru el sils el ongdibel. Kau ke medengelii a klemengetel a taem el mousbech er ngii el omekall el mo er a basio er a kldibel me bo el sebechem el mong e nguu a kingellem er a uchei er a lomuchel a prokuram? Ngkmal soad el mo ngmai aike el rokui el kmal ungil el suobel el Jehovah a mla kutmokl el kired! (Isa. 65:13, 14) Ke mla kutmokl a rolel a olidiuul el bo mousbech?
3. Ngera el uleklatk a ngosukid me a telungalek er kid el mo ngmai a mui el klungioled er a prokuram?
3 Ngera sebechel el ngosukau el mo kerekikl el orrenges? A lsebechel, e bo lungil a cheliuem sel leklebesei. E momes er ngike el mengedecheduch. E monguiu a bek el bades el medung. Moluches a mekedeb el tekoi el soam. Ngungil a lsekum a rebek el telungalek a dmak el dengchokl me ngsebechir a ruungalek el ngosuterir a rengelekir el mo kerekikl el orrenges. (Osi. 29:15) Nglocha sebechemiu el ongalek el mesaod aike el tekoi el msiluub sel obo er a blimiu. Me a telungalek a lolemolem el melebedebek a tekoi el lesiluub er a uriul, e ngungil a omosaod aike el suobel el sebechiu el oltaut er a chelsel a klengar er kemiu er a temel a Omengull el Telungalek.
4. Kede mekerang e ngosuterir a rebebil el mo ngmai a klungiolir er tia el eru el sils el ongdibel?
4 Mngesuterir a Rebebil el Mo Ngmai a Klungiolir: Ngsoad a rebebil a lengai a klungiolir el dirrek. Te ngar er ngii a rechudelang el chad me a rebebil el ngar er a ongdibel el ousbech a ngeso el mo er tia el kldibel? Me kau ngsebechem el mo olengeseu er tir? (1 Jn. 3:17, 18) A remechuodel, el ileakl a rudam el oungerachel er a mekekerei el cheldellir a rechad er a ongdibel, a kirir el mo biusech a mederir er tirke el ousbech a ngeso.
5. Ngmekerang a bo dorous aike el siotaikeng el kirel a eru el sils el ongdibel? (Momes er a baks.)
5 Ngdi uai a ngar er a mong, e a bek el edei el sandei er uchei er a lomuchel a meklou el ongdibel er kid, e kede mo merous a siotaikeng el mengemedaol er a rechad el me obengked. A bek el ongdibel a kirir el rullii a turrekong er tir el mo merous aike el siotaikeng el lengilai e mo melasem el oldingel er a belurir el rokir. A lsekum e ngngar er ngii a siotaikeng el mlo medechel e moutekangel el ngmai el mei er a basio er a kldibel me bo el sebechem el ousbech er ngii sel mongedecheduch er a rechad. A komakai el omesodel tiang a mo soadel er a prokuram er a Sebadong. Aike el medechel el siotaikeng el diak bo lousbech a telungalek er kau a sebechem el ngmai el msang a ta er a odam el olengeseu sel bo msiseb er tia el basio er a kldibel. Mketmeklii a ta er a siotaikeng e le ke mo ousbech er ngii er sel ulebongel el cheldecheduch er a Sandei.
6. Ngmekerang a dolecholt a ungil el omerelled er a temel a eru el sils el ongdibel?
6 A Ungil el Omerelled a Uchul a Omelisiich: Chelecha el taem el betok el chad a “betik a rengrir ra di tir” e diak lolatk a rengrir a rebebil, e ngmera el melisiich er kid sel dobengterir a rekldemed el Kristiano el tir a melasem el olecholt a ungil el omerellir! (2 Ti. 3:2) Kede olecholt a ungil el omerelled el oeak a dechelellakl e lungil a blekerdeled sel be desiseb er a blil ongdibel er a 8:00 a.m. e deketmokl a kingellir tirke el dedak el kiei me a lechub e ngtirke el dedak el ngar er a mlai me a lechub e ngtirke el dosuub a Biblia el obengterir. E mo oltirakl a tekingel ngike el odam el melekoi el kmo ngmla mo kired el mo dengchokl er a kingelled e dorrenges a ongngak el melai er a chesmerel a prokuram er kid. Ngdirrek el ungil a domekoad a cell phone me a pager er kid me lak bo longesang er a rebebil. Kede olecholt a ungil el blekerdeled a lak dongedecheduch e dousbech a cell phone er kid e domengur e domibais er a ikrel a blil a ongdibel er a temel a prokuram.
7. Ngmekerang e sebeched el kasisiich er a delongeled sel dobengterir a rudam er kid?
7 Ungil el Klausechelei: Aika el eru el sils el ongdibel a meskid a techelled el mo oldeu a rengud er tia el kltarreng el dobang er a delongeled kid me a rudam me a rudos er kid. (Psa. 133:1-3) Molasem el outkeu er a rebetok el rudam me a rudos me bo el sebechem el mo medengelterir a rekuk bebil er a rebeches el chad el mlo sebechir el mei er tia el kldibel. (2 Ko. 6:13) Ngungil a omrellii a turrekong er kau el mo medengelii a ta el beches el chad me a lechub e ngtelungalek er a bek el sils. A temel a blengur er a sueleb a meskid a techelled el mo otutii tia el turrekong er kid. Mngai a kelem el mei me bo el sebechem el omengur el teloi er a rebebil e mdak el chadecheduch e mkasisiich, me lak mtobed el mo mechar a kelem me a lechub e bo momengur er a blil a blengur. A omoruul el uaisei, e ngsebechem el mo medengelterir a rebeches el chad e mo omak a kmes el deleuill er a delongeliu.
8. Ngera me ngkired el kongei el mo olengeseu el oureor er a temel a eru el sils el ongdibel, e mekerang a doruul el uaisei?
8 Ngkmal uchul a omelisiich me a ongelaod sel doureor el obengterir a rekldemed er a klaumerang! Kau ke kongei el mo olengeseu er a rudam el meruul a ureor er a chelsel a ongdibel? (Psa. 110:3) A lsekum e ngdiak a ulterekokl el urerem, e moutekangel el mo mesa ngike el odam el oungerachel er a Volunteer Service Department. A betok el chim a rullii a ureor el mo kebekakl e mo uchul a deurreng.
9. Ngera me ngkired el mo kerekikl er a omerelled me a teletelel a doubail er a temel a eru el sils el ongdibel er kid?
9 A Omerelled a Melisiich er a Rebebil: Kid a Sioning er a Jehovah er a bek el taem, el diak el di el sel temel a prokuram er a klou el ongdibel er kid e lemerekong. Tirke el omes er kid er a temel a eru el sils el ongdibel er kid a kirir el mo sebechir el mesa klekakerous er a delongeled kid me tirke el diak el Sioning. (1 Pe. 2:12) A biled me a omengetmeklel a bedenged er sel temel a klou el ongdibel me sel dengar er a blil a blengur a kirel el mengebkall er a Jehovah. (1 Ti. 2:9, 10) Ngungil a debecherei a tip sel dengar er a blil a blengur a lsekum e ngsiukang er a beluu. A lapel badge el bereked er a biled a ochotid el kmo kede Sioning er a Jehovah. Tia sebechel meskid a techelled el mo ouchais er a rebebil el kirel a eru el sils el ongdibel er kid me a lmuut el bebil el tekoi el kirel a klemerang.
10. Ngera el tekoi el dilubech a meketeklii a ungil el ocholt el sebechel el mo er ngii el ungil el omerelled a uchul?
10 Ngera osengir a rebebil el kirel a ungil el omerelled sel temel a meklou el ongdibel er kid? A doltirakl er a chais el tilobed er a simbung, e a merreder er sel basio el mla er ngii a klou el ongdibel er ngii a dilu el kmo: “A rechad a kmal ungil a blekerdelir. Aki kmal semeriar el outkeu er tir el mei er tiang er a bek el rak.” Tia el mlo merek el rak, e a ta el chad el diak el Sioning a urridii a chidbengel er a hotel el lekiliei er ngii a Resioning. Tia el chidib me aike el rokui el ngar er a chelsel a mloluut el mo er a merreder er a hotel. Me ngike el merreder er a hotel a dilu er ngika el ouklalo er a chidib el kmo: “Ke mera el ngeltengat e le tia el hotel a di mui er a Resioning er a Jehovah el kiei er tiang e mo er a klou el ongdibel er tir. Oleko Resioning a dimlak el ngar tiang, e ngdimlak el moluut a chidbengem.”
11. Chelecha el lolekedang sel klou el ongdibel er kid, e ngerang a turrekong er kau e ngera uchul?
11 Aika el meklou el ongdibel er chelecha el rak a di olekedang. A klou el taem me a ureor a mlechoit el mo mengetmokl er a prokuram me tia el basio er a kldibel. Mrellii a turrekong er kau el mo teloi er tia el kldibel el rokir me bo el sebechem el ngmai aike el bla leketmokl a Jehovah me a cheldebechellel el kirem. Bo lulterekokl a rengum el mo melisiich er a rebebil el oeak a ungil el blekerdelem me a ungil el omerellem. E seikid e kau me a rebebil a mo medengelii a belkul a tekingel a ta er a odos er kid el milluches el kmo: “Tia el klou el ongdibel a mlo uchul a klou el deuil a renguk!”
[Blurb el ngar er a 4 el llel]
Ngdi uai a ngar er a mong, e a bek el edei el sandei er uchei er a lomuchel a meklou el ongdibel er kid, e kede mo merous a siotaikeng el mengemedaol er a rechad el me obengked
[Blurb el ngar er a 6 el llel]
A biled me a omengetmeklel a bedenged er sel temel a klou el ongdibel me sel dengar er a blil a blengur a kirel el mengebkall er a Jehovah
[Blurb el ngar er a 7 el llel]
Bo lulterekokl a rengum el mo melisiich er a rebebil el oeak a ungil el blekerdelem me a ungil el omerellem
[Baks el ngar er a 4-7 el llel]
Uleklatk el kirel a Meklou el Ongdibel er a Rak er a 2011
◼ Temel a Prokuram: A prokuram a mo omuchel er a 9:20 a.m. A chesimer a mengai a chesmerel er a 8:00 a.m. Me ngike el odam sel ledu el kmo ngmla omuchel a ongngak, e kid el rokui a kired el mo smiik a kingelled e mo dengchokl e mo chelellakl el orrenges.
◼ Kutmokl a Kingellir a Rebebil: Ngdi sebeched el mengetmokl a kingellir tirke el kiei el obengked me a lechub e ngtirke el obengked el ngar er a mlid me a lechub e ngtirke el chad el dosuub a Biblia el obengterir.—1 Ko. 13:5.
◼ Blengur er a Sueleb: Moutekangel el ngmai a sueleb er kau el me er sel basio er a kldibel me lak bo mtobed el mo omengur er a cheroid. Ngsebechem el ousbech er a kekerei el cooler el sebechel el mo er a cheungel a kingall. A meklou el cooler me a obebeu el blil a ilumel me a lechub e ngkall a diak el kired el ousbech er sel basio er a kldibel.
◼ Omelenget: Ngsebeched el ochotii a omereng el saul er kid el kirel a oketmeklel a meklou el ongdibel el oeak a omelenget el mo er a ureor er a beluulechad el rokir, el ngar er sel basio er a klou el ongdibel. Me a lsekum e ke melenget el ousbech a check e ngkirem el luchesii el mo er a “Christian Congregation of Jehovah’s Witnesses.”
◼ Accident me a Tautediu el Blekeradel: A lsekum e ngmo duubech a tautediu el blekeradel el ngar er a basio er a kldibel, e moutekangel el mo ouchais er a odam el olengeseu el kmeed er kau, e ngii a mereched el mo ouchais er a chad er a First Aid me bo el sebechel el mesa sel blekeradel e lolengeseu. A lsekum e ngusbechall, e ngike el chad er a first aid a mo omekedong er a 911. Tiang a mo uchul e ngdiak el bo el betok a okedong el mo er sel obis.
◼ Kar: A lsekum e ngngar er ngii a kar el kirem el melai, e mngai a ungil el ildisel e le ngdiak a kar er tia el basio er a kldibel.
◼ Please Follow Up (S-43) el Babier: A Please Follow Up el babier a dousbech el meluches a tekoi el kirel a chad el ullecholt a klemeriarreng el kirel a klemerang er a temel a kldibel. A rechad el mla mo oldingel a obliil a kirir el olab a tang me a lechub e ngteblo er aika el babier sel lemei er a kldibel. Sel bla mrekir tia el babier e mnguu el mo er a Book Room me a lechub e ke nguu el msa melechesel a ongdibel er kau.—Momes er a November 2009 el Omesiunged el kirel a Renged er a 4 el llel.
◼ Blil a Blengur: Mongebkall er a ngklel a Jehovah el oeak a ungil el omerellem sel omngar er a blil a blengur. E becherei a tip a lsekum e ngsiukang er a beluu.
◼ Melenget el kirel a Omesiou: A deurreng el bo denguu e le kid el mlo er tia el klou el kldibel a lmuut el mo klou a lsekum e kede kongei el mo olengeseu er aike el ureor el mo er ngii. (Rellir 20:35) Me a ngii di el chad el soal el olengeseu a kirel el mo er sel Volunteer Service Department. A rengalek el ngariou a rekrir er a 16 a dirrek el sebechir el olengeseu el oeak a loureor el obengterir a rechad er a blirir me a lechub a ta er a klou el chad el lomekrael er tir.
[Baks el ngar er a 5 el llel]
Ngmekerang a Bo Dorous er a Siotaikeng?
Ngsoad el di mengedeb a cheldechedechad me bo el sebeched el rokir a basio el doureor er ngii. Ngsebeched el dmu el kmo: “Alii. Aki meruul er tia el ureor el ngar er ngii er a beluulechad el rokir el merous er tia el siotaikeng. Me tiakid a siotaikeng er kau. E ngar er ngii a omesodel el ngar er a siotaikeng.” A ikrel tia el siotaikeng a olechau a osenged me ngsebechem el nguu el msa chad er a blai me bo el sebechel el mesang. Mochotii a klemeriarreng er kau el kirel. Me sel morous er tia el siotaikeng er a Sebadong me a Sandei, e ngungil a modak a magazine el obengkel.