Domekeroul er a Kmes el Deleuill er Kid me a Jehovah
1. Ngera me ngklou a ultutelel a domekeroul er a kmes el deleuill er kid me a Jehovah?
1 A doleketek er a kmes el deleuill er kid me a Jehovah e ngousbech a klou el ureor. Ngousbech er a lmuut el betok er a di doruul er a urered a Rekristiano. A lsekum ngdiak deblechoel el mengedecheduch er a Jehovah, e ngsebechel el mo uai a ta er a kmeed el sechelid el mla mo diak dongedecheduch er ngii. (Och. 2:4) Me bo dorriter el kmo ngmekerang a omesubel a Biblia me a nglunguuch e sebechel el ngosukid el omekeroul er a kmes el deleuill er kid me a Jehovah.—Psa. 25:14.
2. Ngua ngera el rolel a omesubed el di kid el tang a mo ngosukid el mo olekeed er kid er a Dios?
2 Nglunguuch me a Omelebedebek a Klou a Ultutelel: A omesuub el di kid el tang el melisiich er a rengud a uldimukl er a lmuut el betok er a di de underline aike el meklou a ultutelel el tekoi er a suobel e domes aike el bades. Ngkired el omtab el kmo ngera ngochotii sel suobel el kirel a llechul, blekerdelel me a rolel a loruul a tekoi a Jehovah. (Exo. 33:13) Sel bo dodengei aike el tekingel a Jehovah e ngmelisiich er a rengud e mekrolid el mo omdasu el kirel a klengar er kid. (Psa. 119:35, 111) A omesubed el di kid el tang a kired el meruul er ngii el mo olekeed er kid er a Jehovah. (Jak. 4:8) A dmolech el omesuub a ousbech a klou el taem me a ungil el basio e dirrek el ousbech er a ducherreng. (Dan. 6:10) Me alta ke kmal mechesang, engdi kau ke mla kutmokl a temem er a bek el sils el melebedebek el kirel aike el mengasireng el blekerdelel a Jehovah?—Psa. 119:147, 148; 143:5.
3. Ngmekerang a nglunguuch el obengkel a omesubed el di kid el tang e ngosukid el omekeroul er a kmes el deleuill er kid me a Jehovah?
3 A nglunguuch a kmal klou a ultutelel el kirel a ungil el rolel a omesubed el di kid el tang. A lsoad a klemerang er a Biblia a bo lolisiich er a rengud e lerellid el mo ‘mesiou ra Dios el oba chomeluu ma dakd,’ e kede ousbech er a oureor el klisichel a Dios. (Heb. 12:28) Me a leuaisei, e ngkired el omuchel a omesubed el olengit er a Jehovah el kirel a oureor el klisichel. (Mt. 5:3) Sel domtab a Bades e dousbech aike el babier el lebeskid a cheldebechelel a Jehovah, e kede kongei er a Jehovah me ngomekrael er kid. (Psa. 62:8) A dosuub el uaisei e ngrolel a omengull el olecholt er a omeluu er kid el mo er a Jehovah e melisiich a deleuill er kid me ngii.—Jud. 20, 21.
4. Ngera me ngklou a ultutelel a dolebedebek a Tekingel a Dios er a bek el sils?
4 Nguai a bek el deleuill, e ngkired el blechoel el melisiich er a deleuill er kid me a Jehovah me bo el sebechel el merael el mo mesisiich er a klemengetel a klengar er kid. Me a leuaisei, e bo el sebeched el ousbech a techall er a bek el sils el olekeed er kid er a Dios, e dodengei el kmo, ngii me ngdirrek el mo olekeed er ngii er kid.—Psa. 1:2, 3; Efe. 5:15, 16.