Dolemolem el Melisiich er a Klaumerang er Kid el Okiu a Omesubed el Di Kid el Tang
A omesubel a Biblia a sebechel el smisichid el kirel a tekingel a Dios, e dirrek el smisichii a klaumerang er kid el uai a ungil el omengeled el sebechel el mo uchul a klisichel a bedenged. Ngdiak el sebeched el mo mesisiich er a tekingel a Dios a lsekum e ngdiak a temed el mesuub er a Biblia el di kid el tang. Me a lmuut el tang, a ungil el rolel a omesubed a sebechel el rullid me ngmelemolem el mesisiich a klaumerang er kid, e dirrek el meskid a klisiched me ngmo sebeched el oltngakl a omelsemai er a Satan el kirel a odechelakl, tekoi er a klechad, me a ngibes el kirel a mekngit el tekoi.—Efe. 6:16.
KLUNGIOLEL A DOSUUB EL DI KID EL TANG
A omesubed el di kid el tang a mekurulii a klemedengei er kid er a Bades. Ngngosukid el mekurulii a mesisiich el klaumerang er kid, e dirrek el mo ungil el medengelii a klungel me a delechel a bltkil a rengul a Kristus. (Rom 11:33; Efe. 3:16-19) Me tia el klaumerang, el ngii a telengtengil a rodech er a oureor el klisichel a Dios, a mo ua mesisiich el klisiich er a chelsel a klengar er kid. Me seikid e kede mo ngodechii a blekerdelel a klengar er kid, e dirrek el mo kiei el ua chad el mla mukeroul er a tekingel a Dios. (Gal. 5:22, 23; Efe. 4:24) Me kede mocha meduch el outekangel a mondai el dechelebangel. Ngmo sebeched el omes el engelakl er aike el chelitecheterir a rebebil, e dirrek el mo melisiich er a budech me a kltarreng er a chelsel a ongdibel. (Kol. 3:10, 13, 14) Me aika el rokui el tekoi a sebechel el mo uchul a omelisiich el mei er kid me a rebebil.
A omesubed el di kid el tang a dirrek el rullid el mo meduch el olengeseu er a resemeriar el debetik er tir sel doldingel a obliil. Ngrullid el mo kltmokl el ‘smodii a blkul sel omelatk el ngara chelsed er tirikel mengeriil chomesaod.’ (1 Pe. 3:15) Me ngdi ua ungil el Kerebai er kid el Kristus Jesus, e ngmo sebeched el mengedecheduch el ua chad el ngar er ngii a deruchellel, el melemalt a klemedengei er kid el kirel a moktek er a Jehovah, e mo sebeched el bleketakl el ocholt a osisechakl el medung er a Bades.—Mt. 7:28, 29.
NGMEKERANG E OINGERANG E KEDE MESUUB
A moktek er kid a diak di donguiu aika el babier el dengai e lemerekong. Kede ousbech er a klou el taem el melebedebek aike el donguiu. Di lekau el oker el kmo: Ngera ngrullii el kirek tia el suobel? Ngera ngochotii el kirel a Jehovah me a blekerdelel me a rolel a loruul a tekoi? Ngmekerang a kuusbech aika el tekoi el lolengeseu er a rebebil? Ngera ngmesaod el ngii a dochelii a klemedengei er ngak er tia el suobel? Me sel dorriter a suobel el osiik a nger er a kerid, e ngsebechel el mekurulii a klemedengei er kid er aika el suobel, me kede mo medengelii a cherrengelel a klemerang el losaod er ngii. Tiakid a rolel e kede nguu a sekutaberreng.—Osi. 4:5.
Ngkired el oterekokl a temel a omesubed e melasem el oltirakl er ngii me bo el sebeched el oterekeklii a ungil el temel a omesuub. (Momekesiu er a Filipi 3:16.) A rebebil a metik er tia el tekoi el meringel a loruul er ngii, engdi ngmo beot a lsekum e te blechoel el meruul er ngii. Ngdirrek el mo uchul a omeksaul! Nglocha sebechem el mesuub er a uchei er a obo mechiuaiu. A rebebil a omkokl a letutau el meruul er ngii e le ngdiak a cherrodech. Ngdirrek el sebechem el ousbech er a temel a ulengull er a sueleb el mesuub. Me a ngii di el taem el ungil er kau, e msikii a ungil el basio el sebechem el mo er ngii e mosuub. Tiang a sebechel el rullau me ke mo ungil el mesuub el diak a mengesang er kau, e dirrek el mo ungil el melebedebek a tekoi, me ngsebechem el melemolem el merael er a melemalt el rael.—Osi. 15:28.
A SUOBEL EL KIRED EL MESUUB
A omengetmekled el kirel aike el eim el miting er kid a kirel el kot el klou a ultutelel el tekoi er a temel a omesubed el di kid el tang. Me nguldimukl er a omesubem er a Ongkerongel me a dirrek el Omesubel a Biblia el Ongdibel, e kau ke dirrek el melai a klungiolem er aike el kall el meketmokl el okiu a Skuul el kirel a Urerel a Dios? Ngdirrek el kirem el melemolem el menguiu er a omengiuel a Biblia, e mengoit a taem el merriter a meklou a ultutelel el tekoi el ngar er a chelsel aike el babier el loltobed a Society. A lsekum e ke mesuub aike el 2 me a 3 el cheldecheduch er a uchei, e ke mo semeriar el orrenges sel lemotobed aika el suobel. Me aika el meklou a ultutelel el ulekrael er a Biblia a mekurulii a klemedengei er kau.
A omengetmokl el kirel a Miting el kirel a Berkel a Klumech a diak el lousbech er a klou el taem el kirel a omesuub, engdi tiang a dirrek el kirel el mo uldimukl er aike el temel a omesubed. A lsekum e ke ousbech a di sesei el bung er a bek el sandei el mesuub aike el suobel el ngar er a Omesiunged el Kirel a Renged, e ngsebechel el lmuut el smisichau, e dirrek el ngosukau el mo meduch el mesaod er a klaumerang er kau el mo er a rebebil er sel taem el moldingel a obliil.
A tabesul el rolel a omesuub el di kau el tang a sebechel el ngosukau e ‘sisichii a chelsem el chad.’ (Efe. 3:16) Nguaisei, a mesisiich el klaumerang, a mekurulii a bltikerreng el mo er a Jehovah me a Kristus Jesus, e kilungii a klemedengei er kid, e dirrek el lmuut el toketekii a duch er kid el kirel a omesiunged, e aika el klungiaol me a lmuut el bebil a rullii a omesubed el di kid el tang el mo er ngii a ultutelel. Me kau, ngngar ngii a ungil e ulterekokl el temem el mesuub el di kau el tang?