Lmuut el Mo Ungil a Duch er Kid el Ngar er a Omesiunged—Molemolem el Omes er Tirke el Melai a Magazine

A Uchul Me Ngklou a Ultutelel: A rebetok el chad el sorir el menguiu a magazine er kid a diak el sorir el mesuub er a Biblia el obengked. Alta te oumerang er a klechelid el lengar er ngii, me a lechub e te omdasu el kmo ngdiak a temir el mesuub. Engdi sel leblechoel el menguiu a magazine er kid, e ngsebechel mukeroul a urungulir er a Tekingel a Dios. (1 Pe. 2:⁠2) Nglocha ngar er ngii a ileakl el suobel el sebechel el remutech a rengrir, me a lechub e ngkuk di mengodech a blekerdelel a klengar er tir. Me a deblechoel el oldingel er tir er a chelsel a kedeb el taem a rulleterir el mo sebechir el mengedecheduch e ngosukid el mo medengei aike el tekoi el lesemeriar me a lechub e ngsuebek a rengrir er ngii. E a cherengel a taem, e ngsebechel omuchel a omesubel a Biblia.

Rolel a Moruul er Ngii:

A bek el buil, e mketmeklii a taem el oba beches el Ongkerongel el mo msa ngika el chad. Ngdirrek el sebechem el mo oldingel er ngii a lebebil er a taem me bo el sebechem el menglou er a klemeriarreng er ngii er a omengiuel er a suobel el mengai er a magazine el bilecherei er a uchei me a lechub e ke kuk msang sel babier el dorous er ngii er sel buil. Mketmokl a ungil el rekord.—Momes er a January 2014 el Omesiunged el Kirel a Renged, er a 3 el llel.
Mketmeklau sel bek el bo moldingel er ngii. Ngsebechem el mechelii a cheldecheduch el obengkel me bo mokurulii a ungil el deleuill er a delongeliu me bo el semeriar er a bai di bo mo msang a magazine.
Bo mkerekikl el omes a techall el mo omuchel a omesubel a Biblia. A lsekum a chad el melai a magazine a oker er kau el kmo ngerang melekoi a Biblia el kirel a ta er a suobel, e mnguu a babier el dousbech er ngii el mesuub a Biblia el msang el ngar er ngii a nger el kirel tia el keril e mdak el mesaod er ngii. E a uchei er a omorael, e bsang a ta er a ker el bo mosaod er ngii sel omluut el mo omes er ngii. A lsekum e ngar er ngii a blechebechel a omesubiu er a bek el blsechel el ousbech er a Biblia me a lechub a ta er aika el babilenged, e ngmo sebechem el omechur er ngii el ta er a chad el mosuub el obengkel. Ngar er ngii a ta el bla bsa chad er a blai a Ungil Chais el babier e ochotii a kedeb el rolel a omesubel a Biblia? Ke mla ocholt er ngii aike el video el Ngera Me Ngkirem el Mesuub er a Biblia? me a Ngera Meketmokl er a Omesubel a Biblia? A lsekum ngii el chad a dimlak el soal el mesuub er a ngar er a mong, engdi blekeradel a sebechel el mengodech. Nglocha sebechem el lmuut el melasem el mo meruul er ngii?

Molasem er Tiang er Chelecha el Buil:

Mluches a ngklir tirke el chad el sebechir el melemolem el melai a magazine. E sel obong, e besterir a beches el magazine, e mouchais er tir el kmo ke mo omesterir a magazine er sel ongingil el buil.