Omuchel a Omesubel a Biblia el Obengterir Tirke el Melai a Magazine er Kid
1. Ngera me a cheldebechelel a Jehovah a meketeketang er a lolisiich er a re publisher el mo oldingel er a rechad e omesterir a magazine?
1 A rebetok el chad a kora diak el sorir el mesuub a Biblia el obengked, engdi te semeriar el menguiu aike el magazine er kid. Sei a uchul me a cheldebechelel a Jehovah a meketeketang er a lolisiich er a re publisher el mo oldingel er a rechad e omesterir a magazine. A rechad sel leblechoel el menguiu aika el magazine er kid, e te blechoel el mo sorir el mo medengelii a Tekingel a Dios. (1 Pe. 2:2) Cherengel a taem, e a tekoi el longuiu er ngii a locha mo sorir, el mo uchul e te kongei el mo mesuub er a Biblia.
2. Kede mekerang a dolisiich er sel klemeriarreng el loba tirke el melai a magazine er kid?
2 ‘Melubs’ a Tane er a Klemerang: Ngungil a lak di bechei a magazine e morael, ke bai melasem el mengedecheduch er a chad er a blai e mekurulii a ungil el deleuill er kemiu el terung. Tiang a mo ngosukau el mo medengelii a blekerdelel a klengar er ngii, tekoi el lesemeriar er ngii, me a klaumerang er ngii, el mo ngosukau el mengedecheduch el oba sekutaberreng. (Osi. 16:23) Mongetmokl el kirel a dersta el odngelem. E a bo el sebechem, e mtelkib el mesaod er a tekoi me a bades el ngar er a chelsel a magazine el melubs a ngii di el tane er a klemerang el ngar er a rengul. (1 Ko. 3:6) Mlechesii sel sils er a dersta el taem el blo moldingel, me sel babier el bilecherei, me a suobel me a bades el mulsaod er ngii.
3. Ngkirel el mo ua ngera ildisel a taem el mluut el mo oldingel er tirke el melai a magazine er kid?
3 Ngua Ngera Ildisel a Taem el Mluut el Mong? Ngkirem el lmuut el mong er a ta el taem er a chelsel a ta el buil el mo mesterir aike el beches el magazine. Engdi, ngultuil er a blekerdelel a klengar er kau me sel klemeriarreng er a chad, e ngsebechem el ngiltii el mo blechoel el oldingel er ngii. El ua tiang, a ta el sandei me a lechub a eru el sandei er a uriul er a bla bechei a magazine e ngsebechem el lmuut el mong e melekoi el kmo, “Ak di mlei el telkib e le ngsoak el ochotii a ta el tekoi el ngar er aike el magazine el mngilai.” Tiang a mo rullii el mo soal el menguiu er seikid el suobel. Me a lsekum e ngmla chiuii, e ngsebechem el oker er a uldesuel el kirel tia el suobel e mo telkib el mesaod er ngii. Me a lsekum a chad a soal el menguiu aika el babilenged, e ngsebechem el lmuut el mong e msang a tract, brochure, me a lechub a babier el dorous er ngii er seikid el buil.
4. A lebebil er a taem, e ngera el tekoi a sebeched el rullii me bo dodengei el kmo tirke el melai a magazine te kongei el kirel a omesubel a Biblia me a lechub e ngdiak?
4 Lak mongiil er a chad er a blai me bo lolengit er kau el kirel a omesuub. Mousbech er tia el techall el mobang. Me a lsekum e ngmla oltngakl er a omesubel a Biblia er a ngar a mong, e a lebebil er a taem, e ngsebechem el ochotii sel “A Nger er Aike el Ker er a Biblia” el ngar er A Ongkerongel e mesa el kmo ngkongei el mo mesaod er ngii el obengkem me a lechub e ngdiak. Alta e ngmo sebechem el omuchel a omesuub el ngar er a medal a tuangel er a blil. Engdi a lsekum e ngdiak el sebechem el omuchel a omesuub, e ngsebechem el melemolem el omsang a magazine el mo melisiich er sel klemeriarreng er ngii.