Bo Mungil el Ousbech Aike el Makesin er Kid

Ngsebeched el olengeseu er a lmuut el betok el melemalt a rengrir el mo ngmai a klungiolir er A Ongkerongel? Ochoi, ngkmal sebeched, a lsekum e kede mo ungil el ousbech aika el makesin. Ngera mo ngosukid? Molatk aika el ulekrael:

◼ Monguiu aika el Makesin: Monguiu a derta el A Ongkerongel! Sel monguiu a suobel e di lekau el oker el kmo, ‘Ngtechang a mo semeriar er tia el suobel, ngchedil, ngsechal, ngngeasek?’ Ngar er a chelsel a babilengem e mketmeklii a tang me a lechub e ngeru el tekoi el sebechem el ousbech el merous aika el makesin. E a uriul e mngiltii a ungil el rolel e ngsebechem el lousbech er a kedeb el omesodel a suobel el mo omeksemeriar er a chad.

◼ Ngsebeched el Merous a Lmuut el Betok el Makesin?: A derta el ongdibel er chelechang a melai a lmuut el betok el makesin el A Ongkerongel er aike el lullai er a ngar er a mong. Ngsebechem el kilungii a urerem er a omerusel aika el makesin?

◼ Temel a Omerusel a Makesin: A betok el ongdibel a mla oterekeklii a ta el sils el kirel a omerusel a makesin. Kau ngsebechem el oldingel er seikid el sils el merous a makesin? A lsekum e ngdiak el sebechem, e molasem el ousbech a bebil er a temem el merous a makesin sel moldingel a obliil me sel omluut el mo omes er tirke el mle semeriar.

◼ Bo Blechoel el Oba A Ongkerongel: Mngai a makesin el locha er a tim sel omngar er a omerael me sel bo er a stoang. Morous el mo er a rechad er a urerem, retonari er kau, me tirke el omdak el ngar er a skuul me a resensei. A rebebil el ngeasek a blechoel el lolab el mo er a skuul a makesin el ngar er ngii a suobel el lesemeriar er ngii a resensei me a rengalek er a skuul. Ngungil a omolab a makesin sel moruul a chelsengum, e sel bo merek e ngsebechem el mesterir tirke el mulengedecheduch er tir. A rebetok er kid a omechar a cheluchul a mlid; me nglocha sebechem el omesterir tirke el omelechang a cheluchul a mlim a makesin. Ngdirrek el ungil a morous a makesin sel loldingel er kau a rechedam, me sel omngar er a taxi, me sel mongiil er a temem el mo omes er a toktang. Ngsebechem el lotkii a kuk ta er a ungil el techall el mo merous a makesin?

A Ongkerongel a diak bo lak a belkul, alta e ngmla engelakl a eru el buil er a lemeketmokl e dirkak dorous er ngii. A suobel el ngar er a chelsel a diak bo lak a ultutelel er a cherengel a taem. Me ngdiak el kired el omechei me a lechub e kede obes aike el meketeketang el makesin, e ngbai kired el mo blak a rengud el merous el mo er a rechad el semeriar el menguiu. A ta er a rolel a doruul er tiang a oeak a debechei aika el meketeketang el makesin er aike el blai el diak a rechad er ngii.